Acts 4

Kò dǒlò̤te̤ Petru ta Jowǎ̤ni̤ dě apo̤kû

1Bǎ Petru ta Jowǎ̤ni̤ hî̌bǎpe ta kòyò htǒotoǒ akhanu, pwa̤lṳhtò̌ta̤ toǒ ta pwa̤ǒpo̤ ta̤lṳhtò̌ho hǐkǒdû̌ tapwa̤ ta Sadugè̌phû̌ toǒ hèto̤ lǒkho. 2Pwa̤nophû̌ htǒosò̌gini̤ sû̌ǐtòwòǐ bǎ kò ta Ye̤shǔ htûpwa̤ge ta ta̤si dě a yṳ̂lṳphlobò kò ta kòyòsi toǒ htûpwa̤ge sǒsǒpwǐ htǒonu pě akhû̌akhî, asînu toǒ sò̌phlǒdû̌ kòyònu sò̌gini̤. 3Asî pṳ̂ pwa̤nophû̌ htǒosò̌gini̤ dě a dǒlò̤te̤ asî dě apo̤kû. A pṳ̂ asî khanu, lṳmṳhǎlò̤hǒ akhû̌akhî, a dǒǒ to̤ asî bǎ lṳmṳlî. 4Pwǎ̤tadě kòyò htě a gana̤de asî ta̤dǒhtû̌ǐ htǒotoǒnu, a yṳǎna̤ǎge plṳ̂ Ye̤shǔ. Dǒ còcè̌pwǎ makhûdû̌ htě a yṳǎ Ye̤shǔ toǒnu a phǔ꤮ ǒ yè̤̌rî̌.

5A pṳ̂hto asî anǒkòti̤ni̤nu Yṳ̌daphû̌ a hǐkǒdû̌ toǒ, wè̤khǔwè̤pwa̤ htě a htû hǐkǒdû̌ toǒ ta pwa̤sû̌ǐ ta̤sû̌ta̤tòwò asara toǒ hè ǒplǒhî̌bǎhtu kè̌khînû̌û bǎ Ye̤rǔshèlèwî̤kûnu. 6Asî hè ǒplǒhî̌bǎhtu kè̌shǐshǔ ta Kaǐpha, Jowǎ̤ni̤, Alexander, pwa̤tòlûhtò̌ hǐkǒdû̌gutṳ̌ Annas ta kòyò hǔwa̤ htě akhlialè ta pwa̤lṳhtò̌ hǐkǒdû̌gutṳ̌nu tapwa̤ toǒ. 7Asî noihtǒ pwa̤nophû̌ htǒosò̌gini̤ asî lo̤mo̤ dě a gwè asî, “Sî ma̤wǒgesǒ kòyò khò̌lopo̤děnu tapwa̤ hî̌tè? Sî ma̤pwǐhè̌o numî̌ sî ma̤ yǎta ûpè a ta̤po̤ta̤phǎ pè? Mè̤tò̤mî̌ sî cû̌ noǎ ûpè ami̤ pè?”

8Petru lǒbehtò̌ ta Běcǎ sǎcahtǐ dě a hî̌shǔ asî, “Pwa̤htûdû̌htûpwa̤ sî ta wè̤khǔwè̤pwa̤ htě a htû hǐkǒdû̌ toǒ꤮, 9pa ma̤wǒgesǒ kòyò khò̌lopo̤dě htǒotapwa̤ akhû̌akhî, khò̌ti̤ni̤ sîsèlè sîgwè pa hǐnu ya? Pa ma̤bǎge yǎ hî̌tè numî̌ sî sò̌yṳ sî̌ya ya? 10Sî lǒ̤꤮ bò htǒotoǒ bǎbǎ, Israel akhlialè lǒ̤꤮ bò bǎbǎ, a to sî̌ya lǒkho ta kòyò khò̌lopo̤dě htǒotapwa̤ ihtǒcû̌jò wǒgesǒ dě sî lo̤mo̤ khònò̤htǒo numî̌ mî̌htě Nǎ̤sèrèwî̤phû̌ Ye̤shǔkhrî̌stu a ta̤po̤ta̤phǎ ami̤akûnu pwǎ. Ye̤shǔkhrî̌stu mî̌ sî htǎwa̤si yǎ nò̌dòhtǔlo̤ tapwa̤nu hǒ, pwǎ̤tadě Cǒmara ma̤htûpwa̤gesǒ a dě ta̤sikla hǒ. 11Ye̤shǔ mî̌,

‘A sǒsǒta lo̤ tama htě sî bǒhtò̌ hǐ dě sî wîkè yǎ, pò̤̌ta nǒkònu a htûhtò̌ ta lo̤ htě kò noǎ yǎ hǐne̤ dě a lo̤bǎkhlo ta ahǔwa̤ toǒnu.’ ^a

12Kòyò htě a ma̤lû̌htò̌gejò pa mî̌ pwǎpǒ̤ Ye̤shǔ tapwǎ̤ pa. Kòyò hǔwa̤ htě Cǒmara ǐ asî ta a ma̤lû̌htò̌ge pa ayanu, bǎ hǎkhû̌ bǎoteběbònu a ǒ dǐpwǎ̤꤮ tò̤.”

13Yṳ̌daphû̌ htě a htûdû̌htûpwa̤ toǒnu, a kè̌shǐ Petru ta Jowǎ̤ni̤ sò̌phlǒkhuhè dě a sî̌ya ta asî mî̌ kòyò pwa̤ǎhǐma̤pwǎphû̌ pwǎ dě a jòlî̤jòhta kû̌kò tò̤ akhû̌akhî, a sû̌pi̤sò̌pi̤ lǒkho. Htohǒtò̤ asî sî̌yapo̤ Petru ta Jowǎ̤ni̤ mî̌ kòyò htě a gûbǒsû̌ kû̌ta Ye̤shǔ toǒ. 14Pò̤̌ta asî kè̌shǐ kò htě akhò̌lopo̤ wǒgesǒnu tapwa̤ ihtǒ ǒ bǎ Petru ta Jowǎ̤ni̤ akòshî̌ akhû̌akhî, asî hî̌jòpe dǐcǎ꤮ tò̤. 15Htodě asî nohǎhtò̌cû̌ tephekè Petru ta Jowǎ̤ni̤ dě pwa̤yṳǎta̤ aprṳ̂aho hǐkhlo dě asînu toǒ ǒplǒhî̌bǎhtukè tû̌ nû̌û. 16Asî gwè kè̌khînû̌û, “Pa tobǎ ma̤ asî hî̌tè? Asî ma̤htûhtò̌ ta̤cǒklî̌kî̌ya htǒotoǒnu kòyò lǒ̤꤮ bò ǒ dě Ye̤rǔshèlèwî̤kû htǒotoǒ sî̌yabò akhû̌akhî, pa hî̌ta amè̤tò̤nu a nî̤petò̤ hǒ. 17Pwǎ̤tadě, ma̤pûhǐ ta̤wi̤ta̤kè̌ htǒo lṳpîshîcû̌pe pû dě kòyò prṳ̂phǎ akla tò̤nu, pa bǎ hî̌ asî ta bǎ dǒhtû̌ǐpe bǎ kò ta Ye̤shǔ ami̤ dǐpwǎ̤꤮ tò̤.”

18Dě asî kaǎginṳ gesǒ Petru ta Jowǎ̤ni̤ dě a hî̌ asî, “Ye̤shǔ ami̤ htǒonu, sî bǎ hî̌bǎǐpe tò̤tò̤, sî bǎ sû̌ǐtòwòǐpe kò tò̤tò̤.” 19Pò̤̌ta Petru ta Jowǎ̤ni̤ hî̌shǔ asî, “Mî̌ pa tobǎ gana̤dekhlo sîyo̤ ya? Mè̤tò̤mî̌ pa tobǎ gana̤dekhlo Cǒmara ayo̤ yanu, gènè̤lò̤ lǒkho sîna̤ dě Cǒmara a lo̤mo̤nu. 20Ma̤tè̤hî̌dě ta̤htě pa kè̌shǐ gana̤dehto toǒnu pa dè pwe̤ǐlṳ mò̌ kò tò̤nu, pa ǒjò tò̤.”

21Hǐnudě Yṳ̌daphû̌ htě a htû hǐkǒdû̌ toǒ tǐ̤ ǐsè̌rè̌ shû̌sho hèkhlopo̤ asî ta dě awǐnu, htodě a plûgekè pwǎ asî. Asî sî̌ya ta kòyò htû̌sò̌ǐ lǒ̤bò Cǒmara ta asî ma̤htûhtò̌ ta̤htǒotoǒ akhû̌akhî, a cèrò Petru ta Jowǎ̤ni̤ hî̌tènu a gènè̤phlo lǒkho tò̤. 22Makhû htě kò ma̤bǎ cǒklî̌kî̌ya nû̌û htǒotapwa̤nu aně ǒ li̤shilǒ hǒ.

Pwa̤yṳǎphû̌ toǒ kwisaba Cǒmara dě a glè ǐ nû̌û ta̤sò̌phlǒkhuha.

23Bǎ kò plûhǎhtò̌ Petru ta Jowǎ̤ni̤ htǒo akhanu, taplǎpa asî gesǒ dě a khobǒsû̌ toǒ a ǒ. Dě pwa̤tòlûhtò̌ta̤ hǐkǒdû̌ lǒ̤꤮ bò toǒ ta wè̤khǔwè̤pwa̤ htě a htû hǐkǒdû̌ toǒ hî̌kwè̌ asî hî̌tènu, a gepwe̤ǐlṳ nû̌ûta akho toǒ. 24Bǎ a khobǒsû̌ toǒ gana̤de ta̤wi̤ta̤kè̌ htǒo akhanu, asî kwisaba htubò nû̌û ta sò̌phlǒ tama akû pa dě Cǒmara ǒ dě a hî̌, “Kǒ꤮ Běcǎdû̌, na mî̌ kò htě a bǒlò̤ mǒkhû̌, hǎkhû̌, shidû̌shite̤we̤ ta ta̤ lǒ̤꤮ bò htě a ǒ dě ta̤htǒotoǒakû tapwa̤! ^b 25Běcǎ sǎcahtǐ nohî̌bǎ tṳtṳ paphidǎ̤wi̤, mî̌pwǎ napwa̤ma̤ta̤ htǒonu ta,

‘Khlilèhǔwa̤ toǒ cû̌ sò̌dû̌gûhî lǒkho ma̤tè? Mî̌ma̤tè̤dě kòyò toǒ cû̌ guma̤phû̌mò̤ lǒkho ta̤htě a nòdû̌ toǒ ayo̤ ma̤tè? ^c 26Hǎkhû̌ Khwǐcophǎ toǒ ma̤wǒnǎ lǒkho ana̤ dě a glè shě Cǒmara ta Khwǐ htě Cǒmara wû̌lǎ yǎta a bǎ ma̤lû̌htò̌ge kòyòhǎkhû̌phû̌ htǒotapwa̤. Hǐnudě pwa̤pǒta̤ toǒ ǒhtuhî̌bǎplǒ nû̌û dě a glè shěplǒ ta hǎkhû̌ akhwǐcophǎ toǒ.’ ^d

27Khònò̤dě wî̤kû htǒonu a htûhtò̌ ana̤ hǐnu hǒ! Ma̤tè̤hî̌dě Khwǐherǒ ta Khwǐpontius Pilǎto ǒplǒhî̌bǎshǔ ta Yṳ̌daphû̌ mè̤tò̤ toǒ ta Yṳ̌daphû̌ toǒ bǎ wî̤kûnu. Dě a gènè̤ ma̤si plǒnû̌û Ye̤shǔ, htě a mî̌ na pwa̤ma̤ta̤ cahtǐ dě na nohtû yǎta Khrî̌stu htǒonu tapwa̤. ^e 28Dě na ta̤po̤ta̤phǎ ta ta̤htě na bè̌lò̤hto na sò̌phlǒ dě a bǎ htûhtò̌ pě toǒ akhû̌akhî, kòyò htǒotoǒ ma̤ lǒkho pwǐ na ma̤wǒnǎhtonu hǒ. 29Pò̤̌ta, Kǒ꤮ Běcǎ꤮, gana̤de kè̌mò̌ asî hî̌ sò̌gònò̤ ǐsha lǒkho pa khònò̤htǒo toǒnu, htohǒtò̤ ma̤pûhǐ pa htû najûphû̌ toǒ hî̌bǎkhuhabǔ wǒkû̌ nawi̤nakè̌ nudě, ma̤jèpû pa. 30Dǔlṳ na sîrîpo̤phǎ htě a ma̤bǎjò kòyò, ta̤ma̤ cǒklî̌kî̌ya ta ta̤ma̤ sû̌pi̤sò̌pi̤ toǒ, dě Ye̤shǔ htě napwa̤ma̤ta̤ cahtǐ htǒotapwa̤ ami̤ akhû̌akhî, noǒlṳhtò̌ tû̌ ta̤htǒotoǒ nî̌꤮.”

31Bǎ asî kwisabahto akhanu, gûla̤ bǎ asî la̤ǒplǒhtu nû̌ûnu tò̤glò a guyṳpè̤tè̤htò̌ dě asî lǒbebò ta Běcǎ sǎcahtǐ pṳ̂̌꤮ tapwa̤ dě asî pṳ̂̌꤮ tapwa̤ dǒhtû̌ǐ khuha lǒkho kò ta Cǒmara awi̤akè̌.

Pwa̤yṳǎphû̌ toǒ ma̤lṳma̤tò̌ ma̤shû̌ma̤jo kè̌khînû̌û ta ta̤htě asî ta ǒ toǒ

32Pwa̤ htě a yṳǎna̤ǎta̤ toǒnu asî ǒnû̌û ta sò̌phlǒ tama꤮ pa, ta̤gènè̤ tacǎ꤮ pa. Asî ta̤kî̌ta̤kû̌ toǒnu asî dǒkwèǐ lǒkho ata dǐpwǎ̤꤮ tò̤. Ta̤ htě asî ta ǒ toǒnu asî ǎplǒma̤plǒ kè̌khînû̌û. ^f 33Pwa̤nophû̌ toǒ lò̤ bǎ kò sasî̌ ta Běcǎ Ye̤shǔ htûpwa̤gesǒ awi̤akè̌ htǒonu, a lǒbe ta ta̤po̤ta̤phǎ ashû̌asho htohǒtò̤ Cǒmara lò̌lò̤lǒbe abwǐasîrî dě asî lǒ̤꤮ bò alo̤. 34Dě pwa̤yṳǎphû̌ htǒotoǒ aklanu, kòyò hǒwi̤shèwè ǒ dǐpwǎ̤꤮ tò̤, ma̤tè̤hî̌dě kòyò htě a ǒ ta hǔkla, hǐphò toǒnu, a shaǎlò̤kè nû̌dě a phî̌hènṳ lǒkho wû htě a shaǎlò̤nṳ htǒotoǒ, 35Dě hèǐlò̤ lǒkho wûhtǒo pwa̤nophû̌ toǒ a cǔdekû dě asî mèpa̤ nû̌ûta kòyò htě a lo̤bǎwûlo̤bǎhtanu toǒ.

36Hǐnu akhû̌akhî, kòyò mi̤ ta Jǒjè ǒ tapwa̤, a mî̌ Lě̤wǐphû̌ tapwa̤ dě a ǒlò̤ Kǔprǔ shikholophû̌jo, dě pwa̤nophû̌ htǒotoǒ kaǎ nû̌ûmi̤ ta Banabǎ (amûasǎ mî̌ kòyò htě a ǐkhû̌ǐǎ kò) 37A shaǎkè ahǔkla ta̤la̤ dě a hè ǐlò̤ awûhtǒo dě pwa̤nophû̌ toǒ a cǔdekû.