1Th 4 | KxfSCKRC | STEP | Pṳwè̤ sî, dě nǒkònu, sî tobǎ ǒhtûpwa̤ tota Cǒmara asò̌phlǒ hî̌tènu, pa sû̌ǐhto sî hǒ. Dě khònò̤htǒo sî ǒhtûpwa̤ numî̌ a mè̤hǒ. Khònò̤htǒo pa kwigwèbǎǐ sî dě pa tûsû sîkò ta Běcǎ Ye̤shǔ agûla̤ dě, sî glè ma̤dû̌htò̌ sělěpo̤ hǐnu.

1 Thessalonians 4

Ta̤ǒhtûpwa̤ htě ato Cǒmara sò̌phlǒ

1 Pṳwè̤ sî, dě nǒkònu, sî tobǎ ǒhtûpwa̤ tota Cǒmara asò̌phlǒ hî̌tènu, pa sû̌ǐhto sî hǒ. Dě khònò̤htǒo sî ǒhtûpwa̤ numî̌ a mè̤hǒ. Khònò̤htǒo pa kwigwèbǎǐ sî dě pa tûsû sîkò ta Běcǎ Ye̤shǔ agûla̤ dě, sî glè ma̤dû̌htò̌ sělěpo̤ hǐnu. 2 Ta̤ htě pa hî̌hto sî ta sî tobǎ ma̤ toǒnu, sî sî̌yahǒ. Ta̤ htǒotoǒ numî̌ Běcǎ Ye̤shǔ bè̌lò̤ ta̤ma̤ pakhû̌ dě pa tobǎ pwe̤ǐpwǎ bǎ sî.

3 Cǒmara sò̌yṳ ta sî ta̤ihtǒhǎnòò̌ sîtoǒ glè mṳ̂plî dě bǎ cû̌sǔnṳ mamǔmakhû dî̌kî̌꤮ tò̤. 4 Sî pṳ̂̌꤮ tapwa̤ tobǎ pǒǐlò̤tû̌ sîna̤ ta ta̤ǒhtûpwa̤ cahtǐ htě kò bè̌dubè̌na̤ sî toǒ. 5 Nopǒǐlò̤ pûma̤ sîna̤ ta ta̤lṳ̂ma̤mo̤ǐ na̤toǒ ta ta̤putupatǎ a ta̤sò̌yṳ pwǐ kòyò htě a sî̌ya kû̌kò Cǒmara tò̤nu toǒ ma̤ nî̌꤮. 6 Sî tobǎ ma̤sǔ sî pṳwè̤ Khrî̌stuphû̌ toǒ ta ta̤ hǐnu toǒ dǐpwǎ̤꤮ tò̤. Sî tobǎ lǒǎ tikhlǐkhû̌tikhlǐkò sî pṳwè̤ Khrî̌stuphû̌ toǒ akhû̌ dǐpwǎ̤꤮ tò̤. Kòyò htě a ma̤hǐnu toǒnu, Běcǎ cèrò asî pě. Pwǐhè̌o toǒnu pa dǒhtû̌ǐlṳhtobò bǎ sî, pa ǐsè̌rè̌htobò sî hǒ. 7 Ma̤tè̤hî̌dě Cǒmara kaǎ pa dě pa glè bǎ ǒhtûpwa̤ ma̤sǔ mamǔmakhû ayanu mè̤tò̤. Ma̤pûhǐ pa ta̤ihtǒhǎnòò̌ sîtoǒ mṳ̂plî ayanudě, a kaǎpwǎ pa. 8 Hǐnu akhû̌akhî, kòyò tapwa̤pwa̤ htě a la̤lò̤kè ta̤sû̌ǐtòwòǐ htǒonumî̌, a la̤lò̤kè kòyòhǎkhû̌phû̌ mè̤tò̤. A la̤lò̤kè Cǒmara htě a ǐ sî Běcǎ sǎcahtǐ htǒotapwa̤nu hǒ.

9 Ta̤mo̤ǐ pṳwè̤ htě a yṳǎna̤ǎ ta̤ toǒ awi̤akè̌nu, pa lo̤bǎ khwè̌pe bǎ nǒ sî tò̤. Ma̤tè̤hî̌dě ta̤ htě bǎ mo̤ǐ nû̌û tapwa̤ ta tapwa̤ sî sana̤tû̌nu, Cǒmara sû̌ǐtòwòǐhtotû̌ sî hǒ. 10 Dèhî̌mè̤mè̤̌mî̌ sî mo̤ǐbò sîpṳsîwè̤ htě a ǒ dě Makedò̌niaga htǒo sagala̤nu toǒ. Pwǎ̤tadě pa tûsûpo̤ sî ta sî glè mo̤ǐ dû̌htò̌khlopo̤ ta htǒonu nî̌.

11 Jipwi̤ ǒhtûpwa̤ mo̤kla pè̤dû lǒkho ta kò dě ta̤pṳ̂̌꤮ tacǎ akû nî̌꤮. Na ta̤wi̤ta̤kè̌ mè̤tò̤ toǒnu, cû̌nṳ ma̤shû̌shǎ pûma̤ kò ma̤ nî̌꤮. Pwǐ pa pwe̤ǐhto sînu, kè̌lǎǎkè̌lǎwè̤ dě bǔǎlò̤tû̌ lǒkho sîna̤ nî̌꤮. 12 Ma̤pûhǐ kòyò htě a yṳǎna̤ǎ Cǒmara hǒtò̤ toǒ kè̌shǐ sî ta̤ǒhtûpwa̤ dě asî glè bè̌dubè̌na̤ sî, htohǒtò̤ ta̤ htě sî lo̤bǎǎlo̤bǎo toǒnu, ma̤pûhǐ sî nǎla̤ǐ pû kòhǔwa̤ tò̤nu, ma̤ lǒkho pwǐ pa hî̌ sînu nî̌꤮.

Běcǎ ata̤hè gesǒ

13 Pṳwè̤sî, pa sò̌yṳ nosî̌ya sî ta kòyò htě a yṳǎna̤ǎta̤ dě a sihtokènu toǒ awi̤akè̌. Pwǐ kòyò htě a ta̤kè̌shuǐ ǒkû̌kò tò̤nu toǒ nî̤bǎ ta̤sǎpla̤nu, pa sò̌yṳ nohtûkû̌ sî hǐnutò̤. 14 Pa yṳǎ ta Ye̤shǔ sihto dě a htûpwa̤gesǒ hǒ. Hǐnudě pa yṳǎ ta htû̌꤮ Ye̤shǔ hèlò̤ gesǒ pěnu, Cǒmara kaǎgesǒ kòyò htě a yṳǎ Ye̤shǔ htě a sihtokènu toǒ pě. ^{▼▼Amûasǎ ahǔwa̤ mî̌ Ye̤shǔ akhû̌akhî, Cǒmara kaǎge kòyò htě a siplǒhtota Ye̤shǔnu pwǎ.} 15 Ta̤ htě pa glè hî̌po̤ sîhtǒo toǒnumî̌, Běcǎ sû̌ǐtòwòǐ tû̌ta ana̤ hǒ. A hî̌, htû̌꤮ Běcǎ Ye̤shǔ hè gesǒ akhapěnu, pa ǒhtûpwa̤pe htǒotoǒnu, pa ge kihtò̌wǐ ta kòyò htě a yṳǎ dě a sihtokènu toǒ mè̤tò̤. ^b 16 Ma̤tè̤hî̌dě Běcǎ sana̤ ǒ dě mǒkhû̌ hèlò̤ pě, dě a kǎǎgulò̤ ayo̤ tûmû pě. Htodě mǒkhû̌tanaphû̌ a hǐkǒdû̌gutṳ̌ tapwa̤ yi̤kǒ hî̌bǎlò̤ pě. Htodě kò gana̤de Cǒmara ǔpo̤htò̌ Tǔ pě dě kòyò htě a yṳǎ Khrî̌stu dě a sihtokè toǒnu, a ihtǒ gewǐgutṳ̌ kò pě. 17 Htodě pa ǒhtûpwa̤pe htǒotoǒnu, ma̤pûhǐ pa cû̌ kè̌shǐshǔ ta Běcǎ dě mǒla̤ pěnu, Cǒmara jokihtò̌ kû̌dǒ pa ta asî dě poǒlṳkla pě. Htopědě pa cû̌ǒplǒ ta Běcǎ tûjûpwa̤ talakhǎ pě. 18 Hǐnu akhû̌akhî, pwe̤ǐmo̤ kè̌khî lǒkho sî sò̌phlǒ ta ta̤wi̤ta̤kè̌ htǒo tapwa̤ ta tapwa̤ nî̌꤮.