2 Corinthians 11

Pò̌lu ta pwa̤nophû̌ htě a lòho toǒ

1He khwè̌cû̌ sî lî̤ khònò̤htǒo toǒnu, he khwè̌ lò̤ta kòyò kicǐ tapwa̤ akhû̌akhî, khòsò̌do sò̌phlǒhtû pû he nî̌꤮. 2Ma̤tè̤hî̌dě he sò̌phlǒsho mè̤mè̤̌ ta sî sò̌phlǒcǒtè̤ sayè̤ kû̌ta Khrî̌stu. Sî toǒnu alò̤ta mamǔphû̌sǎ htě asò̌phlǒ mṳ̂plî tapwa̤ dě he olò̤hto heyo̤ ta he htû̌ bǎ yǎta makhû pě tapwa̤ a mî̌ Khrî̌stu htǒo tapwa̤ hǒ. 3Pwǐ khînǎmo̤pha hǐkǒdû̌ sûlûana̤ sǒsǒta wṳ̂ dě a hè lǒǎplò̤ǎ Ěwa̤nu, he bǎgubǎgènǎ ta pěmî̌ kò hè lǒǎplò̤ǎ sî hǐnu pě, htohǒtò̤ pěmî̌ kò hè ma̤pî̌ma̤lṳ̂bò sî sò̌phlǒ a ta̤gènè̤ toǒ dě sî wîkè sî ta̤sò̌yṳ mo̤ǐ lǒ̤sû̌lǒ̤sò̌ Khrî̌stu ta sî ta̤sò̌yṳmo̤ǐ te̤mǎ Khrî̌stu htǒonu pě he bǎgubǎgè mè̤mè̤̌ sîya hǐnu. ^a 4Ma̤tè̤hî̌dě ûpè tapwa̤ bǎbǎ, a hènṳ dǒhtû̌ǐ sî ta Ye̤shǔ awi̤akè̌ htě a kî̌ya tû̌ta pa dǒhtû̌ǐ sî htǒonu, sî sò̌le̤sò̌lò̤ kaǎshǔ yǎ. Dě sî phî̌shǔ yû Běcǎ sǎcahtǐ htě a kî̌ya tû̌ta sî phî̌shǔhtonu tapwa̤, htohǒtò̤ sî yṳǎyû pwǎ ta̤sò̌le̤sò̌lò̤ awi̤akè̌ htě a kî̌ya tû̌ta pa dǒhtû̌ǐhto sînu toǒ hǒ. 5Sî dè kaǎ asî ta, “Pwa̤nophû̌ saradû̌” toǒnu, a htò̌yî̤to̤khlo nǒta he tò̤. 6He hî̌bǎsî̌jò kû̌nǒ kò tò̤ pwǎ̤tadě he sî̌ya te̤mǎbò Cǒmara a ta̤te̤ta̤mǎ toǒ. Pa ǒ ta ta̤sî̌khû̌sî̌ya Cǒmara a ta̤te̤ta̤mǎ htǒonumî̌ pa dǔlṳ te̤mǎhto sî pṳ̂̌꤮ taplǎ hǒ.

7Bǎ he dǒhtû̌ǐ sî ta ta̤sò̌le̤sò̌lò̤ awi̤akè̌ akhanu, he kwinǒ sî khû̌kǎ dǐbǎ꤮ tò̤. Ma̤pûhǐ sî nî̤bǎ yolahtûpwa̤ tûjûpwa̤ ayanu, he shò̌lò̤ hena̤ hǐnu pwǎ. He ma̤hǐnudě mî̌ asǔ ya? 8Bǎ he ma̤ta̤ sîkla akhanu, ta̤hǎbòkè toǒ numî̌ pwa̤yṳǎta̤ aprṳ̂aho ahǔwa̤ toǒ ǐpwǎ he wû. Ma̤pûhǐ he ma̤bò̌ta̤ ta sîyanu, a sǒsǒta he cû̌ phî̌sigwi we̤saphǎ pwa̤yṳǎta̤ aprṳ̂aho ahǔwa̤ toǒ hǐnunu. 9Bǎ he ǒkû̌ ta sî akha, he dè lo̤bǎwû hî̌nu, he kwibǎnǒ sî dǐpwǎ̤꤮ tò̤, ma̤tè̤hî̌dě ta̤ lǒ̤꤮ bò htě he lo̤bǎ toǒnu, pa pṳwè̤ Makedò̌niaga toǒ hè ma̤jobòpwǎ he. Dě awǐanǒ numî̌ he kwibǎnǒ sî ta̤ma̤jo dǐplǎ꤮ tò̤, khònò̤htǒo tǒ̤hè numî̌ he ma̤guma̤gè, ma̤htǒma̤klǎnǒ sî tò̤tò̤. ^b 10He hî̌bǎhtû̌sò̌ǐ pwa̤yṳǎta̤ aprṳ̂ahophû̌ ahǔwa̤ htě a ǒ bǎ Akhayagakû toǒ awi̤akè̌ htǒonu, he ta̤htû̌sò̌ǐnu he ǒkǔnò nǒtò̤. Ma̤tè̤hî̌dě Khrî̌stu a ta̤te̤ta̤mǎ ǒ hekû akhû̌akhî, he hî̌ sî khònò̤ htǒotoǒnu, sî sî̌yate̤mǎ lòtṳ̌ pwǎ. 11He hî̌ htǒodě he mo̤ǐpe sî tò̤nu ya? He mo̤ǐ sî numî̌ Cǒmara sî̌ya. 12Ma̤pûhǐ kòyò htě a hî̌ ta asî ta̤ma̤ toǒ numî̌ asǒsǒta pa ta̤ma̤ pwǎnu toǒ, a hî̌bǎhtû̌sò̌ǐjòpe pû ana̤ hǐnu tò̤nu, he ma̤sělěpo̤ pwǐ he ma̤ khònò̤ htǒonu. 13Asînu toǒ mî̌ pwa̤nophû̌ a mè̤mè̤̌ mè̤tò̤. Asî mî̌ pwa̤nophû̌ htě a lòho toǒ pwǎ. Asî cû̌ hî̌lòho kò ta ata̤ma̤ toǒ dě a jîma̤ lǒkho ana̤ pwǐ Khrî̌stu a pwa̤nophû̌ mè̤mè̤̌ toǒnu pwǎ. 14Asî ma̤hǐnu dě he sû̌pi̤sò̌pi̤ nǒ dǐcǎ꤮ tò̤. Khînǎmo̤pha hǐkǒdû̌ sûlûlòho ana̤ pwǐ mǒkhû̌tanaphû̌ htě a shěrakha toǒnu mî̌ a ma̤jò pwǎ. 15Hǐnudě, khînǎmo̤pha hǐkǒdû̌ apwa̤ma̤ta̤ toǒ sûlûlòhojò sǒsǒ ana̤ pwǐ Cǒmara apwa̤ma̤ta̤ htě acǒatè̤ toǒ numî̌ la̤sû̌pi̤sò̌pi̤ nǒ dǐcǎ꤮ tò̤. Dě gutṳ̌lò̤ pěnu, pwǐ asî ma̤sǔhtohǒnu, asî khòbǎ ta̤cèrò pwǐ a gwata asînu pě.

Pò̌lu hî̌bǎhtû̌sò̌ǐ a khòbǎ ta̤jîta̤jû toǒ

16He hî̌ gesǒ ta, sî to gènè̤ lǒkho he ta kòyò kicǐ dǐpwǎ̤꤮ tò̤. Pwǎ̤ta sî dè gènè̤ lǒkho he hî̌dě he htû kû̌nǎ kòyò kicǐ dě he hî̌bǎhtû̌sò̌ǐ kû̌nǎ tîkî̌phû̌. 17He hî̌bǎhtû̌sò̌ǐ khònò̤htǒo numî̌ he hî̌bǎ pwǐ Běcǎ sò̌yṳ nohî̌bǎ henu mè̤tò̤. He hî̌bǎpwǎ pwǐ kòyò kicǐ tapwa̤nu. 18Kò hî̌bǎhtò̌yî̤ plṳ̂ lǒkho kòna̤ pwǐ kòyòhǎkhû̌phû̌ la̤klo hî̌bǎhtò̌yî̤nu toǒ akhû̌akhî, he glè hî̌bǎhtò̌yî̤ dǒpwǎ hena̤. 19Dò꤮ dû̌ ta, sî ǒ lǒkho ta ta̤sî̌ta̤jò dě sî khòsò̌dobò̌, sî sò̌le̤sò̌lò̤ gana̤de lǒkho kòyò kicǐnu toǒ a ta̤hî̌bǎ. 20Kòyò htě a nohtû nû̌ûta sîjûnu toǒ, a lǒǎplò̤ǎ sînu toǒ, a ǎtṳotṳ sîkhû̌nu toǒnu, sî sò̌phlǒhtû lǒkho yǎ hǒhǒ. Sî nophî̌htò̌yî̤ ǐ lǒkho ana̤ dě sî nopi̤ji ǐ lǒkho asî ta sîna̤na̤.

21Pa ma̤bǔkû̌ dòdû̌꤮ pwǐ asî ma̤ sînu tò̤, pa ǐsha sikè tû̌ nî, htodě pa sòwò̤ tû̌ nî. Pwǎ̤tadě asî dè hî̌bǎhtò̌yî̤bǔ hǐnu mî̌ he hî̌bǎhtò̌yî̤ kû̌ pwǐ kòyò kicǐ tapwa̤ hî̌bǎhtò̌yî̤ akhonu he hî̌bǎbò̌ pwǎpwǎ kò̌. 22Asî mî̌ Ebrephû̌ toǒ ya? He mî̌ Ebrephû̌ tapwa̤pwa̤ lè. Asî mî̌ Israelphû̌ toǒ ya? He mî̌ Israelphû̌ tapwa̤pwa̤ lè. Asî mî̌ Abraham akhlialè toǒ ya? He mî̌ Abraham akhlialè tapwa̤pwa̤ lè. 23Asî mî̌ Khrî̌stu apwa̤ma̤ta̤ toǒ ya? He ma̤dû̌khlo ta asînu toǒ kò̌kò̌. He hî̌ hè̌o dě alò̤ta he kimisawa̤. He jipwi̤ ma̤dû̌khlo ta asî ma̤nu kò̌kò̌, kò dǒlò̤te̤ plṳ̂khlo he dě apo̤kû ta asî kò̌kò̌. Kò phlě he ta wî̤nò̌plènu a ǒplṳ̂, he glè phǔ꤮ sinu he kè̌shǐ shěto̤bǎ sala̤ hǒ. ^c 24Yṳ̌daphû̌ toǒ phlě he taplǎnu a bǎphlě he sushi ta lǐ̤sǒtephlě, dě he kè̌shǐbǎ hǐnu yè̤̌plǎ hǒ. ^d 25Rò̌mǎphû̌ toǒ phlě he ta wî̤sǒpli̤ suplǎ, kòyò toǒ wî he ta lo̤ dě asî wî to̤htû̌꤮ he si, dě asî gènè̤ lǒkho ta he sihǒnu, a ǒ taplǎ. ^e Sǒkhlidû̌ phò̌ bǎ he shidû̌shite̤we̤kû subǎ dě he lòcǔ shidû̌shite̤we̤ akûnu ti̤ni̤ ta tasa. ^f 26Dě he cû̌plṳ̂ klè̌ akûnu he kè̌shǐ shěto̤bǎ plṳ̂ ta ta̤sò̌gònò̤ ǐsha toǒ. He kè̌shǐ shěto̤bǎ shidû̌ dǐdòbǐ heklè̌, he kè̌shǐ shěto̤bǎ ta pwa̤pṳ̂sigwi we̤saphǎ kòta̤ toǒ, he kè̌shǐ shěto̤bǎ ta hekhlilè Yṳ̌daphû̌ toǒ ta Yṳ̌daphû̌ mè̤tò̤ toǒ sò̌khěkhû̌khwè kè̌lǎma̤si he. Bǎ he cû̌nṳ wî̤dû̌wî̤htû akû bǎbǎ, bǎ he cû̌ dě kòyò ǒ dǐpwǎ̤꤮ tò̤ agûla̤nu bǎbǎ, he kè̌shǐ shěto̤bǎ plṳ̂ ta ta̤sò̌gònò̤ ǐsha toǒ. Htohǒtò̤ shidû̌shite̤we̤ akû bǎbǎ, he kè̌shǐ shěto̤bǎ plṳ̂ ta̤sò̌gònò̤ ǐsha toǒ. Pṳwè̤ Khrî̌stuphû̌ htě a lòho toǒ a ta̤ma̤pò̤ma̤sha numî̌ he shěto̤bǎ plṳ̂. ^g Ta̤sò̌gònò̤ ǐsha lǒ̤꤮ bò htǒotoǒnu, he kè̌shǐbǎbò. ^h 27He bǎ ǎwè̤ shuphǔshèwè dě he bǎ jipwi̤jili̤ wè̤ lòdǒlòde hena̤. He hǎmoǒnî̤tò̤ numî̌ aǒ sala̤la̤. He to̤bǎ ta ta̤lòdǒǎ lòdǒo mî̌ a ǒǒ. Ǎkǒobe tò̤ sala̤la̤. He hǐdo la̤kûla̤sǒ ǒ lǒbetò̤ dě he bǎ khòbǎ gawo̤gashǐ. 28Tǒ̤hè̌onu patò̤, pṳ̂̌ni̤ni̤꤮ he bǎgubǎgè bǎ bò꤮ pwa̤yṳǎta̤ aprṳ̂aho toǒ awi̤akè̌. 29Kòyò tapwa̤pwa̤ dè khû̌ǎyû̌lò̤ hî̌dě he gènè̤ gwèbǎǐ yǎ. Kòyò tapwa̤pwa̤ dè ma̤ta̤sǔ khanu he sò̌phlǒdû̌ mè̤mè̤̌ kòyò htě a lǒcû̌ nû̌û dě ta̤sǔ akûnu tapwa̤.

30Hè dè lo̤bǎ hî̌bǎhtû̌sò̌ǐ hî̌dě he hî̌bǎhtû̌sò̌ǐ pwǎpǒ̤ ta̤ htě a dǔlṳ he khû̌ǎyû̌lò̤ toǒ awi̤akè̌ pwǎ. 31Běcǎ Ye̤shǔkhrî̌stu apha Cǒmara htǒo a sî̌ya ta he hî̌bǎ lòho mè̤tò̤. Kò htû̌sò̌ǐ tû̌ta ami̤ tûjûpwa̤ talakhǎ nî̌꤮. 32Bǎ he ǒ Damatè̌wî̤kû akhanu, Khwǐdû̌ Areta ahǒla̤ Khwǐ ginǐ̤pwa̤tapwa̤ bè̌lò̤ ǒpo̤ akliphû̌ toǒ dě wî̤ takhadû̌htu dě a noǒpo̤ pṳ̂ asî ta he. ⁱ 33Pwǎ̤tadě, kò shû̌nṳ he dě sû̌tòphlò̌ tama akû, dě wî̤we̤dû̌ alo̤nu takhaphû̌ ǒ tûkû dě kò jèlò̤te̤ he wî̤we̤dû̌ takhaphû̌htǒo akhlo dě he shǎplǎkè ta Khwǐnu tapwa̤ a cǔdekû.