1Th 1 | KxfSCKRC | STEP | Pa mî̌ Pò̌lu, Sǐla, ta Timò̤̌te. Pa khwè̌cû̌ plǒnû̌û lî̤htǒotabǎ dě sî Tè̌shalò̌nia pwa̤yṳǎta̤ aprṳ̂ahophû̌ toǒ a ǒ. Sî Tè̌shalò̌nia pwa̤yṳǎta̤ aprṳ̂ahophû̌ toǒ mî̌ pha Cǒmara ta Běcǎ Ye̤shǔkhrî̌stu akòyò toǒ hǒ. Ta̤bwǐta̤sîrî ta ta̤gûjûkabǎ ǒkû̌ tû̌ta sî nî̌꤮.

1 Thessalonians 1

1 Pa mî̌ Pò̌lu, Sǐla, ^{▼▼Dě Greekyo̤ mî̌ a hî̌ nû̌ûta “Silvanus”} ta Timò̤̌te. Pa khwè̌cû̌ plǒnû̌û lî̤htǒotabǎ dě sî Tè̌shalò̌nia pwa̤yṳǎta̤ aprṳ̂ahophû̌ toǒ a ǒ. ^b

Sî Tè̌shalò̌nia pwa̤yṳǎta̤ aprṳ̂ahophû̌ toǒ mî̌ pha Cǒmara ta Běcǎ Ye̤shǔkhrî̌stu akòyò toǒ hǒ. Ta̤bwǐta̤sîrî ta ta̤gûjûkabǎ ǒkû̌ tû̌ta sî nî̌꤮.

Tè̌shalò̌nia pwa̤yṳǎta̤ aprṳ̂ahophû̌ toǒ a ta̤ǒhtûpwa̤ ta a ta̤yṳta̤nǎ

2 Bǎ pa kwisaba sî lǒ̤꤮ bò aya akhanu, pa hî̌bwǐhî̌sîrî Cǒmara pṳ̂̌꤮ taplǎ. 3 Sî ta̤yṳta̤nǎ akhû̌khî, sî ma̤ta̤ ahtûhtò̌, sî ta̤mo̤ǐ kò akhû̌akhî, sî gûma̤ ta̤, dě sî ǒ ta ta̤kè̌shuǐ dě pa Běcǎ Ye̤shǔkhrî̌stu alo̤ akhû̌khî, sî khòsò̌dobò̌ ta̤ma̤jîma̤jû sî toǒ. Bǎ pa kwisaba dě papha Cǒmara ǒ akhanu, sî ma̤ta̤ lǒ̤꤮ bò htǒotoǒnu, pa shope̤nǎpè̤pe tò̤.

4 Pṳwè̤ htě Cǒmara mo̤ǐ toǒ, pa sî̌ya ta sî mî̌ kòyò htě Cǒmara wû̌lǎ sîtoǒ hǒ. 5 Ma̤tè̤hî̌dě pa phî̌hè bǎ sî ta̤sò̌le̤sò̌lò̤ awi̤akè̌ htǒonumî̌ tǒ̤pwǎ pa khû̌phě a ta̤hî̌bǎnu mè̤tò̤. Ta̤sò̌le̤sò̌lò̤ awi̤akè̌ htǒonumî̌, a ǒ ta a sîrîshû̌sho, a ǒ ta Běcǎ sǎcahtǐ, a ǒ ta ta̤yṳǎ bòmṳ̂sîglî ta̤sò̌le̤sò̌lò̤ awi̤akè̌ a ta̤cǒta̤tè̤ htǒotoǒ. Dě bǎ pa ǒkû̌ ta sî akhanu, pa mî̌ kòyò hî̌tè toǒnu, sî sî̌yahtotû̌ hǒ. Htǒonumî̌ pa ǒhtûpwa̤ ta sî la̤nî̤bwǐnî̤sîrî aya pwǎ. 6 Sî kè̌mò̌mṳ pa ta Běcǎ dě kò ma̤jîma̤jû mè̤mè̤̌ sî, pò̤̌ta sî sò̌le̤sò̌lò̤ phî̌shǔpe ta̤sò̌le̤sò̌lò̤ awi̤akè̌. Bǎ sî phî̌shǔ ta̤sò̌le̤sò̌lò̤ awi̤akè̌ akhanu, Běcǎ sǎcahtǐ ma̤ sò̌le̤sò̌lò̤ bǎ sî hǒ. ^c 7 Hǐnudě sî htûhtò̌ kòyò htě a yṳǎna̤ǎ Khrî̌stu dě a ǒ bǎ Makedò̌niagakûnu toǒ ta Akhayagakûnu toǒ ala̤kè̌mò̌mṳ hǒ. 8 Ma̤tè̤hî̌dě Běcǎ a ta̤sò̌le̤sò̌lò̤ awi̤akè̌ htě sî dǒhtû̌ǐ bǎ kò htǒonu, a lṳcû̌to̤ pwǎ dě Makedò̌niaga ta Akhayagakûnu mè̤tò̤. Sîmi̤ htě sî yṳǎna̤ǎ Cǒmara awi̤akè̌ htǒonu, a lṳpîshî cû̌to̤bò dě gûla̤ pṳ̂̌꤮ tò̤glò hǒ. Hǐnudě sî ta̤yṳ awi̤akè̌ htǒonu pa lo̤bǎ dǒhtû̌ǐlṳpe bǎ kò dǐpwǎ̤꤮ tò̤. 9 Bǎ pa hè ǒlèkû̌ sî akhanu, sî kaǎshǔ lǒkho pa hî̌tènu, kòyò lǒ̤bò ǒ bǎnu toǒ pwe̤ǐbò pa. A pwe̤ǐ bǎ pa ta ma̤pûhǐ sî ma̤kû̌ Cǒmara htě a htûpwa̤ dě acǒatè̤ mè̤mè̤̌ htǒotapwa̤ a ta̤ma̤nu, sî wîkèbò sî ta̤saba pwa̤yo̤ toǒ. 10 Htodě Cǒmara aphû̌khû Ye̤shǔ htě apha ma̤ htûpwa̤gesǒ nû̌û ta ta̤si htǒotapwa̤ ǒ dě mǒkhû̌ hèlò̤ gesǒ pěnu, sî ǒpo̤kè̌shuǐ lǒkho hî̌tènu asî hî̌bò bǎ pa. Ye̤shǔ mî̌ pwa̤ ma̤lû̌htò̌ge pa ta Cǒmara a ta̤sò̌dû̌ dě a cèrò kò pě htǒonu tapwa̤ acǔdekû hǒ.