1Th 3 | KxfSCKRC | STEP | Gutṳ̌lò̤nu pa khòbò̌pe tò̤ akhû̌akhî, pa ǒkè bǎ Atîwî̤kûbǎo pa bè̌lò̤kè pa sò̌phlǒ hǐnu.

1 Thessalonians 3

1 Gutṳ̌lò̤nu pa khòbò̌pe tò̤ akhû̌akhî, pa ǒkè bǎ Atîwî̤kûbǎo pa bè̌lò̤kè pa sò̌phlǒ hǐnu. ^a 2 Dě pa sûlò̤ Timò̤̌te sîǒ, a mî̌ pa pṳwè̤ tapwa̤ dě ahtû Cǒmara pwa̤ma̤ta̤ tapwa̤. A ma̤plǒkû̌ta̤ ta pa, dě a dǒhtû̌ǐ bǎ kò ta Khrî̌stu a ta̤sò̌le̤sò̌lò̤ awi̤akè̌. Ma̤pûhǐ a ǐkhû̌ǐǎ sî dě a tûsû sî ta̤yṳta̤nǎ akònu, pa sûlò̤ yǎ dě sîǒ. 3 Kò ma̤jîma̤jû sî akhû̌akhî, ma̤pûhǐ sî wîkè pû sî ta̤yṳta̤nǎ dǐpwǎ̤꤮ tò̤nu, pa nohè Timò̤̌te dě sîǒ. Sî sî̌yawǒ ta Cǒmara ta̤yè̤lò̤ǒnǎ dě pa bǎ khòbǎ ta̤ma̤jîma̤jû pwǐhè̌o toǒnu hǒ. 4 Ma̤tè̤hî̌dě bǎ pa ǒplǒ ta sî akhanu, pa hî̌ sala̤la̤hto bǎ sî ta pa khòbǎ ta̤ma̤jîma̤jû hè̌onu pě. A hè htûhtò̌ kwè̌꤮ ta sî hî̌tènu sî kè̌shǐbǎ na̤cè̌ hǒ. 5 He ǒkhòpe tò̤ akhû̌akhî, ma̤pûhǐ Timò̤̌te sî̌ya ta sî ǒměǒglepe ta sî ta̤yṳ ya, mî̌ sî ǒměpe tò̤ yanu, he sûlò̤ yǎ dě sî ǒ. He bǎgu ta khînǎmo̤pha hǐkǒdû̌ lǒǎplò̤ǎ sî. Htodě ta̤phî̌ta̤ma̤ lǒ̤꤮ bò htě pa ma̤htobò toǒnu, a glè nòdû̌kèbò, he bǎgu hǐnu.

6 Pwǎ̤tadě khònò̤htǒo Timò̤̌te ǒ sîǒ dě a geto̤sǒ paǒ hǒ. Dě a ge pwe̤ǐ pa ta ta̤wi̤ta̤kè̌ htě amo̤ toǒ. A pwe̤ǐlṳ bǎ pa ta sî ta̤yṳta̤nǎ ta sî ta̤mo̤ǐ toǒ awi̤akè̌. Htohǒtò̤ a pwe̤ǐlṳ pa ta sî gènè̤htò̌nṳ pa pṳ̂̌꤮ taplǎ, dě sî ǒ ta ta̤sò̌le̤sò̌lò̤, htohǒtò̤ sî nǎsǔ kè̌shǐ mè̤mè̤̌ pa pwǐ pa nǎsǔ kè̌shǐ sînu, a pwe̤ǐlṳ bǎ pa hǐnu. ^b 7 Hǐnudě pṳwè̤sî, bǎ pa khòbǎ ta̤pò̤ta̤sha htě adû̌ayǒ ta ta̤jîta̤jû lǒ̤bò htǒotoǒ akhanu, sî yṳ nǎla̤ǐpe Khrî̌stu akhû̌akhî, a nî̤khû̌nî̤ǎ mè̤mè̤̌ paya. 8 Ma̤tè̤hî̌dě, sî ihtǒ měgle dě Běcǎ akû akhû̌akhî, pa ǒhtûpwa̤ khònò̤ htǒonu, phi꤮ aphiamo̤ hègesǒ pa hǒ. 9 Sî khû̌khî, pa hî̌bwǐhî̌sîrî mè̤mè̤̌ pa Cǒmara dě pa sò̌le̤sò̌lò̤ mè̤mè̤̌ dě alo̤mo̤. Dě pa sò̌le̤sò̌lò̤ hî̌bwǐhî̌sîrî Cǒmara htǒonu, a kǒpè̤pe tò̤. 10 Ma̤pûhǐ pa kè̌shǐ glashǔbò̌ gesǒ ta sî dě pa ma̤jè dû̌htò̌po̤ sî ta̤yṳ htě alo̤bǎ toǒnu, pa kwisaba lṳmṳkhǐkhǐ lṳmṳshasha.

11 Ma̤pûhǐ pa hè gesǒ dě sîǒnu, pa Cǒmara htě a mî̌ papha sana̤ htǒotapwa̤ ta pa Běcǎ Ye̤shǔ htǒo tîwî̌tòwò bǔmophlohètû̌ bǎ paklè̌ pě nî̌꤮. 12 Běcǎ glè ma̤dû̌htò̌tû̌ bǎ sî ta̤mo̤ǐ nû̌û dě, sî mo̤ǐ lǒ̤sû̌lǒ̤sò̌ kè̌khînû̌û tapwa̤ ta tapwa̤, htohǒtò̤ sî mo̤ǐdû̌htò̌po̤ kòyò ahǔwa̤ toǒ sǒsǒta pa mo̤ǐ sînu nî̌꤮. 13 Bǎ pa Běcǎ Ye̤shǔ hèlò̤ kû̌ta akòyò cahtǐ toǒ lǒ̤bò pě akhanu, ma̤pûhǐ kò la̤bè̌ sî ta̤sǔ ǒpe tò̤nu, htohǒtò̤ ma̤pûhǐ sî cahtǐ dě pa Cǒmara ta papha htǒotapwa̤ alo̤mo̤ pěnu, a ǐshû̌ǐsho tû̌ta sî sò̌phlǒ akhû̌aǎ nî̌꤮.