1 Peter 4
Ǒhtûpwa̤ cǒtè̤ta Cǒmara
1Khrî̌stu kòjîkòjû ana̤klû akhû̌akhî, sî tobǎ bè̌sǒsǒdǒ sî sò̌phlǒ pwǐ Běcǎnu, dě sî tobǎ khòsò̌do dǒ ta̤jîta̤jû toǒ, ma̤tè̤hî̌dě, kòyò htě a kòjîkòjû ta na̤klû phěyî̌ tokho toǒnu, a ma̤pe ta̤sǔta̤plě tò̤. 2Hǐnudě sahtò̌ khònò̤htǒo tǒ̤hè dě, sî mṳni̤mṳsa htě a ǒkèpe dě hǎkhû̌bǎo toǒnu sî bǎ ǒhtûpwa̤ pwǐ Cǒmara a ta̤sò̌yṳnu. Sî bǎ ǒhtûpwa̤pe pwǐ kòyòhǎkhû̌phû̌ a ta̤sò̌yṳ phû̌mò̤nu toǒ tò̤. 3Dě wǐkha, pwǐ kòyò htě a sî̌ya kû̌kò Cǒmara tò̤nu toǒ ma̤bònòdû̌ akhîakhanu, sî ma̤ pǒbòhto nòdû̌ hǐnuhǒ. Sî ǒhtûpwa̤ ma̤bònòdû̌ kwè̌꤮ akhîakha ta hî̌tè hî̌numî̌, sî ta̤ǒsapwa̤ wǒtò̤, sî sò̌phlǒ putupatǎ, sî ta̤ǎmṳbǎomṳpǒ, sî ta̤ma̤lṳ̂ma̤pwè htě a ǒ ta ta̤ǎtûlû̌otûlû̌ toǒ, sî ta̤saba pwa̤yo̤pwa̤gî htě la̤wi̤ja yǎ toǒnu hǒ. 4Hǐnudě khònò̤htǒo sî bǒsû̌khǎkho ma̤mi̤pi̤sidǒpe sîna̤ ta ta̤htǒotoǒ tò̤ akhû̌akhî, kòyò htě a sî̌ya Cǒmara tò̤ htǒotoǒ sû̌pi̤sò̌pi̤ lǒkho dě a pi̤jishǐcǒbò sî hǒ. 5Pwǎ̤tadě asî ma̤hto kwè̌꤮ hî̌tènu, asî tobǎ ge pwe̤ǐlṳphlosǒ Cǒmara ta ana̤ pě. Cǒmara ǒwǒnǎ ana̤ ta a glè cèrò kòyò htûpwa̤ toǒ ta kòyòsi htǒotoǒ hǒ. 6Hǐnudě kò dǒhtû̌ǐhto bǎ kòyò htě a si khònò̤htǒo toǒnu ta ta̤sò̌le̤sò̌lò̤ awi̤akè̌ numî̌ htǒo akhû̌akhî hǒ. Kò cèrò asî na̤klûphěyî̌ pwǐ kò cèròhto kòyò pṳ̂̌꤮ tapwa̤nu toǒhǒ. Pwǎ̤ta asî ta̤ǒhtûpwa̤ toǒnu a ǒhtûpwa̤ sǒsǒta Cǒmara ǒhtûpwa̤nu pě.Sû htě a hè dě Cǒmara ǒ toǒ
7Ta̤lǒ̤꤮ bò a glè̌ gutṳkèhǒnu a hèto̤ phǔhǒ. Hǐnu akhû̌akhî, ma̤pûhǐ sî kwisababò̌ kû̌kònu, ǒsòklò lǒkho dě sû̌ǐtòwòǐlò̤ lǒkho sîna̤, htohǒtò̤ ǒhtûpwa̤ sapwa̤kû̌ lǒkho nî̌꤮. 8Dě ta̤lǒ̤꤮ bò aklanu, ta̤mo̤ǐ mè̤mè̤̌ nû̌û tapwa̤ ta tapwa̤ numî̌ a lo̤dû̌shǐ hǒ, ma̤tè̤hî̌dě ta̤mo̤ǐnu a bòlû̌plṳ̂kè ta̤sǔ. a 9Kaǎshǔ lǒkho shǐpwa̤shǐmè̤ dě sîhǐphòdǒkû nî̌꤮, tṳ̂mṳ̂ta̤ma̤ lǒkho pûma̤ nî̌꤮. 10Cǒmara ǐhto sî sû tapwa̤ ta tapwa̤hǒ, dě noǎ pa̤dǒ lǒkho sî sû htǒonu ta kòyò ahǔwa̤ toǒ ayanu. Pǒǐ te̤mǎ lǒkho sû htě Cǒmara yṳ̂lò̤ khǒnû̌û tapwa̤ ta tapwa̤ htǒonu nî̌꤮. 11Ûpèpè̌꤮ bǎbǎ, a dè dǒhtû̌ǐ bǎ kò hî̌nu, a bǎ dǒhtû̌ǐ bǎ kò pwǐ Cǒmara hî̌bǎ kò dě a nodǒhtû̌ǐ tṳtṳ nû̌ûta nanu. Dě ûpèpè̌꤮ bǎbǎ a dè ma̤jûphû̌ ta̤ma̤ hî̌nu, a tobǎ ma̤ nû̌ûta khû̌ǎ htě Cǒmara ǐlò̤ nû̌ûnu toǒ. Dè ma̤hǐnu hî̌dě, Ye̤shǔkhrî̌stu akhû̌akhî, kò htû̌sò̌ǐ Cǒmara ta ta̤ lǒ̤꤮ bò htě sî ma̤ htǒotoǒ akhû̌akhî pě. Cǒmara nî̤bǎtû̌ta ta̤sîrîdû̌sîrîhtû ta ta̤po̤ta̤phǎ tûjûpwa̤ talakhǎ nî̌꤮. Amè̤.Sî htû Khrî̌stuphû̌ akhû̌akhî sî khòbǎ ta̤jîta̤jû
12He khobǒsû̌bǒmo̤ sî꤮, kò ma̤jîma̤jû sî htǒonumî̌ kò ma̤kè̌pwǎ sî ta̤yṳ akhû̌akhî, sû̌pi̤sò̌pi̤ lǒkho pûma̤ nî̌꤮. Sî dè htûmè̤mè̤̌ Khrî̌stuphû̌ hî̌dě, ta̤htûhtò̌ ana̤ pwǐhè̌o numî̌ akhǒnǒ sîya dǐcǎ꤮ tò̤. 13Mî̌tanu, htû̌꤮ Khrî̌stu hèlò̤ ǒlṳhtò̌ ta ata̤sîrîdû̌sîrîhtû pěnu, ma̤pûhǐ sî sò̌le̤sò̌lò̤ yi̤kǒ kû̌kò pě ayanu dě, ta̤ htě sî khòjîkhòjû kû̌dǒ ta Khrî̌stu pwǐhè̌o toǒnu, tûrû̌ sò̌le̤ lǒkho nî̌꤮. 14Sî dè khòbǎ ta̤pi̤jishǐcǒ dě sî gûkû̌ Khrî̌stu akò dèhî̌mò̌nu sî nî̤bǎ ta̤howi̤, ma̤tè̤hî̌dě Cǒmara a sǎcahtǐ htě asîrîdû̌sîrîhtû htǒonu, a ǒkû̌dǒ ta sî hǒ. 15Sî dè ma̤si kòyò, mètò̤mî̌ sî dè ǎhǔǎkě, mètò̤mî̌ sî dè ma̤ ta̤phû̌mò̤shî̌hto, mètò̤mî̌ sî dè cû̌nṳma̤ dǐdò shû̌shishû̌shǎ kò dèhî̌dě sî tobǎ khòbǎ ta̤jîta̤jû hǒ. Pwǎ̤tadě sî htǒotoǒ numî̌, sî to khòbǎ ta̤jîta̤jû ta sî ma̤ ta̤phû̌mò̤ htǒotoǒ akò tò̤. 16Pwǎ̤tadě sî htû Khrî̌stuphû̌ akhû̌akhî, sî khòbǎ ta̤jîta̤jû hî̌nu, sòwò̤ lǒkho pûma̤ nî̌꤮. Kò kaǎ sî ta Khrî̌stu ami̤ hǒ akhû̌akhî, tûrû̌ htû̌sò̌ǐ lǒkho Cǒmara nî̌꤮. 17Ma̤tè̤hî̌dě, akhîakha hèto̤ ta Cǒmara glè tèhtò̌ cèrò wǐgutṳ̌tû̌ akòyò hǒ. A dè tèhtò̌ cèrò wǐgutṳ̌ pa pě dèhî̌dě kòyò htě a gana̤de Cǒmara a ta̤sò̌le̤sò̌lò̤ awi̤akè̌ tò̤ toǒnu apò̤asha ajîajû pwî̌꤮ tè pě. 18Pwǐ lî̤cahtǐ hî̌nǎ ta, “Kòyò cǒtè̤ toǒ glè nî̤bǎ ta̤ma̤lû̌htò̌ge ayanu, apò̤asha mè̤mè̤̌. Dèhî̌hǐnu dě kòyò htě a shodo Cǒmara toǒ ta ta̤ma̤sǔphû̌ toǒnu apò̤asha pwî̌꤮ tè pěnu la̤hî̌ agûla̤ ǒpe tò̤.” b 19Hǐnudě, sî khòbǎ ta̤jîta̤jû htǒonu, a dè to ta Cǒmara asò̌phlǒ hî̌dě, sî tobǎ ma̤wǒ sělěpo̤, htohǒtò̤ sî to bè̌lò̤ sama sî sò̌phlǒ dě Běcǎ htě a bǒlò̤ ta̤ htě acǒatè̤ ta ayo̤ htǒotapwa̤ a cǔdekû.
Copyright information for
KxfSCKRC