2Cor 13 | KxfSCKRC | STEP | He glè hè ǒlèkû̌ sî htǒotaplǎ numî̌ suplǎtaplǎ hǒ. Pwǐ lî̤cahtǐkû hî̌ ta, “Kòyò tapwa̤pwa̤ dè bè̌ a sû̌kho tapwa̤pwa̤ ata̤sǔ dèhî̌dě, pî̌tî̌gutṳ̌ kòyò sò̌gini̤ mè̤tò̤mî̌ sò̌su bǎ lò̤sasî̌ ta kòyò htǒotapwa̤ bè̌ a sû̌kho ta̤sǔ htǒonumî̌ ato mè̤mè̤̌ hǐnu.”

2 Corinthians 13

Ta̤ǐsè̌rè̌sè̌so ta ta̤hî̌mo̤hî̌wǒ gutṳ̌lò̤

1 He glè hè ǒlèkû̌ sî htǒotaplǎ numî̌ suplǎtaplǎ hǒ. Pwǐ lî̤cahtǐkû hî̌ ta, “Kòyò tapwa̤pwa̤ dè bè̌ a sû̌kho tapwa̤pwa̤ ata̤sǔ dèhî̌dě, pî̌tî̌gutṳ̌ kòyò sò̌gini̤ mè̤tò̤mî̌ sò̌su bǎ lò̤sasî̌ ta kòyò htǒotapwa̤ bè̌ a sû̌kho ta̤sǔ htǒonumî̌ ato mè̤mè̤̌ hǐnu.” ^a 2 Bǎ he hè ǒlèkû̌ sî ginǐ̤plǎtaplǎ akhanu, he ǐsè̌rè̌nǎhto kòyò htě a ma̤sǔta̤ dě awǐanǒnu toǒ ta lǒ̤꤮ bò kòyò ahǔwa̤nu toǒ hǒ. Khònò̤dě he ǒtepheyî̤ ta sî dě he ǐsè̌rè̌ gesǒ sî. Dě htû̌꤮ he hè sǒ pě taplǎnu he sò̌le̤ǐnòpe nǒ sî dǐpwǎ̤꤮ tò̤. 3 He ma̤ pwǐ he hî̌htonu pě, ma̤tè̤hî̌dě Khrî̌stu nohî̌bǎ tṳtṳ he ta sî mè̤ ya mî̌ amè̤tò̤ yanu, sî kwisho he dě he glè hî̌ bǎ sî hǒ. Khrî̌stu sû̌ǐwǒge sî pěmî̌, a ǐshabǎnǒ sî dî̌kî̌꤮ tò̤, a sû̌ǐwǒge sî ta a ta̤shû̌ta̤sho pě. 4 Dě ta̤khû̌ǎyû̌lò̤ akhû̌akhî, Khrî̌stu khòsi asò̌ nò̌dòhtǔ alo̤. Pwǎ̤ta khònò̤htǒo dě Cǒmara a ta̤po̤ta̤phǎ shû̌sho akhû̌akhî, a htûpwa̤ hǒ. Hǐnudě pa mî̌ pa khû̌ǎyû̌lò̤ sǒsǒ hǐnu pwǎ̤tadě bǎ pa hî̌ sî pě akhanu, pa dǔlṳ bǎ sî ta Cǒmara a ta̤po̤ta̤phǎ shû̌sho pě, ma̤tè̤hî̌dě pa htû ta Khrî̌stu tacǎnǔ꤮ pa dě pa ta̤ǒhtûpwa̤kû akhû̌akhî, pa ma̤hǐnu pě.

5 Ma̤pûhǐ sî sî̌yaǐ lǒkho sîna̤ ta sî cǒtè̤ ta ta̤yṳ ya, sî cǒtè̤ tò̤ yanu, gwèlò̤ lǒkho sîna̤nu. Khrî̌stu ǒhtûpwa̤ dě sîkû numî̌ sî sî̌ya tò̤ ya? Pwǎ̤tadě sî dè kè̌shǐ ta sî ta̤yṳ tò̤nu, Ye̤shǔkhrî̌stu ǒhtûpwa̤ dě sîkû tò̤. 6 Dě he yṳǎ ta pa mî̌ Khrî̌stu a pwa̤nophû̌ toǒ mè̤mè̤̌ numî̌, sî sî̌yahè tû̌ pě. 7 Pa kwisaba ta sî ma̤ sělěpe pûma̤ ta̤sǔ ma̤, ma̤tè̤hî̌dě ma̤pûhǐ kò sî̌ya ta pa mî̌ Khrî̌stu a pwa̤nophû̌ mè̤mè̤̌ toǒ ayanudě, pa kwisaba hǐnu mè̤tò̤. Sî dè gènè̤ lǒkho pa ta pa mî̌ pwa̤nophû̌ htě a mè̤mè̤̌ toǒ bǎbǎ, a mè̤mè̤̌ tò̤ toǒ bǎbǎ, a la̤hî̌ǒ nǒ dǐcǎ꤮ tò̤. Ta̤ htě pa sò̌yṳ mè̤mè̤̌ numî̌ hî̌tè hî̌dě sî dè ma̤ta̤wǒ hî̌numî̌ pǒ hǒ. 8 Ma̤tè̤hî̌dě pa shěshǔhtè̌shǔ ta̤te̤ta̤mǎ numî̌ anî̤ tò̤, pa bǎgû sûkhû̌ kû̌ta ta̤te̤ta̤mǎ tokho. 9 Pa dè lo̤bǎ sû̌ǐwǒgemò̌ sî tò̤nu, pa noǎjò pa ta̤shû̌ta̤sho tò̤, hǐnudě kò gènè̤ lǒkho pa ta pa khû̌ǎyû̌lò̤ pwǎ hǐnudě sî dè ma̤ sělěpe ta̤sǔ tò̤ hî̌nu, sî htûhtò̌ kòyò htě a shû̌sho toǒ akhû̌akhî, pa sò̌le̤sò̌lò̤ mè̤mè̤̌. Pa kwisaba bǎ sî ta sî ǒhtûpwa̤ wǒhè alo̤mo̤ tokho dě sî ma̤pe pû ta̤sǔ tò̤, hǐnu pwǎ. 10 Htû̌꤮ he hèto̤kû̌ sî pě dě ma̤pûhǐ he hè noǎshû̌ pûma̤ he ta̤shû̌ta̤sho htě Běcǎ ǐ he htǒonu ma̤nu, bǎ he ǒyî̤ ta sî akha, he sò̌yṳ khwè̌cû̌wǐpwǎ bǎ sî lî̤htǒo. Ma̤pûhǐ he ma̤dû̌htò̌htûhtò̌ sî ta̤yṳta̤nǎ ayanu, Běcǎ ǐ he ta̤shû̌ta̤sho htǒonu pwǎ. A ǐ he ta̤shû̌ta̤sho dě he glè ma̤pî̌ma̤lṳ̂ sî ayanu mè̤tò̤.

11 Sû̌kho sî꤮, he sò̌yṳ hî̌ gutṳ̌lò̤ sî ta, sò̌le̤sò̌lò̤ lǒkho nî̌꤮. Ma̤wǒgesǒ lǒkho sî ta̤ǒhtûpwa̤ nî̌꤮. Gana̤de lǒkho he ta̤kwigwèbǎǐ sî htǒonu toǒ nî̌꤮. Ǒhtuǒplǒ, ǒpè̤ǒdû nû̌û nî̌꤮. Sî dè ma̤mò̌hǐnu Cǒmara htě a mî̌ ta̤mo̤ǐ ta ta̤pè̤ta̤dû a kòshî̌kòtṳ htǒotapwa̤ ǒkû̌ tû̌ta sî pě.

12 Dǔlṳ kè̌khînû̌û ta sî ta̤mo̤ǐ htǒonu ta sî hî̌mo̤hî̌wǒ nû̌û tapwa̤ ta tapwa̤ nî̌꤮. 13 Pwa̤yṳǎphû̌ htě a ǒ lǒkho bǎo pṳ̂̌꤮ tapwa̤ sûhè bǎ asî ta sî ta̤hî̌mo̤hî̌wǒ toǒ.

14 Pa Běcǎ Ye̤shǔkhrî̌stu abwǐasîrî, pha Cǒmara ata̤mo̤ǐ ta Běcǎ sǎcahtǐ a ta̤bǒsû̌khǎkho htǒonu, a ǒkû̌ tû̌ta sî pṳ̂̌꤮ tapwa̤ nî̌꤮.