Jowǎ̤ni̤ lî̤ subǎ tabǎhtǒo mî̌pwǎ lî̤ htě mo̤pwa̤ tapwa̤ khwè̌cû̌ bǎ Kayǔ htě a htû pwa̤yṳǎta̤ aprṳ̂aho hǐkǒdû̌ htǒotapwa̤ a ǒ. Kayǔ htǒonu a ma̤shû̌ma̤jo na̤cè̌ Khrî̌stuphû̌ toǒ akhû̌akhî, pwa̤khwè̌lî̤ htǒotapwa̤ htû̌sò̌ǐ mè̤mè̤̌ nû̌û. Na bǒsû̌ ta Dǐotarephǐ numî̌ sè̌rè̌ǐ nana̤ tîkî̌ nî̌, a mǎcû̌ nû̌û ta̤hî̌bǎ hǐnu.

Ta̤hî̌bǎ to̤to̤ ta to̤to̤

Ta̤hî̌bǎ wǐ dě alo̤mo̤ 1:1-4

Kò htû̌sò̌ǐ Kayǔ 1:5-8

Kò pi̤jishǐcǒ Dǐotarephǐ 1:9-10

Kò htû̌sò̌ǐ Demetarǐ 1:10-12

Ta̤hî̌bǎ gutṳ̌lò̤ 1:13-15

3 John

1He mî̌ wè̤khǔwè̤pwa̤ htě a htû hǐkǒdû̌ tapwa̤ dě he khwè̌cû̌ lî̤htǒotabǎ dě Kayǔ a ǒ. Kayǔ mî̌ kòyò htě he mo̤ǐ mè̤mè̤̌ yǎ tapwa̤. ^a

2He khobǒsû̌bǒmo̤, ma̤pûhǐ ta̤wǒ lǒ̤꤮ bò ǒ kû̌ta nanu dě, he kwisaba bǎ naya. Pwǐ he sî̌ya ta na ǒshû̌ǒmo̤wǒ sû̌sò̌ tokhonu, he kwisaba ta na na̤saklû phěyî̌ tokhonu, a ǒshû̌ǒmo̤wǒ tû̌ta hǐnu nî̌꤮. 3Ma̤tè̤hî̌dě bǎ pa pṳwè̤ sû̌sò̌ toǒ hèto̤kû̌ he akha, a pwe̤ǐlṳ bǎ he ta nawi̤nakè̌. Dě a hî̌ bǎ he, na sò̌phlǒcǒtè̤ ta ta̤te̤ta̤mǎ dě na ǒhtûpwa̤ gûkû̌ hǐnu pṳ̂̌꤮ taplǎ akhû̌akhî, he sò̌le̤sò̌lò̤ mè̤mè̤̌. 4Bǎ he gana̤de ta hephû̌heli̤ sû̌sò̌ toǒ ǒhtûpwa̤ dě ta̤te̤ta̤mǎ akû akhanu, he sò̌le̤sò̌lò̤ pṳ̂̌꤮ taplǎ. Ta̤ htě a glè ma̤sò̌le̤khlo he ta htǒonu a ǒpe dǐcǎ꤮ tò̤ hǒ.

Kò htû̌sò̌ǐ Kayǔ

5He khobǒsû̌bǒmo̤, na sò̌phlǒcǒtè̤ mè̤mè̤̌ ta ta̤ma̤ dě na ma̤jè pṳwè̤ Khrî̌stuphû̌nu toǒ. Asî mî̌ shǐtè̤mè̤ dě na sî̌yanǒ yǎtò̤ toǒ pwǎ̤tadě na ma̤jè asî. 6Asî dǒhtû̌ǐlṳ lǒkho bǎ pwa̤yṳǎta̤ aprṳ̂ahophû̌ bǎo toǒ ta na ta̤mo̤ǐ awi̤akè̌. Ma̤pûhǐ asî cû̌ sělěhèpo̤ klè̌ dě alo̤mo̤ tokhonu, khòsò̌do ma̤jè asî pwǐ ato ta Cǒmara a ta̤sò̌yṳnu toǒ nî̌꤮. 7Ma̤tè̤hî̌dě asî hǎhtò̌cû̌ klè̌ ta Khrî̌stu aya pwǎ̤tadě a phî̌ kû̌kò ta̤ma̤jè dě kòyò yṳǎ Khrî̌stu tò̤nu toǒ a ǒ dǐcǎ꤮ tò̤. 8Hǐnu akhû̌akhî, ma̤pûhǐ pa ma̤ kû̌dǒta̤ ta asî dě a ma̤ lǒkho ta̤te̤ta̤mǎ ata̤ma̤ htǒotoǒ ayanu, pa Khrî̌stuphû̌ toǒ tobǎ ma̤jè bǎ kòyò hǐnu toǒ hǒ.

Dǐotarephǐ ta Demetarǐ

9He khwè̌cû̌hto lî̤ dě pwa̤yṳǎta̤ aprṳ̂aho a ǒ tabǎ pwǎ̤tadě Dǐotarephǐ htě a sò̌yṳhtû asî hǐkǒdû̌ htǒotapwa̤nu, a gana̤de pa khwè̌pwe̤ǐcû̌ lî̤nu toǒ tò̤. 10Hǐnu akhû̌akhî, htû̌꤮ he hèto̤ pě dě he hî̌lṳhtò̌ bǎ sî ta bò꤮ a ma̤sǔhtonu toǒ pě. A dǒ payo̤ dě a hî̌ phû̌mò̤shî̌hto pa, htohǒtò̤ bǎ pṳwè̤ toǒ cû̌to̤khato̤kû̌ yǎ akhanu, a kaǎshǔ asî tò̤. Htohǒtò̤ kòyò htě a sò̌yṳ kaǎshǔ pṳwè̤ htǒotoǒnu, a ma̤dǐdò ta a wṳ̂hǎhtò̌kè kò dě asî pwa̤yṳǎta̤ aprṳ̂aho akhlo.

11He khobǒsû̌꤮, ta̤phû̌mò̤shî̌hto hǐnu toǒnu kè̌mò̌mṳkû̌ pûma̤ kò ma̤ nî̌꤮. Kè̌mò̌mṳkû̌ kò ta̤ htě awǒnu toǒ nî̌꤮. Kòyò tapwa̤pwa̤ a ma̤ ta̤wǒnu, a mî̌ Cǒmara akòyò tapwa̤ hǒ. Kòyò htě a ma̤ ta̤phû̌mò̤ tapwa̤pwa̤ numî̌ kòyò htě a sî̌ya te̤mǎ kû̌kò Cǒmara hǒtò̤. 12Kò htû̌sò̌ǐbò Demetarǐ. Ta̤te̤ta̤mǎ khòlṳcǒtè̤tû̌ asò̌ ta a wǒ awi̤akè̌. He htû̌sò̌ǐdǒ yǎ awi̤akè̌, dě na sî̌ya ta pa hî̌htǒo numî̌ acǒatè̤ pwǎ.

Ta̤hî̌mo̤hî̌wǒ gutṳ̌lò̤

13Ta̤wi̤ta̤kè̌ htě he sò̌yṳ pwe̤ǐ na numî̌ aǒplṳ̂ pwǎ̤tadě he sò̌yṳ khwè̌cû̌pe bǎ na ta lî̤ tò̤. 14Pwǎ̤tadě he kè̌shuǐ ta he glè kè̌shǐphwè ta na pě dě pa hî̌bǎshǔ kè̌khînû̌û tapwa̤ ta tapwa̤ pě.

15Ta̤pè̤ta̤dû ǒkû̌ tû̌ta na nî̌꤮. Pa khobǒsû̌ lǒ̤꤮ bò bǎo toǒ hî̌mo̤hî̌wǒ dǒ na. Hî̌mo̤hî̌wǒpo̤ tṳtṳ dǒbò pa khobǒsû̌nu toǒ tapwa̤ hto tapwa̤ nî̌꤮.