Acts 17

Dě Tè̌shalò̌niawî̤kû

1Asî cû̌tûlû̌kè Aphǐpò̌lǐwî̤ ta Apò̌lò̌nǐawî̤ dě a cû̌to̤ lǒkho Tè̌shalò̌niawî̤. Bǎ wî̤nu tî̤wî̤ akûnu, Yṳ̌daphû̌ ta̤sabahǐ ǒ tama. 2Pwǐ Pò̌lu la̤klo ma̤nu, a cû̌nṳ dě ta̤sabahǐkû. Yṳ̌daphû̌ a mṳni̤dǔ sushodèbònu a cû̌ dǒhtû̌ǐ htè̌kè̌khî ta kòyò saprṳ̂ bǎnu toǒ dě a yṳ̂lṳ bǎ kò ta lî̤cahtǐ awi̤akè̌. 3Dě a pwe̤ǐ asî ta kò khwè̌nǎ lî̤cahtǐ awi̤akè̌nu toǒ dě a yṳ̂lṳphlo bǎ kò ta Khrî̌stu awi̤akè̌. Dě a hî̌, Khrî̌stu htě Cǒmara wû̌lǎ yǎta pwa̤ma̤lû̌htò̌ge kò htǒotapwa̤ numî̌ kò ma̤jîma̤jûhto nû̌û pědě a htûpwa̤gesǒ ta ta̤si pě a pwe̤ǐphlo bǎ kò hǐnu. Dě a hî̌, “Ye̤shǔ htě he pwe̤ǐlṳ bǎ sî khònò̤htǒo tapwa̤ numî̌ mî̌pwǎ Khrî̌stu htě Cǒmara wû̌lǎ nû̌û dě a glè ma̤lû̌htò̌ge kò htǒonu tapwa̤ hǒ.” 4Dě Yṳ̌daphû̌ akla toǒǒnu, a yṳǎ Pò̌lu a ta̤hî̌bǎ dě a cû̌nṳbǒsû̌ kû̌ta Pò̌lu ta Tilǎ. Greekphû̌ htě a bè̌dubè̌na̤ Cǒmara toǒnu a yṳǎna̤ǎplṳ̂ kû̌ asî htǒosò̌gini̤, htohǒtò̤ mamǔ htě a mi̤dû̌sǎhtû toǒnu, asò̌phlǒ ǒkû̌ asî htǒosò̌gini̤ dě a yṳǎna̤ǎ ginṳplṳ̂ kû̌ asî.

5Pwǎ̤ta Yṳ̌daphû̌ toǒ sò̌khěkhû̌khwè asî dě a cû̌kaǎplǒ kòyòjono̤ kòyòphû̌mò̤ htě a cû̌ klǎkû htǒotoǒ dě a noma̤ shû̌shishû̌shǎbò kò tî̤wî̤bò. Ma̤pûhǐ asî pṳ̂cǐjûgrû htò̌nṳ Pò̌lu ta Tilǎ dě kòyò saprṳ̂ htǒotoǒ a lo̤mo̤nu, Yṳ̌daphû̌ htǒotoǒ ta kòyò saprṳ̂ htǒotoǒ cû̌ ma̤pò̌nṳ Ya̤so ahǐ dě nṳkè̌lǎ Pò̌lu ta Tilǎ. 6Pwǎ̤tadě asî kè̌shǐ Pò̌lu ta Tilǎ tò̤ akhû̌akhî, a cǐhǎhtò̌ Ya̤so ta apṳwè̤ Khrî̌stuphû̌ ahǔwa̤ toǒ dě a kaǎcû̌ asî bǎ kòyò htû wî̤hǐkǒlǒkòdû̌ toǒ a lo̤mo̤ dě a yi̤kǒhtò̌ lǒkho, “Kòyò htǒotoǒ mî̌, pwa̤ma̤ shû̌shishû̌shǎ ta̤ gûla̤ pṳ̂̌꤮ tò̤glò. Dě khònò̤htǒo asî hèto̤ pa wî̤kû hǒ. 7Pwa̤ dǒshuǐ asî dě ahǐkû mî̌ Ya̤so hǒ. Asî hî̌ lǒkho ta Khwǐdû̌ ǒ ahǔwa̤ tapwa̤, dě ami̤ ta Ye̤shǔ akhû̌akhî, asî hî̌bǎ tûlû̌talǎ Khwǐdû̌kèsa a ta̤sû̌ta̤tòwò toǒ hǒ.” 8Dě asî hî̌bǎ lǒkho pwǐhè̌o akhû̌akhî, a ma̤pwi̤la̤sò̌go shû̌shishû̌shǎ htò̌bò kòyò saprṳ̂ ta kòyò htě a htû wî̤hǐkǒlǒkòdû̌ toǒ. 9Ma̤pûhǐ Ya̤so ta apṳwè̤ Khrî̌stuphû̌ ahǔwa̤ toǒ lû̌htò̌ ayanu, wî̤hǐkǒlǒkòdû̌ toǒ kwi Ya̤so ta akho htǒotoǒ wû, htodě a plûhǎhtò̌cû̌kè nǒpwǎ asî.

Dě Berǐwî̤kû

10Lṳmṳkhǐ akhanu, pwa̤yṳǎphû̌ toǒ sûcû̌kè Pò̌lu ta Tilǎ dě Berǐwî̤. Bǎ a cû̌to̤ wî̤kû akhanu, a cû̌nṳ nò̤totǐ Yṳ̌daphû̌ a ta̤sabahǐ akû. 11Yṳ̌daphû̌ ǒ bǎ Berǐwî̤ toǒnu a sò̌phlǒhtû kè̌shǐyî̤khlo ta Tè̌shalò̌niawî̤phû̌ sîtoǒ. Asî gana̤de sapwa̤sali̤ mè̤mè̤̌ ta̤wi̤ta̤kè̌ ta ta̤sò̌phlǒsho akû. Htodě ma̤pûhǐ asî sî̌ya te̤mǎ ta Pò̌lu a ta̤hî̌bǎ htǒonumî̌, amè̤ ya mî̌ mè̤tò̤ yanu a kè̌lǎsî̌ya lǒkho lî̤cahtǐ pṳ̂̌ni̤ pṳ̂̌sa. 12Asî yṳǎna̤ǎ plṳ̂, htodě Greek khlilèphû̌ mamǔ htě a mi̤dû̌sǎhtû toǒ ta Greekphû̌ makhû toǒ yṳǎna̤ǎ kû̌ plṳ̂.

13Dě bǎ Yṳ̌daphû̌ htě Tè̌shalò̌niawî̤ toǒ gana̤de ta Pò̌lu dǒhtû̌ǐpo̤ bǎ kò ta Cǒmara ale̤ayo̤ dě Berǐwî̤kû akhanu, asî hètûsû kòyò saprṳ̂ htǒotoǒ dě a noma̤shû̌shishû̌shǎ kò. 14Pwa̤yṳǎphû̌ toǒ taplǎpa sûcû̌kè Pò̌lu dě shidû̌shite̤we̤htu, pò̤̌ta Tilǎ ta Timò̤̌te sò̌gini̤bò ǒkèpepwǎ bǎ Berǐwî̤kûnu. 15Pwa̤ htě a sûcû̌ Pò̌lu toǒnu, a gû dò̌cû̌kû̌dǒ nû̌û sǒkhlidû̌ dě Atîwî̤. Dě bǎ asî getîkhîsǒ Berǐwî̤ akhanu, Pò̌lu mǎcû̌nṳ asî ta̤hî̌bǎ ta a glè gepwe̤ǐ bǎ nû̌û Tilǎ ta Timò̤̌te hèphwèkû̌ nû̌ûǒ.

Dě Atîwî̤kû

16Bǎ Pò̌lu ǒpo̤ Tilǎ ta Timò̤̌te bǎ Atîwî̤ akhanu, a kè̌shǐ pwa̤yo̤ toǒ ǒplṳ̂ mè̤mè̤̌ bǎ wî̤kûnu akhû̌akhî, a sò̌phlǒpî̌ mè̤mè̤̌. 17Hǐnu akhû̌akhî, a dǒhtû̌ htè̌kè̌khî ta Yṳ̌daphû̌ ta Greek khlilèphû̌ htě a bè̌dubè̌na̤ Cǒmara toǒ bǎ ta̤sabahǐ akûnu, htohǒtò̤ a dǒhtû̌ htè̌kè̌khî kû̌po̤ ta kòyò htě a ǒ lǒkho klǎkûnu toǒ hǐnu pṳ̂̌ni̤ni̤. 18Sara htě kò kaǎ yǎta, Epikǔrǔphû̌ ta Satò̌iphû̌ toǒ dǒhtû̌ htè̌kè̌khî lǒkho ta Pò̌lu. Asî akla toǒǒnu, a hî̌ lǒkho Pò̌lu, “Kòyò ta̤sî̌ya ǒkû̌kò dǐcǎ꤮ tò̤ dě a cû̌jîma̤ ana̤ pwǐ pwa̤sî̌pwa̤jò htǒotapwa̤ a cû̌ hî̌kwè̌꤮ hî̌tètè?” Toǒǒ dě a hî̌lè̌, “A sǒsǒta a dǒhtû̌ǐ shigahǔwa̤gakhlo a Cǒmara toǒ awi̤akè̌,” a hî̌ hǐnu. Asî cû̌hî̌tǒ̤ lǒkho pwǐhè̌o ma̤tè̤hî̌dě a tobǎ Pò̌lu dǒhtû̌ǐ bǎ kò ta Ye̤shǔ awi̤akè̌ ta ata̤si htûpwa̤ge awi̤akè̌ akhanu akhû̌akhî, a hî̌ lǒkho hǐnu. 19Htodě asî kaǎcû̌ Pò̌lu dě kòyò htû hǐkǒdû̌ toǒ a ǒ dě asî cû̌ ǒhtuhî̌bǎplǒ nû̌û bǎ Areopakǔ kholokhû̌nu, dě asî gwè Pò̌lu, “Pa sò̌yṳ sî̌yakû̌ na ta̤sû̌ǐtòwòǐ asa htǒotacǎ awi̤akè̌. 20Ta̤wi̤ta̤kè̌ htě na dǒhtû̌ǐ htǒonu, akhǒ mè̤mè̤̌ paya dě amûasǎ hè hî̌tènu pa sò̌yṳ sî̌yakû̌,” a hî̌ nû̌û hǐnu. 21(Ma̤tè̤hî̌dě, Atîphû̌ ta shigahǔwa̤khlophû̌ htě a ǒ lǒkho bǎnu pṳ̂̌꤮ pwa̤nu, ta̤wi̤ta̤kè̌ dè ǒlṳhtò̌sa khǒ tacǎcǎ hǒ hǐnumî̌, a sò̌yṳ dǒhtû̌ lǒkho, a sò̌yṳ gana̤de dě a ma̤bòkè akhîakha ta ta̤htǒotoǒ awi̤akè̌ pwǎ.)

22Pò̌lu ihtǒ dě kòyò htû hǐkǒdû̌ toǒ la̤ǒhtuhî̌bǎplǒ nû̌û bǎ Areopakǔ kholo alo̤mo̤ htǒonu dě a hî̌, “Atîwî̤phû̌ lǒ̤bò sî꤮, bǎtè tacǎbǎbǎ, he kè̌shǐ ta sî bè̌dubè̌na̤ mè̤mè̤̌ Cǒmara lè꤮. 23Ma̤tè̤hî̌dě, bǎ he cû̌shido dě sî wî̤kû akha he kè̌ sî ta̤subusaba agûla̤ toǒ akhanu, he kè̌shǐ ta̤lṳhtò̌ gûla̤ tò̤glò dě kò khwè̌ yǎta, ‘Cǒmara htě kò sî̌ya yǎtò̤ tapwa̤ aya’ hǐnu. Hǐnu akhû̌akhî, Cǒmara htě sî sî̌ya nû̌ûtò̤ dě sî subusabahtò̌ ǐyǎ htǒotapwa̤nu, he dǒhtû̌ǐ bǎ sî ta a awi̤akè̌ khònò̤.

24“Cǒmara htě a bǒlò̤ lṳmṳ, shǎ, la, hǎkhû̌ ta ta̤pṳ̂̌꤮ tacǎ htǒotapwa̤ numî̌ mǒkhû̌ ta hǎkhû̌ a Běcǎ hǒ. Dě ta̤lṳhtò̌ho htě kòyò ma̤ yǎta acǔde toǒnu, Cǒmara ǒ bǎnu toǒ akû tò̤. ^a 25Hǐnu akhû̌akhî, kòyòhǎkhû̌phû̌ ma̤shû̌ma̤jo Cǒmara ayanu a lo̤bǎ nǒ dǐcǎ꤮ tò̤, ma̤tè̤hî̌dě, asana̤ tû̌ htǒonu, a ǐ kò pṳ̂̌꤮ tapwa̤ ta̤htûpwa̤ ta ta̤sǎnṳsǎhtò̌ ta ta̤ ahǔwa̤ pṳ̂̌꤮ tacǎ. 26Cǒmara bǒlò̤ pwǎ kòyò tapwǎ̤꤮ pa dě a nohtûhtò̌ kòyòhǎkhû̌phû̌ pṳ̂̌mṳpṳ̂̌cǎ dě a noǒbò kò bǎ hǎkhû̌tebě akû. Asana̤ ma̤wǒnǎ te̤mǎ tû̌ akhîakha ta ta̤gûla̤gûbò̌ htě kòyòhǎkhû̌phû̌ ǒ aya. 27Ma̤pûhǐ kòyòhǎkhû̌phû̌ kè̌lǎ nû̌û pě kǎlè̌mî̌ a kè̌shǐ nû̌û pě kǎlè a gènè̤ dě a bǒlò̤ asî. Dè hî̌mè̤mè̤̌mî̌ Cǒmara ǒphǔpwǎ ta pa pwǎ. 28Pwǐ kòyò tapwa̤ hî̌hto ta, ‘Cǒmara akhû̌akhî, pa ǒhtûpwa̤bò̌, dě pa cû̌bò̌khabò̌,’ a hî̌ hǐnu. Pwǐ sî pwa̤khwè̌lî̤sò̌po̤ toǒ hî̌nu, ‘Pa mî̌ aphû̌ali̤ toǒ,’ a khwè̌ hǐnu.

29“Pwǐ pa htû Cǒmara aphû̌ali̤ toǒnu, Cǒmara mî̌ alò̤ta wû, hta, mè̤tò̤mî̌ lo̤ toǒ pa to gènè̤ hǐnutò̤, Cǒmara mî̌ pwa̤ma̤jò bǒjòhǐ toǒ, pwa̤ htû cǔdesî̌jò toǒ bǒ htûhtò̌jò a pwǐ pwa̤yo̤nu toǒ mè̤tò̤. 30Bǎ kò sî̌ya Cǒmara hǒtò̤ akhanu, a kè̌bò̌khû̌kè kòyòhǎkhû̌phû̌ ata̤sǔ hǐnu tacǎ pwǎ. Pwǎ̤tadě khònò̤htǒonu, a hî̌lò̤ ayo̤ ta kòyò pṳ̂̌꤮ tapwa̤ htě a ǒ gûla̤ bǎtè tò̤glòbǎbǎ, a tobǎ yò̤lò̤ge lǒkho asò̌phlǒ dě a tobǎ htû̌tiwǐ getosǒ Cǒmara a ǒ pṳ̂̌꤮ tapwa̤ a hî̌hto hǐnu hǒ. 31Ma̤tè̤hî̌dě, a bè̌měbè̌glehto mṳni̤mṳsa dě a cèrò cǒtè̤bò hǎkhû̌tebě pě. Cǒmara wû̌lǎhto pwa̤cèròta̤ tapwa̤ hǒ. Dě a dǔlṳhto bǎ kòpṳ̂̌꤮ tapwa̤ ta a ta̤khòlṳ hǒ. Dě a ta̤khòlṳhtǒo awi̤akè̌ mî̌ a ma̤htûpwa̤gesǒ kòyònu tapwa̤ ta ta̤si htǒonu hǒ.”

32Bǎ asî gana̤de Pò̌lu dǒhtû̌ǐ bǎ asî ta ta̤si htûpwa̤ge awi̤akè̌htǒo akhanu, toǒǒ dě a luya̤ nû̌û, toǒǒ dě a hî̌lè̌, “Pa sò̌yṳ gana̤de gepo̤sǒ na hî̌ bǎ pa ta̤wi̤ta̤kè̌ htǒonu.” 33Htǒotaplǎdě Pò̌lu hǎhtò̌cû̌ tephekè. 34Kòyò toǒǒnu a sò̌phlǒǒ nû̌û ta a bǒsû̌ nû̌û dě a yṳǎna̤ǎdǒ nû̌û. Pwa̤ htě a yṳǎna̤ǎta̤ toǒ aklanu, ami̤ mî̌ Dionǔsia ǒtapwa̤. A mî̌ kòyò tapwa̤ htě a ǒkû̌dǒ ta Areopakǔ kòyò htû hǐkǒdû̌ aprṳ̂aho toǒ akla tapwa̤. Htodě mamǔ htě ami̤ mî̌ Damarǐ ta kòyò ahǔwa̤ toǒ yṳǎna̤ǎgedǒ nû̌û.