2 Corinthians 1

Pò̌lu a ta̤hî̌mo̤hî̌wǒ

1He mî̌ Pò̌lu. Cǒmara sò̌phlǒtotû̌ dě a wû̌lǎ he ta Běcǎ Ye̤shǔkhrî̌stu a pwa̤nophû̌ tapwa̤ hǒ. He ta pa pṳwè̤ Timò̤̌te khwè̌cû̌ lî̤htǒo dě sî Kòrî̌tiawî̤phû̌ htě a yṳǎ Cǒmara toǒ ǒ. Htohǒtò̤ pa khwè̌cû̌dǒ bǎ kòyò htě a yṳǎ Cǒmara dě a ǒ bǎ Akhayagakûnu toǒ aǒ. ^a

2Papha Cǒmara ta Běcǎ Ye̤shǔkhrî̌stu ǐlò̤tû̌pû sî ta̤bwǐta̤sîrî ta ta̤gûjûkabǎ nî̌꤮.

Pò̌lu hî̌bwǐhî̌sîrî htû̌sò̌ǐ Cǒmara

3Pa hî̌bwǐhî̌sîrî htû̌sò̌ǐ plǒnû̌û pa Běcǎ Ye̤shǔkhrî̌stu apha Cǒmara htǒo hò̌꤮. A mî̌ pha htě a gwèbǎǐ kò tapwa̤, ta̤ma̤mo̤ ta̤ma̤jè lǒ̤꤮ bò toǒ numî̌ a ǒ dě nû̌ûǒ hè pwǎ. 4Bǎ pa kè̌shǐ shěto̤bǎ ta ta̤pò̤ta̤sha lǒ̤꤮ bò toǒ akhanu, a ma̤mo̤ ma̤jè pa. Dě a ma̤mo̤ ma̤jè pa pwǐhè̌o akhû̌akhî, pa ma̤mo̤ ma̤jèbò̌ dò̌ǔ kòhǔwa̤ htě a kè̌shǐ shěto̤bǎ ta ta̤pò̤ta̤sha pṳ̂̌tacǎ toǒ. Ta̤ma̤mo̤ ma̤jè htě pa ma̤mo̤ ma̤jè kò htǒotoǒ numî̌, a sǒsǒta Cǒmara ma̤mo̤ ma̤jè pa toǒnu pwǎ. 5Khrî̌stu akhû̌akhî, pa khòbǎ plṳ̂ ta̤jîta̤jû, pwǎ̤tadě Ye̤shǔkhrî̌stu akhû̌akhî, Cǒmara ma̤mo̤ ma̤jè plṳ̂ mè̤mè̤̌ pa. 6Ma̤pûhǐ sî nî̤bǎ ta̤ma̤mo̤ ma̤jè ta ta̤ǒhtûpwa̤ tûjûpwa̤ ayanu, Cǒmara nokhòbǎ pa ta̤pò̤ta̤sha htǒonu pwǎ. Ma̤pûhǐ sî nî̤bǎdǒ ta̤ma̤mo̤ ma̤jè ayanu, Cǒmara ma̤mo̤ ma̤jè pa. Pa ta̤ma̤mo̤ ma̤jè sî htǒonu, a ǐhtûhtò̌ sî ta̤khòsò̌do sǒsǒta pa khòbǎhtonu toǒ hǒ. 7Hǐnu akhû̌akhî, pa yṳǎ mè̤mè̤̌ sî, ma̤tè̤hî̌dě bǎ sî khòbǎ sǒsǒ ta̤jîta̤jû pwǐ pa khòbǎ toǒ akhanu, Cǒmara ma̤mo̤ ma̤jè sî pwǐ a ma̤mo̤ ma̤jè pa htǒonu pě.

8Pṳwè̤ toǒ꤮, pa sò̌yṳ ǐsî̌yalṳdǒ sî ta pata̤khòbǎ mè̤mè̤̌ ta̤jîta̤jû toǒ awi̤akè̌ bǎ pa ǒ Ashǎgadû̌kû akhanu. Ta̤jîta̤jû htě pa khòbǎ htǒonu, ajîajû tûlû̌ akhû̌akhî, pa sijò pěkò̌꤮ pa gènè̤ hǐnu. ^b 9Dě pa bè̌ yǎta pa si hǒ ma̤tè̤dě pa bǎcû̌ khòjîkhòjûtǒ̤ pwǐhè̌o ma̤tè, ma̤pûhǐ pa yṳǎlò̤ pû pana̤ tò̤, dě pa yṳǎ pwǎpǒ̤ Cǒmara htě a ma̤htûpwa̤ge kò ta ta̤si htǒonu tapwa̤ ayanu, pa bǎ khòbǎpwǎ ta̤ hǐnu. 10Cǒmara ma̤lû̌htò̌ge pa dě ta̤si a ta̤sò̌gònò̤ ǐsha adû̌ayǒakû htǒonu hǒ. Pa yṳǎ ta Cǒmara ma̤lû̌htò̌ge sělěpo̤ lòtṳ̌pwǎ pa pě. 11Ma̤pûhǐ Cǒmara ma̤lû̌htò̌ge pa ta ta̤hè̌o toǒ ayanu, pa lo̤bǎ sî ta̤ma̤jè ta sî ta̤kwisaba. Ma̤pûhǐ kòyò saprṳ̂ htû̌sò̌ hî̌bwǐhî̌sîrîhtò̌ Cǒmara pě ayanu, Cǒmara gana̤de sî ta̤kwisaba toǒ pě dě a ma̤lû̌htò̌ge pa dě ta̤siakla ta ata̤bwǐdû̌sîrîhtû pě.

Pò̌lu htû̌lè̌ khǒkè ata̤ tîwî̌tòwò

12Pa hî̌bǎhtò̌yî̤ bǔ payo̤ ma̤tè̤hî̌dě, pa sò̌phlǒkûhtǒo pa sî̌ya te̤mǎ ta pa ma̤sǔma̤plě, pa hî̌sǔhî̌plěnǒ kò dǐpwǎ̤꤮ tò̤, htohǒtò̤ pa bè̌ cǒtè̤pwǎ pa sò̌phlǒsǔshi dě sîkhû̌ pwǎ. Pa ma̤pwǐhè̌o numî̌ Cǒmara abwǐasîrî a ta̤po̤ta̤phǎ akhû̌akhî pwǎ, kòyòhǎkhû̌phû̌ a ta̤sî̌ta̤jò akhû̌akhînu mè̤tò̤. 13Pa khwè̌cû̌ bǎ sî lî̤ toǒnumî̌, pa hî̌ totǐ sî, pa bè̌hǔ amûasǎ dǐcǎ꤮ tò̤. 14Khònò̤dě sî sî̌yaphlo pṳ̂̌bò pawi̤pakè̌ hǒtò̤, pwǎ̤ta nǒkòpěnu pa kè̌shuǐ ta sî sî̌yaphlo bòmṳ̂sîglî pawi̤pakè̌ pě. Hǐnudě, bǎ Běcǎ Ye̤shǔ hèsǒ pě ti̤ni̤nu, pakhû̌pakhî sî sò̌le̤sò̌lò̤ pwǐ pa sò̌le̤sò̌lò̤ ta sîkhû̌sîkhînu pě.

15He sî̌yate̤mǎ ta pa sò̌le̤sò̌lò̤ lòtṳ̌ pě, dě ma̤pûhǐ sî nî̤bǎ ta̤howi̤ ginǐ̤plǎ ayanu, he bè̌lò̤hto he sò̌phlǒ ta he sò̌yṳ hè ǒlèkû̌ sî ginǐ̤plǎ. 16Hǐnudě he bè̌lò̤hto he sò̌phlǒ ta htû̌꤮ he cû̌ Makedò̌niaga akhapěnu he cû̌nṳǒlèkû̌ sî pě. Htodě htû̌꤮ he ǒ Makedò̌niaga ge akhapěnu, ma̤pûhǐ sî ma̤jè he dě he cû̌po̤ Yṳ̌daga htǒoayanu, he genṳ ǒlèkû̌po̤ sî pěpě, he gènè̤ hǐnu. ^c 17He ma̤wǒhto pwǐhè̌o hǒ pwǎ̤ta a htûhtò̌tò̤. Kǎlè̌mî̌ sî gènè̤bò lǒkho he ta a hî̌te̤hî̌mǎ ayo̤ tò̤, a hî̌htohî̌lò̤ tû̌ aya, hǐnu kǎlè. Kòyòhǎkhû̌phû̌ toǒ a ta̤tîwî̌tòwò toǒnumî̌, htû̌těpě dě a hî̌ ta, “O,” těpě dě a hî̌ ta, “Tò̤,” a ma̤ lǒkho hǐnu. He ta̤tîwî̌tòwò htǒonumî̌ a sǒsǒta hǐnu mè̤tò̤.

18Pwǐ Cǒmara hî̌bǎcǒtè̤ ta̤nu, he hî̌bǎcǒtè̤ sǒsǒ pwǐ anu pwǎ. Htû̌těpě dě “O,” těpě dě “Tò̤,” he hî̌ kû̌kò hǐnu dǐkhò̌꤮ tò̤. 19Ma̤tè̤hî̌dě he ta Sǐla ▼

▼Silvanus

ta Timò̤̌te dǒhtû̌ǐ bǎ sî ta Ye̤shǔkhrî̌stu awi̤akè̌ hǒ. A mî̌ Cǒmara aphû̌khû tapwa̤, a hî̌bǎcǒhî̌bǎtè̤ pṳ̂̌꤮ taplǎ, A hî̌htohî̌lò̤ kû̌kò dǐkhò̌꤮ tò̤. ^e 20Běcǎ Ye̤shǔ ma̤lǒma̤be lǒ̤꤮ bò Cǒmara a ta̤olò̤nu toǒ hǒ. A ma̤lǒma̤be Cǒmara a ta̤olò̤ htǒonumî̌, pa sò̌phlǒto kû̌pwǎ dě pa hî̌ ta, “Amè̤” amûasǎ mî̌ “A mè̤mè̤̌” dě pa htû̌sò̌ǐ Cǒmara hǐnu. 21Pwa̤ htě a ma̤měma̤gle tònòwǒ bǎpa ta̤yṳǎ Khrî̌stu htǒonumî̌ Cǒmara sana̤ tû̌. Ma̤pûhǐ pa htûhtò̌ akòyònu, a wû̌lǎ pa hǒ. 22Htohǒtò̤, Cǒmara ma̤mǎnǎ pa htǒonu, a dǔlṳ ta pa htû akòyò hǒ. A ǐlò̤ pa Běcǎ sǎcahtǐ htǒonumî̌ a ma̤mǎnǎ pa hǒ. Htodě Běcǎ sǎcahtǐ htǒonu, a hènṳ ǒhtûpwa̤ pa sò̌phlǒkû dě a hî̌jèdǒ pa ta Cǒmara ma̤lǒma̤behtò̌bò bǎ pa a ta̤olò̤nu toǒ pě.

23He cè̌klè hè sǎhtǎ sî dě he hèto̤pe dě Kòrî̌tiawî̤kû tò̤. He hî̌ hǐnu dě he plò̤ sî tò̤nu Cǒmara sî̌yabò pwǎ. 24Pa sò̌yṳ ma̤dǐdò sî ta̤yṳ tò̤. Sî ta̤yṳta̤nǎ shû̌tuklǔ numî̌ pa sî̌ya hǒ. Ma̤pûhǐ sî sò̌le̤sò̌lò̤ dû̌htò̌po̤ ayanu, pa sò̌yṳ hè ma̤shû̌ma̤jo pwǎ sî.