2Th 1 | KxfSCKRC | STEP | Pa mî̌ Pò̌lu, Sǐla, ta Timò̤̌te. Pa khwè̌cû̌ plǒnû̌û lî̤htǒotabǎ dě sî Tè̌shalò̌nia pwa̤yṳǎta̤ aprṳ̂ahophû̌ toǒ a ǒ. Sî mî̌ papha Cǒmara ta Běcǎ Ye̤shǔkhrî̌stu akòyò toǒ.

2 Thessalonians 1

1 Pa mî̌ Pò̌lu, Sǐla, ^{▼▼Dě Greekyo̤ mî̌ a hî̌ nû̌ûta “Silvanus”} ta Timò̤̌te. Pa khwè̌cû̌ plǒnû̌û lî̤htǒotabǎ dě sî Tè̌shalò̌nia pwa̤yṳǎta̤ aprṳ̂ahophû̌ toǒ a ǒ. Sî mî̌ papha Cǒmara ta Běcǎ Ye̤shǔkhrî̌stu akòyò toǒ. ^b 2 Pha Cǒmara ta Běcǎ Ye̤shǔkhrî̌stu ǐtû̌pû sî ta̤bwǐta̤sîrî ta ta̤gûjûkabǎ nî̌꤮.

Pò̌lu a ta̤hî̌bwǐhî̌sîrîhtò̌ Cǒmara ta a ta̤kwisaba

3 Pṳwè̤ Khrî̌stuphû̌ toǒ꤮, pa gènè̤htò̌nṳ sî bò̌khòtè꤮ bǎbǎnu, pa bǎ hî̌bwǐhî̌sîrî Cǒmara ta sîya pṳ̂̌꤮ taplǎ, ma̤tè̤hî̌dě sî ta̤yṳta̤nǎ ta sî ta̤mo̤ǐ nû̌û tapwa̤ ta tapwa̤nu, sǔ a dû̌htò̌ akhû̌akhî, pa tobǎ hî̌bwǐhî̌sîrî yǎ. 4 Hǐnu akhû̌akhî, pa sana̤nu pa pwe̤ǐlṳbǎ pwa̤yṳǎta̤ aprṳ̂aho ahǔwa̤ toǒ ta sîwi̤sîkè̌. Bǎ sî khòbǎ ta̤ma̤jîma̤jû ta ta̤pò̤ta̤sha toǒ akhanu, sî khòsò̌dobò̌ ta sî ǒměǒgle dě sî ta̤yṳta̤nǎ akû akhû̌akhî, pa bè̌htò̌yî̤ mè̤mè̤̌ pa sò̌phlǒ.

5 Ta̤htǒotoǒ khò bò꤮ asò̌ ta Cǒmara cèrò ta̤ numî̌ acǒatè̤ pwǎ. Hǐnu akhû̌akhî, Cǒmara bè̌ sî ta sîtosîbǎ ta ashiagakû pě. Sî khòbǎ ta̤jîta̤jû khònò̤htǒo numî̌ Cǒmara shiga aya pwǎ. 6 Cǒmara ma̤ta̤ numî̌ atoabǎ pwǎ. Kòyò htě a ma̤jîma̤jû sî toǒnu, Cǒmara ǐ geshǔsǒtû̌ asî ta̤jîta̤jû pě. 7 Pwǎ̤tadě sî ta pa khòbǎ ta̤jîta̤jû htǒotoǒnu, Cǒmara ma̤mo̤ gesǒtû̌ pa pě. Htû̌꤮ Běcǎ Ye̤shǔ ǒlṳhtò̌ akhapěnu, a ma̤mo̤htò̌ gesǒ pa pě. A hè dě mî̌plo̤ akû pě. A hè kû̌ta a tanaphû̌ htě a ǒ ta a ta̤po̤ta̤phǎ htǒonu toǒ pě. 8 A cèrò kòyò htě a sî̌ya kû̌kò Cǒmara tò̤nu toǒ ta kòyò htě a jûle̤phî̌yo̤ pa Běcǎ Ye̤shǔ a ta̤sò̌le̤sò̌lò̤ awi̤akè̌ tò̤nu toǒ pě. 9 A sî khòbǎ ta̤pî̌ta̤lṳ̂ tûjûpwa̤ ata̤cèrò htǒonu pě. Htodě Běcǎ bè̌tephekè asî dě a lo̤mo̤ ta a ta̤sîrîdû̌htû htě apo̤aphǎ htǒotoǒ alo̤mo̤ pě. ^c 10 Htû̌꤮ Běcǎ Ye̤shǔ hègesǒ amṳni̤ ti̤ni̤ pěnu, a htûhtò̌tû̌ hǐnu pě. Bǎnu ti̤ni̤ pěnu, akòyò cahtǐ toǒ ma̤sîrîdû̌sîrîhtû nû̌û pě dě kòyò htě a yṳǎ nû̌û toǒnu, a sû̌pi̤sò̌pi̤bò nû̌ûla̤ pě. Hǐnudě sîhtǒo toǒǒ bǎbǎ, sî htû̌sò̌ǐ kû̌dǒ dě asîkla pě, ma̤tè̤hî̌dě sî yṳǎhto ta̤sò̌le̤sò̌lò̤ awi̤akè̌ htě pa dǒhtû̌ǐhtobǎ sînu toǒ hǒ.

11 Hǐnudě ma̤pûhǐ Cǒmara ma̤jè sî dě sî ǒhtûpwa̤ tobǎ kû̌ta ata̤kaǎ sî ayanu, pa kwisaba sîya pṳ̂̌꤮ taplǎ. Pa kwisabapo̤ bǎ sîya ta Cǒmara ma̤lǒma̤bebò bǎ sî ta̤ma̤wǒ htě sî sò̌yṳma̤nu toǒ, ta ta̤ma̤ htě sî ma̤ yǎta ta̤yṳnu toǒ. Dě Cǒmara ma̤tû̌ bǎ sî ta a ta̤po̤ta̤phǎ pě. 12 Pa kwisaba pwǐhè̌o numî̌ ma̤pûhǐ pa Běcǎ Ye̤shǔ nî̤bǎ ta̤sîrîdû̌sîrîhtû sî ǒ dě sî nî̤bǎkû̌lè̌ ta̤sîrîdû̌sîrîhtû dě a ǒ pě ayanu pwǎ. Pa Cǒmara ta pa Běcǎ Ye̤shǔkhrî̌stu abwǐasîrî akhû̌akhî, a htûhtò̌ tû̌ta pwǐhè̌o pě nî̌꤮.