2Cor 3 | KxfSCKRC | STEP | He hî̌ hè̌o dě alò̤ta he hî̌bǎhtò̌yî̤ gesǒ hena̤ hǐnu ya? Mî̌ pa lo̤bǎ phî̌hènṳ pa lî̤sasî̌ toǒ dě a glè pwe̤ǐlṳ bǎ sî ta pa mî̌ pwa̤nophû̌ mè̤mè̤̌ toǒ pwǐ kòhǔwa̤ toǒǒ phî̌hènṳnu ya? Mè̤tò̤mî̌ pa lo̤bǎ phî̌cû̌nṳ lî̤sasî̌ htě sî khwè̌ bǎ pa toǒnu ya?

2 Corinthians 3

Pa mî̌ pwa̤nophû̌ htě a dǒhtû̌ǐ bǎ kò ta ta̤wṳ̂dò asa

1 He hî̌ hè̌o dě alò̤ta he hî̌bǎhtò̌yî̤ gesǒ hena̤ hǐnu ya? Mî̌ pa lo̤bǎ phî̌hènṳ pa lî̤sasî̌ toǒ dě a glè pwe̤ǐlṳ bǎ sî ta pa mî̌ pwa̤nophû̌ mè̤mè̤̌ toǒ pwǐ kòhǔwa̤ toǒǒ phî̌hènṳnu ya? Mè̤tò̤mî̌ pa lo̤bǎ phî̌cû̌nṳ lî̤sasî̌ htě sî khwè̌ bǎ pa toǒnu ya? 2 Pò̤̌ta pa htǒotoǒnu, pa lo̤bǎdǒ hǐnu tò̤. Pa sî̌ya ta sî mî̌ pa lî̤sasî̌ toǒ dě pa sò̌phlǒ tǒhtuta sî pṳ̂̌꤮ taplǎ. Dě sî gû Khrî̌stu akò akhû̌akhî, kòyò pṳ̂̌꤮ tapwa̤ sî̌ya tṳtṳ kû̌ta pa ma̤ta̤ htǒonumî̌ awǒpwǎ hǐnu pě. 3 Sî htǒotoǒ numî̌, alò̤ta lî̤ htě Khrî̌stu khwè̌ dě a sûhè tṳtṳ nû̌ûta pa htǒotoǒnu hǒ. Pwǎ̤ta a khwè̌ nû̌ûta lî̤bo ta lî̤boshi htǒonu mè̤tò̤, htohǒtò̤ a khwè̌ nû̌ûdě lo̤bělo̤ pwǐ Mǒ̤jè alo̤běnu mè̤tò̤tò̤. Khrî̌stu nokhwè̌ tṳtṳ lî̤phlǒhtǒo dě sî sò̌phlǒ toǒ alo̤ ta a Běcǎ sǎcahtǐ hǒ. ^a

Cǒmara htě a htûpwa̤ htǒotapwa̤ nohè Běcǎ sǎcahtǐ dě a glè hè ǒhtûpwa̤ sîsò̌phlǒkû hǒ. ^b

4 Ye̤shǔkhrî̌stu ǒhtûpwa̤ dě pakû ta sîkû akhû̌akhî, pa hî̌bǔ ta pa ma̤ ta̤ma̤ htǒotoǒnu, Cǒmara ta̤sò̌yṳǒ pwǎ. 5 Pa sî̌yahtò̌ tû̌ pa ta̤sî̌ta̤jò toǒnu mè̤tò̤. Pa ǒ ta ta̤sî̌ta̤jò htě pa ma̤bò̌ ta̤ma̤ htǒotoǒ numî̌ a ǒpwǎ Cǒmara a ǒ hè. 6 Ma̤pûhǐ pa sû̌ǐ dǒhtû̌ǐphlobò̌ bǎ kò ta̤wṳ̂dò asahtǒo ayanu, pwa̤ htě a ǐlò̤ pa ta̤sî̌ta̤jò htǒonumî̌ Cǒmara htǒotapwa̤ hǒ. Ta̤wṳ̂dò asa htě a ǐlò̤ htǒonumî̌ asǒsǒta kò khwè̌ Mǒ̤jè a ta̤sû̌ta̤tòwònu mè̤tò̤. Ta̤wṳ̂dò asa htǒonumî̌ a nǎla̤ǐ Běcǎ sǎcahtǐ ma̤ta̤ dě pa sò̌phlǒkû htǒonu pwǎ. Pa dè nǎla̤ǐ ta̤sû̌ta̤tòwò htě kò khwè̌ htǒonu hî̌numî̌ pa nî̤bǎ ta̤si pě, pwǎ̤ta Běcǎ sǎcahtǐ htǒonu a phî̌hènṳ bǎ pa ta̤htûpwa̤ tûjûpwa̤ hǒ. ^c

7 Dě wǐkha bǎ Cǒmara khwè̌ ta̤mǎlò̤ htǒotoǒ bǎ lo̤bělo̤ dě a ǐlò̤ nû̌ûta Mǒ̤jè akhanu, Cǒmara a sîrîdû̌sîrîhtû htǒonu a lîrakhahtò̌lṳ. Dě ta̤lîrakhalò̤ dě Mǒ̤jè ami̤sǎlo̤ htǒonu, a rakhashû̌ bǎ mè̤mè̤̌ ta Israelphû̌ toǒ aya akhû̌akhî, asî kè̌bǔ nû̌ûmi̤sǎ tò̤. Pwǎ̤tadě ta̤rakha htǒonu a lîsělě tò̤, a hǎmǎge pwǎ. ^d 8 Ta̤sû̌ta̤tòwò htǒonu a dè hè ta a ta̤sîrîdû̌sîrîhtû shû̌sho bǎo dèhî̌mò̌nu ta̤wṳ̂dò asa htǒonu a sîrîdû̌sîrîhtû shû̌shokhlo ta ta̤sû̌ta̤tòwò htǒonu hǒ. Ta̤wṳ̂dò asa htǒonu mî̌ Běcǎ sǎcahtǐ htě a ǐ pa ta̤htûpwa̤ htǒonu tapwa̤ hǒ. 9 Ta̤wṳ̂dò ali̤ htě a phî̌hè pwǎ ta̤si htǒonu, a ǒmò̌ ta sîrîshû̌sho dèhî̌dě, ta̤wṳ̂dò asa htě a ma̤cǒma̤tè̤ pa dě Cǒmara alo̤mo̤ htǒonu, a sîrîshû̌sho dû̌khlo ta hǐnu hǒ. 10 Ta̤wṳ̂dò asa khònò̤htǒo tûmû a sîrîdû̌sîrîhtû htǒonu ashû̌asho dě ashû̌ashopè̤kè ta̤sû̌ta̤tòwò htǒo akhû̌akhî, a lò̤ta ta̤sû̌ta̤tòwò a sîrîshû̌sho hǎmǎkè hǐnu. 11 Ta̤sû̌ta̤tòwò awî̤awǒ mè̤mè̤̌ pwǎ̤ta a lîsělěpe tò̤, a lî hǎmǎkè pwǎ. Pwǎ̤tadě ta̤wṳ̂dò asa htě a ǒměgle tûjûpwa̤ htǒo, a ǒ ta a ta̤sîrîshû̌sho dě adû̌khlo ta ta̤sû̌ta̤tòwò htǒonu hǒ.

12 Pa sî̌ya te̤mǎ ta ta̤wṳ̂dò asahtǒo a ǒměǒgle tûjûpwa̤ pě akhû̌akhî, pa dǒhtû̌ǐ bǎ kò ta Cǒmara ale̤ayo̤nu pa hî̌ khuhabǔ hǒ. 13 Pa mî̌ alò̤ta Mǒ̤jènu mè̤tò̤. Ma̤pûhǐ Israelphû̌ toǒ kè̌hètotǐ pû Mǒ̤jè mi̤sǎ htě a lîrakha pi̤gilò̤ ta gilò̤ htǒo tò̤nu, Mǒ̤jè hǔbǐ ami̤sǎ. ^e 14 Bǎnukha Israelphû̌ toǒnu, a te̤pe̤bò nû̌û sò̌phlǒ. Tǒ̤khònò̤ bǎbǎ, bǎ kò dǒ htò̌lṳ Mǒ̤jè a ta̤sû̌ta̤tòwò dě lî̤cahtǐkû htǒo akhanu, asî sî̌yaphlo dǐcǎ꤮ tò̤. Asî dè yṳǎ Běcǎ Ye̤shǔkhrî̌stu mî̌ asò̌phlǒ te̤pe̤ htǒo glè ǒmohtò̌ dě sî̌yaphlohè bò̌nǒ pwǎ. 15 Tǒ̤lò̤khònò̤htǒo bǎbǎ, asî sî̌yaphlo lǒkho hǒtò̤. Ma̤tè̤hî̌dě bǎ asî dǒ Mǒ̤jè a ta̤sû̌ta̤tòwò akhanu, asî sò̌phlǒ te̤pe̤ pepwǎ akhû̌akhî, a sî̌yaphlobò̌ lǒkho tò̤. 16 Pwǎ̤tadě, bǎ kòyò htě asò̌phlǒ te̤pe̤ htǒotapwa̤ yṳǎna̤ǎge Běcǎ akhanu, ta̤ htě a ma̤khǐma̤te̤pe̤ nû̌ûsò̌phlǒ toǒnu kò phî̌mokè pě. ^f 17 Běcǎ htě he khwè̌ awi̤akè̌ htǒotapwa̤ numî̌ Běcǎ sǎcahtǐ hǒ. Kòyò lǒ̤bò htě a nî̤bǎ Běcǎ sǎcahtǐ toǒnu, Běcǎ sǎcahtǐ plûhǎhtò̌pele cû̌ nû̌û hǒ. 18 Khònò̤ ta̤ lǒ̤bò htě a hǔdǐdò pa dě a yṳǎ Ye̤shǔ htǒotoǒ ami̤sǎnu a ǒpe dǐcǎ꤮ tò̤. Hǐnudě, khònò̤htǒo pa kè̌shǐ sělě Běcǎ a ta̤sîrîdû̌sîrîhtû dě pa htûhtò̌ sǒsǒta me̤dǔ htě a lîshěrakha gesǒ Běcǎ a ta̤sîrîdû̌sîrîhtû toǒnu hǒ. Pa kè̌shǐ sělě Běcǎ asîrîdû̌sîrîhtû, Běcǎ sǎcahtǐ ma̤ bǎ pa dě pa sǒsǒta pa Běcǎ htě a ta̤sîrîdû̌sîrîhtû htǒotapwa̤nu hǒ.