2Cor 12 | KxfSCKRC | STEP | Ta̤hî̌bǎhtû̌sò̌ǐ htǒonu a nî̤bwǐnî̤sîrî ta kòyòya dǐpwǎ̤꤮ tò̤ pwǎ̤ta he tobǎ hî̌bǎhtû̌sò̌ǐ pwǎ. Pò̤̌ta khònò̤htǒo he pwe̤ǐlṳ bǎ sî ta Běcǎ ǐkè̌shǐnǎ he toǒ ta a dǔlṳ bǎ he ta̤toǒ awi̤akè̌.

2 Corinthians 12

Pò̌lu a ta̤kè̌shǐnǎ toǒ ta ta̤dǔlṳ nû̌û toǒ

1 Ta̤hî̌bǎhtû̌sò̌ǐ htǒonu a nî̤bwǐnî̤sîrî ta kòyòya dǐpwǎ̤꤮ tò̤ pwǎ̤ta he tobǎ hî̌bǎhtû̌sò̌ǐ pwǎ. Pò̤̌ta khònò̤htǒo he pwe̤ǐlṳ bǎ sî ta Běcǎ ǐkè̌shǐnǎ he toǒ ta a dǔlṳ bǎ he ta̤toǒ awi̤akè̌. 2 Dě awǐ shǐlǐ̤ně akhanu, kò kaǎge kihtò̌ kòmakhû htě a yṳǎ Khrî̌stu tapwa̤ dě mǒkhû̌ suto̤tato̤ tò̤glò. (Ana̤saklû ǒpahtò̌kû̌dǒ ya, mî̌ a ǒpahtò̌dǒ tò̤ yanu, he sî̌ya tò̤. Sî̌ya pwǎpǒ̤ Cǒmara tapwǎ̤ pa.) 3 Pwǐ he hî̌htonuhǒ, kòmakhûnu tapwa̤nu, bǎnukha ana̤klû ǒpahtò̌kû̌dǒ ya mî̌ a ǒpahtò̌dǒ tò̤ yanu sî̌ya pwǎpǒ̤ Cǒmara tapwǎ̤ pa. 4 Pwǎ̤ta Běcǎ kaǎge kihtò̌ to̤kû̌ a dě ala̤ǒ mǒkhû̌ gûla̤ htò̌yî̤gutṳ̌nu tò̤glò mî̌ he sî̌ya. Bǎ a htò̌ǒ bǎnu akha a gana̤de kò hî̌bǎ nû̌û yo̤toǒ dě a pwe̤ǐlṳ gekhîjòpe bǎ kò ta kòyòhǎkhû̌phû̌ ayo̤ tò̤, htohǒtò̤ Cǒmara nopwe̤ǐlṳ nǒ nû̌û tò̤tò̤. 5 He hî̌bǎhtû̌sò̌ǐ ta̤ma̤htûhtò̌ htǒotoǒ. Pwǎ̤tadě he hî̌bǎhtû̌sò̌ǐ nǒ hena̤ tò̤. He glè hî̌bǎhtû̌sò̌ǐ pwǎpǒ̤ he ta̤khû̌ǎyû̌lò̤ htǒotoǒ pwǎ. 6 Pò̤̌ta he dè sò̌yṳ hî̌bǎhtû̌sò̌ǐ hena̤ pě hî̌numî̌ anî̤ pwǎ, he htûnǒ kòyò kicǐ tò̤, ma̤tè̤hî̌dě he hî̌bǎhtû̌sò̌ǐ heyo̤ htǒotoǒ numî̌ acǒatè̤ pwǎ. Pwǎ̤ta ma̤pûhǐ he hî̌bǎ htû̌sò̌ǐ hena̤ tò̤nu, he khòǐ hena̤. He sò̌yṳ nogènè̤ kò pwî̌ kò kè̌shǐ he ma̤ta̤toǒ ta pwî̌ kò gana̤de he ta̤sû̌ǐ toǒnu pwǎ. He sò̌yṳ nogènè̤dû̌khlo kò ta pwî̌ he ma̤nu tò̤.

7 Ma̤pûhǐ he hî̌bǎhtû̌sò̌ǐ pû hena̤ ta he kè̌shǐ ta̤wǒ dě mǒkhû̌nu toǒ tò̤nu, Cǒmara ǐ he dě he glè khòbǎ ta̤jîta̤jû tacǎ htě a lò̤ta ta̤shî̌shǒ gîshǒ gana̤ ǒtò̤ dě he phěla̤nu. Khînǎmo̤pha hǐkǒdû̌ nohè a tanaphû̌ tado dě a glè hè ma̤jîma̤jû he ta ta̤jîta̤jû htǒotacǎ hǒ. Ta̤pò̤ta̤sha htǒo akhû̌akhî, he phî̌htò̌yî̤jòpe hena̤ tò̤ hǒ. 8 Ma̤pûhǐ Cǒmara phî̌tephekè bǎ he ta̤jîta̤jû htǒonu, he kwigwèbǎǐ yǎ suplǎ. 9 Pwǎ̤ta a hî̌shǔ he, “Na lo̤bǎ ta̤ lǒ̤꤮ bò toǒnu hebwǐhesîrî ma̤jè na hǒ. Bǎ na khû̌ǎyû̌lò̤ hǐnu akha, he ta̤po̤ta̤phǎ shû̌sho ǒlṳhtò̌ nakû pě.” Hǐnu akhû̌akhî, ma̤pûhǐ kò kè̌shǐ sělěpo̤ Khrî̌stu a ta̤po̤phǎ shû̌sho ǒ dě hekû htǒonu, he hî̌bǎhtû̌sò̌ǐ he ta̤khû̌ǎyû̌lò̤ awi̤akè̌ htǒotoǒ pě. He hî̌bǎhtû̌sò̌ǐ hena̤ hǐnudě he sò̌le̤sò̌lò̤ pwǎ. 10 Hǐnudě he ǒ ta ta̤khû̌ǎyû̌lò̤ toǒ, he kè̌shǐ shěto̤bǎ ta ta̤jîta̤jû toǒ, kò pi̤jishǐcǒ he toǒ, kò ma̤jîma̤jû he toǒ, he kè̌shǐ shěto̤bǎ ta ta̤pò̤ta̤sha sî toǒ, ta̤ lǒ̤꤮ bò htě he kè̌shǐ shěto̤bǎ htǒotoǒ numî̌ Khrî̌stu aya pwǎ, ma̤tè̤ he sò̌phlǒmo̤ sò̌phlǒto pwǎ. Ma̤tè̤hî̌dě bǎ he khû̌ǎyû̌lò̤ akhanu, he khû̌ǎshû̌shotû̌ ^{▼▼Pa yṳǎ Cǒmara akhû̌akhî, Cǒmara ǐ he sû̌sò̌ ta̤khû̌ta̤ǎ tokho.} pwǎ.

Pò̌lu bǎgubǎgè bǎ Kòrî̌tiaphû̌ pwa̤yṳǎta̤ aprṳ̂ahophû̌ toǒ aya

11 He hî̌bǎhtû̌sò̌ǐ heyo̤ akhû̌akhî, he lò̤ta kòyò kicǐ tapwa̤. Pwǎ̤ta sî ma̤kicǐ pwǎ he. Sî to htû kòyò toǒ dě a to htû̌sò̌ǐ he. Pwǐ kòyò toǒǒ hî̌ lǒkho he ta, he mî̌ kòyò nòdû̌ tapwa̤ pwǎ pwǎ̤tadě he yû̌lò̤khlo to̤ta a htû lǒkho saradû̌, amî̌ pwa̤nophû̌nu toǒ dî̌kî̌꤮ tò̤. 12 Bǎ he ǒkû̌dǒ ta sî akhanu, sî kè̌shǐ te̤mǎbòtû̌ ta he mî̌ pwa̤nophû̌ mè̤mè̤̌ tapwa̤ hǒ, ma̤tè̤hî̌dě ta̤ htě he ma̤hto toǒnu, he sò̌phlǒhtû ma̤ mè̤mè̤̌, htohǒtò̤ he dǔlṳhto bǎ sî ta̤ma̤dòǐ toǒ ta ta̤cǒklî̌kî̌ya toǒ hǒ, dě he ma̤lṳplṳ̂hto bǎ sî ta̤sû̌pi̤sò̌pi̤ toǒ hǒ. 13 Pwa̤yṳǎta̤ aprṳ̂ahophû̌ ahǔwa̤ toǒ dě he kè̌dû̌kî̌yakhlo yǎ, sî dě he kè̌ bò̌khû̌kè sî hǐnu ya? A ǒ tacǎ mî̌ he kwi sî ta̤ma̤jè tò̤nu pwǎ kò̌kò̌. He kwi sî ta̤ma̤jè tò̤ htǒonu, khòsò̌do dě bòlû̌kèpû he ta̤sǔ nî̌꤮.

14 He tîwî̌tòwònǎ ta he glè hè ǒlèkû̌ sî suplǎtaplǎ hǒ. Pwǎ̤tadě he hèkwinǒ sî wû dǐbǎ꤮ tò̤. He kwi pwǎpǒ̤ sî glè mo̤ǐ he pwǎ, ma̤tè̤hî̌dě phû̌ to bǔǎ mo̤pha mè̤tò̤, mo̤pha to bǔǎpwǎ phû̌. 15 Hema̤hǎbòkè hewûhehta, hekhû̌heǎ, ta̤pṳ̂̌꤮ tacǎ ta sîyanu, he sò̌le̤sò̌lò̤ pwǎ. He mo̤ǐ sî pwî̌tènu sî ta̤mo̤ǐ henu alò̤ta ayû̌ gilò̤to̤ ma̤hî̌tè?

16 Hǐnudě he ma̤guma̤gè sî tò̤ numî̌ sî sî̌ya lòtṳ̌ pwǎ. Pwǎ̤tadě kòyò toǒǒ hî̌ lǒkho he ta he hè htû̌sǒbǎ phû̌mò̤ sî, he hè lòhǎlòho ǎ sîwû, a hî̌ lǒkho hǐnu. 17 He lòhoǎ lòhoo nǒ sî ya? Kòyò htě he nohè yǎ dě sî ǒ toǒ numî̌ a hè ǎtṳobò̌ bǎ sîkhû̌ dě a geǐ lǒkho he wû numî̌ a ǒ tapwa̤pwa̤ ya? 18 Bǎ he kwigwèbǎǐ Tǐtǔ dě a glè hè sî ǒ, dě he plûhè kû̌dǒ pwa̤yṳǎphû̌ tapwa̤ ta a akha numî̌, Tǐtǔ hèma̤ǎ sîkhû̌ ya? A hè ma̤ǎ sîkhû̌ dǐcǎ꤮ tò̤. A ta̤ǒhtûpwa̤hǎnòò̌, ata̤bè̌ a sò̌phlǒsǔshi toǒ numî̌ asǒsǒpwǎta he mè̤tò̤ya?

19 Pa lǒ̤꤮ bò khwè̌bǎ sî htǒotoǒ numî̌, sî gènè̤ lǒkho ta pa hî̌bǎ ma̤kwaǐbò pana̤ hǐnu kǎlè. Hǐnu mè̤tò̤, pa hî̌bǎpwǎ pwǐ Khrî̌stu nohî̌bǎ panu pwǎ numî̌ Cǒmara kè̌shǐ sî̌yatû̌ hǒ. Khobǒsû̌ sî꤮, bò꤮ pa ma̤ta̤ htǒotoǒ numî̌ pa ma̤ htě a glè htûbwǐhtûsîrî ta sîya pwǎ. 20 Htû̌꤮ he hèto̤kû̌ sî ǒ khapěnu, he hè kè̌shǐtû̌ sî ta̤bè̌sû̌bè̌sǎ toǒ htě a kî̌yatû̌ ta pwǐ he sò̌yṳ kè̌shǐnu toǒ pě, htodě sî kè̌shǐtû̌ he ta̤bè̌sû̌bè̌sǎ toǒ htě a kî̌ya pwǐ sî sò̌yṳ kè̌shǐ henu pě, he bǎgubǎgènǎ hǐnu. He bǎgu ta pěmî̌ he hèkè̌shǐ sîgèsîgo nû̌û, sî sò̌khěkè̌khînû̌û, sî sò̌phlǒdû̌ nû̌û, sî ǒkhǒnû̌û tṳ̂prû ta tṳ̂prû, pi̤jishǐcǒ kò, dǒmi̤shǐyo̤ kò, phî̌dû̌phî̌htû na̤, ma̤shû̌shǎ pi̤ti̤pṳ̂tṳ̂ ta̤, hǐnu toǒ hǒ. 21 Dě sî ta̤ǒhtûpwa̤hǎnòò̌ ma̤ lǒkho hǐnu akhû̌akhî, he hè ǒlèkû̌ sî htǒotaplǎ pěnu, pěmî̌ he kè̌shǐbǎ ta ta̤sòwò̤ dě Cǒmara a lo̤mo̤ pě he gènè̤ ǐsha hǐnu. Ma̤tè̤hî̌dě, dě awǐanǒ numî̌ kòyò htě a cû̌sǔnṳ mamǔmakhû toǒ, gènè̤ putupatǎ toǒ ta a cû̌sǔnṳ kòphû̌kòma toǒnu, a yò̤lò̤ge lǒkho asò̌ tò̤. Hǐnudě kòyò htǒotoǒ akhû̌akhî, he hǎsihǎǒ asîya pě kò̌ he bǎgu hǐnu.