2Cor 9 | KxfSCKRC | STEP | Sî to ma̤jo Cǒmara akòyò htě a shuphǔshèwè dě a ǒ Yerǔshèlèwî̤kûnu toǒ awi̤akè̌nu, he lo̤bǎ khwè̌ sělěpo̤pe nǒbǎ sî tò̤.

2 Corinthians 9

Khrî̌stuphû̌ tapwa̤ ta tapwa̤ a ta̤phî̌jè ma̤jè nû̌û

1 Sî to ma̤jo Cǒmara akòyò htě a shuphǔshèwè dě a ǒ Yerǔshèlèwî̤kûnu toǒ awi̤akè̌nu, he lo̤bǎ khwè̌ sělěpo̤pe nǒbǎ sî tò̤. 2 Ma̤tè̤hî̌dě sî sò̌phlǒsho ma̤jo asî pwî̌꤮ tènu, he sî̌ya. He htû̌sò̌ǐ pa sû̌kho dě Makedò̌niagakûnu toǒ ta sîwi̤sîkè̌ toǒ hǒ. He hî̌ asî ta sî pwa̤yṳǎphû̌ dě Akhayagakû htǒotoǒnu, a ma̤wǒnǎ wû dě něhǎnope. Sî sò̌phlǒsho htǒonu, a htû̌wè̤htò̌ plṳ̂ Makedò̌niagaphû̌ toǒ asò̌phlǒ dě a glè ma̤jo kò hǐnu pě. 3 Ma̤pûhǐ sî ma̤wǒnǎ lǒkho sî ta̤ma̤lṳ pwǐ he pwe̤ǐlṳhto bǎ asînu, htohǒtò̤ pa htû̌sò̌ǐ kò ta sîwi̤sîkè̌ toǒnu, ma̤pûhǐ a htûhtò̌ pû ta̤htû̌sò̌ lòho tò̤nu, he nohè pa pṳwè̤ htǒotoǒ dě siǒ hǒ. 4 Hǐnudě bǎ he hè pě akhanu, pa pṳwè̤ Khrî̌stuphû̌ dě Makedò̌niaga toǒ gûhèkû̌ ta he pě kǎlè. He sò̌yṳ nokè̌shǐ asî ta sî ma̤wǒnǎhtobò wû ta̤ma̤lṳnu toǒ. Sî dè ma̤wǒnǎmò̌ dǐcǎ꤮ tò̤nu, ta̤ htě he yṳǎ sî toǒnu a htûhtò̌nò heya ta sîya ta̤sòwò̤ pě. 5 Hǐnudě, he bè̌lò̤ he sò̌phlǒ ta he nohèwǐ pa pṳwè̤ toǒ dě sîǒ htě a glè ma̤jè ta̤kûplǒ ta̤ma̤lṳ htě sî olò̤ ta sî ma̤jè kònu toǒ. Dè ma̤mò̌hǐnu mî̌ htû̌꤮ he hèto̤ pěnu, sî ma̤wǒnǎhtobò sî ta̤ma̤lṳ htǒotoǒ hǒ. Pa dè ma̤hǐnudě kò kè̌shǐ ta kò noshû̌ sî dǐpwǎ̤꤮ mè̤tò̤, sî sò̌phlǒsho ma̤tû̌pwǎ hǐnu pě.

6 Gènè̤kè̌ lǒkho kòyò htě a wi̤lò̤ pî̌tî̌pwǎ ta̤khli tapwa̤nu a nî̤bǎ pî̌tî̌ gesǒpwǎ ta̤sǎta̤pho pě. Pwǎ̤ta kòyò htě a wi̤lò̤plṳ̂ ta̤khli tapwa̤nu, a nî̤bǎplṳ̂ gesǒ ta̤sǎta̤pho pě. 7 Hǐnudě, ûpèpè̌ bǎbǎ, a tobǎ ǐ pwǐ a bè̌lò̤hto asò̌phlǒ dě a glè ǐ pwî̌꤮ tè akhû̌nu pwǎ. A bǎ sò̌le̤ǐge nû̌û tò̤. A bǎ bè̌ asò̌phlǒ ta a lò̤bǎ nû̌ûkhû̌ dě a tobǎ ǐ hǐnu tò̤, ma̤tè̤hî̌dě Cǒmara mo̤ǐ kòyò htě a sò̌le̤sò̌lò̤ ǐ kòyònu toǒ pwǎ. 8 Ma̤pûhǐ sî nî̤bǎ lǒbebò ta̤ htě sî lo̤bǎnu toǒ, htohǒtò̤ ma̤pûhǐ sî ta ǒbetî̌pî̌ dě sî ǐpa̤ tṳtṳ yǎta kòyò ahǔwa̤toǒ ayanu, Cǒmara howi̤plṳ̂khlope ta lǒ̤꤮ bò sî lo̤bǎ toǒ numî̌ a ma̤jò pwǎ. 9 Lî̤cahtǐkû hî̌,

“Pwa̤cǒpwa̤tè̤ tapwa̤ sò̌phlǒsho ma̤jo kòyò shuphǔshèwè toǒ hǒ. A ta̤cǒta̤tè̤ htǒonu, a ǒměgle tûjûpwa̤ hǒ.” ^a

10 Ma̤tè̤hî̌dě pwa̤ htě a ǐlò̤ pwa̤ma̤ǎhǔklaphû̌ toǒ ta̤khlita̤lè dě a glè shǒǎ aya ta la̤ǎla̤o aya toǒ numî̌ Cǒmara hǒ. Hǐnudě, Cǒmara ǐbò sî ta̤khli htě sî lo̤bǎ toǒnu pě. Ta̤khli htǒonumî̌ a mè̤mè̤̌bò sî lo̤bǎ ma̤wǒ kònu toǒ hǒ. Cǒmara nosǎhtò̌phohtò̌ dû̌htò̌ ta dû̌htò̌ kû̌po̤tû̌ sî ta̤sǎta̤pho pě. Sî ta̤sǎta̤pho htǒonumî̌ lǒ̤꤮ bò ta̤wǒ htě a hè dě sî ta̤sò̌phlǒsho ǐkò htǒotoǒ a ǒnu hǒ. ^b 11 Ma̤pûhǐ sî sò̌phlǒsho ǐbò̌ kû̌kò pṳ̂̌꤮ taplǎ, htohǒtò̤ ma̤pûhǐ kòyò htě a nî̤bǎ sî ta̤ma̤lṳ dě paǒ htǒotoǒ hî̌bwǐhî̌sîrî Cǒmara ayanu, Cǒmara ǐ dû̌yò̤htò̌sa lǒbetû̌ sî pṳ̂̌꤮ taplǎ pě.

12 Ma̤tè̤hî̌dě ta̤ma̤lṳma̤tò̌ htǒonu a ma̤jotû̌ Cǒmara kòyò htě a shuphǔshèwè htǒotoǒ mè̤tò̤, a htû̌wè̤htò̌to̤ kòsò̌phlǒ dě kò glè hî̌bwǐhî̌sîrî htû̌sò̌ǐ lǒkho Cǒmara. 13 Sî ta̤ma̤jo htǒonu a khòlṳ ta sî yṳǎ mè̤mè̤̌ Běcǎ Ye̤shǔ hǒ. Dě sî yṳǎ gûma̤kû̌ pwǐ Khrî̌stu a ta̤sò̌le̤sò̌lò̤ awi̤akè̌ hî̌nu akhû̌akhî, kò htû̌sò̌ǐplṳ̂ Cǒmara pě. Ma̤tè̤hî̌dě sî sò̌phlǒsho ma̤jo asî ta kò pṳ̂̌꤮ tapwa̤ akhû̌akhî, kòyò saprṳ̂ htû̌sò̌ǐ lǒkho Cǒmara hǐnu pě. 14 Hǐnudě Cǒmara ta̤bwǐta̤sîrî htě a cǒklî̌kî̌yatû̌ htǒonu, a dǔlṳ sî dě sî dǔlṳ tṳtṳ yǎta asî akhû̌akhî, asî kwisaba sîya pě, htohǒtò̤ asî nǎsǔ kè̌shǐ mè̤mè̤̌ sî pě. 15 Pa htû̌sò̌ǐ plǒnû̌û Cǒmara htě a ǐlò̤ pa sû amî̌ aphû̌khû htě a le̤dû̌pwî̤htû mè̤mè̤̌ dě pa hî̌jò agûla̤ ǒpe tò̤ htǒonu tapwa̤ hò̌꤮.