2Cor 10 | KxfSCKRC | STEP | Toǒǒnu a hî̌ lǒkho he ta bǎ he hî̌bǎshǔ ta sî akha, he ǐshapwǎ pò̤̌ta bǎ he khwè̌ lî̤ akhanu, he hî̌bǎshû̌hî̌bǎsho mè̤mè̤̌, a hî̌ lǒkho he hǐnu. Pwǎ̤ta he kwigwèbǎǐ gutṳ sî pwǐ Khrî̌stu ǒta ta̤sò̌dohobî̌ htǒonu.

2 Corinthians 10

Pò̌lu hî̌bǎ ma̤kwa dǐdòtû̌ a ta̤phî̌ta̤ma̤

1 Toǒǒnu a hî̌ lǒkho he ta bǎ he hî̌bǎshǔ ta sî akha, he ǐshapwǎ pò̤̌ta bǎ he khwè̌ lî̤ akhanu, he hî̌bǎshû̌hî̌bǎsho mè̤mè̤̌, a hî̌ lǒkho he hǐnu. Pwǎ̤ta he kwigwèbǎǐ gutṳ sî pwǐ Khrî̌stu ǒta ta̤sò̌dohobî̌ htǒonu. 2 Htû̌꤮ he hèshǔgesǒ sî pě akhanu, ma̤pûhǐ he hî̌bǎshû̌hî̌bǎsho pû sî tò̤nu, he kwigwèbǎǐ gutṳ sî ta htû̌lè̌ tèplè̌kèbò sî sò̌phlǒ ta̤bè̌ sî sò̌phlǒsǔshinu toǒ nî̌꤮. Dě sîkla toǒǒnu a hî̌ lǒkho pa ta pa gûpwǎ kòyòhǎkhû̌phû̌ ala̤klo sò̌yṳnu toǒ pwǎ. Kòyò htě a hî̌ pa hǐnu toǒnu, he hî̌bǎshû̌ tuklǔ asî pě. 3 Pa mî̌ kòyòhǎkhû̌phû̌ toǒ pwǎ numî̌ amè̤pwǎ, pò̤̌ta pa shěshǔ ta̤ htǒonu, pa shě pwǐ kòyòhǎkhû̌phû̌ toǒ shěnu mè̤tò̤. 4 Ta̤shě a ta̤wè̌ta̤htò htě pa noǎ htǒotoǒ numî̌ kòyòhǎkhû̌phû̌ a ta̤wè̌ta̤htò mè̤tò̤. Pa noǎ Cǒmara a ta̤wè̌ta̤htò htě apo̤aphǎ dě a ma̤lò̤te̤ja pî̌bò̌kèbò wî̤we̤khǒdû̌ toǒ ta ta̤gègo nû̌û htě asǔnu toǒ hǒ. 5 Pa ma̤lò̤te̤jakèbò ta̤phî̌dû̌phî̌htò̌yî̤ lǒ̤꤮ bò na̤ htě a ma̤dǐdòshǔ ta̤sî̌ya Cǒmaranu toǒ. Kòyò lǒ̤꤮ bò a ta̤gènè̤ toǒnu pa pṳ̂dǒǒbò yǎ dě pa nojûle̤phî̌yo̤ gana̤de yǎta Khrî̌stu ayo̤.

6 Bǎ sî dǔlṳ ta sî gana̤de gûma̤ mṳ̂tî̤glî ta̤ akhanu, pa ǒ tîwî̌tòwònǎ dě pa glè cèrò kòyò htě a gana̤de gûma̤ kû̌kò tò̤nu toǒ hǒ.

7 Sî kè̌ lǒkho pwǎ ta̤ǒlṳ dě akhlo toǒ pwǎ. Dě sîkla toǒǒnu a hî̌sǔ lǒkho ta kòyò htě a htû Khrî̌stu apwa̤ma̤ta̤ mî̌ pa pwǎ. Nosî̌ya to̤kû̌ asî ta pa mî̌ pa htû kû̌dǒ Khrî̌stu apwa̤ma̤ta̤ toǒ hǒ. 8 Ta̤shû̌ta̤sho htě Běcǎ ǐ he htǒonu, alò̤ta he hî̌bǎ htû̌sò̌ǐshû̌ hena̤ tîkî̌ ya? Pwǎ̤tadě he sòwò̤ nǒtò̤. Ta̤shû̌ta̤sho htǒonu, a glè ma̤ dû̌htò̌htûhtò̌pwǎ sî aya, a ma̤pî̌ma̤lṳ̂ sî ayanu mè̤tò̤. 9 He khwè̌ ǐshacû̌ bǎ sî ta lî̤ toǒ hǐnu mè̤tò̤. 10 Ma̤tè̤hî̌dě toǒǒnu, a hî̌ lǒkho, “Pò̌lu khwè̌ mè̤mè̤̌ lî̤ tûkûdě ashû̌asho tûlû̌shû̌. Bǎ a ǒkû̌ ta pa akhanu, a ǐsha pwǎ, a dǒhtû̌ǐ mî̌ a nî̤ kû̌kò tò̤tò̤,” a hî̌ lǒkho he hǐnu. 11 Kòyò htě a hî̌ hǐnu toǒnu, a to sî̌ya ta pa ǒyî̤ ta sî bǎbǎ, pa ǒplǒ ta sî bǎbǎ, pa ma̤ te̤mǎ mè̤mè̤̌ pwǐ pa hî̌ dě lî̤kû htǒonu pě.

12 Pa ǐsha mè̤mè̤̌ tû̌pwǎ sî paya nî. Kòyò htě a gènè̤htò̌yî̤ lǒkho ana̤ ta asî mî̌ asî̌ajòkhlo kò toǒnu pa tègunò̤bǔ kû̌nǒ pana̤ ta asî tò̤. Asî tapwa̤ ta tapwa̤ tègunò̤tû̌ lǒkho ana̤ akhû̌akhî, asî mî̌ kòyò nòdû̌ mè̤mè̤̌ toǒ.

13 Pwǎ̤ta, pa dě, pa hî̌bǎhtò̌yî̤ tûlû̌ ta pwî̌ pa to hî̌bǎ htò̌yî̤ tò̤nu. Pa hî̌bǎhtò̌yî̤ pwǎpǒ̤ ta̤ma̤ htě Cǒmara ǐlò̤ pa htǒotoǒnu pwǎ. Htǒonumî̌ a ǒhtukû̌bò ta pa ma̤ta̤ dě sîkla htǒotoǒnu hǒ. 14 Pa cû̌ma̤ tûlû̌ ta gûla̤ htě Cǒmara noma̤ pa htǒonu tò̤. Cǒmara ǐpa ta̤ma̤ dě pa glè hè sî ǒ ta pa mî̌ pwa̤ htě a hè pwe̤ǐlṳ wǐgutṳ̌ bǎ sî ta̤sò̌le̤sò̌lò̤ awi̤akè̌ toǒ pwǎ. 15 Hǐnudě pa hî̌bǎhtû̌sò̌ǐ kû̌nǒ pana̤ ta ta̤ma̤ htě kòhǔwa̤ ma̤htûhtò̌ wǐhtonu toǒ awi̤akè̌ tò̤. Pwǎ̤ta pa kè̌shuǐ khǒtû̌ ta sî ta̤yṳ glè shohtò̌ htohǒtò̤ pa hèma̤ ta̤ma̤ dě sîkla htǒo dû̌htò̌htûhtò̌ ta htûhtò̌po̤ dě alo̤mo̤ tokho ayanu pwǎ. 16 Htopědě pa cû̌sělě tûlû̌po̤ doyî̤ htě kò cû̌ pwe̤ǐlṳnǒ asî ta ta̤sò̌le̤sò̌lò̤ awi̤akè̌ dǐplǎ꤮ hǒtò̤nu toǒ a ǒ pě. Dě pa cû̌ dǒhtû̌ǐlṳ asî ta Ye̤shǔ a ta̤sò̌le̤sò̌lò̤ awi̤akè̌ pě. Ma̤tè̤hî̌dě pa sò̌yṳ hî̌bǎhtò̌yî̤ pana̤ ta ta̤ma̤ htě kòhǔwa̤ ma̤bǎhto gûla̤nu toǒ tò̤. 17 Ma̤tè̤hî̌dě, lî̤cahtǐkû hî̌, “Kòyò tapwa̤pwa̤ dě a sò̌yṳ phî̌htò̌yî̤ ana̤nu, a to phî̌htò̌yî̤ pwǎpǒ̤ ta̤ htě Běcǎ ma̤bǎhto ta̤nu toǒ awi̤akè̌ pwǎ.” ^a 18 Ma̤tè̤hî̌dě, kòyò htě a htû̌sò̌ǐtû̌ ana̤ toǒnu, Běcǎ sò̌phlǒǒ nû̌û tò̤, Běcǎ sò̌phlǒǒ pwǎpǒ̤ kòyò htě Běcǎ htû̌sò̌ǐtû̌ nû̌û ta ana̤nu toǒ pwǎ.