1Pe 3 | KxfSCKRC | STEP | Hǐnudě sî htû matoǒnu bǎbǎ, shò̌lò̤ lǒkho sîsò̌ dě sîwṳ̂ toǒ ala̤ nî̌꤮. Dě asî klanu, a dè yṳǎ kû̌kò Cǒmara ale̤ayo̤ tò̤ dèǒ tapwa̤pwa̤ hî̌dě, sî hî̌ asî ta̤hî̌bǎ dǐmû̌꤮ tò̤ bǎbǎ, sî ta̤ǒsapwa̤ sîna̤ akhû̌akhî, a htěnṳcǐnṳge asî sò̌phlǒ dě a yṳǎna̤ǎkû̌ Khrî̌stu pě.

1 Peter 3

Ma ta wṳ̂ toǒ awi̤akè̌

1 Hǐnudě sî htû matoǒnu bǎbǎ, shò̌lò̤ lǒkho sîsò̌ dě sîwṳ̂ toǒ ala̤ nî̌꤮. Dě asî klanu, a dè yṳǎ kû̌kò Cǒmara ale̤ayo̤ tò̤ dèǒ tapwa̤pwa̤ hî̌dě, sî hî̌ asî ta̤hî̌bǎ dǐmû̌꤮ tò̤ bǎbǎ, sî ta̤ǒsapwa̤ sîna̤ akhû̌akhî, a htěnṳcǐnṳge asî sò̌phlǒ dě a yṳǎna̤ǎkû̌ Khrî̌stu pě. ^a 2 Dě asî kè̌shǐ sî ta̤ǒhtûpwa̤ cǒtè̤ toǒ ta sî ta̤bè̌dubè̌na̤ Cǒmara toǒ akhû̌akhî, a htûge kû̌ta pwa̤yṳǎphû̌ pě. 3 Na ta̤wî̤ta̤wǒ toǒnu nǎla̤htò̌ǐ pûma̤ yǎta sî ta̤sǐ khû̌lṳ, sî tîwî̌htò̌ sîna̤ ta wûhta, kûsǒhtò̌ hǐdowî̤wǒ htě a ǒlṳpwǎ akhlo htǒotoǒnu ma̤ nî̌. ^b 4 Mî̌tanu, htû lǒkho kòyò htě a tîwî̌wî̤wǒ asò̌phlǒ sǔshikûnu toǒ nî̌꤮. Sî tobǎ sò̌phlǒ sò̌dohobî̌, sî tobǎ sò̌phlǒ gûjûkabǎ. Ta̤wî̤ta̤wǒ pwǐhè̌o toǒnu, a ǒkhòyî̤ dě Cǒmara bè̌ le̤dû̌pwî̤htû mè̤mè̤̌ yǎ. 5 Ma̤tè̤hî̌dě mamǔ dě꤮ wǐnu a bè̌ a ta̤kè̌shuǐ dě Cǒmara a ǒnu toǒ a ta̤tîwî̌wî̤ ana̤ mî̌ mî̌pwǎ a shò̌lò̤ lǒkho asò̌phlǒ dě awṳ̂la̤ htǒonu hǒ. 6 Shǎra mî̌ mamǔ hǐnu tapwa̤ hǒ. A gana̤de Abraham ayo̤ dě a kaǎ awṳ̂ ta aběcǎ. Dě sî htûpwa̤ yṳǎ akhû̌akhî, sî dè ma̤ta̤wǒ dě sî ǐsha dǐcǎ꤮ tò̤ hî̌numî̌, khònò̤htǒo sî htûhtò̌ sǒsǒta Shǎranu hǒ. ^c 7 Hǐnudě sî htû wṳ̂ toǒnu, bǎ sî ǒkû̌ ta sîma akha, sî̌yajèkû̌ yǎta asî mî̌ a khû̌ǎyû̌lò̤khlo ta sî hǐnu nî̌꤮. Sî̌ya bè̌dubè̌na̤shǔ sîma nî̌꤮. Ma̤tè̤hî̌dě Cǒmara ǐko yolahtûpwa̤ sû htǒonu, asî nî̤bǎ sǒsǒpwǎta sî. Bǎ sî kwisaba akha, ma̤pûhǐ ta̤ ma̤dǐdò pû sî tò̤nu, tûrû̌ ma̤ lǒkho hǐnu nî̌꤮. ^d

Ta̤khò ta̤jîta̤jû ta ta̤ma̤wǒ aya

8 He sò̌yṳ hî̌ gutṳ̌lò̤po̤ sî, sî pṳ̂̌꤮ tapwa̤ tobǎ ǒnû̌û ta ta̤gènè̤ tacǎ꤮ pa, ta̤bè̌sû̌bè̌sǎ tacǎ꤮ pa nî̌꤮. Mo̤ǐ kè̌khînû̌û tapwa̤ ta tapwa̤ pwǐ pṳwè̤nu nî̌꤮. Gwèbǎǐ kè̌khînû̌û tapwa̤ ta tapwa̤ dě shò̌lò̤ lǒkho sî sò̌phlǒ tapwa̤ ta tapwa̤ nî̌꤮. 9 Ma̤phû̌mò̤shî̌htoshǔ pûma̤ kòyò ma̤ nî̌꤮, ǐsho geshǔ pûma̤ kòyò ma̤, mî̌tanu howi̤ geshǔ kò nî̌꤮. Ma̤tè̤hî̌dě Cǒmara kaǎ sî dě sî glè ma̤wǒ geshǔ kò hǐnu. Ma̤pûhǐ Cǒmara howi̤ sînu dě ma̤ lǒkho hǐnu nî̌꤮. 10 Pwǐ lî̤cahtǐ ǒto̤to̤ dě a hî̌,

“Ûpè bǎbǎ, kòyò htě a mo̤ǐ a ta̤ǒhtûpwa̤ toǒ dě a sò̌yṳ kè̌shǐ mṳni̤mṳsa awǒ toǒnu, a tobǎ hî̌bǎ phû̌mò̤shî̌hto ta̤ tò̤. Htohǒtò̤ a tobǎ wîkè ta̤hî̌bǎ lòhǎlòho toǒ. ^e 11 A tobǎ htû̌tiwǐkhǒkè ana̤ ta ta̤phû̌mò̤shî̌hto dě a tobǎ ma̤ta̤ awǒ toǒ. A tobǎ jipwi̤jili̤ ǒpè̤ǒdû sělě kû̌ta kòyò. 12 Ma̤tè̤hî̌dě, Běcǎ kè̌ǐkhwè̌ǐ kòcǒkòtè̤ dě a gana̤de asî ta̤kwisaba toǒ. Pò̤̌ta kòyò htě a ma̤ ta̤phû̌mò̤shî̌hto toǒnu, Běcǎ htû̌tiwǐ kè̌cû̌khǒkè asî.” ^f

13 Sî dè sò̌phlǒsho ma̤ta̤wǒ hî̌dě ûpè tapwa̤ glè ma̤jî̤ sî pè? 14 Pwǎ̤tadě ta̤cǒta̤tè̤ akhû̌akhî, sî dè khòbǎ ta̤jîta̤jû dèhî̌nu, sî nî̤bǎ ta̤howi̤. ^g Asî ma̤pò̤ma̤sha sî pwǎ̤tadě ǐsha pûma̤ asîla̤ ma̤ nî̌꤮, sò̌phlǒgu sò̌phlǒgè pûma̤ asî gûla̤ ma̤ma̤. ^h 15 Pwǎ̤tadě, bè̌dubè̌na̤ lǒkho Khrî̌stu dě sî sò̌phlǒkû pwǐ sî Běcǎ tapwa̤nu nî̌꤮. Ûpè tapwa̤ bǎbǎ, a dè gwè sî ta sî ta̤kè̌shuǐ awi̤akè̌ hî̌nu, ma̤pûhǐ sî hî̌shǔjò kò dě tîwî̌tòwònǎ lǒkho sîna̤ pṳ̂̌꤮ taplǎ nî̌꤮. Pwǎ̤tadě tûrû̌ hî̌bǎ sò̌dohobî̌shǔ asî dě bè̌dubè̌na̤ asî nî̌꤮. 16 Sî sò̌phlǒ dè hî̌lò̤ sî ta sîta̤sǔ ǒtò̤ hî̌nu, tûrû̌ ma̤ sělě nî̌꤮. Sî dè ma̤hǐnu hî̌dě kòyò htě a hî̌bǐhî̌ǒ, a hî̌ phû̌mò̤shî̌hto sî ta̤ǒsarawǒ dě Khrî̌stu akû htǒotoǒnu, a sòwò̤getû̌ ta a ta̤hî̌bǎhî̌sho akò pě. 17 Ma̤tè̤hî̌dě Cǒmara dè sò̌phlǒǒ ta, pa ma̤ta̤wǒhtǒo akhû̌akhî, pa bǎ khòbǎ ta̤jîta̤jû hî̌nu, awǒkhlope ta pa ma̤ ta̤phû̌mò̤shî̌hto dě pa khòbǎ ta̤jîta̤jû toǒ. 18 Ma̤tè̤hî̌dě Khrî̌stu khòsipwǎ bǎ ana̤ ta kòyò ta̤sǔ aya taplǎpa dě ahtoaphlǔ hǒ, a lo̤bǎ khòsipe nǒtò̤. Ma̤pûhǐ a sûcû̌ sî Cǒmara a ǒ dě kòyò cǒtè̤ htǒotapwa̤nu, a hè khòsihto bǎ kòyò ta̤ma̤sǔphû̌ toǒ agûla̤ hǒ. Kò ma̤si ana̤klû pwǎ̤tadě Cǒmara ma̤htûpwa̤gesǒ yǎta Běcǎ sǎcahtǐ akû. 19 Dě Běcǎ sǎcahtǐ htǒo akhû̌akhî, a cû̌ dǒhtû̌ǐ bǎ yolahtûpwa̤ htě a ǒ dě kò la̤dǒnṳ kòyòpo̤kû khònò̤ htǒonu toǒ. 20 Ta̤htûpwa̤ htǒotoǒ numî̌ mî̌pwǎ bǎ Nǒa ma̤htò̌ sǒkhlidû̌ dě꤮ wǐkha bǎ Cǒmara khòsò̌do ǒpo̤ asî akha pwǎ̤tadě a jûle̤phî̌yo̤kû̌ nû̌ûyo̤ tò̤nu toǒ hǒ. Dě sǒkhlidû̌ akûnu kòyò nṳpî̌tî̌ pwǎ. Cǒmara ma̤lû̌htò̌gebò asî ta shi numî̌ aǒpwǎ pwa̤lǐ̤sǒ pwǎ. ⁱ 21 Sî plo sîna̤ ta shi htǒonumî̌, a dǔlṳ kè̌mò̌mṳ shi dě Nǒa htukhanu ta, Cǒmara ma̤lû̌htò̌ge sî khònò̤htǒonu pwǎ. Sî plo sîna̤ ta shi numî̌ a shǔbòkè na̤klû akwǐ mè̤tò̤. Mî̌tanu, ta̤ploshi htǒonumî̌ ta̤olò̤ Cǒmara ta sî glè ma̤ ata̤ dě ta̤sò̌phlǒ mṳ̂plî akû hǐnupwǎ. Ye̤shǔkhrî̌stu si dě a htûpwa̤gesǒ akhû̌akhî, sî plo sîna̤ ta shi numî̌ a ma̤lû̌htò̌gepwǎ sî. 22 Ye̤shǔkhrî̌stu gekihtò̌ mǒkhû̌ dě a gehǎnòò̌ Cǒmara acǔdemû tokho hǒ, dě a pǒǐbò tanaphû̌ toǒ ta ta̤sîrîshû̌sho toǒ, ta ta̤po̤ta̤phǎ toǒ hǒ.