Acts 23

1Pò̌lu kè̌cû̌to Yṳ̌daphû̌ htě a htûdû̌htûpwa̤ htǒotoǒ dě a hî̌ asî, “He pṳwè̤ toǒ, dě he sò̌phlǒkûnu a dǔlṳ he ta he ta̤ǒhtûpwa̤ dě Cǒmara a lo̤mo̤htǒo, tǒ̤khònò̤nu, amṳ̂aplî lǒbebò pwǎ.” 2Pwa̤tòlûhtò̌ hǐkǒdû̌gutṳ̌ Ana̤nǐ nopla̤ Pò̌lu khû̌phě ta kòyò htě a ihtǒ ǒphǔ nû̌ûnu toǒ. 3Htodě Pò̌lu hî̌shǔ yǎ, “Kǒ꤮ dǒdǎ htě kò plṳbû yǎ, Cǒmara pla̤ na pě! Na hǎnòò̌ bǎnu ta na glè cèrò he pwǐ ta̤sû̌ta̤tòwò aklè̌ hènu pò̤̌ta na nopla̤ kò ta he khû̌phě akhû̌akhî, na tûlû̌kè ta̤sû̌ta̤tòwò hǒ.” ^a

4Kòyò htě a ǒphǔ ta Pò̌lu toǒ hî̌shǔ nû̌û, “Kǒ꤮ na cû̌ hî̌bǎ phû̌mò̤shî̌hto bǔtǒ̤ Cǒmara a pwa̤tòlûhtò̌ hǐkǒdû̌gutṳ̌ htǒotapwa̤pwa̤!”

5Dě Pò̌lu hî̌shǔ, “He pṳwè̤ toǒ꤮, he sî̌ya ta a mî̌ a htû pwa̤tòlûhtò̌ hǐkǒdû̌gutṳ̌nu mè̤tò̤. Lî̤cahtǐ hî̌nǎ, ‘Kòyò htû hǐkǒdû̌ htě a pǒǐ na kòyò toǒ htǒotapwa̤nu, na tobǎ hî̌ phû̌mò̤shî̌hto yǎtò̤,’” a hî̌ hǐnu. ^b

6Bǎ Pò̌lu kè̌shǐ ta kòyò ǒbǎnu toǒ mî̌ toǒǒ dě Sadugè̌phû̌, toǒǒ dě Pharisè̌phû̌ akhû̌akhî, a yi̤kǒhtò̌lṳ bǎ Yṳ̌daphû̌ htě a htû hǐkǒdû̌ toǒ, “He pṳwè̤ toǒ꤮, he mî̌ Pharisè̌phû̌ tapwa̤. He mî̌ Pharisè̌phû̌ toǒ a phû̌makhû mî̌ amè̤mè̤. He kè̌shuǐ ta kòyò htě a si toǒnu, a glè htûpwa̤gesǒ pě akhû̌akhî, sî sèlè he.” ^c 7Dě a hî̌lṳhtò̌ ta̤ htǒo akhû̌akhî, Pharisè̌phû̌ ta Sadugè̌phû̌ toǒ gègo kè̌khînû̌û dě asî htò̌pò̌kè nû̌û ginǐ̤prṳ̂. 8(Ma̤tè̤hî̌dě Sadugè̌phû̌ toǒnu, a hî̌ lǒkho, kòyò sihto toǒnu, a htûpwa̤gepe tò̤. Htohǒtò̤ mǒkhû̌tanaphû̌ bǎbǎ, yola bǎbǎ, a ǒ dǐcǎ꤮ tò̤. Pwǎ̤tadě Pharisè̌phû̌ toǒ lè̌dě, a yṳǎbò lè̌ta a ǒbò sucǎ.) ^d

9Htǒotaplǎdě kò tǐ̤꤮ yi̤kǒhtò̌ shû̌shû̌ asî klanu pwa̤sû̌ǐ ta̤sû̌ta̤tòwò asara ǒ toǒ, asî ta Pharisè̌phû̌ mî̌ tûprṳ̂pa pwǎ, dě asîkla toǒǒnu, a ihtǒ dě a htè̌ kè̌khîshǔ, “Pa kè̌shǐ kòyò htǒotapwa̤ a ta̤ma̤sǔ dǐcǎ꤮ tò̤. Kǎlè̌mî̌ yolahtûpwa̤ mè̤tò̤mî̌ mǒkhû̌tanaphû̌ nohî̌bǎ pwǎ yǎ kǎlè.” 10Ta̤to̤klî̌ htǒo a shû̌htò̌ to̤ dě, klitîrî̌ ahǐkǒdû̌ htǒotapwa̤ bǎgu ta ǐsha kò pe̤tṳpe̤glò Pò̌lu akhû̌akhî, a nokaǎhǎhtò̌kè Pò̌lu ta akliphû̌ toǒ dě asî kla, dě a sûcû̌kè nû̌û dě kliphû̌ toǒ la̤ǒ hǐnu toǒ akû.

11Bǎnu tasa, Běcǎ hè ihtǒ ǒ dě Pò̌lu kòshî̌ dě a hî̌ nû̌û, “Bè̌shû̌bè̌sho na sò̌phlǒ nî̌꤮. Pwǐ na khòhto nasò̌ ta hewi̤hekè̌ bǎ Ye̤rǔshèlèwî̤kû htǒonu, na glè khòlṳpo̤ ta̤wi̤ta̤kè̌ htǒonu dě Rò̌mǎwî̤kûnu pě.”

Kòyò shokhû̌ye̤yo̤ Pò̌lu

12Htû̌pe̤wo̤ lṳmṳlî akhanu, Yṳ̌daphû̌ toǒ hèǒhtuhî̌bǎplǒ nû̌û dě asî hî̌bǎhǔ nû̌û yo̤ dě a bèkè̌khînû̌û ta, “Pa dè ma̤sinṳ Pò̌lu hǒtò̤nu, paǎpao dǐcǎ꤮ tò̤.” 13Kòyò htě a gwèhǔ nû̌û yo̤ htǒotoǒnu, a ǒ kòyò li̤shi lǒ̤. 14Htodě asî cû̌ dě pwa̤tòlûhtò̌ hǐkǒdû̌ toǒ ta Yṳ̌daphû̌ wè̤khǔwè̤pwa̤ htě a htû hǐkǒdû̌ toǒ a ǒ dě a hî̌, “Pa bèsihto pana̤ ta pa dè ma̤sinṳ Pò̌lu tò̤ hî̌dě paǎpao dǐcǎ꤮ tò̤. 15Hǐnu akhû̌akhî, sî ta Yṳ̌daphû̌ htě a htû hǐkǒdû̌ toǒ khwè̌cû̌ lî̤ tabǎ dě Rò̌mǎ klitîrî̌ ahǐkǒdû̌nu tapwa̤ a ǒ dě hî̌ nû̌û, nosûgesǒ Pò̌lu dě sî ǒnu. Dě jîma̤ lǒkho pwǐ sî sò̌yṳ sî̌ya te̤mǎ htò̌dû̌po̤ ta̤wi̤ta̤kè̌ htǒonu. Dě bǎ kò sûgesǒ yǎ dě klè̌lo̤ akha pěnu, pa ma̤wǒnǎ pana̤ pě dě pa ma̤sishǔ yǎ pě.”

16Pwǎ̤tadě Pò̌lu apṳwè̤ mamǔ a phû̌makhû gana̤de ta kò glè̌ guma̤si Pò̌lu ayo̤ dě, a cû̌nṳ kliphû̌ toǒ la̤ǒhǐhtǒo akû dě a cû̌nṳ pwe̤ǐlṳ Pò̌lu ta ta̤wi̤ta̤kè̌ htǒotacǎ.

17Htǒotaplǎdě Pò̌lu kaǎ klita̤ya̤ a hǐkǒdû̌ toǒ akla tapwa̤ dě a hî̌ nû̌û, “Sûcû̌ phijaû̌ makhûphû̌ htǒotapwa̤ dě klitîrî̌ hǐkǒdû̌nu tapwa̤ a ǒnu. Ta̤wi̤ta̤kè̌ htě a sò̌yṳ pwe̤ǐlṳ bǎ nû̌ûnu, a ǒ tacǎ.” 18Dě klita̤ya̤ hǐkǒdû̌ tapwa̤ sûcû̌ nû̌û dě klitîrî̌ hǐkǒdû̌nu tapwa̤ a ǒ dě a hî̌ nû̌û, “Pò̌lu htě kò dǒnṳ yǎ dě apo̤kûnu tapwa̤ kaǎ he dě a nosûcû̌ he ta phijaû̌ makhûphû̌ htǒotapwa̤ dě naǒ. A sò̌yṳ hî̌bǎ nanu, a ǒ tacǎ, a hî̌ hǐnu.”

19Klitîrî̌ hǐkǒdû̌ cǐnṳ nû̌ûcǔde dě a kaǎcû̌ nû̌û bǎ gûla̤ tûdû tò̤glò dě a gwèhǔ nû̌û, “Ta̤wi̤ta̤kè̌ htě na sò̌yṳ hî̌ henu mî̌ titè?”

20Dě a pwe̤ǐ nû̌û, “Yṳ̌daphû̌ toǒ sò̌phlǒto plǒbò nû̌û ta htû̌pe̤wo̤ pěnu, asî glè jîma̤ ana̤ pwǐ Yṳ̌da kòyò htûdû̌htûpwa̤ toǒ sò̌yṳ sî̌ya te̤mǎ Pò̌lu awi̤akè̌ pě dě a nosûhè na ta Pò̌lu htǒo dě Yṳ̌da kòyò htûdû̌htûpwa̤nu toǒ a ǒ pě. 21Pwǎ̤tadě cû̌gana̤de pûma̤ asîyo̤ ma̤ nî̌꤮, ma̤tè̤hî̌dě kòyò glè̌ ǒpo̤ ma̤sihǔ yǎnu a ǒ kòyò li̤shilǒ. Asî bèhto nû̌ûyo̤ tapwa̤ ta tapwa̤ ta, asî dè ma̤sinṳ Pò̌lu hǒtò̤ hǐnu, asî ǎo ta̤ dǐcǎ꤮ tò̤, a hî̌ lǒkho hǐnu. Khònò̤htǒo asî ma̤wǒnǎbò ana̤ ta a glè ma̤ lǒkho pwǐhè̌o akhû̌akhî, asî ǒpo̤ gana̤de pwǎ na ta̤hî̌ geshǔ hî̌tènu pwǎ.”

22Klitîrî̌ ahǐkǒdû̌ htǒotapwa̤ hî̌ nû̌û, “Na pwe̤ǐlṳ bǎ he ta̤wi̤ta̤kè̌ htǒotacǎnu, cû̌pwe̤ǐ pûma̤ kò dǐpwǎ̤꤮ ma̤ nî̌꤮.” A hî̌hto hǐnu dě a plûgekè makhûphû̌ htǒotapwa̤.

Kò sûhtò̌ Pò̌lu dě Khwǐdû̌ Phelî̌ a ǒ

23Hǐnu htodě, klitîrî̌ hǐkǒdû̌ kaǎhè klita̤ya̤ hǐkǒdû̌ sò̌gini̤ dě a hî̌ asî, “Noma̤wǒnǎ kliphû̌ ginǐ̤ya̤, dě nocû̌kû̌dǒ yǎta pwa̤dò̌ tîsî̌ apwa̤ susǒtishi, ta pwa̤pṳ̂ sòbò apwa̤ ginǐ̤ya̤nu, dě khò̌ta̤na̤ bǎ lǐ̤sǒta̤na̤rî bǎ pě akhanu, nohǎhtò̌cû̌ asî dě Kèsarǐwî̤ pě nî̌꤮. 24Ma̤wǒnǎ bǎ Pò̌lu aya ta tîsî̌toǒ pě nî̌꤮, dě sûcû̌to̤ mo̤akwǐ yǎ dě Khwǐdû̌ Phelî̌ ǒ pě nî̌꤮, dě sûlû̌htò̌ cû̌wǒkè yǎ ta pwa̤ htě a sò̌khusò̌ha nû̌ûnu toǒ a cǔdekû nî̌꤮.”

25A hî̌ hǐnu htodě, klitîrî̌ hǐkǒdû̌ htǒotapwa̤ khwè̌nṳ lî̤ tabǎ dě a hî̌ pwǐ ala̤ htǒonu ta,
26Pwa̤khwè̌lî̤htǒo mî̌ he htě ami̤ ta Klò̌dǐlṳsǐ. He khwè̌cû̌ bǎ na ta a mî̌ Běcǎ Khwǐdû̌ Phelî̌. Na ǒmo̤ǒwǒ tû̌ pû nî̌꤮.
27Yṳ̌daphû̌ toǒ pṳ̂měǐ kòyò htǒotapwa̤ dě a glè̌ ma̤si nû̌û pě. Kò ǐsî̌ya he ta a mî̌ Rò̌mǎ shiphû̌gaphû̌ tapwa̤ akhû̌akhî, he kaǎ he kliphû̌ toǒ dě he cû̌ ma̤lû̌htò̌gekè yǎ. 28Asî cû̌bè̌ nû̌û ta̤sǔ ta ta̤wi̤ta̤kè̌ hî̌tènu, he sò̌yṳ sî̌ya akhû̌akhî, he sûcû̌ yǎ dě asî Yṳ̌daphû̌ htě a htû hǐkǒdû̌nu toǒ a ǒ. 29Ata̤sǔ htě a to̤ ta a tobǎ sinu bǎbǎ, kò tobǎ dǒnṳ yǎ dě apo̤kûnu bǎbǎ, he kè̌shǐ a ǒ dǐcǎ꤮ tò̤. Kò bè̌htò̌ ta̤sǔ dě alo̤ khònò̤htǒo numî̌, mî̌pwǎ asî ata̤sû̌ta̤tòwò tû̌nu toǒ pwǎ. 30Bǎ kò ǐsî̌ya he ta Yṳ̌daphû̌ toǒ cû̌ǒhtuhî̌bǎplǒ nû̌û dě asî hî̌bǎhǔ kè̌khînû̌û ta asî glè̌ shokhû̌ye̤yo̤ Pò̌lunu, he bè̌lò̤ he sò̌phlǒ ta he glè nosûcû̌phwèkè yǎ dě naǒ taplǎpa. Dě he hî̌ kòyò htě a bè̌ nû̌û ta̤sǔ htǒonu toǒ ta a hèbè̌htò̌lṳ Pò̌lu ata̤sǔ awi̤akè̌ dě na lo̤mo̤ pě.

31Dě kliphû̌ toǒ ma̤pwǐ kò noasînu. Dě asî kaǎ Pò̌lu dě a sûcû̌ to̤ nû̌û dě Atipatarǐwî̤ bǎnu tasa. 32Děnǒkò ti̤ni̤nu, kliphû̌ htě a cû̌ ta akhò̌lopo̤ toǒnu a getîkhîsǒ dě kliphû̌ toǒ la̤ǒ agûla̤. Ma̤pûhǐ pwa̤dò̌ tîsî̌ toǒ cû̌sělěpo̤ kû̌ta Pò̌lu dě lo̤mo̤ tokho ayanu, a noǒkèkè pwa̤dò̌ tîsî̌ toǒ bǎnu. 33Asî cû̌to̤ dě Kèsarǐwî̤, a cû̌ǐ lî̤nu tabǎ dě Khwǐdû̌ acǔdekû dě asî sûhtò̌kè Pò̌lu dě Khwǐdû̌ htǒotapwa̤ a ǒ. 34Khwǐdû̌ dǒkè̌hto lî̤htǒo dě a gwè Pò̌lu ta a ǒ dě gabǎtè taga hètè, dě bǎ a sî̌ya ta Pò̌lu ǒ dě Kǐlǐkǐaga hè akhanu, 35A hî̌ nû̌û, “Htû̌꤮ kòyò htě a bè̌ na ta̤sǔnu toǒ dè hèto̤ pě dě he gana̤de kè̌kè̌ na ta̤hî̌bǎ pě.” Htodě, a hî̌lò̤ ayo̤ dě kliphû̌ toǒ alo̤ ta cû̌bè̌ Pò̌lu dě Khwǐherǒ ma̤htò̌ ahonu tama akûnu, dě ǒpo̤ǐ yǎ nî̌꤮.