2Cor 2 | KxfSCKRC | STEP | He dè hè sǎhtǎmò̌ sînu, he sî̌ya ta he hè ma̤sǎpla̤ sî pě akhû̌akhî, he bè̌lò̤kè he sò̌phlǒ dě he hèpe tò̤.

2 Corinthians 2

1 He dè hè sǎhtǎmò̌ sînu, he sî̌ya ta he hè ma̤sǎpla̤ sî pě akhû̌akhî, he bè̌lò̤kè he sò̌phlǒ dě he hèpe tò̤. 2 He dè ma̤sǎpla̤ sî hî̌dě mî̌ûpè ma̤sò̌le̤sò̌lò̤lè̌pû he pě pè? Pwa̤ma̤sò̌le̤sò̌lò̤ he mî̌ a ǒ pwǎpǒ̤ sî htě he ma̤sǎpla̤ sî htǒotoǒ pwǎ. 3 Htû̌ he hè pě akhanu, sî htě ama̤sò̌le̤sò̌lò̤ he toǒnu ma̤pûhǐ a ma̤sǎpla̤ he tò̤nu, he khwè̌cû̌wǐ tû̌ bǎ sî lî̤ hǒ. Sî lǒ̤bò sî̌ya te̤mǎ tû̌ he ta̤sò̌le̤sò̌lò̤ dèhî̌dě sî bǎ sò̌le̤sò̌lò̤ dò̌ǔ pwǎ. 4 Bǎ he khwè̌cû̌ sî lî̤ htǒo tabǎ akhanu, he sò̌phlǒmo̤ dî̌kî̌꤮ tò̤, aguagè na̤cè̌ he. Htohǒtò̤ he mi̤sǎshilò̤ betî̌pî̌꤮ kèpwǎ. Pwǎ̤tadě he sò̌yṳ ma̤sǎpla̤ sî hǐnu mè̤tò̤, he sò̌yṳ nosî̌ya sî ta he mo̤ǐ sî pwî̌꤮ tènu pwǎ.

Bòlû̌ ta̤ma̤sǔphû̌ a ta̤sǔ

5 Khònò̤, dè hî̌ kòyò ma̤sǔta̤ dě sîkla tapwa̤nu, a ma̤sǎpla̤ tû̌ he mè̤tò̤, a ma̤sǎpla̤bòdǒ sî pṳ̂̌꤮ tapwa̤. Pò̤̌ta he sò̌yṳ hî̌lǒhî̌khlo nǒtò̤, he hî̌ ta a phǔ ma̤sǎpla̤bòdǒ sî pṳ̂̌꤮ tapwa̤ hǒ. 6 Pwa̤ma̤sǔta̤ htǒotapwa̤nu, sî tṳ̂prṳ̂taphǎ ma̤yò̤ nû̌û pwî̌numî̌ a pǒhǒ. 7 Pò̤̌ta, khònò̤htǒo sî cû̌ bòlû̌ yǎ ta̤sǔ numî̌ awǒkhlo sîya. Dě cû̌ ǐkhû̌ǐǎ gesǒ yǎnu. Tò̤pěmî̌ a sò̌phlǒpî̌ dě a sǎpla̤sǎyṳ tûlû̌kè hè̌. 8 Hǐnu akhû̌akhî, he kwigwèbǎǐ sî. Cû̌ dǔlṳgesǒ yǎta sî mo̤ǐsělě pepwǎ anu nî̌꤮. 9 He khwè̌ bǎ sî lî̤ dě awǐkha tabǎnu mî̌, he sò̌yṳ noma̤yò̤ sî ta kòyò gana̤de kòyo̤ tò̤nu tapwa̤ pwǎ. Hǐnudě he sò̌yṳ sî̌ya te̤mǎ ta sî gûma̤kû̌ pwǐ he sû̌ǐ sînu ya mî̌, sî gûma̤ tò̤ya hǐnupwǎ. 10 Khònò̤htǒo sî dè bòlû̌ kòyò htě sî ma̤yò̤ yǎnu tapwa̤ ata̤sǔ dèhî̌dě he꤮ mî̌ he bòlû̌dò̌ǔpwǎ ata̤sǔsǔ. Hî̌kû̌nǎ, ta̤ htě he to bòlû̌kè dè ǒ hî̌dě, ma̤pûhǐ a htûbwǐhtûsîrî sîyanu he bòlû̌dǒ ata̤sǔ pě. Khrî̌stu kè̌shǐ kû̌dǒ he bòlû̌ ata̤sǔ htǒonu pě. 11 Ma̤pûhǐ khînǎmo̤pha hǐkǒdû̌ ma̤pè̤kè pû pa tò̤nu, pa bǎ bòlû̌ kò ta̤sǔ hǐnu. Ma̤tè̤hî̌dě khînǎmo̤pha hǐkǒdû̌ a ta̤yè̤lò̤nǎ toǒnu pa sî̌yabò tû̌ hǒ.

Pò̌lu sò̌phlǒgu sò̌phlǒgè dě Tarò̌wî̤kû

12 Bǎ he cû̌to̤ Tarò̌wî̤kû dě he glè dǒhtû̌ǐ bǎ kò ta Khrî̌stu a ta̤sò̌le̤sò̌lò̤ awi̤akè̌ akhanu, he kè̌shǐ Běcǎ bòmonǎhto he takha dě he kè̌shǐ ta a sò̌yṳ noma̤ he ta̤ma̤ bǎ wî̤nu tî̤wî̤ akû. ^a 13 Pwǎ̤ta he sò̌phlǒgu sò̌phlǒgè jòjî̌꤮ tò̤, ma̤tè̤hî̌dě he kè̌shǐ pa pṳwè̤ Tǐtǔ tò̤. Hǐnudě he hî̌mo̤hî̌wǒkè kòyò ǒ bǎ Tarò̌wî̤kûnu toǒ dě he hǎhtò̌cû̌kè Makedò̌niaga.

Khrî̌stu akhû̌akhî pa ma̤pè̤ta̤

14 Pwǎ̤tadě, he hî̌bwǐhî̌sîrî htû̌sò̌ǐ ta̤ htě Cǒmara ma̤bǎ pa htǒotoǒ, ma̤tè̤hî̌dě pa htûhtò̌ kû̌ta Khrî̌stu tacǎpa akhû̌akhî, Cǒmara cû̌wǐ palo̤mo̤ dě pa gûkû̌ akò htě asǒsǒta kò dǒlò̤te̤ Khrî̌stu akòyò dě apo̤kûnu toǒ hǒ. Cǒmara dǔlṳ pa ta kò pṳ̂̌꤮ tapwa̤ hǒ. Cǒmara notṳtṳ pa dě pa cû̌shidoǐsî̌ya kò ta Khrî̌stu awi̤akè̌ htě asǒsǒta ta̤nṳmû̌nṳshu htǒonu pṳ̂̌꤮ tò̤glò hǒ. 15 Pa ta̤ǒhtûpwa̤ ta pa ta̤dǒhtû̌ǐ kò htǒotoǒnu asǒsǒta ta̤nṳmû̌nṳshu dě a nṳmû̌ pîshîcû̌to̤bò kòyò pṳ̂̌꤮ tapwa̤ ǒ. A nṳmû̌ cû̌to̤bò dě kòyò htě a nî̤bǎ ta̤ma̤lû̌htò̌ge toǒ ta kòyò htě a to̤ dě ta̤pî̌ta̤lṳ̂ pě toǒ ǒ. 16 Pa ta̤ǒhtûpwa̤ htǒo ta pa ta̤dǒhtû̌ǐ bǎkò Khrî̌stu awi̤akè̌ htě a sûcû̌ kò dě ta̤htûpwa̤ tûjûpwa̤ htǒotoǒnu, asǒsǒta ta̤nṳmû̌nṳshu toǒ dě a nṳmû̌wǐ mè̤mè̤̌ bǎ kòyò htě a nî̤bǎ ta̤ma̤lû̌htò̌ge htǒotoǒ aya hǒ. Pwǎ̤ta kòyò htě a to̤ dě ta̤pî̌ta̤lṳ̂ pě toǒ ayanu, a nṳsonṳû bǎ asî sǒsǒta lṳso nupwǎ. Dě asî yṳǎ kû̌kò tò̤ akhû̌akhî, a sûcû̌ asî dě ta̤cèrò tûjûpwa̤ agûla̤ htǒonu hǒ. Pa ta̤ma̤ htǒonumî̌ adû̌ayǒ mè̤mè̤̌, hǐnudě mî̌ûpè tapwa̤ ma̤bò̌ mè̤mè̤̌ ta̤ma̤ hè̌o tacǎ pè? 17 Kòyò ma̤ lǒkho Cǒmara ata̤ma̤ dě a sû̌ǐtòwòǐ bǎ kònu a ǒplṳ̂ pwǎ̤ta pa kè̌mò̌mṳ ma̤kû̌ pwǐ asî ma̤nu tò̤. Ma̤tè̤hî̌dě, ma̤pûhǐ asî nî̤bǎ lǒkho wû dě asî dǒhtû̌ǐpwǎ bǎ kò ta Cǒmara ale̤ayo̤. Pwǎ̤ta pa htǒotoǒnu, Cǒmara nocû̌ dǒhtû̌ǐ pa ta Khrî̌stu awi̤akè̌, pa dǒhtû̌ǐ kò htǒonu Cǒmara kè̌shǐ, pa htû kû̌ta Khrî̌stu tacǎnǔpa dě pa mî̌ pwa̤nophû̌ htě a sò̌phlǒcǒtè̤ toǒ hǒ.