Acts 3
Petru ta Jowǎ̤ni̤ ma̤bǎ kòyò khò̌lopo̤dě tapwa̤
1Bǎnu ti̤ni̤ bǎ lṳmṳlò̤ suna̤rînu, kò to kwisaba akhîkhanu, Petru ta Jowǎ̤ni̤ htò̌ lǒkho dě ta̤lṳhtò̌hokû. 2Kòjò johè kò khò̌lopo̤děpe dě a mo̤phukû tapwa̤ dě kò hèbè̌ nû̌û bǎ ta̤lṳhtò̌ho takha kòshî̌nu. Takha htǒonu kò kaǎ yǎta “Takhawî̤.” Ma̤pûhǐ a kwinṳpû wû htě kòyò hènṳ ta̤lṳhtò̌hokûnu toǒ aǒnu dě kò hè bè̌ nû̌û bǎnu pṳ̂̌ti̤ni̤. 3Bǎ a kè̌shǐ Petru ta Jowǎ̤ni̤ glè̌nṳ dě ta̤lṳhtò̌hokû akhanu, a kwigwèbǎǐ asî ta̤ tacǎcǎ. 4Dě asî kè̌lò̤ nû̌û dě Petru hî̌ nû̌û, “Kè̌cû̌to dě paǒbǎo!” 5Dě a glè̌ nî̤bǎ ta̤ tacǎcǎ kǎlè a gènè̤ dě a kè̌cû̌ Petru ta Jowǎ̤ni̤. 6Pwǎ̤tadě Petru hî̌ nû̌û, “Hewûhehta ǒ dǐmǐ꤮ tò̤, pò̤̌ta ta̤htě he ta ǒ toǒnu, he ǐ na. Dě Nǎ̤sèrèwî̤phû̌ Ye̤shǔkhrî̌stu htě a ǒ ta ta̤po̤ta̤phǎ htǒotapwa̤ ami̤akû akhû̌akhî he hî̌ na, ihtǒ cû̌mò̌!” 7A hî̌hto hǐnudě a pṳ̂ nû̌ûcǔdemû dě a cǐkihtǒ nû̌û, taplǎpa a khǎlǎ ta a khò̌shidǐ toǒ a shû̌htò̌shohtò̌bò. 8A pe̤kihtǒ htodě a cû̌nṳ plǒkû̌ta asî dě ta̤lṳhtò̌hokû dě a cû̌gecû̌le̤, pe̤gepe̤le̤ htû̌sò̌ǐ Cǒmara. 9Kòyò lǒ̤꤮ bò ǒ bǎnu toǒ kè̌shǐbò a cû̌jò htǒonu ta a sò̌po̤ htû̌sò̌ǐ Cǒmaranu toǒ. 10Dě asî to̤mǎǐ lǒkho nû̌û ta a mî̌ kòyò hǎnòò̌kwiǎ kòwû bǎ ta̤lṳhtò̌ho takhawî̤ kòshî̌nu tapwa̤ pwǎ. Dě a cû̌jògesǒ pwǐhè̌o akhû̌akhî, asî sû̌pi̤sò̌pi̤bò pṳ̂̌꤮ tapwa̤.Petru a ta̤dǒhtû̌ǐ dě ta̤lṳhtò̌hokû
11Bǎ kòyò htǒotapwa̤ pṳ̂měte̤gle Petru ta Jowǎ̤ni̤ gûla̤ bǎnu tò̤glò htě kò kaǎ yǎta Shòlomo hǐdòkhû̌ akhanu, kòyò bǎnu toǒ sû̌pi̤sò̌pi̤ dě khlè̌hè lǒkho asî ǒ. 12Petru kè̌shǐ asî dě a hî̌ asî, “He khobǒsû̌ Israelphû̌꤮, sî cû̌ sû̌pi̤sò̌pi̤ lǒkho ta̤ma̤ htǒotacǎ ala̤ ma̤tè? Sî cû̌ kè̌jono̤ tǒ̤bò pa ma̤tè? Kòyò htǒotapwa̤ cû̌jò htǒonumî̌ sî gènè̤ lǒkho ta pa ma̤ bǎ yǎta pa ta̤po̤ta̤phǎnu ya? Sî gènè̤ lǒkho ta pa mî̌ kòyò cahtǐphû̌ toǒ akhû̌akhî hǐnu ya? 13Abraham, Isǎko ta Yǎ̤kò toǒ a Cǒmara ta pa mo̤phaphiphu dě awǐnu toǒ a Cǒmara dǔlṳhtò̌ a ta̤sîrîdû̌sîrîhtû ta apwa̤ma̤ta̤ Ye̤shǔ htǒonu hǒ. Pwǎ̤tadě sî ǐlò̤kè yǎ kòyò htûdû̌htûpwa̤ toǒ a cǔdekû dě bǎ Khwǐpilǎto cèròhto nû̌ûdě a glè plûhǎhtò̌kè nû̌û akhanu, sî jûkû̌ yǎ tò̤. Dě Khwǐ htǒotapwa̤ a lo̤mo̤nu, sî la̤lò̤ shope̤kè yǎ. a 14A mî̌ kòyòcahtǐ, kòcǒkòtè̤ tapwa̤ hǐnudě sî wîkè yǎ. Sî kwi Khwǐpilǎto ta, ‘Khòsò̌do dě plûhǎhtò̌ bǎ pa kòyò htě a ma̤si kònu tapwa̤.’ b 15Sî ma̤sikè kòyò htě a ǐ kò ta̤htûpwa̤ htǒonu tapwa̤, pò̤̌ta Cǒmara ma̤htûpwa̤gesǒ yǎ dě ta̤sikla hǒ. Dě ta̤htûhtò̌ana̤ pwǐhè̌o numî̌ pa kè̌shǐ ta pana̤ hǒ. 16Sî kè̌shǐsî̌ya ta kòyò khò̌lopo̤dě htǒotapwa̤nu amî̌ a yṳǎ Ye̤shǔ ami̤ akhû̌akhî, a wǒgesǒ pwǎ. Pa sî̌ya ta htǒonu amî̌ a yṳǎ Ye̤shǔ akhû̌akhî, Ye̤shǔ ma̤wǒ mṳ̂tî̤glîbò nû̌û pwǐ sî lǒ̤꤮ bò kè̌shǐbòtû̌ khònò̤ htǒonuhǒ. 17“Pṳwè̤ sî꤮, khònò̤dě, sî ta sî hǐkǒdû̌ ma̤si Ye̤shǔ numî̌, sî sî̌ya amûasǎ tò̤ akhû̌akhî, sî ma̤ pwǎ yǎ. 18Cǒmara hî̌nǎhtobò ayo̤ ta pwa̤po̤ toǒ lǒ̤꤮ bò hǒ. Dě a hî̌nǎ asî ta Khrî̌stu bǎ khòbǎ nò ta̤jîta̤jû pěnu a lǒhtò̌behtò̌ pwǐ a hî̌ htǒonu hǒ. 19Ma̤pûhǐ Cǒmara bòlû̌kè sî ta̤sǔnu, yò̤lò̤ge lǒkho sîsò̌ htû̌lè̌gesǒ lǒkho sîna̤ dě Cǒmara ǒ. Sî dè ma̤mò̌hǐnu, htû̌꤮ akhîakhato akhîakhabǎ pěnu Běcǎ Cǒmara ǐkhû̌ǐǎge sî pě. 20Dě a nohèlò̤ bǎ sî Ye̤shǔ mî̌ Mè̤shǐa htě Cǒmara wû̌lǎhto bǎ sîya htǒonu tapwa̤ pě. 21Pwǐ Cǒmara ǐ sî̌yanǎ htotû̌ ta pwa̤po̤ cahtǐ dě꤮ wǐkha toǒ ta Ye̤shǔ htǒonu a tobǎ ǒ dě mǒkhû̌ to̤htû̌ Běcǎ Cǒmara ma̤sa gebòsǒ ta̤pṳ̂̌꤮ tacǎ akhanu pě. 22Ma̤tè̤hî̌dě Mǒ̤jè hî̌, ‘Pwǐ Cǒmara nohè henu, a nohè pwa̤po̤ dě sî khlilèkla tapwa̤ pě dě sî bǎ gana̤de ayo̤ pṳ̂̌꤮ tûmû pě. c 23Kòyò htě a gana̤de jûle̤phî̌yo̤kû̌ pwa̤po̤nu tapwa̤ ale̤ayo̤ tò̤ toǒnu, Cǒmara bè̌tephekè asî ta Cǒmara aphû̌ali̤ gûla̤ pě, htohǒtò̤ a ma̤pî̌kè asî pě.’ d 24“Tèhtò̌ bǎ pwa̤po̤ Shamuělè htukhape to̤htû̌ pwa̤po̤ lǒ̤꤮ bò htě a dǒhtû̌ǐ Cǒmara awi̤akè̌ anǒkò toǒ ahtukhanu, a pwe̤ǐnǎhtobò ta̤htě a glè htûhtò̌ htukha khònò̤kha htǒotoǒ awi̤akè̌ hǒ. 25Cǒmara a ta̤olò̤mèlò̤ htě a nodǔlṳlò̤ tṳtṳ pwa̤po̤ sî toǒ numî̌ sîya hǒ. Htohǒtò̤ Cǒmara wṳ̂dòhto ta sî mo̤phaphiphu dě꤮ wǐnu toǒnu mî̌ sîya ǒkû̌dǒ hǒhǒ. Pwǐ Cǒmara pwe̤ǐnǎhto Abraham ta, ‘He howi̤ tṳtṳbò hǎkhû̌phû̌ htǒotoǒ lǒ̤꤮ bò ta na khlilè gilò̤nu tapwa̤ akhû̌akhî pě.’ e 26Bǎ Cǒmara wû̌lǎ pwa̤ma̤ta̤ Ye̤shǔ akhanu, a nohèwǐ nû̌û dě sî ǒ hǒ. Ma̤pûhǐ a howi̤ sî dě a nohè nû̌û hǒ. Dě Cǒmara nowîkè sî ta sî pṳ̂̌꤮ tapwa̤ ata̤phû̌mò̤shî̌hto akhû̌akhî, a howi̤ sî.”
Copyright information for
KxfSCKRC