1Ti 5 | KxfSCKRC | STEP | Sǎhtǎ pûma̤ makhû mo̤pwa̤ ma̤ nî̌꤮, pwǎ̤tadě kwigwèbǎ hî̌bǎ bè̌dubè̌na̤ yǎ pwǐ na kwigwèbǎǐ naphanu nî̌꤮. Makhû htě aněja toǒnu bè̌ yǎ pwǐ napṳ ta nana̤nu nî̌꤮.

1 Timothy 5

Ta̤dò̌khû̌ htě kòyò yṳǎna̤ǎ toǒ aya

1 Sǎhtǎ pûma̤ makhû mo̤pwa̤ ma̤ nî̌꤮, pwǎ̤tadě kwigwèbǎ hî̌bǎ bè̌dubè̌na̤ yǎ pwǐ na kwigwèbǎǐ naphanu nî̌꤮. Makhû htě aněja toǒnu bè̌ yǎ pwǐ napṳ ta nana̤nu nî̌꤮. 2 Bè̌dubè̌na̤ lǒkho mamǔ mo̤pwa̤ toǒ pwǐ namo̤nu nî̌꤮. Htodě mamǔ htě aněja toǒnu, bè̌dubè̌na̤ asî dě gènè̤ mṳ̂plî asî pwǐ na pṳmamǔnu nî̌꤮.

3 Mamǔǒkhwè̌ htě kò pwa̤ma̤jo nû̌û ǒtò̤ toǒnu, bè̌dubè̌na̤ asî dě kè̌ǐkhwè̌ǐma̤jè asî nî̌꤮. 4 Pwǎ̤ta mamǔǒkhwè̌ tapwa̤nu a dè phû̌ǒ, mètò̤mî̌ ali̤ toǒ dèǒ hî̌mò̌nu, aphû̌ali̤ sîtoǒ tobǎ kè̌ǐkhwè̌ǐ wǐ a mo̤ǒkhwè̌ a phiǒkhwè̌ htǒo pwǐ Khrî̌stuphû̌ la̤klo ma̤nu. Hǐnu akhû̌akhî, ma̤bwǐma̤sîrîge mo̤phaphiphu toǒ ta klè̌ pwǐhè̌o nî̌꤮, ma̤tè̤hî̌dě ma̤ta̤hè̌o toǒ numî̌ ato Cǒmara asò̌phlǒ. 5 Mamǔ tapwa̤ a ǒkhwè̌ mè̤mè̤̌ dě kò pwa̤kè̌ǐkhwè̌ǐ nû̌û ǒtò̤ tapwa̤nu, a kè̌shuǐ a ta̤ma̤jè dě Cǒmara a ǒ. Htodě lṳmṳkhǐkhǐ lṳmṳshasha a kwisaba sala̤la̤. Htohǒtò̤ a kwigwèbǎǐ Cǒmara ta a glè ma̤jè nû̌û. 6 Pò̤̌ta mamǔǒkhwè̌ tapwa̤ dě a kè̌lǎ a ta̤sò̌le̤sò̌lò̤ a ta̤ma̤mo̤lò̤ ana̤ tapwa̤nu, a htûpwa̤ pwǎ̤ta a sihto hǒ. 7 Ma̤pûhǐ kò bè̌ pû asî ta̤sǔ tò̤nu, sû̌ǐtòwòǐ lò̤bǎ kòyò htě a yṳǎ Ye̤shǔ toǒ glè ma̤ lǒkho hǐnu nî̌꤮. 8 Kòyò tapwa̤pwa̤ a dè kè̌ǐkhwè̌ǐ akhlialè tò̤ hî̌nu, a la̤kè Khrî̌stuphû̌ a ta̤sû̌ǐtòwòǐ hǒ. Dě a mî̌ kòyò htě a jîkhlope ta kòyò htě a yṳǎkû̌kò Khrî̌stu tò̤ tapwa̤. A jîgutṳ̌ mî̌ kòyò htě a kè̌ǐ a hǐphû̌phòphû̌ aphû̌ama tò̤nu toǒ hǒ.

9 Mamǔǒkhwè̌ tapwa̤pwa̤ dě aně dè behtò̌ shisusǒ hǒtò̤nu, bè̌ pûma̤ yǎ dě mamǔǒkhwè̌ a lî̤khwè̌mǎ akû ma̤ nî̌, htohǒtò̤ a to wṳ̂bǎǒpwǎ taplǎ pa. 10 Htodě a bǎ htû mamǔ htě ami̤lṳwǒ ta a ma̤ta̤wǒ toǒ akò. A bǎ htû mamǔ tapwa̤ dě a kè̌ǐkhwè̌ǐ dû̌htò̌wǒhtotû̌ aphû̌ali̤ toǒ, a bǎ dǒshuǐ shǐtè̤mè̤ toǒ dě a hǐdǒkû, a bǎ htû mamǔ tapwa̤ dě a shǔbò Cǒmara akòyò toǒ akhò̌lopo̤, ^{▼▼A mî̌ mamǔ tapwa̤ htě a ma̤ Cǒmara ata̤ma̤ dě ta̤shò̌lò̤sò̌ akû.} A bǎ ma̤jo kòyò bǎpò̤bǎsha toǒ htodě a bǎ htû mamǔ tapwa̤ dě a ǐlò̤ asò̌ ta a ma̤ta̤wǒ toǒ aya.

11 Pwǎ̤tadě, mamǔǒkhwè̌ dě anějape toǒnu, bè̌nṳ pûma̤ asî dě mamǔǒkhwè̌ a lî̤khwè̌mǎ akû ma̤. Ma̤tè̤hî̌dě bǎ asî sǐshiphěyî̌ a ta̤sò̌yṳ ma̤pî̌kè ata̤mo̤ǐ Khrî̌stu akhanu, asî sò̌yṳ tèplè̌sǒ lǒkhopwǎ awṳ̂. 12 Dě asî ma̤pî̌kè a ta̤olò̤wǐnu tûmû akhû̌akhî, Cǒmara cèrò asî pě. 13 Htohǒtò̤ asî htûhtò̌ kòyò cè̌klèlèbǒ, ma̤bò akhîakha, dě cû̌ǒlè htò̌hǐ tama hto tama. Tǒ̤ a cè̌klè htǒonu patò̤, asî ǒtṳda dǒ kòyòyo̤, hî̌bǐhî̌ǒ kò, nṳma̤shû̌shǎ dǐdò tǒ̤ kòhǔwa̤ ta̤wi̤ta̤kè̌ akû dě hî̌bǎ yo̤ htě a gwa hî̌tò̤ toǒ. 14 Hǐnudě he sò̌yṳ ta mamǔǒkhwè̌ htě anějape toǒ glè phî̌ lǒkho awṳ̂. Htodě phû̌ǒli̤ǒ lǒkho, dě kè̌ǐkhwè̌ǐ lǒkho hǐphò numî̌ kòyò htě a kè̌lǎ pa ta̤sǔ dě a glè hî̌phû̌mò̤shî̌hto pa toǒnu, a kè̌shǐpe ala̤hî̌ pa toǒ tò̤ hǒ. 15 Ma̤tè̤hî̌dě mamǔǒkhwè̌ toǒǒnu, a htû̌tiwǐkhǒkè ana̤ ta Khrî̌stu hǒ, dě a gûcû̌kû̌ lǒkho khînǎmo̤pha hǐkǒdû̌ akò.

16 Mamǔ htě a htû khrî̌stuphû̌ toǒnu, dě a khlilè akla, mamǔǒkhwè̌ dè ǒ tapwa̤pwa̤ hî̌dě asî bǎ kè̌ǐkhwè̌ǐ nû̌û. Bè̌htò̌ pûma̤ ta̤bǐta̤ò̌ htǒonu dě pwa̤yṳǎta̤ aprṳ̂aho alo̤ ma̤, ma̤tè̤hî̌dě ma̤pûhǐ pwa̤yṳǎta̤ aprṳ̂aho kè̌ ma̤jè pwǎpǒ̤ mamǔǒkhwè̌ htě pwa̤ma̤jè nû̌û ǒtò̤ toǒ ayanudě, kè̌ǐkhwè̌ǐ lǒkho asî nî̌꤮.

17 Wè̤khǔwè̤pwa̤ htě a htû hǐkǒdû̌ dě a ma̤wǒta̤ toǒnu, sî tobǎ bè̌dubè̌na̤ asî, htohǒtò̤ asî tobǎ nî̤bǎ pǒǎpǒo lakhû̌lakǎ. ^{▼▼Lî̤cahtǐ ahǔwa̤ toǒǒnu, “Sî tobǎ bè̌dubè̌na̤ asî, htohǒtò̤ asî tobǎ nî̤bǎ pǒǎpǒo lakhû̌lakǎ” a hî̌ kû̌kò hǐnu tò̤, a hî̌ ta, “Asî tobǎ nî̤bǎ khû̌kǎ ginǐ̤plǎ gûla̤” hǐnu} Wè̤khǔwè̤pwa̤ htě a htû hǐkǒdû̌ dě a gûma̤ Cǒmara ata̤ma̤ toǒ, dě a dǒhtû̌ǐ bǎ kò ta Cǒmara ale̤ayo̤ dě a sû̌ǐtòwòǐ bǎ kò ta Cǒmara ale̤ayo̤ toǒnu, sî tobǎ bè̌dubè̌na̤ asî, ǐpǒǎpǒo mè̤mè̤̌ bǎ lǒkho asî lakhû̌lakǎ. 18 Ma̤tè̤hî̌dě lî̤cahtǐkû hî̌, “Pṳ̂ htě sî noyî̤lòsu yǎta bǔ akhanu, tûplû̌bǐ pûma̤ akhû̌phě ma̤,” ^c htodě “Pwa̤ma̤ta̤ tapwa̤nu a to nî̤bǎ akhû̌akǎ.” ^d 19 Kòyò tapwa̤pwa̤ dè bè̌ wè̤khǔwè̤pwa̤ ta̤sǔ htě a htû hǐkǒdû̌ akla tapwa̤pwa̤ dèhî̌dě pî̌tî̌gutṳ̌ pwa̤lò̤sasî̌ dèǒ sò̌gini̤ tò̤mî̌ta sò̌su tò̤ hî̌numî̌ gana̤dekû̌ lǒkho pûma̤ ayo̤ ma̤ nî̌꤮. ^e 20 Asî dè ma̤ ta̤sǔ dèhî̌dě, sǎhtǎ asî dě sû̌ǐwǒ gesǒ asî dě kòyò tṳ̂prṳ̂taphǎ a lo̤mo̤nu nî̌꤮. Ma̤pûhǐ kòyò ahǔwa̤ toǒ ǐsha ayanu tûrû̌ ma̤ lǒkho hǐnu nî̌꤮.

21 Dě Cǒmara ta Ye̤shǔkhrî̌stu ta tanaphû̌ cahtǐ toǒ a lo̤mo̤nu, he hî̌lò̤yo̤ htě a měgle tûmû ta na glè jûle̤phî̌yo̤ ta̤sû̌ǐtòwòǐ akhû̌ htǒotoǒ dě na ma̤ta̤ titètè̌꤮ bǎbǎ, kè̌bò̌khû̌ pûma̤ kò dǐpwǎ̤꤮ ma̤ nî̌꤮. Htohǒtò̤ kè̌dû̌ kè̌pî̌tî̌ pûma̤ kò dǐpwǎ̤꤮ ma̤ nî̌꤮.

22 Cû̌ bè̌htò̌phwè pûma̤ sî cǔde kòlo̤ tapwa̤pwa̤ htě a glè ma̤ Cǒmara a ta̤phî̌ta̤ma̤ ayanu ma̤ nî̌꤮. Cû̌nṳkû̌ pûma̤ dě kò ma̤ ta̤sǔta̤plě aklanu ma̤ nî̌꤮, ǒcǒǒtè̤tû̌ nata nî̌꤮.

23 Opwǎ pûma̤ shi ma̤, oshîlo̤kû̌ yǎta sobîshi ^{▼▼Sobîshi mî̌ alò̤ta sî̌yo̤nu hǒ.}tîkî̌ tîkî̌ nî̌꤮. Na sha sala̤la̤tû̌ akhû̌akhî, a ma̤wǒjè naphukû ata̤sha htǒonu pě.

24 Kòyò toǒǒ a ta̤sǔta̤plěnu a ǒlṳlîwǒ, dě kò pṳ̂̌ tapwa̤ kè̌shǐ sî̌yabò asî ta̤sǔ htǒonu ta Cǒmara cèrò asî pě pwǎ̤ta kòyò ahǔwa̤ toǒǒ a ta̤sǔta̤plěnu, khònò̤khahtǒo kò kè̌shǐjò yǎtò̤. Pwǎ̤ta kò kè̌shǐnǒ a nǒkò pě. 25 Hǐnuakho ta̤ma̤wǒ htě pa kè̌shǐlṳlî yǎnu a ǒ toǒ. Ta̤ma̤wǒ htě kò kè̌shǐlṳlîjò yǎ hǒtò̤ toǒ bǎbǎ, kò kè̌shǐ te̤mǎnǒ a nǒkò pě.