2 Peter 1
Petru a ta̤hî̌mo̤hî̌wǒ
1Pa Cǒmara ta pwa̤ma̤lû̌htò̌ge pa Běcǎ Ye̤shǔkhrî̌stu htǒotapwa̤ a ta̤cǒta̤tè̤ akhû̌akhî, sî mî̌ kòyò toǒ htě a nî̤bǎdǒ ta̤yṳta̤nǎ dě alò̤ta pa htǒotoǒ hǒ. Dě he khwè̌cû̌bǎ sî lî̤htǒo. He mî̌ Shîmǒ̤nè̤ Petru, he htû Ye̤shǔkhrî̌stu ajû ta a pwa̤nophû̌ tapwa̤. 2Sî sî̌ya Cǒmara ta pa Běcǎ Ye̤shǔkhrî̌stu akhû̌akhî, ta̤bwǐta̤sîrî ta ta̤gûjûkabǎ ǒlǒbekû̌ tû̌ta sî nî̌꤮.Cǒmara ata̤kaǎ ta ata̤wû̌lǎhtò̌
3Ye̤shǔ a ta̤po̤ta̤phǎ htǒo akhû̌akhî, bǎ pa sî̌yahèto̤khlo nû̌û akhanu, ma̤pûhǐ pa ǒkû̌ ta ta̤htûpwa̤, htodě ma̤pûhǐ pa ma̤kû̌pwǐ ato nû̌ûsò̌phlǒ ayanu, a ǐlò̤bò pa lo̤bǎnu toǒ hǒ. Dě a ta̤po̤ta̤phǎ htě adû̌ayǒ ta ata̤wǒ mè̤mè̤̌ htǒotoǒ akhû̌akhî, a kaǎ pa hǒ. 4A ta̤po̤ta̤phǎ htě adû̌ayǒ ta ata̤wǒ mè̤mè̤̌ htǒotoǒ akhû̌akhî, a ǐlò̤hto pa a ta̤olò̤ htě apwî̤dû̌ dě adû̌ayǒ mè̤mè̤̌ htǒotoǒ hǒ. A ǐlò̤ ta̤htǒotoǒ akhû̌akhî, sî lû̌htò̌kè ta ta̤gènè̤ patǎ phû̌mò̤shî̌hto htě a ma̤pî̌ sî dě hǎkhû̌bǎonu toǒ pě. Htohǒtò̤ sî htûhtò̌ sǒsǒkû̌ta pwǐ Cǒmara ala̤klonu pě. 5Ta̤wi̤ta̤kè̌ htǒo akhû̌akhî, jipwi̤ hèwǒpo̤ lǒkho dě alo̤mo̤ nî̌꤮. Dě sî ta̤yṳta̤nǎ akhû̌nu, bè̌plǒ dû̌htò̌po̤ ta̤bè̌ sò̌phlǒsǔshi htě awǒ, dě ta̤bè̌ sò̌phlǒsǔshi awǒ akhû̌nu, bè̌plǒ dû̌htò̌po̤ ta̤sî̌khû̌sî̌ya, 6Dě ta̤sî̌khû̌sî̌ya akhû̌nu, bè̌plǒ dû̌htò̌po̤ ta̤khòǐpè̤ tû̌ na̤, dě ta̤khòǐpè̤ tû̌ na̤ akhû̌nu, bè̌plǒ dû̌htò̌po̤ ta̤khòsò̌do, dě ta̤khòsò̌do akhû̌nu, bè̌plǒ dû̌htò̌po̤ ta̤ǒhtûpwa̤ tobǎ ta Cǒmara, 7Dě ta̤ǒhtûpwa̤ tobǎ ta Cǒmara akhû̌nu, bè̌plǒ dû̌htò̌po̤ ta̤mo̤ǐ pṳwè̤, dě ta̤mo̤ǐ pṳwè̤ akhû̌nu, bè̌plǒ dû̌htò̌po̤ ta̤mo̤ta̤kla nî̌꤮. 8Ta̤htǒotoǒ sǔsǔ dè ǒhtò̌dû̌ hî̌dě, a htûbwǐhtûsîrî ta sîya dě sî sî̌yahè te̤mǎwǒpo̤ Běcǎ Ye̤shǔkhrî̌stu pě. 9Pwǎ̤tadě kòyò htě a ǒkû̌ ta ta̤htǒotoǒ tò̤nu toǒ, alò̤ta kòyò htě a mi̤sǎkhǐ. Dě a shope̤nǎkè Cǒmara ma̤mṳ̂plîhto nû̌ûta̤sǔ dě awǐkhanu toǒ pwǎ. 10Hǐnudě pṳwè̤ sî꤮, ma̤pûhǐ Cǒmara ata̤kaǎ sî htǒonu ta a ta̤wû̌lǎhtò̌ sî htǒo glè htûhtò̌ hè mè̤mè̤̌ ayanu, jipwi̤ ma̤dû̌htò̌po̤ lǒkho dě alo̤mo̤ tokho nî̌꤮. Sî dè ma̤hǐnu hî̌dě sî htò̌tukhu lòkhǔpe dǐkhò̌꤮ tò̤ hǒ. 11Hǐnudě Cǒmara sò̌le̤sò̌lò̤ dǒshuǐ sî ta pa Běcǎ Ye̤shǔkhrî̌stu htě a mî̌ pwa̤ma̤lû̌htò̌ge pa htǒotapwa̤ ashiaga dě a ǒ tûjûpwa̤ talakhǎ akû htǒonu pě. 12Sî sî̌yahto ta̤htǒotoǒ hǒ dě sî ǒměǒgle ta ta̤te̤ta̤mǎ htě sî nî̤bǎhtonu toǒ pwǎ̤ta pṳ̂̌taplǎ꤮ he ǐ sî̌yahtò̌ gesǒ sî ta ta̤wi̤ta̤kè̌ htǒotoǒ hǐnu pwǎ. 13Bǎ he ǒhtûpwa̤pe akha, he htû̌wè̤ gènè̤htò̌ gesǒ sî ta ta̤wi̤ta̤kè̌ htǒotoǒ mî̌ he gènè̤ ta ato pwǎ. 14Ma̤tè̤hî̌dě he sî̌ya ta yî̤hǒtò̤ pěmî̌, he tobǎ bè̌kè he na̤klûhtǒo pwǐ pa Běcǎ Ye̤shǔkhrî̌stu dǔlṳnǎhto henu pwǎ. 15Hǐnudě htû̌꤮ he sihto pěnu, ma̤pûhǐ sî gènè̤htò̌bǎto̤ ta̤htě he sû̌ǐkè sînu toǒ pěnudě khònò̤htǒo he jipwi̤ ma̤ mè̤mè̤̌ ta̤ hǒ.Petru ta pwa̤nophû̌ ahǔwa̤ toǒ kè̌shǐ Khrî̌stu a ta̤lîta̤rakha
16Bǎ pa ǐsî̌ya bǎ sî ta pa Běcǎ Ye̤shǔkhrî̌stu a ta̤po̤ta̤phǎ ta ata̤hè awi̤akè̌ htǒo akhanu, ta̤dǒnè htě amè̤tò̤ pwǎ̤tadě kòyò sî̌jò lòho toǒ dǒbǎ sî toǒnu, pa gûdǒ kû̌kò tò̤. Pa kè̌shǐ a ta̤lîta̤rakha adû̌ayǒ toǒ ta pami̤sǎ tû̌. 17Bǎ pha Cǒmara ǐlò̤ a ta̤bè̌dubè̌na̤ ta a ta̤sîrîdû̌sîrîhtû dě Ye̤shǔlo̤ akhanu, pa ǒdǒ bǎnu. Cǒmara htě apo̤aphǎ adû̌ayǒkhlo ta ta̤lǒ̤꤮ bò htǒotapwa̤nu, a hî̌, “Htǒomî̌ hephû̌khû htě he mo̤ǐyǎ dě ato he sò̌phlǒ tapwa̤.” a 18Bǎ pa ǒkû̌ ta a kholocahtǐkhû̌ dě yo̤sǎ ǒ mǒkhû̌ po̤lò̤ akhanu, pa gana̤de ta pana̤. 19Hǐnudě pwa̤po̤ toǒ dǒhtû̌ǐ ta̤wi̤ta̤kè̌ htǒotoǒnu, a te̤mǎ khlopo̤ ta paya. Sî to bè̌sû̌bè̌sǎwǒ ta̤wi̤ta̤kè̌ htě alò̤ta mî̌ko lîhtò̌ ta̤khǐkla dě alî to̤htû̌ lṳmṳlîbû tamanu. Dě lṳmṳlîbû hè hǒ akhanu, shǎto̤wo̤nu tama ▼▼Shǎto̤wo̤ mî̌ a hî̌ Ye̤shǔkhrî̌stu htǒonuhǒ.
htò̌ dě sî sò̌phlǒkû pě. 20Ta̤ htě a lo̤bǎdû̌shǐ mî̌, sî tobǎ sî̌ya ta Cǒmara alî̤ htě pwa̤po̤ khwè̌nǎ toǒnumî̌, a khwè̌ lǒkho ta a ta̤gènè̤tû̌ toǒnu mè̤tò̤. 21Ma̤tè̤hî̌dě, pwa̤po̤ a ta̤dǒhtû̌ǐ toǒ numî̌, a hè pwǐ kòyò sò̌yṳ nopwe̤ǐnu mè̤tò̤. Asî dǒhtû̌ǐ bǎ kò ta̤wi̤ta̤kè̌ htǒonumî̌ a dǒhtû̌ǐ bǎ kò pwǐ Běcǎ sǎcahtǐ pwe̤ǐ bǎ asînu pwǎ, dě ta̤wi̤ta̤kè̌ htǒonumî̌ a ǒ dě Cǒmara ǒ hè.
Copyright information for
KxfSCKRC