Act 12 | KxfSCKRC | STEP | Bǎnuakha Khwǐherǒ tèhtò̌ ma̤jîma̤jû pwa̤yṳǎta̤ aprṳ̂ahophû̌ toǒ.

Acts 12

Jǎgomo̤ si ta kò dǒlò̤te̤ Petru apo̤kû awi̤akè̌

1 Bǎnuakha Khwǐherǒ ^{▼▼Khwǐherǒ htǒotapwa̤ numî̌ Khwǐherǒ Akrǐpa.} tèhtò̌ ma̤jîma̤jû pwa̤yṳǎta̤ aprṳ̂ahophû̌ toǒ. 2 Dě a hî̌lò̤ ayo̤ akhû̌akhî, kò shusikè Jowǎ̤ni̤ awè̤ Jǎgomo̤ ta nò̌she. 3 A kè̌shǐ ta a ma̤ta̤ pwǐhè̌onu, ato ta Yṳ̌daphû̌ toǒ asò̌phlǒ akhû̌akhî, a hî̌lò̤po̤ ayo̤ ta bǎ pṳ̂po̤ Petru. Ta̤ma̤ htǒonu a htûhtò̌ bǎ mû̌pwè shodo ta̤bû akhanu. 4 Kò pṳ̂hto Petru dě kò dǒlò̤te̤ yǎ apo̤kû. Kòyò ǐlò̤ kliphû̌ lǐ̤prṳ̂ ata̤ma̤ dě asî bǎ ǒpo̤ǐ nû̌û. Asî ǒpo̤ tṳ̂prṳ̂ hto tṳ̂prṳ̂. Tṳ̂prṳ̂nu a ǒ sò̌li̤. Bǎ pwèhto akhanu, Khwǐherǒ gènè̤ ta a sèlèkè̌ Petru dě a cèrò nû̌û kòyò saprṳ̂ a lo̤mo̤ pě. ^b

5 Hǐnudě kò dǒ sadape Petru dě apo̤kû. Pwǎ̤tadě pwa̤yṳǎta̤ aprṳ̂ahophû̌ toǒ sò̌phlǒsho kwisaba bǎ mè̤mè̤̌ nû̌ûya.

Mǒkhû̌tanaphû̌ ma̤lû̌htò̌ge Petru dě apo̤kû

6 Bǎ Khwǐherǒ kaǎhtò̌ Petru dě kòyò saprṳ̂ a lo̤mo̤ hǒtò̤ tasanu, Petru hǎmoǒ kliphû̌ sò̌gini̤ aplǎkû. Kò coklomě yǎta sǒpli̤te̤htò̌ ginǐ̤bo. Htohǒtò̤ kliphû̌ toǒ ǒpo̤ǐbò bǎ la̤dǒlò̤te̤ kò apo̤ takhahtunu. 7 Běcǎ a mǒkhû̌tanaphû̌ tapwa̤ hè ihtǒ ǒlṳsumṳ bǎnu dě a lîhtò̌bò bǎ Petru ǒ ǐ a po̤kûnu. Mǒkhû̌tanaphû̌ pla̤ Petru kòbòkhû̌ a htû̌wè̤ihtǒ nû̌û dě a hî̌ nû̌û, “Ihtǒphwèmò̌” taplǎpa sǒpli̤te̤htò̌ ǒ Petru acǔde ginǐ̤khobò akû htǒonu a plû̌htò̌ lòte̤kèbò tû̌ ana̤.

8 Htodě mǒkhû̌tanaphû̌ hî̌ nû̌û, “Wò̤htò̌ na sò̌to̤ dě dò̌nṳ na khò̌phěnu.” Dě Petru gûma̤kû̌ pwǐ tanamǒkhû̌phû̌ hî̌ yǎnu. Dě a hî̌po̤ nû̌û, “Kò̌po̤nṳ na hǔgòpwî̌nu dě gûcû̌kû̌ hekò.” 9 Dě Petru gûhǎhtò̌kû̌ nû̌ûkò to̤dě apo̤khlo. Pwǎ̤ta mǒkhû̌tanaphû̌ ma̤ bǎ nû̌û pwǐ htǒonumî̌ a mè̤mè̤̌ ya, mè̤tò̤ yanu Petru sî̌ya te̤mǎ tò̤. A gènè̤pwǎ ta a kè̌shǐnǎ ta̤tacǎcǎ pwǎ. 10 Asî cû̌tûlû̌bò̌kèhto pwa̤ǒpo̤takha awǐgutṳ̌ to̤to̤ htodě a cû̌ tûlû̌bò̌po̤ ginǐ̤to̤ to̤to̤. Gutṳ̌lò̤ dě a cû̌to̤ takha te̤htò̌nu tûkû. Takha htǒotûkûnu mî̌ a phlo nṳto̤ wî̤kû dě a lṳ̂mohtò̌ tû̌pwǎ bǎ asî, dě asî hǎhtò̌cû̌kè ta takha htǒonu tûkû. Dě asî gûcû̌plǒ pwǎ nû̌û wî̤kûklè̌ htǒotabo dě mǒkhû̌tanaphû̌ hǎmǎsumṳkè bǎ Petru.

11 A hǎmǎhto bǎ nû̌û dě Petru sî̌yanǒ pwǎ ta̤htûhtò̌ana̤ ta ahtǒo dě a hî̌, “Khònò̤htǒo he sî̌ya ta ta̤ma̤htûhtò̌ ana̤ pwǐhè̌o numî̌ a mè̤na̤cè̌. Běcǎ Cǒmara nohè a mǒkhû̌tanaphû̌ dě a hè ma̤lû̌htò̌kè he dě Khwǐherǒ a ta̤sîrîshû̌sho ala̤, htohǒtò̤ a hè ma̤lû̌htò̌ge he dě Yṳ̌daphû̌ htě a kè̌shuǐ ta a glè ma̤jî̤ he toǒ a cǔdekû.” 12 Bǎ a sî̌yahè ta ta̤ma̤htûhtò̌ ana̤htǒo mî̌ a mè̤na̤cè̌ akhanu, a cû̌ Jowǎ̤ni̤ htě kò kaǎpo̤ ami̤ ta Mǎ̤riko htǒotapwa̤ amo̤ Marǐa ahǐ, dě bǎnukha, a totǐ ta kò hè ǒhtuǒplǒ kwisaba plǒbò nû̌û bǎnu. 13 Petru geto̤glo takhadû̌ hǐlo̤mo̤nu tûkû dě ma̤pûhǐ asî sî̌ya ta mî̌ûpè to̤glo takha pènu dě pwa̤ma̤ta̤ mamǔphû̌ htě ami̤ ta Rò̌de htǒotapwa̤ cû̌kè̌shǔ nû̌û. 14 A sî̌ya Petru ayo̤ dě a sò̌le̤sò̌lò̤ tûlû̌shû̌, a shope̤ bòmo bǎ nû̌û takha dě a khlè̌ginṳ pwe̤ǐ asî ta Petru ihtǒ ǒ akhlonu.

15 “Mî̌ na kicǐ ya?” Asî hî̌shǔ Rò̌de hǐnu, pwǎ̤tadě a mè̤na̤cè̌ Rò̌de hî̌sapwa̤shǔ asî hǐnu. “Petru ayola pwǎkò̌” asî hî̌shǔ gesǒ nû̌û hǐnu.

16 Bǎnuakha Petru to̤glo sělěpo̤ takha dě asî bòmo takhanu a kè̌shǐ Petru dě asî sû̌pi̤sò̌pi̤ jòjî̌꤮ tò̤. 17 Petru sò̌yṳ ta pwǎpwǎ꤮ noǒ asî dě a wî̌wòlṳ bǎ asî ta acǔde. Dě a pwe̤ǐ asî ta Běcǎ Cǒmara ma̤lû̌htò̌ kwè̌꤮ a dě apo̤kû hî̌tè awi̤akè̌. Dě a hî̌, “Pwe̤ǐ dǒ Jǎgomo̤ ^{▼▼Pwa̤sî̌jò toǒ gènè̤ta Jǎgomo̤ htǒo tapwa̤ mî̌ Běcǎ Ye̤shǔ apṳ makhû} ta pwa̤yṳǎphû̌ lǒ̤꤮ bò ahǔwa̤nu toǒ ta ta̤wi̤ta̤kè̌ htǒonu nî̌꤮,” Petru hî̌htokè asî hǐnu dě a hǎhtò̌cû̌kè ahǔwa̤ tò̤glò.

18 Lṳmṳlîbû dě pwa̤ǒpo̤ apo̤ toǒ gènè̤ sò̌phlǒshû̌shǎ mè̤mè̤̌ dě a hî̌ kè̌khînû̌û, “Petru cû̌lû̌htò̌jò hî̌tètè?” 19 Htotaplǎ dě Khwǐherǒ hî̌lò̤ ayo̤, a nokè̌lǎ gesǒ akliphû̌ toǒ ta Petru pwǎ̤tadě asî kè̌shǐpe nû̌û tò̤. Hǐnu akhû̌akhî, a cû̌ sèlèkè̌ pwa̤ǒpo̤ apo̤ htǒotoǒ dě a hî̌lò̤ ayo̤ ta ma̤sikè pwa̤ǒpo̤ apo̤nu toǒ.

Ta̤htûhtò̌ana̤ hǐnu htodě anǒkònu Khwǐherǒ hǎhtò̌cû̌kè bǎ Yṳ̌daganu dě a hǎhtò̌cû̌ ǒkǔ Kèsarǐwî̤.

Khwǐherǒ sikè awi̤akè̌

20 Bǎnuakha Khwǐherǒ sò̌phlǒdû̌ mè̤mè̤̌ Tǔrǔwî̤phû̌ toǒ ta Sidowî̤phû̌ toǒ. Hǐnu akhû̌akhî, ma̤pûhǐ asî cû̌kè̌shǐ hî̌bǎnṳ ta Khwǐherǒ htǒonudě asî wî̤phû̌ toǒ cû̌htunû̌û dě Khwǐherǒ a ǒ. Awǐgutṳ̌ mî̌ asî cû̌hî̌bǎphlowǐ ta Balǎsatǔ dě a glè ma̤jè asî aya, ma̤tè̤hî̌dě a mî̌ a htû pwa̤yṳ̂klè̌nè̌klòjè Khwǐ dě Khwǐ yṳǎ nû̌û tapwa̤. Nǒkònu asî cû̌kwi ta̤pè̤ta̤dû dě Khwǐ a ǒ, ma̤tè̤hî̌dě Khwǐ htǒotapwa̤ ashiaganu, a ma̤jè bǎ asî shiphû̌gaphû̌ ta shǎǎshǎo toǒ.

21 Ti̤ni̤kha bǎ kòyò wû̌lǎ khǒtû̌ Khwǐherǒ akhanu, akûsǒhtò̌nṳ Khwǐhǐdohǐyò̤ dě a hǎnòò̌ Khwǐ a gògohtahtò̌yî̤khû̌ dě a hî̌bǎlò̤ kòyò saprṳ̂ toǒ. 22 Dě asî yi̤kǒhtò̌, “Khwǐ htě a hî̌bǎ htǒotapwa̤ mî̌ kòyòhǎkhû̌phû̌ mè̤tò̤. A mî̌ Cǒmara tapwa̤ pwǎ hǒ.” 23 Taplǎpa, Běcǎ a mǒkhû̌tanaphû̌ tapwa̤ ma̤shǐma̤sha Khwǐherǒ, ma̤tè̤hî̌dě a to htû̌sò̌ǐ Cǒmara hǐnudě a cû̌ nohtû̌sò̌ǐ ana̤ ta kòyòhǎkhû̌phû̌. Dě ye̤ ěsikè nû̌û.

24 Pwǎ̤tadě Cǒmara ale̤ayo̤nu, a lṳpîshîcû̌ yî̤ hèpo̤ alo̤mo̤ dě sǔ kò yṳǎna̤ǎ htò̌dû̌.

25 Dě Banabǎ ta Saulǔ ma̤hto ata̤ma̤ bǎ Ye̤rǔshèlèwî̤kûnu dě a kaǎnṳ Jowǎ̤ni̤ htě kò kaǎpo̤ nû̌ûmi̤ ta Mǎ̤riko htǒotapwa̤nu dě a hǎhtò̌gekè.