1Ti 2 | KxfSCKRC | STEP | Dě ta̤ lǒ̤bò aklanu ta̤htě a lo̤bǎdû̌gutṳ̌ dě he sò̌yṳ ǐkhû̌ǐǎ sî numî̌ mî̌pwǎ sî glè kwisaba bǎ kòya pṳ̂̌꤮ tapwa̤, dě kwinṳdǒ bǎ kòhǔwa̤ atalo̤bǎ toǒ, htodě hî̌bwǐhî̌sîrîhtò̌ bǎ Cǒmara ta kòyò lǒ̤꤮ bò aya.

1 Timothy 2

Pwa̤yṳǎta̤ aprṳ̂aho a ta̤subusaba

1 Dě ta̤ lǒ̤bò aklanu ta̤htě a lo̤bǎdû̌gutṳ̌ dě he sò̌yṳ ǐkhû̌ǐǎ sî numî̌ mî̌pwǎ sî glè kwisaba bǎ kòya pṳ̂̌꤮ tapwa̤, dě kwinṳdǒ bǎ kòhǔwa̤ atalo̤bǎ toǒ, htodě hî̌bwǐhî̌sîrîhtò̌ bǎ Cǒmara ta kòyò lǒ̤꤮ bò aya. 2 Saba lǒkho hǐnu ta Khwǐ toǒ aya ta pwa̤pǒta̤ lǒ̤꤮ bò toǒ aya. Ma̤pûhǐ pa sabahtò̌ sî̌tukǔ gûjûkabǎ Cǒmara ayanu, ta ǒhtûpwa̤ te̤bǎte̤to kû̌kò ta ta̤pṳ̂̌꤮ tacǎ akûnu dě, kwisaba lǒkho hǐnu nî̌꤮. 3 Htǒomî̌ ta̤htě awǒ dě a ma̤sò̌le̤sò̌lò̤ pa Cǒmara htě a ma̤lû̌htò̌ge pa htǒotapwa̤ asò̌phlǒ. 4 Cǒmara sò̌phlǒǒ ta kòyò pṳ̂̌꤮ tapwa̤ glè nî̤bǎ ta̤ma̤lû̌htò̌ge dě a sî̌ya lǒkho ta̤te̤ta̤mǎ. 5 Ma̤tè̤hî̌dě Cǒmara ǒtû̌ tapwǎ̤꤮ pa. Htodě kòyò htě a ma̤pè̤ma̤dû bǎ gesǒ Cǒmara ta kòyòhǎkhû̌phû̌nu a ǒ tapwa̤. A mî̌ kòyòphû̌khû Ye̤shǔkhrî̌stu htǒonuhǒ. 6 Ma̤pûhǐ a ma̤lû̌htò̌ge kòyòhǎkhû̌phû̌ lǒ̤꤮ bò ayanu, a ǐlò̤kè a ta̤htûpwa̤. A mî̌ pwa̤lò̤sasî̌ dě a hè tokhîkha tapwa̤. 7 Dě ta̤wi̤ta̤kè̌ htǒo aya, kò nohtû he pwǐ pwa̤dǒhtû̌ǐta̤ tapwa̤ ta pwa̤nophû̌ tapwa̤ ta sara htě a glè sû̌ǐbǎ Yṳ̌daphû̌ mè̤tò̤ toǒ ta ta̤yṳta̤nǎ ta ta̤cǒta̤tè̤ htǒo awi̤akè̌ tapwa̤ hǒ. He hî̌ lòhǎlòho nǒtò̤. He hî̌cǒtè̤ pwǎ. ^a

8 Hǐnu akhû̌akhî, gûla̤ pṳ̂̌꤮ tò̤glònu he sò̌yṳ ta makhû lǒ̤꤮ bò toǒ glè yṳ̂htò̌ acǔde cahtǐ dě kwisabata̤. Dě a ta̤kwisaba akûnu, ta̤to̤klî̌, ta̤sò̌phlǒdû̌ toǒnu a tobǎ ǒ tò̤.

9 He sò̌yṳkû̌ ta mamǔ lǒ̤bò toǒ glè bè̌sû̌bè̌sǎ lǒkho a ta̤kûta̤sǒ toǒ. Kûsǒ lǒkho ta̤ htě atoabǎnu toǒ, tîwî̌ htû̌shò̌na̤ dě sǐ pûma̤ khû̌lṳ ma̤, kûshû̌htò̌ pûma̤ hta ta lo̤po̤lo̤sè̌ toǒ ma̤, dě kûsǒhtò̌ pûma̤ hǐdohǐyò̤ htě ale̤dû̌pwî̤htûnu toǒ ma̤. ^b 10 Pwǎ̤ta, mamǔ mî̌ tobǎ tîwî̌ htû̌shò̌ ma̤wî̤ ana̤ ta ta̤ma̤ htě awǒ toǒ. Mamǔ htě a olò̤ ta a glè bè̌dubè̌na̤ Cǒmara toǒnu, a tobǎ ma̤ lǒkho ta̤wǒ hǐnu toǒ.

11 Bǎ mamǔ toǒ sû̌ǐ sî̌ya lǒkho ana̤ akhanu, asî tobǎ sû̌ǐ sî̌ya dě ta̤ǒsǔǒsè̌ akû ta dě ta̤gana̤debò yo̤ akû. 12 A glè phî̌nṳ akhîakha dě asî sû̌ǐ makhû toǒ bǎbǎ, noǎ a ta̤sîrîshû̌sho dě makhû toǒ akhû̌ bǎbǎ, he plûma̤ asî tò̤. Asî bǎ ǒsǔǒsè̌ pwǎ. 13 Ma̤tè̤hî̌dě Cǒmara bǒlò̤ wǐgutṳ̌ Ada. ^c Dě Ěwa̤ numî̌, Cǒmara bǒlò̤ nǒpwǎ yǎ nǒkò. ^d 14 Dě khînǎmo̤pha hǐkǒdû̌ lǒplò̤ Ada mè̤tò̤. Khînǎmo̤pha hǐkǒdû̌ lǒplò̤ yǎ dě a ma̤ta̤sǔ numî̌ mamǔ pwǎ. ^e 15 Pò̤̌ta mamǔ toǒǒnu, a dè ǒměǒgle lǒkho dě a ta̤yṳta̤nǎ ta ata̤mo̤ǐ, ta a ta̤cahtǐ akû dě a dè ǒ lǒkho ta a ta̤bè̌sû̌bè̌sǎ sapwa̤ ana̤ hî̌numî̌, Cǒmara ma̤lû̌htò̌ge asî bǎ asî phû̌ǒ akhanu pě.