Acts 5

Ana̤nǐ ta Saphǐra

1Pwǎ̤tadě kòyò htě ami̤ ta Ana̤nǐ ǒtapwa̤. A ta ama Saphǐra shaǎkè ahǔkla ta̤la̤. 2Wû htě asî shaǎnṳ htǒonu, ama sò̌phlǒ sǒsǒ nû̌û dě asî glè bè̌kè asîya toǒ, htě a ǒkè ahǔwa̤ htǒotoǒnu a hèǐ nû̌ûta pwa̤nophû̌nu toǒ.

3Dě Petru hî̌ nû̌û, “Ana̤nǐ na cû̌ nopǒǐtǒ̤ nana̤ ta khînǎmo̤pha hǐkǒdû̌ ma̤tè? Na lòhokè Běcǎ sǎcahtǐ hǒ. Na cû̌ bè̌wǒhǔkè tǒ̤ hǔkla pwî̤ htě na shaǎnṳ yǎ aklanu toǒ ma̤tè? 4Bǎ na shaǎlò̤ nahǔkla hǒtò̤ akhanu, hǔklahtǒo mî̌ nata tû̌ mè̤tò̤ ya? Na shaǎhto yǎ dě wû htě na nî̤bǎ toǒnu mî̌ nata pwǎpwǎ. Hǐnudě na cû̌ bè̌lò̤tǒ̤ na sò̌phlǒ dě na glè ma̤pwǐhè̌o ma̤tè? Htǒomî̌ na lòho kòyò mè̤tò̤, na lòho Cǒmara hǒ.”

5Ana̤nǐ gana̤de ta̤hî̌bǎ htǒonu ta taplǎpa a lòkhǔsikè. Dě kòyò lǒ̤꤮ bò htě a gana̤de lǒkho ta̤ma̤htûhtò̌ ana̤ htǒotoǒnu a sò̌gònò̤ ǐshabò. 6Makhû phû̌dephû̌sǎ toǒ hènṳto̤ dě a tûlûbǐ nû̌ûta hǔgòpwî̌, asî johǎhtò̌kè nû̌û dě cû̌ lǔkè nû̌û.

7Htodě a phǔ ǒ suna̤rî akhanu, ama hènṳ to̤dě Petru a ǒ. Pò̤̌ta bǒpo̤no̤nu, a ma̤kwè̌꤮ hî̌tènu a sî̌ya kû̌kò dǐcǎ꤮ tò̤. 8Petru gwè Saphǐra, “Na pwe̤ǐlṳ bǎ kè̌ he, lǒ̤꤮ bò na ta nawṳ̂ shaǎnṳ û̌cata̤bî̌ apwî̤ numî̌ wû pwî̌o nupwǎ ya?”

Dě a hî̌shǔ, “Amè̤kǎlè, lǒ̤꤮ bò numî̌ pwî̌o nupwǎ hǒ.”

9Hǐnudě Petru hî̌ nû̌û, “Mî̌ma̤tè̤dě na ta nawṳ̂ cû̌ ma̤kè̌bǎ tǒ̤ Běcǎ sǎcahtǐ ma̤tè? Kòyò cû̌lǔ nawṳ̂ toǒnu, a geto̤ mǒ̤pepwǎ bǎ takhahtu htǒonu pwǎ dě asî jocû̌ kû̌po̤ na pě!”

10A hî̌ htodě taplǎpa Saphǐra lòkhǔsikè bǎ Petru khò̌lopo̤ kòshî̌nu. Makhû phû̌dephû̌sǎ toǒ hènṳ dě kè̌shǐ nû̌û si akhû̌akhî, asî johǎhtò̌cû̌lǔ kû̌dǒ nû̌û ta awṳ̂. 11Pwa̤yṳǎta̤ aprṳ̂ahophû̌ htǒotûprṳ̂ ta kòyò ahǔwa̤ toǒ gana̤de lǒkho ta̤ma̤htûhtò̌ ana̤ htǒotoǒdě a ǐsha jòjî̌꤮ lǒkho tò̤.

Ta̤cǒklî̌kî̌ya ta ta̤ma̤ sû̌pi̤sò̌pi̤ toǒ

12Ta̤ma̤ cǒklî̌kî̌ya toǒ bǎbǎ, ta̤ma̤ sû̌pi̤sò̌pi̤ toǒ bǎbǎ, pwa̤nophû̌ toǒ ma̤lṳplṳ̂ bǎ kò. Pwa̤yṳǎphû̌ toǒ lǒ̤bò hè kè̌shǐ glashǔ nû̌û dě ta̤lṳhtò̌ho gûla̤ tò̤glò htě kò kaǎ yǎta Khwǐshòlomo hǐdòkû̌nu. 13Kòyò htě a yṳǎna̤ǎ tò̤ toǒnu a hènṳ bǒsû̌bǔ kû̌ asî dǐpwǎ̤꤮ tò̤, pò̤̌ta a htû̌sò̌ǐ mè̤mè̤̌ asî. 14Pwǎ̤tadě mamǔmakhû htě a yṳǎ Běcǎ toǒnu, sǔ a hènṳ htò̌dû̌ kû̌ dě asî prṳ̂ho akû. 15Pwa̤nophû̌ toǒ ma̤ cǒklî̌kî̌ya bǎ kò ta̤htǒotoǒ akhû̌akhî, ma̤pûhǐ a yo̤ǔ lò̤bǎ pwa̤shǐpwa̤sha htǒotoǒ nudě, kòyò ò̌hè lǒkho kòshǐkòsha toǒ dě a hè dalò̤ bǎ asî la̤mi̤ ta khlǒ toǒ bǎ Petru cû̌ asî kòshî̌ klè̌dû̌kûnu. 16Kòyò saprṳ̂ htě a ǒ te̤we̤lṳ̂phǔ ta Ye̤rǔshèlèwî̤nu toǒ ò̌hè lǒkho kòshǐkòsha toǒ ta kòyò htě khînǎmo̤pha ma̤sha nû̌ûnu toǒ dě pwa̤nophû̌ toǒ ǒ dě asî ma̤bǎbò bǎ kò pṳ̂̌꤮ tapwa̤.

Pwa̤nophû̌ toǒ khòbǎ ta̤ma̤jîma̤jû

17Htǒotaplǎdě pwa̤tòlûhtò̌ hǐkǒdû̌gutṳ̌ tapwa̤ ta kò lǒ̤꤮ bò htě a gûkû̌ nû̌ûkò ta a ǒpanṳ dǒkû̌ Sadugè̌phû̌ aprṳ̂aho bǎnu toǒ sò̌khěkhû̌khwè pwa̤nophû̌. 18Asî pṳ̂ pwa̤nophû̌ toǒ dě dǒlò̤te̤kè asî dě apo̤kû. 19Pò̤̌ta bǎnu tasa, Běcǎ mǒkhû̌tanaphû̌ tapwa̤ hèbòmo takha dě a plûhǎhtò̌kè pwa̤nophû̌ htǒotoǒ dě a hî̌ asî, 20“Cû̌nṳ ihtǒ ǒ lǒkho dě ta̤lṳhtò̌ho awe̤kû nudě dǒhtû̌ǐbò bǎ kò ta yolahtûpwa̤ asa htǒo awi̤akè̌nu.”

21Pwa̤nophû̌ toǒ gana̤de mǒkhû̌tanaphû̌nu tapwa̤ ayo̤ dě, bǎ lṳmṳlîbû akhanu, asî cû̌nṳ lǒkho ta̤lṳhtò̌ho awe̤kû dě asî bòhtò̌ sû̌ǐtòwòǐlò̤bò kò bǎnu.

Pwa̤tòlûhtò̌ hǐkǒdû̌gutṳ̌ tapwa̤ ta kòyò htě a gûhèkû̌ nû̌ûkò toǒ hèto̤ dě hè kaǎplǒbò Yṳ̌da hǐkǒdû̌ toǒ ta wè̤khǔwè̤pwa̤ toǒ dě asî ǒplǒhî̌bǎhtu kû̌bò nû̌û. Htodě a nocû̌kaǎhè pwa̤nophû̌ ǒ apo̤kûnu toǒ dě asî lo̤mo̤. 22Pwǎ̤tadě bǎ Yṳ̌da klihǐkǒdû̌ toǒ cû̌nṳ dě kò la̤dǒ asî gûla̤ akhanu, a kè̌shǐpe pwa̤nophû̌ htǒotoǒ dǐpwǎ̤꤮ tò̤ akhû̌akhî, asî gepwe̤ǐsǒ kòyò htû hǐkǒdû̌nu toǒ ta wè̤khǔwè̤pwa̤nu toǒ, dě a hî̌ asî, 23“Bǎ pa cû̌to̤ dě kò la̤dǒ agûla̤ akhanu, pa kè̌shǐ kò è̌měwǒ takha ta sò̌. Htodě pwa̤ǒpo̤ apo̤ lǒ̤꤮ bò htǒotoǒnu, a ihtǒ ǒpo̤ lǒkho bǎ takhahtunu pṳ̂̌꤮ tapwa̤ pwǎ̤ta pa bòmo takha dě pa nṳkè̌ akû akhanu, pa kè̌shǐpe dǐpwǎ̤꤮ tò̤.” 24Bǎ pwa̤ǒpo̤ ta̤lṳhtò̌ho hǐkǒdû̌ htǒotapwa̤ ta pwa̤tòlûhtò̌ hǐkǒdû̌ toǒ gana̤de ta̤wi̤ta̤kè̌ htǒo akhanu, a te̤pe̤bòkè nû̌û dě a gènè̤ lǒkho ta mî̌ a glè̌ htûhtò̌ kû̌bò po̤ kwè̌꤮ hî̌tè pě a gènè̤bò hǐnu.

25Htǒotaplǎdě kòyò hènṳ tapwa̤ dě a hî̌ asî, “Gana̤de lǒkho sî dǒlò̤te̤ kòyò dě apo̤kûnu toǒ cû̌ǒ ta̤lṳhtò̌ho we̤kûnu dě a sû̌ǐtòwòǐlò̤bò kò bǎnu hǒ.” 26Hǐnudě pwa̤ǒpo̤ ta̤lṳhtò̌ho hǐkǒdû̌ htǒotapwa̤ ta akhophijaû̌ toǒ hǎhtò̌cû̌ kaǎgesǒ pwa̤nophû̌nu toǒ. Pò̤̌ta ǐsha ta kò wî asî ta lo̤ dě asî ma̤shabǔ asî tò̤.

27Asî sûcû̌ pwa̤nophû̌ htǒotoǒ dě Yṳ̌daphû̌ hǐkǒdû̌ htǒotoǒ alo̤mo̤ dě pwa̤tòlûhtò̌ hǐkǒdû̌gutṳ̌ htǒotapwa̤ gwè sèlèkè̌ asî. 28A hî̌ asî, “Pa hî̌te̤hî̌mǎhto sî ta sû̌ǐtòwòǐpe pûma̤ kò ta kòyò htǒotapwa̤ ami̤ ma̤ nî̌꤮, dě khònò̤htǒo sî kè̌kè̌ sî cû̌ ma̤kwè̌꤮ hî̌tè! Sî sû̌ǐ pîshîcû̌bò kò dě Ye̤rǔshèlèwî̤kû htǒonu hǒ. Kòyònu tapwa̤ si numî̌ pa htǒotoǒ ma si hǒ, sî sò̌yṳ bè̌ lǒkho pa ta̤sǔ hǐnu.” ^a

29Petru ta pwa̤nophû̌ toǒ hî̌shǔ, “Wǐ꤮ ta gana̤de kòyòhǎkhû̌phû̌ ayo̤nu, tò̤nò̌ gana̤de Cǒmara ayo̤. 30Sî htǎwa̤sihto Ye̤shǔ nò̌dòhtǔlo̤ dě paphipaphu a Cǒmara htǒotapwa̤ ma̤htûpwa̤gesǒ yǎ dě ta̤sikla hǒ. 31Ma̤pûhǐ Cǒmara ǐ Israelphû̌ toǒ yò̤lò̤ge asò̌ ta ta̤bòlû̌kè ta̤sǔ toǒ ayanu, a bè̌ǒ Ye̤shǔ dě acǔdemû tokho pwǐ kòyò htûdû̌htûpwa̤ tapwa̤ ta pwa̤ma̤lû̌htò̌ge kò tapwa̤nu hǒ. 32Pa mî̌ pwa̤ htě a lò̤ bǎ kò sasî̌ ta ta̤htǒo toǒ awi̤akè̌ hǒ. Hǐnudě Běcǎ sǎcahtǐ lò̤ sǒsǒkû̌ asasî̌ hǐnunu. Běcǎ sǎcahtǐ htǒonu Cǒmara ǐlò̤ nû̌ûta kòyò htě a gana̤de nû̌ûyo̤nu toǒ aya.”

33Bǎ Yṳ̌daphû̌ hǐkǒdû̌ kûshû̌htû toǒ ta Yṳ̌daphû̌ wè̤khǔwè̤pwa̤ htě a htû hǐkǒdû̌ toǒ gana̤de ta̤hî̌bǎhtǒo akhanu, a sò̌phlǒdû̌ jòjî̌꤮ tò̤. Dě a sò̌yṳ guma̤sikè pwa̤nophû̌ htǒotoǒ ayo̤. 34Pwǎ̤tadě bǎ asî klanu Pharisè̌phû̌ htě ami̤ ta Gameliělè ǒtapwa̤. A mî̌ ta̤sû̌ta̤tòwò asara tapwa̤, htohǒtò̤ a mî̌ kòyò htě kò bè̌dubè̌na̤ nû̌û tapwa̤nu. A ihtǒ kòyò hǐkǒdû̌ toǒ alo̤mo̤ dě a nokaǎhǎhtò̌ khǒkèbò pwa̤nophû̌ toǒ dě akhlo teděsǎ. 35Htodě a hî̌ Yṳ̌daphû̌ htě a htû hǐkǒdû̌ toǒ, “Khobǒsû̌ Israelphû̌ sî꤮, sî glè̌ ma̤ kòyò htǒotoǒ hî̌tènu, gènè̤ te̤mǎ lǒkho pû. 36Gènè̤htò̌to̤ lǒkho ta dě awǐkha numî̌ kòyòmi̤ ta Tǔdǎ ǒhtò̌ tapwa̤. A hî̌lò̤ ana̤ ta he mî̌ kòyò hǐkǒdû̌ tapwa̤. Akhophijaû̌ htě a gûkû̌ nû̌ûnu a phǔ꤮ ǒ lǐ̤ya̤, hǐnudě bǎ kò ma̤sikèhto nû̌û akhanu, akhophijaû̌ toǒ nûpò̌nûshîbòkè. Htodě a ta̤phî̌ta̤ma̤ toǒnu a pî̌bòkèpwǎ bǎnu. 37Nǒkò bǎ kò kûplǒ shiphû̌gaphû̌ ami̤ ta̤khwè̌mǎnǎ akhanu, Galilî̌aphû̌ htě ami̤ ta Yṳ̌da htǒonu tapwa̤ ǒlṳhtò̌ gesǒ. A cû̌ lǒǎplò̤ǎplṳ̂ kòyò hǐnudě yî̤hǒtò̤ kò ma̤sikè yǎ dě akhophijaû̌ toǒ nûpò̌nûshîkè pwǎ. 38Hǐnudě ta̤wi̤ta̤kè̌ htě a htûhtò̌ khònò̤htǒo bǎbǎ, he sò̌yṳ hî̌ sî ta ma̤pûma̤ asî dǐcǎ꤮ ma̤. Noǒtû̌ asî hǐnu hǒ, ma̤tè̤hî̌dě asî gènè̤ ma̤ta̤ htǒotoǒnu, a dè hèmè̤ pwǎ ta kòyòhǎkhû̌phû̌ a ta̤gènè̤ dèhî̌mî̌ a pî̌kè tû̌ ata pě. 39Pwǎ̤tadě ta̤ma̤ htǒonu, a ǒ dě Cǒmara a ǒhè dèhî̌numî̌ sî ma̤pè̤ nǒ asî tò̤. Sî shěshǔ cǎkǎ ta Cǒmara, sî kè̌shǐ sana̤ Cǒmara ta sîna̤ pě.”

40Pwa̤ htû Yṳ̌daphû̌ hǐkǒdû̌kûshû̌htû toǒ jûle̤phî̌yo̤ kû̌ Gameliělè a ta̤ǐgènè̤jè htǒo dě a kaǎnṳ gesǒ pwa̤nophû̌ htǒotoǒ. Htodě a phlě asî ta wî̤sǒpli̤ dě a hî̌ asî ta sî bǎ dǒhtû̌ǐnṳpe bǎ kò ta Ye̤shǔ ami̤ htǒonu tò̤, a hî̌hto hǐnudě a plûgekè asî.

41Pwa̤nophû̌ toǒ sò̌le̤sò̌lò̤ hǎhtò̌cû̌kè dě Yṳ̌daphû̌ hǐkǒdû̌ htǒotoǒ a lo̤mo̤, ma̤tè̤hî̌dě asî gû Ye̤shǔ akò akhû̌akhî, Cǒmara bè̌nòpwǎ asî ta agwa khòbǎ kò ma̤sòwò̤ asî hǐnu. 42Dě nǒkònu, asî ǒkǔ tò̤. Dě ta̤lṳhtò̌hoakûnu bǎbǎ, dě kòhǐkòphòakûnu bǎbǎ, pṳ̂̌ti̤ni̤꤮ asî sû̌ǐtòwòǐ hè bǎ kò. Asî dǒhtû̌ǐ sělěhèlṳpo̤ bǎ kò ta ta̤sò̌le̤sò̌lò̤ awi̤akè̌. Ta̤sò̌le̤sò̌lò̤ mî̌ Ye̤shǔ htě a ma̤lû̌htò̌ge kòyòhǎkhû̌phû̌ lǒ̤bò tapwa̤nu hǒ.