2Cor 7 | KxfSCKRC | STEP | Sû̌kho toǒ꤮, Cǒmara olò̤bò toǒ numî̌ payabò hǒ. Hǐnudě, pa cû̌tephekè ta pana̤saklû a ta̤sò̌yṳ phû̌mò̤shî̌hto toǒ ta pa sò̌phlǒ a ta̤gènè̤ phû̌mò̤shî̌hto htǒonu toǒ hò̌꤮. Pa ǐsha bè̌dubè̌na̤ Cǒmara htǒo akhû̌akhî, pa htûhtò̌ ta kòyò htě a cahtǐ toǒ hò̌꤮.

2 Corinthians 7

1 Sû̌kho toǒ꤮, Cǒmara olò̤bò toǒ numî̌ payabò hǒ. Hǐnudě, pa cû̌tephekè ta pana̤saklû a ta̤sò̌yṳ phû̌mò̤shî̌hto toǒ ta pa sò̌phlǒ a ta̤gènè̤ phû̌mò̤shî̌hto htǒonu toǒ hò̌꤮. Pa ǐsha bè̌dubè̌na̤ Cǒmara htǒo akhû̌akhî, pa htûhtò̌ ta kòyò htě a cahtǐ toǒ hò̌꤮.

Pò̌lu a ta̤sò̌le̤sò̌lò̤

2 Pṳwè̤ sî꤮, dǔlṳ lǒkho pû bǎ pa ta sî ta̤mo̤ǐ. Pa ma̤sǔma̤plěnǒ kò dǐpwǎ̤꤮ tò̤. Pa ma̤pò̤ma̤shanǒ kò dǐpwǎ̤꤮ tò̤tò̤. Pa cû̌ǎtṳotṳnǒ kòkhû̌ dǐpwǎ̤꤮ tò̤tò̤. 3 He hî̌ hǐnu dě he sò̌yṳ bè̌ sî ta̤sǔ hǐnu mè̤tò̤. Ma̤tè̤hî̌dě pwǐ he hî̌hto sînu, sî mî̌ kòyò htě pa mo̤ǐ yǎ toǒ. Hǐnudě pa si bǎbǎ, pa htûpwa̤ bǎbǎ, pa mo̤ǐnò pwǎ sî. 4 He yṳǎ te̤mǎ mè̤mè̤̌ sî dě he htû̌sò̌ǐ mè̤mè̤̌ sî pṳ̂̌꤮ taplǎ nî. Hǐnu akhû̌akhî, pa kè̌shǐbǎ plṳ̂ mè̤mè̤̌ ta ta̤pò̤ta̤sha pwǎ̤ta pa sò̌le̤sò̌lò̤ pwǎ, htohǒtò̤ pa sò̌phlǒmo̤ pwǎ.

5 Bǎ pa hèto̤ Makedò̌niaga akhanu, ta̤pò̤ta̤sha htǒo a gûsada kû̌pe ta pa, a ǒkǔtò̤, ma̤tè̤hî̌dě bǎnukha kòyò htě a sò̌khě pa toǒnu a hèto̤klî̌ pa dě pa sò̌phlǒgu sò̌phlǒgè mè̤mè̤̌. ^a 6 Pò̤̌ta Cǒmara htě a ǐshû̌ǐshohtò̌ kòyò sò̌phlǒpî̌ toǒ tapwa̤nu, a ǐkhû̌ǐǎ pa hǒ, ma̤tè̤hî̌dě Tǐtǔ hèto̤kû̌ pa hǒ. 7 Tǐtǔ hèto̤ dě pa sò̌le̤sò̌lò̤ tû̌nu mè̤tò̤, a pwe̤ǐ bǎ pa ta sî ǐkhû̌ǐǎ nû̌û hî̌tènu akhû̌akhî, a ma̤sò̌le̤sò̌lò̤ mè̤mè̤̌ pa. A pwe̤ǐlṳ bǎ pa ta sî nǎsǔ kè̌shǐ jòjî̌ he tò̤, htodě sî gènè̤sǎpla̤ ǐ sî ta̤ma̤sǔ toǒ, htohǒtò̤ sî ǒ tîwî̌tòwònǎ dě sî glè hî̌bǎ ma̤kwaǐ bǎ he, a pwe̤ǐlṳ bǎ he hǐnu akhû̌akhî, khònò̤dě he tǐ̤ sò̌le̤sò̌lò̤khlo pepe.

8 Lî̤ htě he khwè̌cû̌ bǎ sî dě awǐkha tabǎnumî̌, a dè ma̤sǎpla̤ mè̤mè̤̌ sî pwǎ̤ta he gènè̤gugènǒ tò̤, he bè̌pwǎ yǎta awǒ. He sûcû̌ bǎ sî lî̤ akhanu, he kè̌shǐ ta a ma̤sǎpla̤ sî akhû̌akhî, he gènè̤gugè ǐtû̌, pwǎ̤ta a ma̤sǎpla̤ pwǎ sî teděsǎphû̌ pwǎ. 9 Pò̤̌ta khònò̤htǒo, he sò̌le̤sò̌lò̤ hǒ. Sî sǎpla̤sǎyṳ akhû̌akhî, he sò̌le̤sò̌lò̤ hǐnu mè̤tò̤. Sî ta̤sǎpla̤sǎyṳ htǒonu, a ǐhtûhtò̌ sî ta̤yò̤lò̤ge sîsò̌ akhû̌akhî, he sò̌le̤sò̌lò̤ pwǎ. Cǒmara gwèbǎǐ kòyò htě a sǎpla̤sǎyṳnu toǒ hǒ. Hǐnu akhû̌akhî, pa ma̤pò̤ma̤sha sî dǐcǎ꤮ tò̤. 10 Ma̤tè̤, ta̤sǎpla̤sǎyṳ htě Cǒmara ǐhtûhtò̌ htǒonumî̌, a nohtû̌lè̌ tèplè̌kè pa sò̌phlǒ ta pa nî̤bǎ ta̤ma̤lû̌htò̌ge aya pwǎ akhû̌akhî, pa lo̤bǎ gènè̤gugè nǒ ta̤sǎpla̤sǎyṳ htě Cǒmara ǐhtûhtò̌ htǒotoǒ tò̤. Pwǎ̤ta kòyòhǎkhû̌phû̌ ala̤klo sǎpla̤sǎyṳ toǒnu, a bè̌ǒhtò̌ pwǎ ta̤si pwǎ.

11 Dě sî sǎpla̤sǎyṳ akhû̌akhî, Cǒmara ma̤ bǎ sî hî̌tèpěnu, kè̌ lǒkhomò̌! Sî sò̌phlǒ ma̤hèshû̌ lǒkho ta̤cǒta̤tè̤ toǒ hǒ, sî sò̌phlǒ dǔlṳshû̌ sî ma̤ta̤ htě ato toǒ hǒ. Sî sò̌phlǒdû̌ hè kòyò ma̤ta̤sǔ dě sîkla toǒnu, sî ǐsha ta Cǒmara cèrò sî pě. Sî sò̌yṳ kè̌shǐ gesǒ pa hǒ. Sî sò̌phlǒ gana̤deshû̌ ta̤hî̌bǎ dě sî glè cèrò kòyò htě a ma̤sǔta̤nu toǒ hǒ. Sî ma̤ lǒkho hǐnu akhû̌akhî, sî dǔlṳ ta khònò̤htǒo sî ta̤sǔ ǒpetò̤ hǒ. 12 Hǐnudě, lî̤ htě he khwè̌cû̌bǎ sî dě awǐkha tabǎnu mî̌, he khwè̌cû̌ bǎ kòyò htě a ma̤sǔta̤nu tapwa̤ ta kòyònu tapwa̤ ma̤sǔkònu toǒ akhû̌akhî tû̌ mè̤tò̤, ma̤pûhǐ sî sî̌ya ta sî ǐlò̤ sîsò̌ ta paya pwî̌꤮ tènu, he khwè̌cû̌ kû̌dǒ hǐnu. Sî mo̤ǐ pa pwî̌꤮ tènu Cǒmara sî̌ya te̤mǎbò hǒ. 13 Hǐnu akhû̌akhî, amo̤sikè pa sò̌phlǒ.

Htohǒtò̤ sî ma̤sò̌le̤sò̌lò̤ mè̤mè̤̌ Tǐtǔ akhû̌akhî, pa kè̌shǐ a sò̌le̤sò̌lò̤ dě pa tǐ̤ sò̌le̤sò̌lò̤ hèshû̌shû̌khlopo̤. 14 Bǎ Tǐtǔ cû̌ dě sî ǒ hǒtò̤nu, he htû̌sò̌ǐ sî dě Tǐtǔ alo̤mo̤. Sî ma̤ mè̤mè̤̌ pwǐ he htû̌sò̌ǐ sînu hǒ. Sî ma̤sòwò̤nǒ he dǐkhò̌꤮ tò̤. Pwǐ he hî̌bǎcǒhî̌bǎtè̤ sî pṳ̂̌꤮ taplǎnu, pa hî̌ Tǐtǔ ta sîwi̤sîkè̌ numî̌ pa hî̌bǎcǒhî̌bǎtè̤ pwǎpwǎ. 15 Hǐnudě, bǎ a gènè̤htò̌ to̤bǎ gesǒ sî ǒ tîwî̌tòwònǎ sîna̤ ta sî gana̤de a ta̤sû̌ǐtòwòǐ htohǒtò̤ sî kaǎshǔ yǎta ta̤ǐsha, gònò̤gèglè akhanu, a tǐ̤ mo̤hè shû̌khlopo̤ sî. 16 He yṳǎ mṳ̂tî̤glî sî dě he sò̌le̤sò̌lò̤ mè̤mè̤̌.