Act 28 | KxfSCKRC | STEP | Bǎ pa htò̌to̤wǒ htodě khosûkhû̌ akhanu, kò pwe̤ǐlṳ bǎ pa ta shikholophû̌jonu tòphò̌kho mî̌ kò kaǎ yǎta Mè̌lata shikholophû̌jo.

Acts 28

Cû̌to̤ dě Mè̌lata shikholophû̌jo

1 Bǎ pa htò̌to̤wǒ htodě khosûkhû̌ akhanu, kò pwe̤ǐlṳ bǎ pa ta shikholophû̌jonu tòphò̌kho mî̌ kò kaǎ yǎta Mè̌lata shikholophû̌jo. 2 Kòyò ǒ bǎ shikholophû̌jolo̤ toǒnu, a ma̤wǒ mè̤mè̤̌ pa. Khwè̌ju hè dě gawo̤ pa akhû̌akhî, asî ǔgèmî̌ dě a kaǎushǔ lǒkho pa mî̌. 3 Pò̌lu cû̌ ò̌ge kû̌ tòò̌ dě a ge shû̌nṳ nû̌û mî̌kla akhanu, mî̌ khǔgû wṳ̂sa tabo dě a hǎhtò̌ pè̌ Pò̌lu dě a pîkîmě nû̌û cǔdelo̤. 4 Kòyò shikholophû̌jo bǎnu toǒ kè̌shǐ wṳ̂ pîkîmě Pò̌lu cǔdelo̤ dě a hî̌ kè̌khînû̌û tapwa̤ ta tapwa̤ pwǐhè̌o, “Kòyò htǒotapwa̤mî̌ pwa̤ma̤si pwǎ kòyò. A lû̌htò̌ ta ta̤si dě shidû̌shite̤we̤kû hǐnudě Běcǎ htě kò kaǎ yǎta ta̤cǒta̤tè̤ htǒotapwa̤ bè̌ ǒhtûpwa̤pe nû̌û tò̤.” 5 Pwǎ̤tadě Pò̌lu tîhî̌ lò̤te̤nṳkè wṳ̂ mî̌kla, dě a ma̤ nû̌û dǐcǎ꤮ tò̤. 6 Asî ǒpo̤ kè̌ lǒkho ta Pò̌lu na̤ yǒhè lòtṳ̌ pě. Asî ǒpo̤ yî̤ hǐnudě a kè̌shǐ awè̤htò̌ nû̌û dǐcǎ꤮ tò̤ akhû̌akhî, asî gènè̤ kî̌yakè Pò̌lu ta a mî̌ Cǒmara aphû̌ tapwa̤pwa̤ hǒ.

7 Gûla̤ te̤we̤phǔ bǎnutò̤glò mî̌, shikholophû̌jo pûkǎ Pǔbalǐa ahǔkla ǒ ta̤la̤. Dě a dǒshuǐwǒ mè̤mè̤̌ pa, dě pa cû̌htû kû̌ yǎ shǐtè̤mè̤ suni̤susa. 8 Pǔbalǐa apha na̤gû dě a shaějogo nû̌ûphukû akhû̌akhî, a hǎmoǒ pwǎ la̤mi̤kû. Dě Pò̌lu nṳ a hǐdǒkû dě, a nṳ kwisaba bǎ nû̌û, dě a bè̌htò̌ acǔde alo̤ dě a ma̤bǎ bǎ nû̌û. 9 Hǐnu akhû̌akhî, kòyòshǐkòyòsha lǒ̤꤮ bò ǒ bǎ shikholophû̌jokhû̌nu toǒ hè ma̤bǎ kû̌ lǒkho ana̤ dě aǒ. 10 Asî ǐplṳ̂ǐphǎ pa sû toǒ, dě bǎ pa htò̌dò̌ sǒkhlidû̌ akhanu, asî bè̌cû̌nṳ bǎ pa la̤ǎla̤o klè̌lo̤ aya toǒ.

Pò̌lu ǒ Mè̌lata shikholophû̌jo dě hǎhtò̌cû̌ Rò̌mǎwî̤

11 Sulabehto anǒkònu, pa htò̌dò̌ Alexandriawî̤ a sǒkhlidû̌ tabǎ. Dě sǒkhlidû̌ ahǐkǒ lo̤mo̤nu Běcǎ ayo̤ ǒsègwè ginǐ̤pwa̤. Dě sǒkhlidû̌ htǒo a cû̌ ǒkǔ phlǔto̤ gawo̤kha bǎ shikholophû̌jonu tòphò̌kho alo̤. 12 Pa cû̌to̤ bǎ Surakǔwî̤ dě pa cû̌ǒ bǎnu suni̤. 13 Pa ǒ bǎnu dě pa hǎhtò̌cû̌po̤ Rěkiwî̤. Htodě anǒkò ti̤ni̤nu, gili̤sǎ dû̌hè cǔmû tokho dě ginǐ̤ni̤ti̤ni̤nu pa cû̌to̤ Pò̌tilǔwî̤. 14 Pa kè̌shǐshǔ ta pwa̤yṳǎphû̌ bǎnu toǒ, dě asî kaǎǒkû̌po̤ pa bǎnu susǒti̤ni̤. Pa ǒkèhto bǎnu dě pa hǎhtò̌cû̌kè Rò̌mǎwî̤. 15 Pa pṳwè̤ pwa̤yṳǎphû̌ htě a ǒ dě Rò̌mǎwî̤kû toǒnu, a gana̤de lǒkho pawi̤pakè̌ dě a hè kè̌shǐshǔto̤ pa Apǐawî̤ klǎkûnu toǒ, toǒdě a hè kè̌shǐshǔ pa dě shǐtè̤mè̤hǐnu suma akû. Bǎ Pò̌lu kè̌shǐ asî akhanu, a nî̤khû̌nî̤ǎ nû̌û dě a hî̌bwǐhî̌sîrî Cǒmara.

Dě Rò̌mǎwî̤kû

16 Bǎ pa cû̌to̤ dě Rò̌mǎwî̤kû akhanu, kò noǒǐtû̌ Pò̌lu htě kò cû̌khò̌ǒ bǎ nû̌û hǐtama dě kliphû̌ tapwa̤ ǒpo̤ǐ nû̌û.

17 Susabenu, Pò̌lu kaǎplǒ Yṳ̌daphû̌ htě a htû ahǐkǒdû̌ bǎ Rò̌mǎwî̤nu toǒ. Bǎ asî hèto̤bò akhanu, a hî̌ asî, “He pṳwè̤ toǒ꤮, ta̤ma̤ tukutakǎshǔ pa khlilèphû̌ toǒ bǎbǎ, mè̤tò̤mî̌ ta̤ htě a kî̌ya ta pa la̤bò̌la̤klo dě pa nî̤bǎ pa mo̤phaphiphu dě꤮ wǐnu toǒ a ǒnu bǎbǎ, he ma̤nǒ dǐcǎ꤮ tò̤. Pwǎ̤ta kò pṳ̂ he Ye̤rǔshèlèwî̤kû dě kò ǐlò̤kè he Rò̌mǎphû̌ toǒ a cǔdekû. 18 Asî gwèsèlèhto he dě anǒkònu, asî kè̌shǐ he ta̤sǔ htě ato ta bǎ ta̤cèrò sikènu a ǒ dǐcǎ꤮ tò̤ akhû̌akhî, asî sò̌yṳ plûkè he. 19 Pwǎ̤tadě bǎ Yṳ̌daphû̌ toǒ htè̌shǔ ta̤htǒo akhanu, he tobǎ nocèrò hena̤ ta Khwǐdû̌kèsa he gènè̤ hǐnu. He bè̌ ta̤sǔ dě he khlilèphû̌ alo̤nu a ǒ nǒ dǐcǎ꤮ tò̤. ^a 20 Ta̤wi̤ta̤kè̌ htǒo akhû̌akhî, he kwi asî dě a glè ǐkè̌shǐ hî̌bǎkû̌ ta̤ ta sî. Dèhî̌mè̤mè̤̌mî̌ sî mî̌ Yṳ̌daphû̌ htǒotoǒ a ta̤kè̌shuǐ akhû̌akhî, kò bǎ cokloměkè he ta sǒpli̤te̤htò̌ htǒo hǒ.”

21 Dě asî hî̌shǔ nû̌û, “Pa nî̤bǎnǒ ta lî̤ ǒ dě Yṳ̌daga hè dě a pwe̤ǐ bǎ pa ta nawi̤nakè̌nu a ǒ dǐbǎ꤮ tò̤. Pa pṳwè̤ Yṳ̌daphû̌ htě a hè bǎo toǒnu, a hî̌ bǎnǒ pa ta na ma̤sǔma̤plěta̤ awi̤akè̌ dǐpwǎ̤꤮ tò̤. 22 Pwǎ̤tadě pa sò̌yṳ gana̤dekû̌ na ta̤kè̌shǐ ta na ta̤gènè̤ toǒ pwǎ, ma̤tè̤hî̌dě, pa sî̌ya ta kòyò bǎtè꤮ tò̤glò bǎbǎ a hî̌ tukutakǎbò kòyò htǒotṳmṳ.”

23 Hǐnudě asî hî̌ nû̌û mṳni̤mṳsa htě a glè kè̌shǐ glashǔsǒ ta Pò̌lu dě bǎ asî hî̌ nû̌ûnu ti̤ni̤nu, Yṳ̌daphû̌ toǒ hè lǒkho bǎ Pò̌lu ǒǐ hǐnu tama akû, dě asî hèplṳ̂khlo ta dě awǐkhanu tuhu. Dě Pò̌lu bòhtò̌ dǒhtû̌ǐlṳ bǎ asî ta Cǒmara ashiaga awi̤akè̌ dě a khòlṳ asò̌htǒo lṳmṳlî to̤htû̌ lṳmṳkhǐ. Ma̤pûhǐ asî yṳǎ Ye̤shǔ awi̤akè̌ htǒoayanu, a jipwi̤ pwe̤ǐsî̌yaphlo bǎ asî ta Mǒ̤jè a ta̤sû̌ta̤tòwònu toǒ ta pwa̤po̤ hî̌nǎnu toǒ. 24 Toǒǒ dě a yṳǎ lǒkho ta Pò̌lu hî̌ htǒotoǒ numî̌ a mè̤mè̤̌, pwǎ̤tadě toǒǒnu a yṳǎ tò̤. 25 Bǎ asî sò̌phlǒ khlè̌khǒkènû̌û dě asî hǎhtò̌cû̌kè akhanu, Pò̌lu hî̌bǎ gutṳ̌lò̤ yo̤sǎ tûmû, “Běcǎ sǎcahtǐ hî̌bǎ tṳtṳ ta pwa̤po̤ Isaǐa dě a pwe̤ǐkè pa mo̤phaphiphu dě꤮ wǐnu toǒ numî̌ a totǐ. 26 Dě a hî̌,

‘Cû̌ dě kòyò htǒo tṳmṳtacǎ a ǒ dě hî̌ asî, “Sî gana̤dehto gana̤desǒ pwǎ̤ta sî sî̌yaphlo tò̤. Sî kè̌htohto kè̌sǒsǒ pwǎ̤tadě sî kè̌shǐ tò̤.” ^b 27 Ma̤tè̤hî̌dě kòyò htǒotṳmṳtacǎnu, a sò̌yṳ sî̌ya kû̌nǒ kò tò̤. Asî ma̤bǐ lǒkho a nò̌kulǎkû, htodě a ma̤bǐ lǒkho a mi̤sǎphlǒ. Dèmè̤tò̤mî̌, asî glè kè̌shǐ lǒkho pû ta a mi̤sǎphlǒ, dě asî gana̤dekû̌ lǒkho ta̤ ta nò̌kulǎ, asî gènè̤phlo hèkû̌ lǒkho dě a htû̌tiwǐ getosǒ lǒkho ana̤ dě he ǒ, dě he glè ma̤bǎge asî.’” ^c A hî̌ hǐnu.

28 Pò̌lu hî̌po̤, “Hǐnu akhû̌akhî, sî tobǎ sî̌ya lǒkho ta, Cǒmara a ta̤ma̤lû̌htò̌ge awi̤akè̌nu, kò sûcû̌ yǎ dě Yṳ̌daphû̌ mè̤tò̤ toǒ a ǒ hǒ, dě Yṳ̌daphû̌ mè̤tò̤ toǒ gana̤de nû̌û pě.” 29 (Pò̌lu hî̌hto ta̤ pwǐhè̌o dě, Yṳ̌daphû̌ toǒ hǎhtò̌cû̌kè dě asî cû̌ htè̌sihtè̌ǒ kè̌khînû̌û.) ^{▼▼Kò khwè̌ lî̤phě dě akòshî̌gutṳ̌ toǒ akûnu, toǒdě lî̤ama 29 htǒonu a ǒpa tò̤.}

30 Pò̌lu ǒ bǎ hǐ htě a cû̌khò̌ ǒkǔ htǒonu ginǐ̤ně dě a dǒshuǐbò kòyò htě a hè ǒlèkû̌ nû̌ûnu toǒ. 31 Pò̌lu dǒhtû̌ǐ bǎ kò ta Cǒmara ashiaga awi̤akè̌, dě a sû̌ǐtòwòǐlò̤ bǎ kò ta Běcǎ Ye̤shǔkhrî̌stu awi̤akè̌. Htodě a hî̌bǎkhuhî̌bǎha dě kò ma̤dǐdò yǎnu a ǒ dǐpwǎ̤꤮ tò̤.