2Cor 4 | KxfSCKRC | STEP | Hǐnudě pa sò̌phlǒpî̌ tò̤, ma̤tè̤ Cǒmara abwǐasîrî akhû̌akhî, a ǐlò̤ pa ta̤ma̤ htě pa glè dǒhtû̌ǐ bǎkò ta ta̤wṳ̂dò asa htǒonu pě.

2 Corinthians 4

Dǒhtû̌ǐ ta̤sò̌le̤sò̌lò̤ awi̤akè̌

1 Hǐnudě pa sò̌phlǒpî̌ tò̤, ma̤tè̤ Cǒmara abwǐasîrî akhû̌akhî, a ǐlò̤ pa ta̤ma̤ htě pa glè dǒhtû̌ǐ bǎkò ta ta̤wṳ̂dò asa htǒonu pě. 2 Ta̤lǒǎplò̤ǎ kò, ta̤ma̤ bè̌hǔ titètè̌꤮ toǒnu bǎbǎ, ta̤ma̤ htě a htûhtò̌ ta̤sòwò̤ titètè̌꤮ toǒnu bǎbǎ, pa ma̤pe dî̌kî̌꤮ tò̤ hǒ. Bǎ pa dǒhtû̌ǐ bǎ kò ta Cǒmara ale̤ayo̤ akhanu, pa hî̌bǎ lǒǎplò̤ǎ kò tò̤, pa sû̌ǐlòho panṳdǒ yo̤sǎ ahǔwa̤toǒ tò̤. Dě Cǒmara a lo̤mo̤, pa hî̌bǎ titètè̌꤮ bǎbǎ, pa ma̤ta̤ titètè̌꤮ bǎbǎnu, atobò pwǎ. Ma̤pûhǐ asî pṳ̂̌꤮ tapwa̤ sî̌ya lǒkho ta asî yṳǎ pa ayanu, pa hî̌cǒtè̤, pa ma̤cǒma̤tè̤ ta̤ hǐnu hǒ. 3 Ma̤tè̤hî̌dě, ta̤sò̌le̤sò̌lò̤ awi̤akè̌ htě pa dǒhtû̌ǐ bǎ kò htǒonu, a dè ǒhǔ mò̌nu, a ǒhǔ pwǎbǎ kòyò htě a to̤kè ta̤pî̌ta̤lṳ̂ toǒ aya. 4 Khînǎmo̤pha hǐkǒdû̌ htě a pǒǐ hǎkhû̌ htǒotadonu, a ma̤khǐ ma̤te̤pe̤kè asî mi̤sǎ akhû̌akhî, asî kè̌shǐ kû̌kò ta̤sò̌le̤sò̌lò̤ awi̤akè̌ ta ata̤lî htǒonu tò̤. Ma̤pûhǐ kòyòhǎkhû̌phû̌ toǒ sî̌yaphlo pû Khrî̌stu a ta̤sò̌le̤sò̌lò̤ awi̤akè̌ htě a pwe̤ǐlṳ bǎ kò ta Khrî̌stu a ta̤sîrîdû̌sîrîhtû awi̤akè̌ htǒo tò̤nu, a ma̤te̤pe̤ ǒò̌kè asî hǐnu hǒ. Pwa̤ htě a dǔlṳ te̤mǎ pa ta Cǒmara mî̌ Khrî̌stu hǒ. 5 Pa cû̌ dǒhtû̌ǐ tû̌ pawi̤pakè̌ mè̤tò̤. Pwǎ̤tadě pa hè dǒhtû̌ǐlṳ bǎ kò ta Ye̤shǔkhrî̌stu mî̌ Běcǎ tapwa̤ awi̤akè̌. Hǐnudě Khrî̌stu akhû̌akhî, pa htû sî jûphû̌ toǒ hǒ. 6 Bǎ Cǒmara bǒlò̤ ta̤lǒ̤꤮ bò akhanu, a hî̌ ta, “Ta̤khǐ sǒsǔ tephe cû̌kè dě ta̤lî ǒlṳhtò̌ tû̌ nî̌꤮,” a hî̌ hǐnu. Cǒmara ma̤hto bǎ pa hǐnu hǒ. Bǎ pa sî̌ya Khrî̌stu hǒtò̤ akhanu, pa sò̌phlǒ htǒo a khǐte̤pe̤ pwǎ, pwǎ̤tadě Cǒmara ma̤lîkè bǎ pa sò̌phlǒ hǒ. Ma̤pûhǐ pa sî̌yaphlowǒ Cǒmara a ta̤sîrîdû̌sîrîhtû htě a dǔlṳhtò̌ tṳtṳ ta Khrî̌stu htǒotoǒnu, a mî̌ pwa̤ htě a ǐshělîhtò̌ bǎ pa sò̌phlǒ a ta̤gènè̤ toǒ tapwa̤ hǒ. ^a

7 Pwǎ̤ta pa dǒhtû̌ǐ bǎ kò htǒotoǒnu, a lò̤pwǎta gopo̤bǒ htě kò shû̌nṳbe akû ta ta̤le̤dû̌pwî̤htû tamanu hǒ. Ta̤le̤dû̌pwî̤htû htǒonumî̌ ta̤sò̌le̤sò̌lò̤ awi̤akè̌ htǒonu hǒ. A ma̤htǒo ma̤tè̤hî̌dě ma̤pûhǐ Cǒmara dǔlṳ ta ta̤po̤ta̤phǎshû̌sho htǒonumî̌ a ǒ dě pakû hǎhtò̌ mè̤tò̤, a ǒ dě Cǒmara ǒ hè pwǎ. 8 Pa kè̌shǐbǎ plṳ̂ mè̤mè̤̌ ta ta̤pò̤ta̤sha pwǎ̤ta a ma̤pè̤nǒ ta pa dǐkhò̌꤮ tò̤. Taplǎplǎnu pa tobǎ ma̤hî̌tènu pa sî̌yape dǐcǎ꤮ tò̤ pwǎ̤ta pa sò̌phlǒpî̌nǒ kû̌kò dǐkhò̌꤮ tò̤. 9 Kò ma̤jîma̤jû nò̌sokǎ pa lè Cǒmara wîkè pa tò̤. Asî po̤lòkhǔ pa pwǎ̤ta pa ihtǒgesǒ dě pa ma̤ sělěpepwǎ ta̤ma̤ lè. 10 Pa cû̌ bǎtè꤮ tò̤glò bǎbǎ, pa bǎkhòbǎ ta̤jîta̤jû pṳ̂̌꤮ taplǎ lò̤ta pa kè̌shǐbǎ ta ta̤sinu. Pa ǒhtûpwa̤ lò̤ta Khrî̌stu htě a ǒhtûpwa̤ bǎ hǎkhû̌ akhanu hǒ. Ma̤pûhǐ kò kè̌shǐ Khrî̌stu ǒhtûpwa̤ pakû dě a ma̤jè pa pṳ̂̌꤮ taplǎ ayanu, ta̤htǒotoǒ htûhtò̌ pwǎ. 11 Pa kòyò ta̤ǒhtûpwa̤ htǒotuhtunu, pa gû Ye̤shǔ kò akhû̌akhî, pa bǎ kè̌shǐbǎ ta ta̤sò̌gònò̤ ǐsha dě kò glè ma̤si pa. Ma̤pûhǐ kò kè̌shǐ ta Khrî̌stu ǒhtûpwa̤ dě pana̤klû ti̤ni̤kha pě a sijòhtǒo akûnu, pa bǎ kè̌shǐbǎpwǎ hǐnu. 12 Dě pa dǒhtû̌ǐ bǎ kò ta̤sò̌le̤sò̌lò̤ awi̤akè̌ akhû̌akhî, pa kè̌shǐ sala̤ ta kò glè ma̤si pa. Pwǎ̤tadě pa kè̌shǐ hǐnu akhû̌akhî, sî nî̤bǎ ta̤htûpwa̤ hǒ.

13 Lî̤cahtǐkûnu hî̌, “He yṳǎ Cǒmara, dě he pwe̤ǐlṳ bǎ kò pě,” a sǒsǒtahǐnuakho, pa yṳǎ Cǒmara akhû̌akhî, pa pwe̤ǐlṳ bǎ kòyò ta Khrî̌stu a ta̤sò̌le̤sò̌lò̤ awi̤akè̌ pě. ^b 14 Pa htûhtò̌ kû̌ta Běcǎ Ye̤shǔ tacǎnǔpa akhû̌akhî, pa sî̌ya ta Cǒmara htě a ma̤htûpwa̤gesǒ pa Běcǎ Ye̤shǔ htǒotapwa̤nu, a ma̤htûpwa̤gesǒ pa pě. Htohǒtò̤ a ma̤htûpwa̤ge kû̌dǒ sî ta pa ta̤si akla pě dě a kaǎǒplǒbò pa dě a lo̤mo̤ pě. 15 Ma̤pûhǐ ta̤jîta̤jû lǒ̤bò a nî̤bwǐnî̤sîrî tû̌pû sîyanu, pa sò̌phlǒhtûbò pṳ̂̌꤮ tacǎ dě pa dǒhtû̌ǐ bǎ kò ta ta̤sò̌le̤sò̌lò̤ awi̤akè̌. Htû̌꤮ kòyò saprṳ̂ kè̌shǐ hèbǎ plṳ̂ Cǒmara abwǐasîrî akhapěnu, kòyò htě a hî̌bwǐhî̌sîrî Cǒmara toǒ ǒdû̌hè pě, dě kòyò lǒ̤꤮ bò htû̌sò̌ǐ Cǒmara pě.

Ǒhtûpwa̤ ta ta̤yṳ

16 Dě htǒotoǒ akhû̌akhî, pa sò̌phlǒpî̌ dî̌kî̌꤮ tò̤. Pana̤klû akhû̌aǎ yû̌lò̤hè taplǎtîkî̌ taplǎtîkî̌, pwǎ̤tadě pa sò̌phlǒ htǒonu, ti̤ni̤ ta ti̤ni̤ a khû̌ǎshû̌shohtò̌ pwǎ. 17 Ma̤tè̤hî̌dě ta̤pò̤ta̤sha htě pa khòbǎ hǎkhû̌bǎotoǒ numî̌ teděsǎphû̌ pwǎ. Pa dè dǒtûkè̌ ta̤wî̤ta̤wǒ htě pa nî̤bǎ yǎ htû̌꤮ nǒkòpě tuhtu pě toǒ numî̌, amè̤ ta dǐcǎ꤮ hǒtò̤. Bǎ hǎkhû̌nu pa khòbǎ ta̤pò̤ta̤sha htǒotoǒ pwǎ̤ta dě mǒkhû̌ pěnu ta̤sîrîdû̌sîrîhtû tûjûpwa̤ htě awî̤awǒkhlo, dě ahtǒkhlo ta ta̤pò̤ta̤sha htě pa khòbǎ hǎkhû̌ bǎonu, pa nî̤bǎ pě. 18 Hǐnudě, ta̤pò̤ta̤sha htě he kè̌shǐbǎ htǒotoǒnu, he bè̌duna̤nǒ yǎ dǐcǎ꤮ tò̤. Ta̤ htě a ǒ tǒhtumě dě he sò̌phlǒkû tacǎnumî̌ ta̤wî̤ta̤wǒ htě Cǒmara glè ǐ he pě htǒonu pwǎ. Ta̤ htě pa kè̌shǐjò toǒnu, a glè ǒlṳyî̤pwǎ teděsǎphû̌ pwǎ, pwǎ̤ta ta̤ htě pa kè̌shǐjòtò̤ toǒnu, a ǒyî̤ tûjûpwa̤ pě.