2Cor 8 | KxfSCKRC | STEP | Pa sû̌kho sî꤮, pa sò̌yṳ pwe̤ǐlṳ sî ta Cǒmara ǐlò̤ ta̤bwǐta̤sîrî dě pwa̤yṳǎta̤ aprṳ̂ahophû̌ htě a ǒ lǒkho Makedò̌nia gakûnu toǒ awi̤akè̌.

2 Corinthians 8

Kòrî̌tiaphû̌ ata̤ǐ ta̤lṳta̤tò̌ toǒ

1 Pa sû̌kho sî꤮, pa sò̌yṳ pwe̤ǐlṳ sî ta Cǒmara ǐlò̤ ta̤bwǐta̤sîrî dě pwa̤yṳǎta̤ aprṳ̂ahophû̌ htě a ǒ lǒkho Makedò̌nia gakûnu toǒ awi̤akè̌. ^a 2 Pwa̤yṳǎta̤ aprṳ̂ahophû̌ bǎnu toǒ mî̌, a khòbǎ mè̤mè̤̌ ta̤pò̤ta̤sha htě ajîajû gutṳ̌ mè̤mè̤̌ toǒ, pwǎ̤ta asî sò̌le̤sò̌lò̤ jòjî̌꤮ lǒkho tò̤. Asî shuphǔshèwè mè̤mè̤̌ pwǎ̤ta a sò̌phlǒ ma̤lṳma̤tò̌ ma̤shû̌ma̤joshû̌ jòjî̌꤮ bǎ mè̤mè̤̌ pwa̤yṳǎphû̌ dě Ye̤rǔshèlèwî̤kûnu toǒ tò̤. 3 Pwî̌ asî ǐbò̌nu asî ǐ, htohǒtò̤ a ǐdû̌khlope ta pwî̌ a ǐbò̌nu, dě asî sò̌phlǒsho lǒkho numî̌ he hî̌bǔ pwǎ. 4 Asî sò̌phlǒsho ma̤lṳ lǒkho dě a kwigwèbǎǐ pa ta pa glè plû asî dě a ma̤jè Cǒmara akòyò toǒ. 5 Asî ma̤ta̤ htǒonumî̌, adû̌khlope ta pa ta̤kè̌shuǐ toǒ hǒ. Pwǐ Cǒmara sò̌yṳ noma̤ asînu, awǐgutṳ̌ mî̌ asî bè̌cahtǐ asò̌ ta Běcǎ aya, htodě asî bè̌cahtǐ lǒkho asò̌ ta paya. 6 Hǐnu akhû̌akhî, ma̤pûhǐ Tǐtǔ ma̤htophlǔjè sî ta̤sò̌phlǒsho ma̤jo kò htǒotoǒ ayanu pa tûsû a hǒ. Ma̤tè̤hî̌dě pwa̤ htě a tèhtò̌ ǐkhû̌ǐǎ wǐgutṳ̌ sî ta sî ma̤jè pwa̤yṳǎphû̌ htě a ǒ lǒkho dě Yerǔshèlèwî̤kûnu toǒ tapwa̤ numî̌ Tǐtǔ hǒ. 7 Sî lǒbe ta ta̤pṳ̂̌꤮ tacǎ. Sî ta̤yṳta̤nǎ mî̌ asho, sî hî̌bǎsî̌jò, sî lǒbe ta ta̤sî̌khû̌sî̌ya, sî sò̌phlǒsho ma̤jo kò, htohǒtò̤ sî mo̤ǐmè̤mè̤̌ pa. Hǐnu akhû̌akhî, pa sò̌yṳkû̌po̤ htě sî lǒbe ta ta̤sò̌phlǒ ma̤jèshû̌ kò toǒ.

8 He hî̌ hǐnu dě he noshû̌ sî hǐnu mè̤tò̤. Ma̤pûhǐ sî gûkè̌mò̌mṳ kòyò ahǔwa̤toǒ sò̌phlǒsho ma̤jo kò nudě, he sò̌yṳ ǐsî̌yapwǎ sî hǐnu. He dǔlṳ sî hǐnu akhû̌akhî, sî mo̤ǐmè̤mè̤̌ kò ya, tò̤mî̌ sî mo̤ǐ kòtò̤ yanu, he sî̌yahè pě hǐnu pwǎ. 9 Pa Běcǎ Ye̤shǔkhrî̌stu htǒonu abwǐdû̌sîrîhtû pwî̌꤮ tènu, sî sî̌yatû̌ hǒ. A ǒ dě mǒkhû̌ akhanu, a dû̌yò̤htò̌sa mè̤mè̤̌ pwǎ̤ta bǎ a hè sûlûana̤ pwǐ kòyòhǎkhû̌phû̌ tapwa̤ akhanu, a bǎhè htû kòyò shuphǔshèwèphû̌ tapwa̤ ta paya hǒ. Ma̤pûhǐ sî dû̌yò̤htò̌sa kû̌kò ayanudě, a bǎhè htû kòyò shuphǔshèwèphû̌ tapwa̤nu hǒ.

10 Hǐnudě he ta̤gènè̤ mî̌ pwǐhè̌o, he kè̌shǐ ta ta̤ma̤ htě sî tèhtò̌ ma̤ yǎ dě něhǎno toǒnu, sî dè ma̤htokè khònò̤htǒo numî̌ awǒkhlo ta sîya. Sî mî̌ kòyò tṳgumṳ htě a tèhtò̌ kûplǒ wǐgutṳ̌ ta̤ma̤lṳ dě a ma̤jo nû̌ûta kòyò ǒ Yerǔshèlèwî̤kûnu toǒ pwǎ mè̤tò̤, sî mî̌ kòyò tṳgumṳ htě a sò̌phlǒsho ma̤lṳma̤tò̌ mè̤mè̤̌ ta̤ toǒ. 11 Hǐnu akhû̌akhî, ma̤htophlǔkè ta̤ htě sî tèhtò̌ ma̤ htǒo tacǎnu. Sî tèhtò̌ kûplǒ ta̤ma̤lṳ akhanu, sî sò̌phlǒsho ma̤jè mè̤mè̤̌ kòyò. Hǐnudě khònò̤htǒo sî to sò̌phlosho ma̤htophlǔkè sî ta̤ma̤ htǒonu. Sî toǐ lǒkho pwî̌ sî ǐbò̌nu pṳ̂̌꤮ tapwa̤. 12 Sî dè sò̌phlosho ǐ mè̤mè̤̌ mò̌nu Cǒmara sò̌yṳ hǒ. Sî ǐbò̌ pwî̌꤮ tè pwî̌꤮ tènu, a lo̤bǎdû̌ mè̤tò̤. Cǒmara sò̌yṳ noǐ sî pwî̌ sî ǐbò̌nu pwǎ. Ta̤ htě sî ǐbò̌tò̤nu a kwinǒ sî dî̌kî̌꤮ tò̤.

13 He ma̤phi bǎ kòyò ahǔwa̤ toǒ a ta̤bǐta̤ò̌ dě he bè̌htò̌htǒlè̌ yǎdě sîlo̤ hǐnu mè̤tò̤. He sò̌yṳ ta sî dè jî dě jîwo̤wǒ̤nû̌û, sî dè mo̤ dě mo̤wo̤wǒ̤nû̌û hǐnu tacǎpa. 14 Ma̤tè̤, khònò̤htǒo sî dû̌yò̤htò̌sa akhû̌akhî, sî to ma̤jodǒ pwa̤yṳǎphû̌ htě a shuphǔshèwènu toǒ. Htû̌꤮ nǒkòpě sî dè lo̤bǎlè̌ mò̌nu asî ma̤jè geshǔtû̌ sî pě. Sî dè ma̤jokè̌khîmò̌ nû̌û hǐnu, bǎ sîkla pwa̤ htě apò̤asha toǒnu a ǒpe nǒtò̤. 15 Lî̤cahtǐkû hî̌, “Kòyò htě a bè̌plǒplṳ̂ mè̤mè̤̌ a la̤ǎla̤o toǒnu ata ǒplṳ̂ tûlû̌ nǒtò̤. Kòyò htě a bè̌plǒ pî̌tî̌pwǎ a la̤ǎla̤o toǒnu, a ǒ pî̌tî̌ tûlû̌ nǒtò̤.” ^b

Tǐtǔ ta a sû̌kho toǒ

16 Cǒmara ma̤shû̌ma̤sho Tǐtǔ asò̌phlǒ dě a ma̤jè sî pwǐ pa sò̌phlǒsho ma̤jè sînu akhû̌akhî, pa hî̌bwǐhî̌sîrî mè̤mè̤̌ Cǒmara. 17 Pwî̌ pa kwigwèbǎǐ yǎta a glè cû̌kè̌ sî akhanu, a jû payo̤ dě a sò̌le̤sò̌lò̤ cû̌kè̌ sî. Hî̌bòbò mî̌ asana̤ sò̌yṳ cû̌kè̌shǐ nòtû̌ sî hǒ. 18 Pa plûcû̌kû̌dǒ pṳwè̤ tapwa̤ ta a. Pwa̤yṳǎta̤ aprṳ̂aho pṳ̂̌tṳgumṳ htû̌sò̌ǐ mè̤mè̤̌ nû̌û, ma̤tè̤hî̌dě a mî̌ pwa̤ma̤ Cǒmara ata̤ma̤ dě a cû̌shido dǒhtû̌ǐ bǎ kò ta ta̤sò̌le̤sò̌lò̤ awi̤akè̌ tapwa̤. 19 Tǒ̤hǒnò̤pa mè̤tò̤, a mî̌ pwa̤yṳǎta̤ aprṳ̂aho bǎo toǒ bè̌htò̌hto nû̌û ta a glè cû̌kû̌dǒ ta pa hǒ. Htû̌꤮ pa hèphî̌ ta̤ma̤lṳ htě sî sò̌phlǒsho ma̤jo kò htǒotoǒ dě pa cû̌ yṳ̂lò̤ yǎta kòyò shuphǔshèwèphû̌ Yerǔshèlèwî̤kû toǒ akhapěnu, a cû̌kû̌dǒ ta pa pě. Ma̤pûhǐ kò htû̌sò̌ǐ lǒkho Ye̤shǔkhrî̌stu, htohǒtò̤ ma̤pûhǐ kò kè̌shǐ lǒkho ta pa sò̌phlǒsho ma̤jè mè̤mè̤̌ asî ayanu, pa cû̌shido yṳ̂bǎ kò ta̤ma̤jo htǒonu pě. 20 Ma̤pûhǐ kò bè̌ pû pa ta̤sǔ tò̤nu, pa cû̌wo̤wǒ̤nû̌û pwǐhè̌o pwǎ. Ta̤ma̤lṳ htě kò sò̌phlǒsho ǐ htǒotoǒnu, pa bǎ ma̤te̤ma̤mǎ ǐwǒ bǎ kò. 21 Pa bè̌ yǎta pa glè ma̤cǒma̤tè̤ pwǎpǒ̤ bǎ Cǒmara a lo̤mo̤ htǒonu mè̤tò̤, kòyòhǎkhû̌phû̌ alo̤mo̤ numî̌ pa bǎ ma̤cǒma̤tè̤dò̌ǔ. ^c

22 Hǐnudě pa nohè kû̌po̤dǒ kòyò ahǔwa̤tapwa̤ ta pa pṳwè̤ htǒo sò̌gini̤. Pa kè̌shǐ sî̌ya ta a mî̌ kòyò htě la̤yṳǎ mè̤mè̤̌ yǎ dě Cǒmara a ta̤phî̌ta̤ma̤ akû tapwa̤nu. Khònò̤dě a yṳǎ mè̤mè̤̌ sî akhû̌akhî, a tǐ̤꤮ sò̌phlǒsho ma̤jèkhlopo̤pe sîsî. 23 Tǐtǔ mî̌ pwa̤ htě a ma̤kû̌dǒ ta̤ ta he dě a ma̤jo sî tapwa̤. Pa pṳwè̤ htě a gûhèkû̌ nû̌ûnu sò̌gini̤ mî̌, pwa̤yṳǎta̤ aprṳ̂aho bǎo toǒ nohèpwǎ asî. Asî mî̌ kòyò toǒ htě a bè̌dubè̌na̤ mè̤mè̤̌ Khrî̌stu toǒ. 24 Ma̤pûhǐ pwa̤yṳǎphû̌ htě a ǒ dě pwa̤yṳǎta̤ aprṳ̂aho akû pṳ̂̌tṳgumṳnu toǒ sî̌ya te̤mǎ ta sî mo̤ǐ mè̤mè̤̌ kò ayanu, dǔlṳ lǒkho yǎta sî mo̤ǐ asî htǒotoǒnu nî̌꤮. Htohǒtò̤ ma̤pûhǐ asî sî̌ya lǒkho ta pa htû̌sò̌ǐ sî htǒotoǒnu ato mè̤mè̤̌ ayanu, ma̤ lǒkho hǐnu nî̌꤮.