1Ti 6 | KxfSCKRC | STEP | Ma̤pûhǐ Cǒmara ami̤ ta̤pi̤jishǐcǒ bǎ tò̤nu, htodě ma̤pûhǐ kò dǒ pû pa ta̤sû̌ǐtòwòǐ htǒotoǒ ayo̤ dǐpwǎ̤꤮ tò̤nu, kòyò lǒ̤꤮ bò htûjû toǒnu, a tobǎ bè̌ lǒkho asò̌phlǒ ta a gwa bè̌dubè̌na̤ aběcǎ toǒ.

1 Timothy 6

1 Ma̤pûhǐ Cǒmara ami̤ ta̤pi̤jishǐcǒ bǎ tò̤nu, htodě ma̤pûhǐ kò dǒ pû pa ta̤sû̌ǐtòwòǐ htǒotoǒ ayo̤ dǐpwǎ̤꤮ tò̤nu, kòyò lǒ̤꤮ bò htûjû toǒnu, a tobǎ bè̌ lǒkho asò̌phlǒ ta a gwa bè̌dubè̌na̤ aběcǎ toǒ. 2 Jû htě a ǒ ta aběcǎ dě a yṳǎna̤ǎhto Khrî̌stu toǒnu, heběcǎ mî̌ pwa̤yṳǎphû̌ pwǎ gènè̤ dě to ma̤tukutakǎ aběcǎ tò̤. Mî̌tanu, a bǎ ma̤wǒkhlo ta̤ ta hǐnu, ma̤tè̤hî̌dě aběcǎ htě asî ma̤ bǎ nû̌û a ta̤phî̌ta̤ma̤ htǒotapwa̤ numî̌ kòyò htě a yṳǎna̤ǎ Ye̤shǔkhrî̌stu dě jûtoǒ mo̤ǐ nû̌û akhû̌akhî, asî tobǎ ma̤wǒkhlo. Sîbǎ sû̌ǐ asî dě noshû̌ asî ta a glèbǎ gûma̤ hǐnu.

3 Kòyò toǒǒnu a sû̌ǐtòwòǐ sǔ lǒkho kò. Asî ta̤sû̌ǐtòwòǐ htǒonu, ato kû̌ta pa Běcǎ Ye̤shǔkhrî̌stu a ta̤sû̌ǐtòwòǐ htě atoamè̤ htǒonu tò̤. Ta̤sû̌ǐtòwòǐ htě a glè ma̤jè bǎkò pwǐ Cǒmara sò̌yṳ noǒhtûpwa̤ kò toǒnu asî sû̌ǐ bǎkò tò̤tò̤. 4 Hǐnudě kòyò htǒotoǒnu, a phî̌dû̌phî̌htû tûlû̌shû̌ lǒkho asò̌phlǒ dě a sî̌ya lǒkho dǐcǎ꤮ tò̤. Asî sò̌phlǒsho tûlû̌shû̌ dě a glè gègo kò ta lî̤phlǒ tophlǒ ta tophlǒ amûasǎ toǒ akhû̌akhî, ta̤htǒotoǒnu, a noǒhtò̌pwǎ ta̤sò̌khě nû̌û, ta̤ma̤nî̤, ta̤pi̤jishǐcǒ, ta ta̤gènè̤sǔ kè̌khînû̌û toǒ. 5 Htohǒtò̤, a noǒhtò̌ ta̤gègo kò pṳ̂̌꤮ taplǎ. Kòyò htě a gègo kò htǒotoǒ a ta̤gènè̤ numî̌ a phû̌mò̤shî̌hto dě ta̤te̤ta̤mǎ ǒpe asîkû tò̤. Ta̤subusaba numî̌ klè̌ htě kò glè dû̌yò̤htò̌sa aya tabo asî gènè̤ lǒkhopwǎ hǐnu.

6 Pwǎ̤tadě, kòyò htě a dè yṳǎ Cǒmara tapwa̤pwa̤ dèhî̌nu a ǒ ta ta̤sò̌phlǒmo̤. Htodě ta̤wǒ sû̌sò̌ toǒnu a ma̤lǒma̤be bǎ nû̌û ta̤ǒhtûpwa̤ toǒ pě. 7 Bǎ pa hè ǒphijaû̌lò̤ dě hǎkhû̌bǎo akhanu, pa phî̌hènṳ ta̤ tacǎcǎ ya? Pa phî̌hènṳ ta̤ dǐcǎ꤮ tò̤. Pa glè phî̌genṳjòsǒ ta̤dě hǎkhû̌bǎomî̌ a ǒ titè? Pa phî̌genṳjò ta̤ dǐcǎ꤮ tò̤. 8 Pò̤̌ta, pa la̤ǎla̤o ta pa ta̤kûta̤sǒ toǒ dèǒhǒnu, pa sò̌phlǒmo̤ hǒ. 9 Pwǎ̤tadě kòyò htě a sò̌yṳ dû̌yò̤htò̌sa toǒnu, a lòte̤nṳ dě ta̤lǒǎplò̤ǎ akûhǒ. Htohǒtò̤ a lòte̤nṳ dě ta̤sò̌yṳ htě a nòdû̌ htǒonu toǒ akû ta ta̤sò̌yṳ htě a ma̤bǎsha gesǒ nû̌û htǒonu akû hǒ. A ta̤sò̌yṳ htǒonu a coklomě nû̌û ta sǒpli̤ hǒ. Dě ta̤sò̌yṳ htǒonu a shò̌lòte̤ asî dě ta̤pî̌ta̤lṳ̂ ta ta̤lòte̤pro̤ akû htǒonuhǒ. 10 Ma̤tè̤hî̌dě ta̤sò̌yṳ wû numî̌ ta̤phû̌mò̤shî̌hto lǒ̤꤮ bò akhò̌wi̤ hǒ. Kòyò toǒǒnu, a sò̌phlǒsho sò̌yṳ tûlû̌shû̌ wû khû̌khî, asî cû̌tephekè ta ta̤yṳta̤nǎ dě nî̤bǎplṳ̂ ta̤sǎpla̤ htǒo ma̤shama̤htòbò asî sò̌phlǒhǒ.

Ta̤mǎnǎta̤hî̌bǎ ta Timò̤̌te aya

11 Pwǎ̤ta na dě na htû Cǒmara akòyò akhû̌akhî, khlè̌cû̌ tephekè ta ta̤ lǒ̤꤮ bò htǒo toǒ nî̌꤮. Ma̤pûhǐ na ǒ ta ta̤cǒta̤tè̤, ta̤yṳǎ Cǒmara, ta̤yṳta̤nǎ, ta̤mo̤ta̤kla, ta̤khòbǎta̤, ta̤sò̌dohobî̌ sî toǒnu dě jipwi̤ ma̤kû̌ ta̤htǒotoǒ nî̌꤮. 12 Ta̤yṳta̤nǎ a ta̤shěta̤pe̤nu tûrû̌ jipwi̤ shě yǎta awǒ gutṳ̌ nî̌꤮, dě pṳ̂měǐwǒ yolahtûpwa̤ tûjûpwa̤ htǒonu nî̌꤮. Bǎ na olò̤ na ta̤yṳta̤nǎ htǒonu dě kò saprṳ̂ a lo̤mo̤ akhanu, Cǒmara kaǎ na dě na nî̤bǎ yolahtûpwa̤ tûjûpwa̤ htǒonu hǒ. 13 Cǒmara htě a ma̤htûpwa̤ ta̤pṳ̂̌tacǎ htǒotapwa̤ alo̤mo̤ ta Ye̤shǔkhrî̌stu htě a olò̤ ayo̤ Khwǐpontius Pilǎto htǒotapwa̤ alo̤mo̤nu, he glè mǎnǎkè nayo̤. ^a 14 Dě he mǎnǎkè na htǒo, jûle̤phî̌yo̤ cǒtè̤ ta̤mǎlò̤ htě he ǐhto nanu toǒ. Nadě nobè̌ pûma̤ ta̤sǔ ta kò ma̤. Tûrû̌ ma̤hǐnu to̤htû̌ Běcǎ Ye̤shǔkhrî̌stu hèǒlṳhtò̌ gesǒ pě taplǎnu nî̌꤮. 15 Cǒmaradû̌ htě kòyò htû̌sò̌ǐ nû̌û htǒotapwa̤ ta tû̌pwǎ a tapwa̤ htě a pǒǐ ta̤ lǒ̤꤮ bò htǒonu, ta Khwǐ toǒ akhwǐ, Běcǎ toǒ a Běcǎ htǒotapwa̤nu, a nohè ǒlṳhtò̌tû̌ Ye̤shǔkhrî̌stu bǎ akhîakha te̤bǎte̤tonu pě. 16 Cǒmara htě a sijòtò̤ numî̌ tû̌pwǎ a tapwǎ̤꤮ pa. A htûpwa̤ dě ta̤lîrakhakû, dě kò hèphǔjò dě a ǒ dǐpwǎ̤tò̤ htǒonu akû. Kò kè̌shǐnǒ yǎ dǐpwǎ̤tò̤ htodě kò kè̌shǐjò yǎ dǐpwǎ̤tò̤. Ta̤bè̌dubè̌na̤ ta ta̤po̤ta̤phǎ tûjûpwa̤ talakhǎ ǒkû̌ tû̌ta a nî̌꤮ Amè̤.

17 Mǎnǎ nayo̤ ta kòyò dû̌yò̤htò̌sa dě hǎkhû̌bǎotoǒnu, dě hî̌ asî ta phî̌dû̌phî̌htûlṳ pûma̤ sîna̤ ma̤, nǎla̤htò̌ǐ pûma̤ sî ta̤dû̌yò̤htò̌sanu toǒ ma̤. Ta̤dû̌yò̤htò̌sa htǒotoǒnu, a ǒlṳpwǎ teděsǎpa dě a hǎmǎkè pě hî̌ asî hǐnu nî̌꤮. Pwǎ̤ta asî tobǎ kè̌shuǐ dě Cǒmara a ǒ. Ma̤pûhǐ pa sò̌le̤sò̌lò̤ ayanu, Cǒmara ǐ lò̤gulò̤wṳ̂ bǎ pa pṳ̂̌꤮ taplǎhǒ. 18 Mǎnǎ nayo̤ ta kòyò dû̌yò̤nu toǒnu, dě hî̌ asî ta nodû̌yò̤kû̌ lǒkho asî ta ta̤ma̤wǒnu tokho nî̌꤮. Dě nosò̌le̤sò̌lò̤ yṳ̂pa̤lò̤ bǎ kò, hî̌ asî ta noma̤shû̌ma̤jo plṳ̂pa̤kû̌ yǎta kòhǔwa̤ toǒ nî̌꤮. 19 Asî dè ma̤mò̌hǐnu, asǒsǒta asî bè̌plǒǐ a ta̤dû̌yò̤htò̌sa dě a bǒpwi̤bǒwǒ akòshî̌htǒo htû̌꤮ nǒkòpě tuhtu ayanuhǒ. Htodě asî pṳ̂měǐtû̌ ta̤htûpwa̤ htě a mè̤mè̤̌ htǒonu pě.

20 Timò̤̌te꤮ pṳ̂mě ma̤kwaǐwǒ ta̤ htě Cǒmara yṳǎ na ta na glè kè̌ǐkhwè̌ǐwǒ ta̤nu toǒ nî̌꤮. Cû̌we̤ khawe̤ kòyò htě a bè̌dubè̌na̤ kû̌kò Cǒmara tò̤nu toǒ a ta̤dǒhtû̌ǐ ta a ta̤gègo nòdû̌ nû̌û dě kòyò toǒǒ gènè̤sǔjò yǎta “Ta̤sî̌ya” nutoǒ nî̌꤮. 21 Kòyò toǒǒ yṳǎtû̌ a ta̤sî̌khû̌sî̌ya htǒotoǒ akhû̌akhî, a cû̌pa̤kè ta ta̤yṳta̤nǎ mè̤mè̤̌ htǒonu hǒ. Cǒmara abwǐasîrî ǒkû̌ tû̌ta sî lǒ̤꤮ bò nî̌꤮.