1Ti 4 | KxfSCKRC | STEP | Běcǎ sǎcahtǐ pwe̤ǐ te̤mǎ ta htû̌꤮ mṳni̤gutṳ̌lò̤ toǒ akû pěnu, kòyò toǒǒ wîkè lǒkho a ta̤yṳta̤nǎ pě dě asî gana̤de khînǎ htě a lòhonu toǒ pě, dě a gûkû̌ khînǎ htě a lòhǎlòho toǒ a ta̤sû̌ǐtòwòǐ toǒ pě.

1 Timothy 4

Sara wǒtò̤ toǒ

1 Běcǎ sǎcahtǐ pwe̤ǐ te̤mǎ ta htû̌꤮ mṳni̤gutṳ̌lò̤ toǒ akû pěnu, kòyò toǒǒ wîkè lǒkho a ta̤yṳta̤nǎ pě dě asî gana̤de khînǎ htě a lòhonu toǒ pě, dě a gûkû̌ khînǎ htě a lòhǎlòho toǒ a ta̤sû̌ǐtòwòǐ toǒ pě. 2 Ta̤sû̌ǐtòwòǐ htǒotoǒ numî̌ a hè dě kòyò lòhǎlòho toǒ a ǒ. Bǎ asî ma̤sǔta̤ akhanu, a gènè̤ ta a ma̤sǔta̤ dî̌kî̌꤮ tò̤. 3 Asî sû̌ǐsǔ kò ta nophî̌ kòmakòwṳ̂ tò̤, htodě shǎǎshǎo toǒǒnu a nodǔǎdǔo kò. Pwǎ̤ta Cǒmara bǒlò̤ bǎ shǎǎ htǒotoǒ ta pwa̤yṳǎna̤ǎta̤ toǒ aya. Kòyò htě a yṳǎna̤ǎta̤ toǒ ta kòyò htě a sî̌ya ta̤te̤ta̤mǎ toǒ ayanu, a dè hî̌bwǐhî̌sîrîhtò̌ Cǒmara dě a phî̌ǎ shǎǎ htě Cǒmara bǒlò̤ htǒotoǒ hî̌numî̌ anî̤ pwǎ. 4 Ma̤tè̤hî̌dě Cǒmara bǒlò̤bò ta̤ toǒ numî̌ awǒbòpwǎ pṳ̂̌꤮ tacǎ. Na dè phî̌shǔjò ta̤pṳ̂̌꤮ tacǎ ta ta̤hî̌bwǐhî̌sîrî hî̌numî̌ to wîkè yǎ dǐcǎ꤮ tò̤. 5 Ma̤tè̤hî̌dě Cǒmara ale̤ayo̤ ta pa ta̤kwisaba akhû̌akhî, Cǒmara jû dě a glè phî̌shǔ ta̤htǒotoǒ hǒ.

Ye̤shǔkhrî̌stu apwa̤ma̤ta̤ awǒ tapwa̤

6 Na dè sû̌ǐ pṳwè̤ Khrî̌stuphû̌ toǒ ta ta̤htǒotoǒ hî̌numî̌ na htûtû̌ Ye̤shǔkhrî̌stu apwa̤ma̤ta̤ awǒ tapwa̤ pě. Bǎ na ma̤hǐnu akha, na bǔǐdû̌htò̌tû̌ nana̤ ta ta̤te̤ta̤mǎ dě ta̤yṳta̤nǎ akûnu toǒ ta ta̤sû̌ǐtòwòǐ awǒ htě na gûma̤nu toǒ pě. 7 Pwǎ̤ta ta̤dǒnè dě꤮ wǐnu htě a te̤bǎte̤to kû̌ta Cǒmara mè̤tò̤nu toǒ ta, ta̤dǒnè htě abwǐasîrî ǒtò̤nu toǒnu, cû̌we̤ khawe̤kè lǒkho nî̌꤮. Mî̌tanu ma̤pûhǐ na ǒhtûpwa̤ pwǐ Cǒmara a ta̤sò̌yṳ ayanu, sû̌ǐgejò nana̤ pṳ̂̌꤮ taplǎ nî̌꤮. 8 Ta̤sû̌ǐ htò̌jò na̤ ta na̤klûphěyî̌ tokho numî̌, abwǐasîrî ǒ toǒ. Pwǎ̤tadě sû̌ǐ htò̌jò nana̤ pwǐ Cǒmara sò̌yṳ noǒhtûpwa̤ na numî̌ abwǐasîrî ǒbò. Pa cû̌sû̌ǐ htò̌jò tǒ̤ pana̤ pwǐ Cǒmara a ta̤sò̌yṳnu ma̤tè̤hî̌dě, ta̤htǒonu a htûbwǐhtûsîrî mè̤mè̤̌ tû̌htǒo tuhtu ayanu mè̤tò̤, htû̌꤮ nǒkòpě tuhtu aya bǎbǎ, a htûbwǐhtûsîrî mè̤mè̤̌ pě.

9 Ta̤hî̌bǎ htǒonumî̌ acǒatè̤ dě kòyò lǒ̤꤮ bò tobǎ phî̌shǔ lǒ̤sû̌lǒ̤sò̌ yǎ, 10 Mî̌htě htǒo akhû̌akhî, pa jipwi̤jili̤ ma̤mè̤mè̤̌ ta̤, ma̤tè̤hî̌dě pa bè̌ pa ta̤kè̌shuǐ dě Cǒmara htě a htûpwa̤ htǒotapwa̤ alo̤. A mî̌ pwa̤ma̤lû̌htò̌ge kòyò lǒ̤꤮ bò, Pwǎ̤tadě kòyò htě a yṳǎna̤ǎ nû̌û toǒ ayanu, a mî̌ pwa̤ma̤lû̌htò̌ge htě a te̤mǎkhlo tapwa̤ hǒ.

11 Mǎnǎ asî yo̤ dě sû̌ǐtòwòǐ asî ta ta̤htǒo toǒ nî̌꤮. 12 Na mî̌ kòyò nějape akhû̌akhî, nogènè̤ pî̌tî̌ pûma̤ kò ta nana̤ ma̤ nî̌꤮. Mî̌tanu, na ta̤hî̌bǎhî̌sho toǒ bǎbǎ, na ma̤ta̤ titètè̌ bǎbǎ, na ta̤mo̤ǐ bǎbǎ, na ta̤yṳta̤nǎ bǎbǎ, na sò̌phlǒ a ta̤mṳ̂plî toǒ bǎbǎ, htûhtò̌ bǎ kò la̤kè̌mò̌mṳ htě awǒ ta kòyò yṳǎta̤ toǒ aya nî̌꤮. 13 Ǐ na ta̤akhîakha dě jipwi̤ dǒ bǎ kò lî̤cahtǐ dě a lo̤mo̤ nî̌꤮, dǒhtû̌ǐlṳ bǎ kò dě, sû̌ǐtòwòǐ to̤ bǎ kò htû̌꤮ he hèto̤kû̌ na pěnu nî̌꤮. 14 Kè̌bò̌khû̌kè pûma̤ Běcǎ sǎcahtǐ asû htě Cǒmara ǐhto nanu ma̤ nî̌꤮. Bǎ pwa̤yṳǎta̤ aprṳ̂aho wè̤khǔwè̤pwa̤ htě a htû hǐkǒdû̌ toǒ bè̌htò̌ acǔde dě nalo̤ akha, na nî̤bǎ tṳtṳ sû htǒonu dě kòyò hî̌po̤phǎnǎ nawi̤nakè̌nu toǒ a ǒ hǒ.

15 Ma̤pûhǐ kòyò lǒ̤bò kè̌shǐ na ta̤dû̌htò̌htûhtò̌ htǒo ayanu, ǐlò̤ na sò̌phlǒ ta ta̤htǒotoǒ aya dě ma̤yǎ pṳ̂̌꤮ taplǎ nî̌꤮. 16 Na hî̌bǎhî̌sho bǎbǎ, na ma̤ta̤ titètè̌ bǎbǎ, na sû̌ǐtòwòǐ kò toǒnu bǎbǎ, sè̌rè̌ǐ yǎ nî̌꤮. Ǒměǒgle ta ta̤htǒotoǒ akû pṳ̂̌꤮ taplǎ nî̌꤮, ma̤tè̤hî̌dě, na dè ma̤hǐnu hî̌dě na ma̤lû̌htò̌getû̌ nana̤pa mè̤tò̤, na ma̤lû̌htò̌gedǒ bǎ kòyò htě a gana̤dekû̌ nanu toǒ pě.