Acts 10

Petru ta Gòne̤lǐa

1Bǎ Kèsarǐwî̤kûnu klihǐkǒdû̌ htě ami̤ ta Gòne̤lǐa ǒ tapwa̤, A mî̌ Rò̌mǎ klita̤ya̤ ahǐkǒdû̌ htě kò kaǎ yǎta Itali kli. 2A mî̌ Yṳ̌daphû̌ mè̤tò̤ dě a mî̌ kòyò htě a mo̤ǐ Cǒmara tapwa̤ htohǒtò̤ a ta a hǐphû̌phòphû̌ toǒ lǒ̤bònu a bè̌dubè̌na̤ mè̤mè̤̌ Cǒmara. A ma̤jè plṳ̂ Yṳ̌daphû̌ htě a shuphû̌shèwè toǒ dě a kwisaba Cǒmara pṳ̂̌꤮ taplǎ. 3Ti̤ni̤kha bǎ lṳmṳhǎlò̤ suna̤rî phǔbǎ akhanu, a kè̌shǐnǎ lîtîklî̌ Cǒmara a mǒkhû̌tanaphû̌ tapwa̤ hènṳ ǒlṳsumṳ a hǐdǒkû dě a kaǎ nû̌ûta, “Gòne̤lǐa!” hǐnu.

4A kè̌ jèwè̤shǔ mǒkhû̌tanaphû̌ dě a ǐsha jòjî̌꤮ tò̤ dě “Běcǎ, na sò̌yṳ hî̌ he titè?” A gwè mǒkhû̌tanaphû̌ hǐnu,

Dě mǒkhû̌tanaphû̌ hî̌shǔ yǎ, “Cǒmara sò̌phlǒǒ na, ma̤tè̤hî̌dě na ta̤kwisaba toǒ ta na ma̤jè kòyò shuphǔshèwèphû̌ toǒnu, a to̤htò̌ dě Cǒmara a ǒ sǒsǒta na lṳhtò̌ anu hǒ. 5Khònò̤htǒo nocû̌ kaǎhèmò̌ Shîmǒ̤nè̤ Petru ta kòyò toǒ dě Yǔpewî̤. 6A cû̌ǒ dě Shîmǒ̤nè̤ htě a ma̤ta̤phěnu tapwa̤ ahǐ dě a ǒ dě shidû̌shite̤we̤htu.”

7– 8Mǒkhû̌tanaphû̌ hǎhtò̌cû̌kè htodě, Gòne̤lǐa kaǎhè jûphû̌ a hǐdǒkû sò̌gini̤ ta kliphû̌ htě a bè̌dubè̌na̤ Cǒmara dě a la̤yṳǎ nû̌û tapwa̤. Dě a pwe̤ǐlṳbò bǎ asî ta ta̤ma̤htûhtò̌hto ana̤ ta a htǒotoǒ, htodě a nocû̌ asî dě Yǔpewî̤.

9Nǒkòti̤ni̤ bǎ asî cû̌to̤phǔ ta Yû̌pewî̤ akhanu, Petru htò̌ dě hǐkhû̌gu tadǎ tama akhû̌ dě a htò̌ kwisaba. Bǎnu akha mî̌ ato ta lṳmṳ glè̌bǎ hǒ. 10A sǎǎsò̌o dě kò ma̤wǒ bǎ nû̌û shǎǎ akha a kè̌shǐnǎ ta̤tacǎ. 11A kè̌shǐ mǒkhû̌ lṳ̂mohtò̌ dě ta̤tacǎ htě alò̤ta hǔgò pṳdû̌nu ane̤ ǒ lǐ̤ne̤ tṳpṳ dě kò jèlòte̤ yǎnu. 12Lǒ̤꤮ bò ta̤phû̌ta̤li̤ htě a khò̌lopo̤ǒ lǐ̤kho toǒ ta lǒ̤꤮ bò ta̤phû̌ta̤li̤ htě a lo̤cû̌nu toǒ ta lǒ̤꤮ bò htû̌phû̌yṳphû̌ htě a wi̤ dě mǒla̤ toǒnu a ǒbò hǔgòdû̌ htǒotṳpṳ akû. 13Yo̤po̤htò̌ dě a hî̌ nû̌û, “Petru꤮ ihtǒ ma̤siǎkèmò̌ ta̤htǒotoǒ.”

14Pwǎ̤tadě Petru hî̌shǔ, “Běcǎ꤮ he ǎnǒ dî̌kî̌꤮ tò̤, ta̤htě kò bè̌ yǎta a cahtǐ tò̤nu toǒ bǎbǎ, mè̤tò̤mî̌ a mṳ̂plîtò̤ toǒnu bǎbǎ, he ǎnǒ yǎ dǐkhò̌꤮ tò̤.”

15Dě yo̤po̤htò̌ po̤ ta, “Ta̤ htě Cǒmara dèhî̌ ta a mṳ̂plî pwǎ, dě ǎyǎnî̤ pwǎ a hî̌nu toǒnu, hî̌ pûma̤ yǎta a phû̌mò̤ ma̤.”

16Hǔgòdû̌ htě ta̤phû̌ta̤li̤ ǒ nû̌ûkû htǒotṳpṳnu, a jèlò̤te̤lṳ be bǎ nû̌û suhu htodě kò johtò̌ hǎmǎkèsǒ yǎ dě mǒkhû̌.

17Bǎ Petru gènè̤kè̌ Cǒmara a ta̤dǔlṳ a ta̤kè̌shǐnǎ htǒo amûasǎ akhanu, kòyò htě Gòne̤lǐa nohè nû̌û toǒnu, a hè gwè kè̌lǎ Shîmǒ̤nè̤ ahǐ dě a hèihtǒ ǒ bǎ ahǐlo̤mo̤ we̤takhahtunu. 18Dě asî gwèhtò̌, “Kòyò mi̤ ta Shîmǒ̤nè̤ Petru hî̌nu tapwa̤ mî̌ a ǒ bǎo ya?”

19Bǎ Petru gènè̤pe ta̤kè̌shǐnǎ htǒo akhanu, Běcǎ sǎcahtǐ hî̌ nû̌û, “Shîmǒ̤nè̤! Kòyò hèkè̌lǎ na sò̌su. 20Hǐnu akhû̌akhî, hǎte̤mò̌ hǐla̤nu, ma̤pò̤ya̤ pûma̤, tûrû̌ gûcû̌kû̌ asînu toǒ akònu, ma̤tè̤hî̌dě he nohè asî dě naǒ.” 21Hǐnudě Petru hǎte̤ hǐla̤ dě a hî̌ asî, “He mî̌ kòyò htě sî hè kè̌lǎ yǎnu tapwa̤ hǒ. Sî hèkè̌lǎ he ma̤tè?”

22Dě asî hî̌shǔ, “Klihǐkǒdû̌ Gòne̤lǐa nohè pa. A mî̌ kòcǒkòtè̤ tapwa̤, htohǒtò̤ kòyò htě a bè̌dubè̌na̤ Cǒmara tapwa̤. Yṳ̌daphû̌ toǒ bè̌dubè̌na̤bò nû̌û pṳ̂̌꤮ tapwa̤. Ma̤pûhǐ a gana̤dekû̌ na ta̤hî̌bǎhî̌sho toǒnu dě Cǒmara a mǒkhû̌tanaphû̌ hè hî̌ nû̌û ta bǎ cû̌ kaǎhè na dě ahǐ.” 23Dě Petru kaǎ hǎmoǒshǔ asî.

Htodě pe̤wo̤ ti̤ni̤nu, Petru ma̤wǒ ana̤ dě a gûcû̌kû̌ asî. Pwa̤yṳǎna̤ǎphû̌ htě a ǒ dě Yǔpewî̤kû toǒ gûcû̌kû̌ nû̌û. 24Dě nǒkò ti̤ni̤nu asî cû̌to̤ dě Kèsarǐwî̤ bǎ Gòne̤lǐa la̤kaǎplǒ apṳwè̤ sana̤ toǒ ta asû̌akho toǒ agûla̤, dě asî bǎnu toǒ ǒpo̤kè̌shuǐ lǒkho Petru. 25Bǎ Petru glè̌nṳ hǐdǒkû akhanu, Gòne̤lǐa dǒshuǐ nû̌û dě a gene̤lò̤ û̌tṳglulò̤ nû̌û khò̌lopo̤kòshî̌ dě a sabahtò̌ nû̌û. 26Pò̤̌ta Petru noihtǒsǒ yǎ dě a hî̌ nû̌û, “Ihtǒmò̌ he mî̌ kòyòhǎkhû̌phû̌ sǒsǒpwǎta na.”

27Bǎ Petru ta Gòne̤lǐa hî̌bǎ ta ginṳ dě hǐdǒkû akhanu, a kè̌shǐ kòyò hèǒplṳ̂ǒphǎ, ǒplǒnǎ lǒkho bǎnu. 28Petru hî̌ asî, “Sî sî̌ya tû̌hǒ, pa Yṳ̌daphû̌ a ta̤sû̌ta̤tòwò ǒta Yṳ̌daphû̌ tapwa̤ glè̌ cû̌bǒsû̌khǎkho dǒta Yṳ̌daphû̌ mè̤tò̤ toǒ bǎbǎ, a glè̌ cû̌ǒlè kû̌ pwǎ asî bǎbǎ, anî̤ tò̤. Pò̤̌ta Cǒmara dǔlṳ he ta Yṳ̌daphû̌ mè̤tò̤ toǒ numî̌ a mṳ̂plî kû̌kò tò̤, mè̤tò̤mî̌ a cahtǐ kû̌kò tò̤ hî̌pû lǒkho ma̤, pa tobǎ bǒsû̌bò asî, Cǒmara dǔlṳ he hǐnu. 29Hǐnu akhû̌akhî, bǎ na kaǎhè he akhanu, he hî̌shǔpe dǐcǎ꤮ tò̤, he hè pwǎ̤ taplǎ pa. Hǐnudě khònò̤htǒo he sò̌yṳ gwè na, na kaǎhè he ma̤tè?” nupwǎ.

30Dě Gòne̤lǐa hî̌ nû̌û, “Bǎ a tûlû̌kè susa lṳmṳhǎlò̤ suna̤rî alò̤ta khònò̤kha htǒonuhǒ, he kwisaba ta̤. Bǎnuakha, kòyò kûsǒnṳ hǐdohǐyò̤ shěrakha tapwa̤ hèihtǒ ǒ sumṳ dě he lo̤mo̤. 31Dě a hî̌ he, ‘Gòne̤lǐa꤮ Cǒmara gana̤de na ta̤kwisaba hǒ. A sî̌yahtò̌bǎ to̤ naǐnayṳ̂ bǎ kòyò shuphǔshèwèphû̌nu toǒ hǒ. 32Nocû̌mò̌ kòyò toǒ dě nocû̌kaǎ asî ta kòyò tapwa̤ htě ami̤ ta Shîmǒ̤nè̤ Petru htě a ǒ dě Yǔpewî̤ tapwa̤. Khònò̤dě a cû̌ ǒkǔkû̌ htě ami̤ ta Shîmǒ̤nè̤ ahǐ hǒ. Shîmǒ̤nè̤ htǒonumî̌ ahǐ ǒ dě shidû̌shite̤we̤htu, a mî̌ pwa̤ma̤ta̤phě tapwa̤.’ 33Hǐnudě he nocû̌kaǎ kò ta na taplǎpa, na hèto̤kû̌ pa dě awǒ mè̤mè̤̌. Ma̤pûhǐ pa gana̤debǎ kû̌bò Cǒmara pwe̤ǐlò̤hto na toǒnu dě khònò̤htǒo pa hèbò dě Cǒmara a lo̤mo̤hǒ.”

Petru a ta̤dǒhtû̌ǐ

34Petru tèhtò̌ hî̌bǎ, “Khònò̤dě he sî̌ya ta Cǒmara kè̌dû̌kè̌pî̌tî̌ kò dǐpwǎ̤꤮ tò̤ numî̌ a mè̤mè̤̌. ^a 35Kòyò khlilèphû̌ titètè̌꤮ bǎbǎ, a dè bè̌dubè̌na̤ Cǒmara dě a dè ma̤toma̤bǎ ta̤ hî̌numî̌ Cǒmara dǒshuǐ pwǎ asî. 36Sî sî̌yahto tû̌ ta̤wi̤ta̤kè̌ htě Cǒmara nohè bǎ Ye̤shǔ ta Israel akhlialè toǒ aya hǒ. Dě a hè pwe̤ǐlṳ bǎ asî ta ta̤sò̌le̤sò̌lò̤ awi̤akè̌ htǒonu hǒ. Dě Ye̤shǔkhrî̌stu mî̌ a htû kò pṳ̂̌꤮ tapwa̤ a Běcǎ htǒotapwa̤ akhû̌akhî, pa nî̤bǎ ta̤pè̤ta̤dû hǒ. 37Dě Yṳ̌daga sagala̤ akûnu, Běcǎ Ye̤shǔ ma̤hto kwè̌꤮ mî̌titè numî̌ sî sî̌yatû̌ hǒ. Bǎ Jowǎ̤ni̤ dǒhtû̌ǐ htobǎ kò ta ta̤ploshi awi̤akè̌ akhanu, Ye̤shǔ tèhtò̌ ma̤ta̤ dě Galilî̌agakû. 38Htodě Cǒmara wû̌lǎ Nǎ̤sèrèwî̤phû̌ Ye̤shǔ dě a ǐ nû̌û Běcǎ sǎcahtǐ ta a ta̤po̤ta̤phǎ hî̌tènu, sî sî̌yahtotû̌ hǒ. Ye̤shǔ cû̌shido gûla̤ pṳ̂̌꤮ tò̤glò dě cû̌ ma̤bwǐma̤sîrî bǎ kò, ma̤bǎge kòyò ǒ ta khînǎmo̤pha hǐkǒdû̌ ma̤nûma̤cě nû̌û toǒ, ma̤tè̤hî̌dě Cǒmara ǒkû̌ta a akhû̌akhî, a ma̤ta̤ hǐnu hǒ.

39“Pa mî̌ kòyò toǒ htě a khòlṳbò bǎ kò ta Ye̤shǔ ma̤hto ta̤ lǒ̤꤮ bò dě Yṳ̌daphû̌ toǒ ǒ ǐ ga toǒ, ta Ye̤rǔshèlèwî̤kû htǒonu toǒ awi̤akè̌ pwǎ. Htodě asî htǎwa̤sikè Ye̤shǔ nò̌dòhtǔ alo̤. 40Pwǎ̤tadě suni̤ ti̤ni̤nu, Cǒmara ma̤htûpwa̤gesǒ nû̌û ta ta̤si dě a dǔlṳhtò̌ gesǒ nû̌û. 41A ǒlṳhtò̌ bǎ kò pṳ̂̌꤮ tapwa̤ mè̤tò̤. A ǒlṳhtò̌ tû̌pwǎbǎ Cǒmara wû̌lǎ pa dě pa glè htûhtò̌ pwa̤lò̤sasî̌ htǒotoǒnu pwǎ. A sihtûpwa̤gehtosǒ akhanu, pa htǒotoǒnu, pa ǎplǒoplǒ kû̌dǒhto ta a hǒ. 42Dě a mǎnǎpo̤ pa ta pa glè cû̌ dǒhtû̌ǐ bǎ kò ta ta̤sò̌le̤sò̌lò̤ awi̤akè̌, htodě pa cû̌khòlṳ bǎ kò pasò̌ ta a mî̌ kòyò tapwa̤ htě Cǒmara wû̌lǎ yǎ dě a mî̌ a htû bǎ kòyò htûpwa̤ toǒ ta kòyòsi toǒ a pwa̤cèròta̤ pě. 43Pwa̤po̤ pṳ̂̌꤮ tapwa̤ dǒhtû̌ǐnǎhto yǎ awi̤akè̌ dě asî hî̌, ‘Kòyò lǒ̤꤮ bò htě a yṳǎna̤ǎ nû̌û toǒnu Cǒmara bòlû̌ tṳtṳ asî ta̤sǔ ta ami̤ akhû̌akhî pě,’” Petru hî̌ asî hǐnu.

Yṳ̌daphû̌ mè̤tò̤ toǒ nî̤bǎ Běcǎ sǎcahtǐ

44Bǎ Petru hî̌bǎpe akhanu, Běcǎ sǎcahtǐ hèlò̤ dě kòyò htě a gana̤de ta̤wi̤ta̤kè̌ htǒotoǒ alo̤ pṳ̂̌꤮ tapwa̤. 45Cǒmara cû̌ ǐlò̤ to̤kû̌ Běcǎ sǎcahtǐ dě Yṳ̌daphû̌ mè̤tò̤ htǒotoǒ alo̤ akhû̌akhî, Yṳ̌daphû̌ htě a yṳǎna̤ǎ ta̤ htě a ǒ lǒkho dě Yǔpewî̤kû dě a hè plǒkû̌ta Petru htǒotoǒnu a sû̌pi̤sò̌pi̤ mè̤mè̤̌. 46Ma̤tè̤hî̌dě asî gana̤de tû̌ kòyò htǒotoǒ hî̌bǎ ta yo̤sǎcǒklî̌ toǒ akhû̌akhî, asî htû̌sò̌ǐ lǒkho Cǒmara.

Htodě Petru hî̌, 47“Kòyò htǒotoǒ nî̤bǎkû̌ Běcǎ sǎcahtǐ pwǐ pa nî̤bǎhto htǒonuhǒ. Ma̤hǐnudě asî glè plo ana̤ ta shi ayanu, mî̌ûpè tapwa̤ glè ma̤dǐdòjò asî pè.” 48Hǐnu akhû̌akhî, Petru hî̌lò̤ayo̤ ta asî glè plo ana̤ ta shi dě Ye̤shǔ ami̤akû. Dě asî kwigwèbǎǐ Petru ta a ǒkû̌po̤ ta asî bǎnu ginǐ̤susa.