Act 8 | KxfSCKRC | STEP | Htodě Saulǔ sò̌phlǒto kû̌ta pwa̤ma̤si Stephennu toǒ dě a olò̤ sǒsǒkû̌ta asî. Tèhtò̌ bǎnu ti̤ni̤ tǒ̤hè kòyò htě a ǒ Ye̤rǔshèlèwî̤kû dě a yṳǎna̤ǎ Ye̤shǔ toǒnu, kò ma̤jîma̤jû mè̤mè̤̌ asî. Kòyò htě a ǒkè Ye̤rǔshèlèwî̤kû toǒ numî̌ tû̌pwǎ pwa̤nophû̌ toǒ pwǎ. Dě kòyò lǒ̤꤮ bò htě a yṳǎna̤ǎta̤ toǒnu a hǎhtò̌khlè̌ cû̌pushǔpîshîbò Yṳ̌daga ta Shamarî̌taga.

Acts 8

1 Htodě Saulǔ sò̌phlǒto kû̌ta pwa̤ma̤si Stephennu toǒ dě a olò̤ sǒsǒkû̌ta asî. Tèhtò̌ bǎnu ti̤ni̤ tǒ̤hè kòyò htě a ǒ Ye̤rǔshèlèwî̤kû dě a yṳǎna̤ǎ Ye̤shǔ toǒnu, kò ma̤jîma̤jû mè̤mè̤̌ asî. Kòyò htě a ǒkè Ye̤rǔshèlèwî̤kû toǒ numî̌ tû̌pwǎ pwa̤nophû̌ toǒ pwǎ. Dě kòyò lǒ̤꤮ bò htě a yṳǎna̤ǎta̤ toǒnu a hǎhtò̌khlè̌ cû̌pushǔpîshîbò Yṳ̌daga ta Shamarî̌taga. 2 Kò mo̤ǐ mè̤mè̤̌ Cǒmaranu a ǒ toǒ, dě a cû̌ lǔwǒkè Stephen. Dě asî hǎsihǎǒ lǒkho. 3 Saulǔ htǒo tapwa̤nu a jipwi̤ kè̌lǎ ma̤pî̌ma̤lṳ̂ Khrî̌stu a pwa̤yṳǎta̤ aprṳ̂ahophû̌ toǒ. A cû̌htò̌nṳ hǐtama hto tama akû, dě a cû̌cǐ jûgrûhǎhtò̌ mamǔmǔ, makhûkhû htě a yṳǎna̤ǎta̤ toǒ dě dǒnṳ asî dě apo̤kû. ^a

Philǐpo dǒhtû̌ǐ ta̤sò̌le̤sò̌lò̤ awi̤akè̌ dě Shamarî̌tagakû

4 Pwa̤yṳǎphû̌ htě a khlè̌cû̌pushǔpîshîkèbò nû̌û toǒnu, a cû̌to̤bò gûla̤ pṳ̂̌꤮ tò̤glò dě a cû̌shido dǒhtû̌ǐ bǎ kò ta Ye̤shǔ ata̤sò̌le̤sò̌lò̤ awi̤akè̌ htǒotoǒ. 5 Phǐlǐpo cû̌to̤ wî̤dû̌gutṳ̌ htě a ǒ Shamarî̌tagakûnu tî̤wî̤. Dě a cû̌ dǒhtû̌ǐ bǎ kòyò ǒ bǎnu toǒ ta Khrî̌stu awi̤akè̌. 6 Kòyò saprṳ̂ toǒ gana̤debǎhto Phǐlǐpo a ta̤dǒhtû̌ǐ toǒ ta asî kè̌shǐbǎhto nû̌û ta̤ma̤ cǒklî̌kî̌ya toǒ akhû̌akhî, a gana̤dewǒ nû̌û ta̤hî̌bǎ toǒ. 7 Khînǎkhînophû̌mò̤ toǒ yi̤kǒ hǎhtò̌cû̌ tephekè tû̌ dě a ma̤sha kòyò toǒ alo̤nu a ǒplṳ̂. Htohǒtò̤ a ma̤bǎplṳ̂ bǎ kòyò htě a sitokhonu toǒ ta kòyò htě a khò̌lopo̤dě toǒ. 8 Hǐnu akhû̌akhî, wî̤kûphû̌ toǒ sò̌le̤sò̌lò̤shû̌ mè̤mè̤.

9 Bǎ wî̤kûnu kòyò htě ami̤ mî̌ Shîmǒ̤nè̤ ǒ tapwa̤. A hî̌ ana̤ ta a mî̌ a htû hǐkǒdû̌ kûshû̌htû tapwa̤. Dě a cû̌shido ma̤sû̌pi̤sò̌pi̤ htoplṳ̂ bǎ Shamarî̌taphû̌ toǒ ta ta̤ma̤tèplè̌ kòmi̤sǎ toǒ. 10 Hǐnudě kòyò lǒ̤꤮ bò htě a htûdû̌htûpwa̤ dě a ǒ bǎ wî̤kûnu toǒ bǎbǎ, kòyò ǎshǎ wè̤ta̤phû̌ ǒ bǎ wî̤kûnu toǒ bǎbǎ, a gana̤desi gana̤deǒbò nû̌yo̤. Asî hî̌ lǒkho, “Kòyò htǒotapwa̤ mî̌ Cǒmara a ta̤po̤ta̤phǎ htě kò kaǎ yǎta ta̤po̤ta̤phǎ adû̌ayǒ na̤cè̌nu hǒ.” 11 A ma̤ sû̌pi̤sò̌pi̤ bǎ kò ta ata̤ma̤ tèplè̌ kòmi̤sǎ bǎnu mî̌ ayî̤hǒ akhû̌akhî, kò gana̤desi gana̤deǒ nû̌yo̤. 12 Pò̤̌ta bǎ Phǐlǐpo dǒhtû̌ǐ bǎ asî ta Cǒmara ashiaga awi̤akè̌ ta Ye̤shǔkhrî̌stu awi̤akè̌ akhanu, mamǔ, makhû toǒ yṳǎna̤ǎ ta̤sò̌le̤sò̌lò̤ awi̤akè̌ dě plo lǒkho ana̤ ta shi. 13 Shîmǒ̤nè̤ ana̤ sana̤nu a yṳǎna̤ǎ kû̌ Ye̤shǔ dě a plodǒ ana̤ ta shi, htohǒtò̤ a cû̌plǒkhaplǒ ta Phǐlǐpo pṳ̂̌꤮ taplǎ. Bǎ a kè̌shǐ Phǐlǐpo ma̤ ta̤sû̌pi̤sò̌pi̤ htě adû̌ayǒ toǒ akhanu, a sû̌pi̤sò̌pi̤ mè̤mè̤̌.

14 Bǎ pwa̤nophû̌ dě Ye̤rǔshèlèwî̤kû toǒ gana̤de ta Shamarî̌taphû̌ toǒ yṳǎ kû̌ lǒkho Cǒmara ale̤ayo̤ akhanu, asî nocû̌ Petru ta Jowǎ̤ni̤ dě asîǒ. 15 Bǎ asî hèto̤ akha, ma̤pûhǐ Shamarî̌taphû̌ toǒ nî̤bǎkû̌ Běcǎ sǎcahtǐnu, a kwisaba bǎ asîya. 16 Ma̤tè̤hî̌dě Běcǎ sǎcahtǐ hèlò̤ asî lo̤ dǐpwǎ̤꤮ hǒtò̤ dě asî plo lǒkho pepwǎ ana̤ ta shi dě Běcǎ Ye̤shǔ ami̤akû. 17 Hǐnudě Petru ta Jowǎ̤ni̤ bè̌htò̌ acǔde dě asî lo̤, dě asî nî̤bǎ lǒkho nǒ Běcǎ sǎcahtǐ.

18 – 19 Bǎ pwa̤nophû̌ Petru ta Jowǎ̤ni̤ bè̌htò̌ acǔde dě pwa̤yṳǎphû̌ toǒ alo̤ dě asî nî̤bǎ Běcǎ sǎcahtǐ akhanu, Shîmǒ̤nè̤ kè̌shǐ dě a sò̌yṳ ǐ Petru ta Jowǎ̤ni̤ wû dě a hî̌ asî, “He bè̌htò̌ he cǔde ûpè tapwa̤ alo̤ pěnu bǎbǎ, ma̤pûhǐ kò nî̤bǎpû Běcǎ sǎcahtǐnu, ǐpa̤ he ta̤po̤ta̤phǎ htǒonu tacǎ.”

20 Dě Petru hî̌shǔ nû̌û, “Cǒmara a ta̤ǐko sû htǒonu, pwî̤ yǎta wû mî̌ anî̤ pwǎ, na gènè̤ hǐnu akhû̌akhî, na ta nawû lòte̤plǒ tû̌ta nû̌û dě ngariǒkû nî̌꤮. 21 Na mî̌ kòyò htě a ǒplǒ ta pa ta̤phî̌ta̤ma̤ akû tò̤, ma̤tè̤hî̌dě na sò̌phlǒ htǒonu, acǒatè̤ dě Cǒmara a lo̤mo̤ tò̤. 22 Na sò̌phlǒ a ta̤gènè̤ phû̌mò̤shî̌hto htǒotoǒnu, na tobǎ yò̤lò̤gesǒ mò̌ yǎ dě kwisaba Cǒmaranu. Na ma̤hǐnukǎlè Cǒmara bòlû̌jòkè bǎ na ta̤gènè̤sǔ htǒonu toǒ pě kǎlè. 23 Ma̤tè̤hî̌dě he kè̌shǐ na sò̌phlǒnu a betî̌pî̌ ta ta̤sò̌khěkhû̌khwè dě na ta̤sǔta̤plě coklomě na sǒsǒta kò lò̤te̤ dě apo̤kû tapwa̤nu.”

24 Shîmǒ̤nè̤ hî̌shǔ Petru ta Jowǎ̤ni̤, “Ma̤pûhǐ sî lǒ̤꤮ bò hî̌ htǒotoǒ lò̤bǎ pû he dǐcǎ꤮ tò̤nu dě kwisaba lǒkho he ya dě Běcǎ ǒ.”

25 Bǎ Petru ta Jowǎ̤ni̤ pwe̤ǐlṳ kò ta ta̤htě a sî̌ya kè̌shǐbǎhto Ye̤shǔkhrî̌stu awi̤akè̌nu toǒ dě dǒhtû̌ǐlṳ bǎhto kò ta Cǒmara ale̤ayo̤ akhanu, asî getîkhîsǒ dě Ye̤rǔshèlèwî̤. Bǎ asî ge dě klè̌lo̤ akhanu, a cû̌nṳplṳ̂ dě Shamarî̌tado tado hto tado dě a cû̌ dǒhtû̌ǐlṳge kò ta̤sò̌le̤sò̌lò̤ awi̤akè̌.

Phǐlǐpo ta kòyò htû Itiopǐaga hǐkǒdû̌ tapwa̤

26 Běcǎ a mǒkhû̌tanaphû̌ tapwa̤ hî̌ Phǐlǐpo, “Ma̤wǒnǎ nana̤ dě ǒ bǎ Ye̤rǔshèlèwî̤nu dě gilò̤nò̤ ta klè̌cǔmû bǎ Gasǎwî̤nu tabo. Klè̌ htǒonumî̌ lo̤semě lò̤rṳ̂khû̌ aklè̌.” 27 Hǐnudě Phǐlǐpo ma̤wǒ ana̤ dě a hǎhtò̌cû̌. Bǎ a cû̌ dě klè̌lo̤ akhanu, a kè̌shǐshǔ ta Itiopǐaphû̌ htě ashǔkè a dǐ tapwa̤. A mî̌ a htû hǐkǒdû̌ dě a bǎ kè̌ǐkhwè̌ǐ pǒǐ Itiopǐa Khwǐmo̤kèdè̌ awûhta lǒ̤꤮ bò tapwa̤. A cû̌ subusabahto Ye̤rǔshèlèwî̤ dě a gegilò̤sǒ ado ta tîsî̌lo̤. 28 Bǎ a ge klè̌lo̤ akhanu, a dǒ lî̤ htě pwa̤po̤ Isaǐa khwè̌nǎ dě꤮ wǐnu toǒ. 29 Běcǎ sǎcahtǐ pwe̤ǐ Phǐlǐpo, “Cû̌ hèphǔ dě a tîsî̌lo̤ kòshî̌.”

30 Phǐlǐpo khlè̌cû̌ tîsî̌lo̤ kòshî̌ dě bǎ a gana̤de a dǒ pwa̤po̤ Isaǐa lî̤ akhanu, a gwè nû̌û, “Na dǒ lî̤htǒo numî̌, na sî̌yayǎ amûasǎ ya?”

31 Dě kòyò htû hǐkǒdû̌ htǒotapwa̤ hî̌shǔ nû̌û, “Kò dè pwe̤ǐsî̌yaphlo mò̌ he dǐpwǎ̤꤮ tò̤nu, he cû̌ sî̌yajò ma̤ hî̌tè?” A hî̌ dě a kaǎhtò̌dò̌ dǒkè nû̌û tîsî̌lo̤.

32 Kò htě ashǔkè adǐ htǒotapwa̤ dǒ lî̤cahtǐ to̤to̤ dě a hî̌,

“Anu alò̤ta sophû̌ tado htě kò cǐcû̌ yǎdě kò glè̌ ma̤si yǎnu, dě alò̤ta kò dî̌kè sophû̌ ashû̌ dě a yi̤kǒ kû̌kò dǐmû̌꤮ tò̤ tado, a hî̌shǔ kû̌gekò yo̤ dǐmû̌꤮ tò̤. ^b 33 Kò ma̤sòwò̤ nû̌û dě kò cèròcǒcèròtè̤ nû̌û tò̤, kòyò htě a pwe̤ǐjò bǎ kò ta akhligilò̤ awi̤akè̌nu a ǒ dǐpwǎ̤꤮ tò̤, ma̤tè̤hî̌dě kò phî̌gekè nû̌û ta̤htûpwa̤ dě hǎkhû̌bǎo.” ^c

34 Kòyò htû hǐkǒdû̌ htǒotapwa̤nu, a gwè Phǐlǐpo, “Pwe̤ǐ bǎkè̌ he ta pwa̤po̤ htǒotapwa̤ hî̌bǎ ta̤htǒo, mî̌ a hî̌tû̌pwǎ awi̤akè̌ pwǎ ya? Mè̤tò̤mî̌ a hî̌ kòhǔwa̤ tapwa̤pwa̤ awi̤akè̌ ya?” 35 Hǐnudě Phǐlǐpo tèhtò̌ hî̌ nû̌û ta lî̤cahtǐ htǒoto̤to̤ dě a pwe̤ǐlṳ nû̌û ta Ye̤shǔ a ta̤sò̌le̤sò̌lò̤ awi̤akè̌.

36 Dě bǎ asî htǒosò̌gini̤ cû̌ hèpo̤ dě alo̤mo̤ akhanu, asî cû̌to̤ bǎ shi ǒ agûla̤ tò̤glò. Htǒotaplǎdě kòyò htû hǐkǒdû̌ htǒotapwa̤nu a hî̌ nû̌û, “Shi ǒ bǎo lè! He dè sò̌yṳ plo hena̤ ta shi hî̌numî̌ ta̤ma̤dǐdò heklè̌ ǒ tacǎcǎ ya?” 37 (Philǐpo hî̌shǔ nû̌û, “Na dè yṳǎ lǒ̤sû̌lǒ̤sò̌ mè̤mè̤̌ mò̌ Ye̤shǔkhrî̌stunu, na plo nana̤ ta shi mî̌ anî̤ pwǎ.” A hî̌ nû̌û dě a hî̌shǔge, “Ye̤shǔkhrî̌stu mî̌ Cǒmara aphû̌khû mè̤mè̤̌ numî̌ he yṳǎ” A hî̌shǔ hǐnu) ^{▼▼Kò khwè̌nǎ lî̤phě dě khû̌lû̌kha toǒnu, toǒǒnu lî̤to̤ 8:37 htǒonu a ǒpa tò̤} 38 Kòyò htû hǐkǒdû̌ htǒotapwa̤nu a kaǎ ǒkǔ pwa̤nî tîsî̌lo̤ htǒotapwa̤. Dě Phǐlǐpo ta kòyò htû hǐkǒdû̌ htǒosò̌gini̤bò hǎte̤ shikla, dě Philǐpo plo a htû hǐkǒdû̌ htǒotapwa̤ ta shi. 39 Bǎ asî ǒ shikla ihtǒ akhanu, Běcǎ sǎcahtǐ jocû̌ hǎmǎkè Phǐlǐpo. Kòyò htû hǐkǒdû̌ htǒotapwa̤ kè̌shǐpe nû̌û tò̤ dě a ge sò̌le̤sò̌lò̤ sělěkè dě ado. 40 Phǐlǐpo sî̌ya ǐ ana̤ ta a cû̌to̤ Asadowî̤kû dě a cû̌sělěpo̤ Kèsarǐwî̤. Bǎ a cû̌ klè̌lo̤ akhanu, a dǒhtû̌ǐ bǎ kò ta Ye̤shǔkhrî̌stu a ta̤sò̌le̤sò̌lò̤ awi̤akè̌ htǒo pṳ̂̌ tî̤wî̤.