1 Thessalonians 5

Ǒwǒnǎ sîna̤ ta Běcǎ ata̤hè amṳni̤

1Pṳwè̤sî, Běcǎ hèto aněala akhîakha bò̌khòtè pěnu, pa lo̤bǎ khwè̌ pwe̤ǐlṳ bǎ nǒ sî tò̤. 2Ma̤tè̤hî̌dě sî sî̌ya te̤mǎhto ta Běcǎ hè amṳni̤ pěnu, alò̤ta pwa̤ǎhǔ hè dě lṳmṳkhǐkhanu pě. ^a 3Bǎ kò hî̌ ta, “Gamo̤gabǎ hǒ, ta̤bǎgubǎgè ǒpe tò̤” kò hî̌ pwǐhè̌o akhapěnu, ta̤pî̌ta̤lṳ̂ glè hèto̤ sumṳ bǎ asî sǒsǒta mamǔ phushaphû̌ǒnu pě dě asî lû̌htò̌bò̌ dǐpwǎ̤꤮ pě tò̤.

4Pwǎ̤tadě, pṳwè̤ sî, sî mî̌ kòyò ǒ ta̤khǐ ala̤ dě ama̤ ta̤phû̌mò̤shî̌hto toǒ mè̤tò̤ akhû̌akhî, Běcǎ hè amṳni̤ htǒonu, sî sò̌htusò̌tò̤ gònò̤gèglè pwǐ pwa̤ǎhǔ hèsumṳnu tò̤. 5Sî lǒ̤꤮ bò htǒo toǒ numî̌ ta̤lî aphû̌khû ta lṳmṳsha aphû̌khû toǒ. Pa mî̌ kòyò lṳmṳna̤phû̌ mè̤tò̤tò̤, ta̤khǐta̤lo̤phû̌ mè̤tò̤tò̤. 6Hǐnudě pa to hǎmoǒshope̤ pwǐ kòhǔwa̤ toǒ hǎmoǒshope̤nu tò̤. Pa tobǎ ǒsòklò pǒǐ tûû̌ pana̤. 7Ma̤tè̤hî̌dě kòyò htě a hǎmoǒ toǒnu a hǎmoǒ lṳmṳkhǐkha, kòyò htě a ǎmṳopǒ toǒ numî̌ a ǎmṳopǒ lṳmṳkhǐkha. 8Pwǎ̤ta pa mî̌ lṳmṳshaphû̌ toǒ akhû̌akhî, pa bǎ pǒǐ tûû̌ pana̤. Pa tobǎ yṳǎ sělě Ye̤shǔ dě pa tobǎ mo̤ǐ sělě kò. Pa dè ma̤hǐnu hî̌dě alò̤ta pa kûsǒhtò̌nṳ pa hǐdote̤htò̌ dě a ma̤kwaǐ pana̤ htǒonuhǒ, htodě pa ta̤kè̌shuǐ htě Cǒmara glè ma̤lû̌htò̌ge pa htǒonumî̌ alò̤ta pa glûhtò̌ khû̌glûte̤htò̌ htě a ma̤kwaǐ pa hǐkǒ htǒonuhǒ. ^b 9Cǒmara wû̌lǎ pa ta pa glè khòbǎ a ta̤sò̌dû̌ a ta̤cèrò htǒonu mè̤tò̤. Dě pa Běcǎ Ye̤shǔkhrî̌stu khû̌khî, a wû̌lǎ pa ta pa nî̤bǎ ta̤ma̤lû̌htò̌ge htǒonupwǎ. 10Pa si bǎbǎ, pa htûpwa̤ bǎbǎ, ma̤pûhǐ pa ǒplǒ ta anu dě, a khòsi bǎ paya hǒ. 11Hǐnudě, ǐkhû̌ǐǎ kè̌khînû̌û tapwa̤ ta tapwa̤ dě ma̤jole̤ ma̤joge kè̌khînû̌û tapwa̤ ta tapwa̤ pwǐ sî ma̤ khònò̤ htǒonu nî̌꤮.

Ta̤sû̌ǐ yṳ̂klè̌nè̌klò ta ta̤hî̌mo̤hî̌wǒ gutṳ̌lò̤

12Pṳwè̤sî, kòyò htě a htû sî hǐkǒdû̌ dě Běcǎ akû ta a gûma̤ ta̤, a ǐsè̌rè̌nǎ bǎ sîklè̌ toǒnu pa kwigwèbǎǐ sî ta bè̌dubè̌na̤ lǒkho kòyò hǐnu toǒ nî̌꤮. 13Dě asî ma̤ lǒkho pwǐhè̌o akhû̌akhî, bè̌dubè̌na̤ sapwa̤ asî dě mo̤ǐ lǒ̤sû̌lǒ̤sò̌ asî nî̌꤮. Mo̤klaǐ nû̌û tapwa̤ ta tapwa̤ nî̌꤮. 14Pṳwè̤sî, pa kwigwèbǎǐ gepo̤sǒ sî ta, ǐsè̌rè̌ tûû̌ kòyò cè̌klèlèbǒnu toǒ nî̌꤮. Htodě ǐkhû̌ǐǎ kòyò htě a ǐshanu toǒ dě ma̤jè kòyò htě a khû̌ǎyû̌lò̤nu toǒ, htodě khòsò̌do bǎ kò pṳ̂̌꤮ tapwa̤ nî̌꤮. 15Noma̤ geshǔ pûma̤ kòyò htě kò ma̤sǔ nû̌ûnu toǒ ma̤ nî̌꤮. Mî̌tanu, jipwi̤ ma̤wǒ kè̌khînû̌û tapwa̤ ta tapwa̤ pṳ̂̌꤮ taplǎ dě jipwi̤ ma̤wǒ bǎ kòyò ahǔwa̤ toǒ nî̌꤮.

16Sò̌le̤sò̌lò̤ lǒkho pṳ̂̌꤮ plǎnî̌꤮.

17Kwisaba lǒkho pṳ̂̌꤮ taplǎ nî̌꤮.

18A htûhtò̌ hî̌tètè̌꤮ bǎbǎ, tûrû̌ hî̌bwǐhî̌sîrî lǒkho Cǒmara pṳ̂̌꤮ taplǎ nî̌꤮. Ma̤tè̤hî̌dě, Cǒmara sò̌phlǒǒ ta sî toma̤ hǐnu dě Ye̤shǔkhrî̌stu akû.

19Ma̤pi̤ pûma̤ Běcǎ sǎcahtǐ a ta̤ǎta̤wè̤ dě nakû toǒ ma̤ nî̌꤮. 20Gènè̤ pî̌tî̌ pûma̤ pwa̤po̤ a ta̤hî̌po̤phǎnǎnu toǒ ma̤ nî̌꤮. 21Sèlèkè̌htobò ta̤pṳ̂̌꤮ tacǎ dě phî̌shǔpû ta̤ htě awǒnu toǒ nî̌꤮. 22Cû̌we̤ khawe̤kè lǒkho ta̤phû̌mò̤shî̌hto pṳ̂̌꤮ tacǎ nî̌꤮.

Pò̌lu kwisaba ta Cǒmara glè howi̤ Tè̌shalò̌nia pwa̤yṳǎta̤ aprṳ̂ahophû̌ toǒ

23Cǒmara htě a ǐ sana̤ pa ta̤gûjûkabǎ htǒotapwa̤ ma̤wî̤ma̤cahtǐ lǒbehtò̌ tû̌ta sî nî̌꤮. Htohǒtò̤ htû̌꤮ pa Běcǎ Ye̤shǔkhrî̌stu hèsǒ pěnu, ma̤pûhǐ kò bè̌jòpe pû sî ta̤sǔ tò̤nu, Cǒmara kè̌ǐkhwè̌ǐpo̤bò sî na̤klû ta sîsò̌ ta sî ta̤ǒhtûpwa̤ pě nî̌꤮. 24Cǒmara htě a kaǎ sî htǒotapwa̤nu, a ma̤ mè̤mè̤̌ bǎ sî hǐnu pě, ma̤tè̤hî̌dě a mî̌ Cǒmara htě acǒatè̤ ta ayo̤ tapwa̤.

25Pṳwè̤sî, kwisabadǒ lǒkho paya nî̌꤮. 26Hî̌mo̤hî̌wǒbò pṳwè̤ htě a yṳǎna̤ǎta̤nu toǒ dě gomo̤ nû̌û tapwa̤ ta tapwa̤ dě ta̤gomo̤ cahtǐ akûnu nî̌꤮. 27Dě Běcǎ ami̤akû, he nolò̤ sî ta sî dǒlṳ bǎ he lî̤htǒotabǎ dě pṳwè̤ htě a yṳǎna̤ǎta̤ pṳ̂̌꤮ tapwa̤ a lo̤mo̤ nî̌꤮.

28Běcǎ Ye̤shǔkhrî̌stu abwǐasîrî ǒkû̌ tû̌ta sî nî̌꤮.