2Pe 3 | KxfSCKRC | STEP | Khobǒsû̌bǒmo̤ sî꤮, he khwè̌cû̌po̤ bǎ sî lî̤ ginǐ̤bǎ tabǎ. Lî̤ ginǐ̤bǎbò htě he khwè̌cû̌ bǎ sî htǒonumî̌, ma̤pûhǐ sî gènè̤ mṳ̂plîkû̌ lǒkho kòyònu dě, he jipwi̤ htû̌wè̤ gènè̤htò̌ gesǒ sî ta ta̤ htě sî sû̌ǐhtonu toǒ pwǎ.

2 Peter 3

Ye̤shǔ hègesǒ pě

1 Khobǒsû̌bǒmo̤ sî꤮, he khwè̌cû̌po̤ bǎ sî lî̤ ginǐ̤bǎ tabǎ. Lî̤ ginǐ̤bǎbò htě he khwè̌cû̌ bǎ sî htǒonumî̌, ma̤pûhǐ sî gènè̤ mṳ̂plîkû̌ lǒkho kòyònu dě, he jipwi̤ htû̌wè̤ gènè̤htò̌ gesǒ sî ta ta̤ htě sî sû̌ǐhtonu toǒ pwǎ. 2 He sò̌phlǒǒ ta sî glè gènè̤htò̌ pwa̤po̤ cahtǐ toǒ a ta̤dǒhtû̌ǐnǎhto dě꤮ wǐnu toǒ, htodě pa Běcǎ ta pwa̤ma̤lû̌htò̌ge pa htǒotapwa̤ a ta̤mǎlò̤ htě sî pwa̤nophû̌ toǒ ǐhto sînu toǒ.

3 Awǐgutṳ̌mî̌, sî tobǎ sî̌yaphlo ta htû̌mṳni̤ gutṳ pěmî̌ kòyò toǒǒ ǒlṳhtò̌ pě dě a pi̤jishǐcǒ luya̤bò pě. Asînu toǒ mî̌ a bǎ gû ma̤còcè̌pwǎ a ta̤sò̌yṳ phû̌mò̤shî̌hto toǒ pě. ^a 4 Dě asî gwè sî pě ta, “Sî Běcǎ Ye̤shǔ olò̤kè sî ta a hè gesǒ pě amè̤ya? Hǐnudě a ǒ bǎtè? Paphipaphu toǒ sibòhtohǒ pwǎ̤tadě ta̤lǒ̤꤮ bònu, a sǒsǒpepwǎ ta pwǐ Cǒmara bǒlò̤ hǎkhû̌ dě wǐkhanu pepwǎ ya.” 5 Dě꤮ wǐ khanu, Cǒmara hî̌pwǎ ayo̤ tûmûpa dě mǒkhû̌ ta hǎkhû̌ htûhtò̌, dě a phî̌htò̌ shi toǒ dě shikla dě a ma̤ htûhtò̌ nû̌ûta hǎkhû̌, asî jîshope̤ takǎkè lǒkho pwǎ. ^b 6 Bǎ a nodû̌shi dě a ma̤pî̌kè hǎkhû̌li̤nu tebě akhanu bǎbǎ, a noǎ shihtǒonu hǒ. ^c 7 Pwǎ̤ta Cǒmara hî̌lò̤ sǒsǒgesǒ ayo̤ pwǐ a bǒlò̤ mǒkhû̌ ta hǎkhû̌ akhanu akhû̌akhî, mǒkhû̌ ta hǎkhû̌ htě pa kè̌shǐ yǎ khònò̤ htǒotoǒnu, Cǒmara pṳ̂měǒkǔ asî dě a ma̤pî̌kè asî ta mî̌ pě. Cǒmara pṳ̂měǒkǔ to̤ asî mṳni̤ bǎ a cèrò ma̤pî̌kè kòyò htě a bè̌dubè̌na̤ nû̌û tò̤nu toǒ pě.

8 Khomo̤ǐ sî꤮, shope̤nǎkè pûma̤ ta̤htǒotacǎ꤮ ma̤ nî̌꤮. Dě Běcǎ ayanu, ti̤ni̤numî̌ alò̤ta anětîrî̌ dě anětîrî̌ numî̌ alò̤pwǎ ta ti̤ni̤ pwǎ. ^d 9 Hǐnudě kòyò toǒǒ gènè̤ ta akhîakhayî̤ pwǎ̤tadě, Běcǎ olò̤ ta a hè gesǒ pěnu, a ma̤yo nǒ tò̤. Cǒmara sò̌yṳ noto̤bǎ kò ta ta̤pî̌ta̤lṳ̂ dǐpwǎ̤꤮ tò̤, htodě a sò̌yṳ noshò̌lò̤sû̌shò̌lò̤sò̌bò kò sò̌ pṳ̂̌꤮ tapwa̤ akhû̌akhî, a khòsò̌dopwǎ bǎ sîya.

10 Pwǎ̤tadě Běcǎ amṳni̤ htǒonu, a hèto̤sumṳ sǒsǒta pwa̤ǎhǔ tapwa̤ hènu pě. Bǎnu ti̤ni̤ pěnu, mǒ gokrû̌htò̌ pě dě a hǎmǎkè pě. Mî̌ gèpî̌ lîtîklî̌kèbò lṳmṳ, la, shǎ htě a ǒ dě mǒla̤ sîtoǒ pě. Dě a gèpî̌ lîtîklî̌kèbò hǎkhû̌ ta ta̤ htě a ǒ nû̌ûkû toǒ lǒ̤꤮ bò pě. ^e

11 Cǒmara ma̤pî̌kèbò pwǐhè̌onu pě akhû̌akhî, sî dě, sî tobǎ ǒhtûpwa̤ hî̌tè hî̌nudě, bǎ sî ǒpo̤ kè̌shuǐ Cǒmara hè pě akhanu, sî to ǒhtûpwa̤ cahtǐ dě, sî to ǒhtûpwa̤ to ta Cǒmara asò̌phlǒ. 12 Dě ma̤pûhǐ Cǒmara amṳni̤ hèto̤ phwèphwè ayanu, ǒhtûpwa̤ wǒ lǒkho. Bǎnu ti̤ni̤ pěnu, mî̌ gèhtò̌ dě mǒla̤ pě dě a ma̤pî̌kèbò mǒla̤ pě. Mî̌gègûshû̌ akhû̌akhî, mǒla̤ aphwǐaphrû̌ lǒ̤꤮ bò jûlòte̤bò pě. 13 Pwǎ̤ta pa dě, pa ǒpo̤kè̌shuǐ ta̤htě Cǒmara olò̤hto bǎ pa ta a bǒtèplè̌ bǎ pa mǒkhû̌sa ta hǎkhû̌sa pě. Gûla̤ bǎnutò̤glò pěnu, kò ǒhtûpwa̤ ma̤to Cǒmara asò̌phlǒ pě. ^f

14 Hǐnudě khobǒsû̌bǒmo̤ sî꤮, sî ǒpo̤kè̌shuǐ ta̤htǒo akhû̌akhî, ma̤pûhǐ Cǒmara kè̌shǐ pû sî ta kòyò htě awî̌ ta ta̤sǔ tò̤nu, htodě ma̤pûhǐ ala̤bè̌ ta̤sǔ dě sîlo̤ ǒ pûtò̤, htohǒtò̤ ma̤pûhǐ sî ǒpè̤ǒdû to̤ ta a pěnu, jipwi̤ sělě lǒkho nî̌꤮. 15 Sî̌yagènè̤ lǒkho ta pa Běcǎ htǒo a khòsò̌do pwǎ, a hè pò̤ya̤ ma̤tè̤hî̌dě ma̤pûhǐ kòyò toǒ nî̤bǎ kû̌kò ta̤ma̤lû̌htò̌ge htǒonudě a sò̌yṳ ǐpe asî akhîakha hǐnupwǎ. Pa pṳwè̤ khobǒsû̌bǒmo̤ Pò̌lu khwè̌dǒhto bǎ sî pwǐ he hî̌ bǎ sî htǒonu hǒ. A khwè̌ bǎ sî pwǐ Cǒmara ǐ nû̌û ta̤sî̌ta̤jònu toǒ hǒ. 16 Pò̌lu alî̤ pṳ̂̌tabǎnu a khwè̌bò pwǐhè̌o pṳ̂̌꤮ taplǎ. Dě ata̤khwè̌ akûnu, ta̤htě kò sî̌ya phlotò̤nu a ǒ toǒ, dě kòyò htě a jòlî̤tò̤ toǒ dě asò̌phlǒ nûhtonûlò̤ toǒnu, a phî̌sǔkè kò khwè̌ lî̤htǒo amûasǎ. Htohǒtò̤ a phî̌sǔkè dǒ lî̤cahtǐ ahǔwa̤ toǒ amûasǎ hǐnunu. Dě asî phî̌sǔ lǒkho hǐnu akhû̌akhî, a ma̤pî̌kè tû̌pwǎ lǒkho ana̤.

17 Pwǎ̤tadě he khobǒsû̌bǒmo̤ sî꤮, sî sî̌yahto ta̤htǒotoǒ hǒ. Hǐnudě ma̤pûhǐ kòyò phû̌mò̤ htǒotoǒ lǒplò̤ tikhlǐ cû̌ pû sî ta a ta̤gènè̤ sǔ htǒotoǒ akû tò̤nu, sè̌rè̌ǐ lǒkho sîna̤ nî̌꤮. Sî dè gana̤de asî yo̤ hî̌numî̌, sî ǒměǒglepe ta sî ta̤yṳta̤nǎ akû tò̤ hǒ. 18 Mî̌tanu, dû̌htò̌ sělěpo̤ lǒkho dě ta̤bwǐta̤sîrî akû ta dě ta̤sî̌ya pwa̤ htě a ma̤lû̌htò̌ge pa mî̌ pa Běcǎ Ye̤shǔkhrî̌stu htǒo akû nî̌꤮. Khònò̤htǒo tǒ̤hènu, kò htû̌sò̌ǐ tû̌ta pa Běcǎ Ye̤shǔkhrî̌stu tûjûpwa̤ talakhǎ nî̌꤮. Amè̤.