1 Thessalonians 2
Pò̌lu ma̤ta̤ dě Tè̌shalò̌niawî̤kû
1Pṳwè̤sî, pa cû̌ǒlèkû̌ sînu, a hǎbònòdû̌ akhîakha mè̤tò̤. Abwǐasîrî ǒpwǎ numî̌ sî sî̌yatû̌ hǒ. 2Pwǐ sî sî̌yahto hǒnu, bǎ pa hèto̤ sî ǒ hǒtò̤ akha, Phǐlǐpiawî̤phû̌ toǒ ma̤jîma̤jû pa, htodě ma̤sòwò̤bò pa. a Kò ma̤ dǐdò tukutakǎ pa pwǎ̤ta ma̤pûhǐ pa dǒhtû̌ǐ bǎ sî ta Cǒmara a ta̤sò̌le̤sò̌lò̤ awi̤akè̌nu dě, pa Cǒmara ǐ pa ta̤khuta̤ha hǒ. b 3Pa ǐkhû̌ǐǎ sî ta sî yṳǎ ta̤sò̌le̤sò̌lò̤ awi̤akè̌ hè̌onumî̌ asǔ nǒtò̤. Pa ta̤gènè̤ mî̌ a mṳ̂aplîpwǎ dě sîkhû̌, pa cû̌plò̤ nǒ kòyò dǐpwǎ̤꤮ tò̤. 4Pa hî̌bǎpwǎ pwǐ atota Cǒmara asò̌phlǒnu pwǎ, ma̤tè̤hî̌dě pa kè̌shǐhto bǎ ta̤jîta̤jû dě pa sò̌phlǒpî̌pè̤ tò̤ akhû̌akhî, a yṳ nǎla̤ǐ pa dě a ǐlò̤ ta̤sò̌le̤sò̌lò̤ awi̤akè̌ htǒo dě pa cǔdekû hǒ. Pa hî̌ pwǐ ato kòyò sò̌phlǒnu mè̤tò̤. Pa hî̌pwǎ pwǐ atota Cǒmara dě a sèlèkè̌ pa sò̌phlǒhtǒo tapwa̤ a ta̤sò̌yṳnu pwǎ. 5Pwǐ sî sî̌yahtonu, pa hè hî̌bǎhtû̌sò̌ǐ lòhonǒ sî dǐkhò̌꤮ tò̤. Pa sò̌yṳ lṳ̂ǐ wûhta dě pa hè jîkhǒjîwa̤ nǒ pana̤ dǐkhò̌꤮ tò̤. Pa ma̤kû̌nǒ pwǐhè̌o tò̤ numî̌ Cǒmara sî̌ya pwǎ. 6Sî bǎbǎ, kòyò ahǔwa̤ toǒnu bǎbǎ, ma̤pûhǐ a htû̌sò̌ǐ pa dě pa ma̤ hǐnu mè̤tò̤. 7Pa mî̌ Khrî̌stu apwa̤nophû̌ toǒ akhû̌akhî, pa dè kwisho ta̤ dě sîǒ numî̌ atoabǎ pwǎ, pwǎ̤ta pa ma̤hǐnu tò̤. Bǎ pa ǒkû̌ ta sî akhanu, pa hî̌bǎbî̌hî̌bǎyṳ pwǎ sî, sǒsǒta mo̤tapwa̤ kè̌ǐkhwè̌ǐ aphû̌ toǒnu pwǎ. 8Pa mo̤ǐ mè̤mè̤̌ sî, htodě sî htû pa sû̌kho htě amo̤ǐmè̤mè̤̌ pa toǒ akhû̌akhî, pa ma̤wǒnǎ pana̤ dě pa glè pwe̤ǐ sî̌yatû̌ pwǎ bǎ sî ta Cǒmara a ta̤sò̌le̤sò̌lò̤ awi̤akè̌ htǒonu mè̤tò̤, pa ma̤wǒnǎpo̤ pana̤ ta pa ǒplǒ ta sî dě, phî̌jèma̤jè kû̌po̤ sî. 9Pṳwè̤sî, pa ǎwè̤ mè̤mè̤̌ ta̤ numî̌ sî to̤ǐ lòtṳ̌pe pwǎ. Bǎ pa dǒhtû̌ǐ bǎ sî ta Cǒmara a ta̤sò̌le̤sò̌lò̤ awi̤akè̌ akhanu, ma̤pûhǐ pa bǔǎ pa phushǎ, htohǒtò̤ ma̤pûhǐ pa ma̤htǒma̤klǎ pû sî tò̤nudě, pa wè̤ta̤ lṳmṳkhǐkhǐ lṳmṳshasha. 10Bǎ pa ǒplǒ ta sî pwa̤yṳǎphû̌ toǒ akhanu, pa ǒhtûpwa̤ cahtǐ, pa ǒcǒǒtè̤, htodě pa ma̤ta̤sǔ tò̤nu sî sî̌yatû̌hǒ. Pa mî̌ kòyò hî̌tè toǒnumî̌, sî ta Cǒmara glè khòlṳtû̌ sîsò̌ hǒ. 11Pa kè̌ǐkhwè̌ǐ sî htǒonu, a lò̤ta pha tapwa̤ kè̌ǐkhwè̌ǐ aphû̌ numî̌ sî sî̌yatû̌hǒ. 12Ma̤tè̤hî̌dě ma̤pûhǐ sî ǒhtûpwa̤tobǎ pwǐ Cǒmara asò̌phlǒnu dě pa ǐkhû̌ǐǎ sî, pa hî̌bǎmo̤hî̌bǎwǒ sî, pa tûsû sîkò pṳ̂̌꤮ tapwa̤. Cǒmara mî̌ pwa̤ htě a kaǎnṳ sî dě ashiagakû ta a sîrîdû̌sîrîhtû akû tapwa̤hǒ. 13Bǎ sî gana̤de Cǒmara ale̤ayo̤ htě pa pwe̤ǐ bǎ sîhtǒo akhanu, sî phî̌shǔ yǎ pwǐ a ǒ dě kòyò a ǒ hènṳ mè̤tò̤, sî phî̌shǔ yǎ pwǐ a ǒ dě Cǒmara a ǒ hènu. Hǐnu akhû̌akhî, pa hî̌bwǐhî̌sîrî Cǒmara pṳ̂̌꤮ taplǎ. Dě ta̤wi̤ta̤kè̌ htǒonumî̌ Cǒmara a ta̤wi̤ta̤kè̌ na̤cè̌. Ta̤wi̤ta̤kè̌ htǒo akhû̌akhî, Cǒmara noǒhtûpwa̤ sî pwǐ ato nû̌ûsò̌phlǒnu hǒ. 14Pṳwè̤sî, ta̤cû̌htûhtò̌ tǒ̤ana̤ ta sî pwǐhè̌otoǒ ma̤tè̤hî̌numî̌ a lò̤ta ta̤ma̤htûhtò̌hto ana̤ dě Cǒmara a pwa̤yṳǎta̤ aprṳ̂ahophû̌ htě a ǒ dě Yṳ̌dagakûnu toǒ hǒ. Asî htû Ye̤shǔkhrî̌stu a kòyò toǒ akhû̌akhî, a htûhtò̌ pwǎ. Sî khlilèphû̌ ma̤jîma̤jû tû̌ sî htǒonu asǒsǒta Yṳ̌daphû̌ toǒ ma̤jîma̤jû pwa̤yṳǎphû̌ htě a ǒ dě Yṳ̌dagakûnu toǒ hǒ. c 15Yṳ̌daphû̌ toǒ mî̌ pwa̤ma̤si Běcǎ Ye̤shǔ ta pwa̤po̤ toǒ, htohǒtò̤ a wṳ̂hǎhtò̌kè pa. A ma̤to Cǒmara sò̌phlǒ tò̤, htodě a sò̌khěkhû̌khwèbò kòpṳ̂̌꤮ tapwa̤. d 16Ma̤pûhǐ Yṳ̌daphû̌ mè̤tò̤ toǒ nî̤bǎdǒ ta̤ma̤lû̌htò̌ge ayanu, pa dǒhtû̌ǐlṳ bǎ asî ta ta̤sò̌le̤sò̌lò̤ awi̤akè̌. Bǎnuakha Yṳ̌daphû̌ toǒ ma̤dǐdò pa. Hǐnudě asî ma̤ta̤ toǒnu, a bè̌betî̌pî̌bò a ta̤sǔnu toǒ to̤htû̌ la̤bè̌htò̌ agûla̤ ǒpe tò̤nu. Khònò̤dě Cǒmara a ta̤sò̌dû̌ a ta̤cèrò gutṳ̌lò̤ htǒonu a glè hèto̤ asî ǒ hǒ.Pò̌lu sò̌yṳ cû̌ǒlèkû̌ Tè̌shalò̌nia pwa̤yṳǎta̤ aprṳ̂ahophû̌ toǒ
17Pò̤̌ta pṳwè̤sî, bǎ ta̤ma̤jîma̤jû ma̤pò̌ma̤shîkè pana̤klû ta sî na̤klûhtǒo teděsǎphû̌ akhanu, pa nǎsǔ na̤cè̌ sî. Pa sò̌yṳ kè̌shǐ sî dě pa jipwi̤jili̤ na̤cè̌. Pa na̤klû ǒyî̤ ta sî pwǎ̤tadě pa ta̤gènè̤ toǒ numî̌ a ǒphǔpwǎ ta sî. 18Pa sò̌yṳ hèǒlèkû̌po̤ sî. He mî̌ Pò̌lu htǒo, he jipwi̤ hè sala̤kû̌po̤ dě sîǒ pwǎ̤ta khînǎmo̤pha hǐkǒdû̌ ma̤dǐdò paklè̌. 19Mî̌ma̤tè̤dě pa sò̌yṳ cû̌ǒlèkû̌po̤ mè̤mè̤̌ sî hî̌numî̌, sî ǒ ta sî ta̤yṳ htě ashû̌asho akhû̌akhî, htû̌ Běcǎ Ye̤shǔkhrî̌stu hèpě ti̤ni̤nu, sî htû pa ta̤dǒshuǐ, pa ta̤sò̌le̤sò̌lò̤ ta pa la̤phî̌htò̌yî̤ khû̌glûhta toǒ hǒ. 20Sî mî̌ pa la̤phî̌htò̌yî̤ pa sò̌phlǒ ta pa ta̤sò̌le̤sò̌lò̤ toǒ hǒ.
Copyright information for
KxfSCKRC