1 Peter 2

Lo̤htûpwa̤ ta khlilè cahtǐ

1Hǐnudě, sò̌khěkhû̌khwèpe pûma̤ kò ma̤. Bò꤮ ta̤lòhǎlòho, ta̤jîcǒjîtè̤, ta̤sò̌khě, ta̤dǒmi̤shǐyo̤ sî toǒnu tobǎ ǒpe tò̤. 2– 3Sî sî̌yabǎhto Cǒmara abwǐasîrî hǒ. Hǐnudě htûhtò̌ sǒsǒkû̌ lǒkho pwǐ phijaû̌phû̌ ǒsa dě a hǒwi̤sò̌o mè̤mè̤̌ nṳ̂shi sû̌sò̌ tokhonu toǒ nî̌꤮. Dě sî hǒwi̤sò̌o nṳ̂shi acè̌ hǐnu akhû̌akhî, sî dû̌pwa̤sî̌yahtò̌ to̤htû̌ ta̤ma̤lû̌htò̌ge lǒhtò̌behtò̌nu pě. ^a

Lo̤htûpwa̤

4Hè lǒkho dě Běcǎ ǒ bǎo, a mî̌ alò̤ta lo̤htûpwa̤ tama htě kò gènè̤ nû̌û ta ale̤apwî̤ ǒtò̤. Kò wîkè nû̌û pwǎ̤tadě Cǒmara wû̌lǎphî̌htò̌ gesǒ nû̌û dě ale̤dû̌pwî̤htû mè̤mè̤̌ nû̌ûya. 5Sî htǒotoǒnu asǒsǒta lo̤htûpwa̤ toǒ hǒ. Cǒmara noǎ lo̤ htě a mî̌ sîhtǒo dě a glè ma̤htò̌ hǐ sû̌sò̌cahtǐ tama. Sî ma̤ta̤ dě hǐkû htǒonu asǒsǒta pwa̤lṳhtò̌ta̤ cahtǐ toǒnu pě. Htohǒtò̤ sî lṳhtò̌ ta̤lṳ dě Cǒmara a ǒ sû̌sò̌cahtǐ tokho toǒ pě. Ye̤shǔkhrî̌stu akhû̌akhî, Cǒmara phî̌shǔ sî ta̤lṳ htǒotoǒ pě. 6Ma̤tè̤hî̌dě lî̤cahtǐkû hî̌,

“He wû̌lǎphî̌ lo̤ le̤dû̌pwî̤htû tama dě he bè̌lò̤ yǎta la̤ma̤měma̤gle hǐkòkhǒ dě Sǐowî̤kû. Kòyò tapwa̤pwa̤ a yṳǎ Běcǎ htǒonu a sòwò̤ dǐkhò̌꤮ tò̤.” ^b

7Dě lo̤ htǒotamanu, ale̤dû̌pwî̤htû mè̤mè̤̌ ta sî pwa̤yṳǎta̤ htǒotoǒ aya. Pwǎ̤ta kòyò htě a yṳǎ nû̌û tò̤ toǒ ayanu:

“Lo̤ htě pwa̤ma̤hǐ wîkè yǎ htǒotamanu, gutṳ̌lò̤ dě a htûhtò̌ ta lo̤ htě a lo̤bǎdû̌khlo ta akhonu.” ^c dě

8“Lo̤htǒo tamanu a glè mè̤ lo̤ htě kò la̤htò̌tukhu yǎ aya, dě a ma̤lòkhǔpo̤ kò aya.” ^d

A gana̤de kû̌kò Cǒmara ale̤ayo̤ tò̤ akhû̌akhî, a htò̌tukhu lòkhǔpo̤ pwǎ. Cǒmara ma̤wǒ bǎ asîya hǐnuhǒ.

9Pwǎ̤ta sî mî̌ khlilèphû̌ tacǎ dě Cǒmara wû̌lǎ a, pwa̤lṳhtò̌ta̤ htě alò̤ta Khwǐ toǒ, khlilèphû̌ htě a cahtǐ, ^e htohǒtò̤ Cǒmara akòyònu toǒ hǒ. Ma̤pûhǐ sî pwe̤ǐlṳ Cǒmara a ta̤ma̤wǒ khǒtû̌ toǒ ayanu, Cǒmara wû̌lǎ sî hǒ. Cǒmara kaǎhǎhtò̌kè sî ta̤khǐ akla dě a sûnṳ sî dě a ta̤lîta̤rakha mo̤ akû hǒ. ^f 10Taplǎkhanu, sî mî̌ Cǒmara akòyò mè̤tò̤ pwǎ̤tadě khònò̤htǒo sî htû Cǒmara akòyò hǒ. Taplǎkhanu, sî sî̌ya Cǒmara a ta̤sò̌yṳgwèbǎǐ tò̤ pwǎ̤ta khònò̤htǒo sî nî̤bǎ a ta̤sò̌yṳgwèbǎǐ hǒ. ^g

11He khobǒsû̌bǒmo̤ sî꤮, hǎkhû̌bǎonu sî mî̌ alò̤ta kòyò cû̌htû shihǔwa̤gakhlophû̌ shǐtè̤mè̤ toǒ pwǎ. He kwigwèbǎǐ sî ta sî glè cû̌tephekè lǒkho ta sî na̤klû a ta̤sò̌yṳ phû̌mò̤ htě ashěape̤ sala̤ sî sò̌phlǒ htǒonu toǒ nî̌꤮. 12Bǎ sî ǒhtûpwa̤ dě khlilèhǔwa̤phû̌ htě a yṳǎ kû̌kò Cǒmara tò̤ htǒotoǒ akla, a bè̌ sî ta̤sǔ ta sî mî̌ kòyò htě a ma̤ ta̤phû̌mò̤shî̌hto akhanu, ǒhtûpwa̤ sarawǒ lǒkho sîna̤ nî̌꤮. Asî kè̌shǐ sî ta̤ma̤wǒ toǒ pě dě htû̌꤮ Cǒmara hèlò̤ amṳni̤ pě ti̤ni̤nu, a bè̌dubè̌na̤ nû̌û pě.

13Běcǎ Ye̤shǔ Khrî̌stu ma̤bǎ pa akhû̌akhî, a sò̌yṳ ta pa glè jûle̤phî̌yo̤ gana̤de kòyòhǎkhû̌phû̌ ǒ ta ta̤sîrîshû̌sho ayo̤. Htohǒtò̤ Khwǐdû̌ htě a ta̤sîrîshû̌shokhlo kò toǒnu bǎbǎ jûle̤phî̌yo̤ lǒkho ayo̤nî̌꤮. 14Htodě kòyò htě Khwǐdû̌ wû̌lǎ asî dě a glè htûdû̌htûpwa̤ toǒnu jûle̤phî̌yo̤ lǒkho ayo̤ nî̌꤮. Khwǐdû̌ nohtò̌htû asî dě a glè cèrò kòyò htě a ma̤ ta̤phû̌mò̤shî̌htonu toǒ dě a htû̌sò̌ǐ kòyò htě a ma̤ ta̤wǒnu toǒ. 15Cǒmara sò̌yṳ noma̤ sî ta̤wǒ, ma̤tè̤hî̌dě a sò̌yṳ ta sî glè ma̤ ǒsî̌tukǔkè kòyò htě a hî̌bǎbǐ hî̌bǎǒ dě gènè̤ geale̤ kû̌kò tò̤nu toǒ. 16Ǒhtûpwa̤ lǒkho pwǐ kòyò nî̤bǎ ta̤pelesesǎ toǒnu nî̌꤮. Pwǎ̤ta noǎ pûma̤ sî ta̤pelesesǎ htǒonu ta a glè ma̤bǐkè pû sî ta̤sǔnu ma̤. Mî̌tanu ǒhtûpwa̤ sǒsǒ lǒkho ta Cǒmara ajû toǒnu. 17Bè̌dubè̌na̤ lǒkho kò pṳ̂̌꤮ tapwa̤ nî̌꤮. Mo̤ǐ lǒkho sî pṳwè̤ Khrî̌stuphû̌ toǒ nî̌꤮. Ǐsha lǒkho Cǒmara ala̤ dě bè̌duna̤ yǎ nî̌꤮. Bè̌dubè̌na̤ lǒkho Khwǐdû̌ nî̌꤮.

Khrî̌stu khòlṳkè̌mò̌mṳ a ta̤jîta̤jû

18Sî htû jû toǒnu, sî bǎ jûle̤phî̌yo̤ gana̤de sîběcǎ ayo̤ dě dǔlṳ lǒbe asî ta sî ta̤bè̌dubè̌na̤ nû̌ûnu nî̌꤮. Ma̤pwǎpǒ̤ pûma̤ běcǎ htě a gwèbǎǐ sî dě akè̌ǐkhwè̌ǐwǒ sînu toǒ ayanu ma̤ nî̌꤮. Běcǎ htě akhuahaphû̌mò̤ toǒnu bǎbǎ, sî tobǎ bè̌duna̤ yǎyǎ, dě sî to jûle̤phî̌yo̤ gana̤de yǎyo̤yo̤. 19Dě Cǒmara ma̤hto bǎ pa akhû̌akhî, ta̤jî htě sî tobǎ khò mè̤tò̤ pwǎ̤tadě sî dè sò̌phlǒhtûbò̌ hî̌mò̌nu Cǒmara kè̌dû̌ sî pě. 20Sî ma̤sǔta̤ akhû̌akhî, kò dè phlěpo̤ sî hî̌mò̌nu, abwǐasîrî ǒpwî̌tè? Pò̤̌ta sî ma̤tota̤ akhû̌akhî, sî dè khòsò̌dobò̌ ta̤jîta̤jû hî̌nu, Cǒmara kè̌dû̌ tû̌ sî pě. 21Ma̤pûhǐ sî bǎ khòsò̌dobò̌ ta̤jîta̤jû htǒo ayanudě, Cǒmara kaǎhtò̌ sî hǒ, ma̤tè̤hî̌dě Khrî̌stu sana̤ khòhto ta̤jîta̤jû ta sîya hǒ dě ma̤pûhǐ sî gû yî̤kû̌ akhǎla̤kha ayanu, a bè̌kè bǎ sî la̤kè̌mò̌mṳ hǒ.

22“A ma̤ ta̤sǔ dǐcǎ꤮ tò̤. Kò gana̤debǎ ta a hî̌bǎ lòho dǐpwǎ̤꤮ tò̤.” ^h

23Bǎ kò pi̤jishǐcǒ yǎ akhanu, a pi̤jishǐcǒ geshǔ kò tò̤. Bǎ kò ma̤jîma̤jû yǎ akhanu, a ma̤ǐsha geshǔ kò tò̤. Mî̌tanu a ta̤wi̤ta̤kè̌ toǒnu, a ǐlò̤kè nû̌ûta Cǒmara htě a yṳǎ nû̌û dě a cèrò cǒtè̤ta̤ htǒotapwa̤ a cǔdekû pwǎ. ⁱ 24Ma̤pûhǐ pa tǒhtupe pû ta ta̤sǔta̤plě toǒ tò̤nu, htohǒtò̤ ma̤pûhǐ pa ǒhtûpwa̤bò̌ kû̌ta ta̤cǒta̤tè̤ pě ayanudě, bǎ kò htǎwa̤si Khrî̌stu dě nò̌dòhtǔlo̤ akhanu, a phî̌htò̌kè pa ta̤sǔta̤plě htǒotoǒ dě ana̤lo̤ hǒ. A khòbǎ ta̤jîta̤jû htǒotoǒ akhû̌akhî, a ma̤bǎkèbò sî hǒ. ^j 25Sî htǒonu, alò̤ta sophû̌ htě a cû̌sǔklè̌ toǒ. Pò̤̌ta khònò̤htǒo sî getosǒ dě pwa̤gèǐ sophû̌ htě a kè̌ǐkhwè̌ǐ sî ta̤ǒhtûpwa̤ htǒotapwa̤ a ǒ hǒ.