2Cor 6 | KxfSCKRC | STEP | Pa mî̌ pwa̤ma̤htuta̤ ta Cǒmara toǒ akhû̌akhî, pa tûsû sî ta sî ǒhtûpwa̤ pwǐ Cǒmara sò̌yṳ noǒhtûpwa̤ sînu. Sî mî̌ kòyò htě a nî̤bǎhto Cǒmara abwǐasîrî toǒ hǒ akhû̌akhî, sî bǎ ǒhtûpwa̤ lǒkho hǐnu.

2 Corinthians 6

1 Pa mî̌ pwa̤ma̤htuta̤ ta Cǒmara toǒ akhû̌akhî, pa tûsû sî ta sî ǒhtûpwa̤ pwǐ Cǒmara sò̌yṳ noǒhtûpwa̤ sînu. Sî mî̌ kòyò htě a nî̤bǎhto Cǒmara abwǐasîrî toǒ hǒ akhû̌akhî, sî bǎ ǒhtûpwa̤ lǒkho hǐnu. 2 Ma̤tè̤hî̌dě Cǒmara hî̌,

“Bǎ khîkha hèto̤ ta he tobǎ kè̌dû̌ sînu ti̤ni̤nu, he gana̤de sî ta̤kwisaba hǒ, bǎ khîkha hèto̤ ta he tobǎ ma̤lû̌htò̌ge sînu ti̤ni̤nu, he ma̤jè sî hǒ.” ^a

Hǐnudě, he hî̌ sî, gana̤de lǒkho, khò̌ti̤ni̤ mî̌ mṳni̤ htě Cǒmara kè̌dû̌ sî amṳni̤ hǒ. Khò̌ti̤ni̤ mî̌ ta̤ma̤lû̌htò̌ge sî amṳni̤ hǒ.

3 Pa dǒhtû̌ǐ bǎ kò ta Ye̤shǔkhrî̌stu awi̤akè̌ htǒo ma̤pûhǐ kò htè̌shǔkè pû tò̤nu dě, ta̤ma̤ htě a htûhtò̌ asî ta̤pi̤jishǐcǒ toǒnu pa ma̤ dǐcǎ꤮ tò̤. 4 Pa ma̤ ta̤ titètè̌꤮ bǎbǎ, ma̤pûhǐ kò kè̌shǐ ta pa mî̌ Cǒmara apwa̤ma̤ta̤ toǒ ayanu, pa dǔlṳ kò ta pa khòsò̌do ta̤jîta̤jû toǒ, ta pa khò shuphǔshèwè ta̤toǒ ta pa khòbǎ ta̤pò̤ta̤sha sîtoǒ hǒ. 5 Kòphlěkòpo̤ pa. Kò dǒlò̤te̤ pa dě apo̤kû. Kò ma̤ shû̌shishû̌shǎ pa dě kò wṳ̂htò̌cû̌kè pa, pa ǎwè̤ lòdǒlòde pṳ̂̌ni̤pṳ̂̌sa, ta̤na̤akû hǎmoǒnî̤tò̤nu ani̤asa ǒplṳ̂, htodě ǎbǎobǎ tò̤ numî̌ a ǒǒ. ^b 6 Pa htû Cǒmara apwa̤ma̤ta̤ toǒ akhû̌akhî, pa dǔlṳ bǎ kò ta pa sò̌phlǒ mṳ̂plî, pa ta̤sî̌khû̌sî̌ya, pa ta̤khòsò̌do, pa ta̤gwèbǎǐ kò htǒotoǒ hǒ. Běcǎ sǎcahtǐ ǒ pakû dě pa mo̤ǐ lǒ̤sû̌lǒ̤sò̌ kò. 7 Pa sû̌ǐ bǎ kò Cǒmara ale̤ayo̤ htě acǒatè̤ toǒ, dě Cǒmara a ta̤po̤ta̤phǎ ashû̌asho htǒo ma̤jè pa. Hǐnu akhû̌akhî, pa htǒotoǒnu Cǒmara dǔlṳphlo ta pa htû apwa̤ma̤ta̤ toǒ hǒ. Pa ǒ ta gòtò̤ htě la̤gò dǐdò htǒonu ta pa nò̌she mî̌ ta̤cǒta̤tè̤ htě Cǒmara ǐ pa htǒotoǒ, dě alò̤ta kliphû̌ tapwa̤ noǎǐ a ta̤wè̌ta̤htò dě a glè shěta̤ aya htǒonu hǒ. 8 Pwa̤ htû̌sò̌ǐ pa mî̌ a ǒǒ, pwa̤ pi̤ji pa mî̌ a ǒǒ. Pwa̤ hî̌bǎwǒ pa mî̌ a ǒǒ, pwa̤ hî̌phû̌mò̤ pa mî̌ a ǒǒ. Pwa̤ hî̌ pa ta kòyòlòho toǒ numî̌ a ǒǒ, pwǎ̤tadě pa mî̌ kòyò htě a hî̌bǎcǒtè̤ ta̤ toǒ pwǎ. 9 Kòyò htě a gènè̤pî̌tî̌ panu a ǒ toǒ pwǎ̤tadě Cǒmara sî̌yabò pwǎ pawi̤pakè̌. Pa glè̌ phǔsi sala̤ pwǎ̤ta pa ǒhtûpwa̤ to̤pe khònò̤. Kòphlěkòpo̤ pa pwǎ̤ta pa si hǒtò̤tò̤. 10 Pa kè̌shǐplṳ̂ mè̤mè̤̌ ta̤pò̤ta̤sha pwǎ̤ta pa sò̌le̤sò̌lò̤ pṳ̂̌꤮ taplǎ. A lò̤ta pa shuphǔshèwè mè̤mè̤̌ pwǎ̤ta pa sû̌ǐtòwòǐ bǎ kò akhû̌akhî, kò dû̌yò̤htò̌sa sû̌sò̌ tokhonu a ǒplṳ̂ hǒ. A lò̤ta pata ǒ kû̌kò dǐcǎ꤮ tò̤ pwǎ̤ta pa nî̤bǎbò ta̤pṳ̂̌꤮ tacǎ hǒ.

11 Khobǒsû̌bǒmo̤ Kòrî̌tiawî̤phû̌ sî꤮, ta̤ lǒ̤꤮ bò htě a ǒ dě pa sò̌phlǒkû toǒnu, pa pwe̤ǐlṳbò bǎ sî hǒ. Pa mo̤ǐ jòjî̌꤮ sî tò̤. 12 Pa mî̌ kòyò htě a phî̌gesǒ ata̤mo̤ǐ toǒ mè̤tò̤. Kòyò htě a phî̌gesǒ ata̤mo̤ǐ toǒ numî̌ sî hǒ. 13 Khònò̤dě he hî̌ sî pwǐ hephû̌heli̤ ta hena̤nu. Mo̤ǐgesǒ pa pwǐ pa mo̤ǐ sînu.

Sî mî̌ Cǒmara htě a htûpwa̤ tapwa̤ a ta̤lṳhtò̌ho

14 Pṳwè̤ toǒ, pwǐ pṳ̂glo aè̌nu, glohtudǒ pûma̤ aè̌ ta kòyò htě a yṳǎkû̌ pa Běcǎ Ye̤shǔ tò̤nu toǒ ma̤ nî̌꤮. Ma̤tè̤hî̌dě anò̤ ta ate̤gwenu a jèmè̤měhtujò nû̌û tò̤. A lî ta a khǐnu bǎbǎ, a ǒhtujò nû̌û tò̤tò̤. 15 Khrî̌stu ta khînǎmo̤pha hǐkǒdû̌ cû̌ sò̌phlǒ te̤bǎte̤tojò nû̌û hî̌tè? Hǐnuakho Khrî̌stu aphû̌ali̤ tapwa̤ ta khînǎmo̤pha hǐkǒdû̌ aphû̌ali̤ tapwa̤nu a cû̌ sò̌phlǒ tǒhtujò nû̌û tamapa hî̌tè? 16 Cǒmara a ta̤lṳhtò̌honu a ǒhtujò ta pwa̤yo̤ ya. ^c Hǐnuakho, pa htǒotoǒ numî̌ Cǒmara htě a htûpwa̤ htǒotapwa̤ a ta̤lṳhtò̌ho. Cǒmara hî̌, “He hèǒ dě hekòyò toǒ a sò̌phlǒkû pě dě he cû̌kû̌ ta asî pě. Dě he htû asî Cǒmara pě, dě asî htû hekòyò toǒ pě.” ^d 17 Htohǒtò̤ Cǒmara hî̌po̤,

“Hǎhtò̌cû̌ tephekè asîklanu dě cû̌ǒ khǒkè ta asînu. Ta̤ htě a mṳ̂plî tò̤ toǒnu tè̌bǎ pûma̤ yǎ dǐcǎ꤮ ma̤, sî dè ma̤hî̌nu mî̌ he kaǎshǔpwǎ sî pě. ^e 18 Dě he htû sîpha pě ta sî htû hephû̌heli̤ toǒ pě,” ^f Běcǎ htě apo̤aphǎ tapwa̤ hî̌ hǐnu.