Acts 9

Saulǔ htûhtò̌ pwa̤yṳǎphû̌ tapwa̤

1Bǎnuakha Saulǔ hî̌ ǐsha Běcǎ akhophijaû̌ toǒ dě a glè ma̤si asî. A cû̌ dě pwa̤tòlûhtò̌ hǐkǒdû̌gutṳ̌ a ǒ, 2Dě a cû̌kwigwèbǎǐ nû̌ûta a glè khwè̌cû̌nṳ lî̤sasî̌ toǒ dě a khwè̌cû̌ bǎ Yṳ̌da ta̤sabahǐ htě a ǒ dě Damatè̌wî̤kûnu toǒ a ǒ. Lî̤sasî̌ htǒotoǒnu, a hî̌ cû̌ asî ta mamǔ bǎbǎ, makhû bǎbǎ, ûpèpè̌ bǎbǎ, Saulǔ dè kè̌shǐ ta asî gûma̤kû̌ Běcǎ Ye̤shǔ aklè̌ toǒ hî̌nu, a pṳ̂ asî pě dě a sûgekè asî Ye̤rǔshèlèwî̤ pě, a khwè̌cû̌ hǐnu. 3Saulǔ cû̌ dě Damatè̌wî̤ dě bǎ a cû̌to̤phǔ wî̤ akhanu, ta̤lîrakha dě mǒkhû̌ shěrakha lò̤te̤we̤ sumṳ nû̌û. 4A lòkhǔpo̤ hǎkhû̌ dě a gana̤de yo̤po̤htò̌ tûmû dě a hî̌ nû̌û, “Saulǔ, Saulǔ, na ma̤jîma̤jû cǎ he ma̤tè?”

5Saulǔ gwèshǔ yǎ, “Běcǎ꤮ na mî̌ ûpè?”

Dě ayo̤pwe̤ htǒo hî̌geshǔ nû̌û, “He mî̌ Ye̤shǔ htě na ma̤jîma̤jû yǎnu tapwa̤hǒ. 6Pwǎ̤ta ihtǒ dě cû̌nṳ wî̤kûnu. Na to ma̤kwè̌꤮ hî̌tènu, kò pwe̤ǐtû̌ na pě.”

7Kòyò htě a gûcû̌kû̌ ta Saulǔ htǒotoǒnu a gana̤de yo̤pwe̤ pwǎ̤tadě a kè̌shǐ kòyò dǐpwǎ̤꤮ tò̤ akhû̌akhî, dû꤮, a ǒkǔbò lǒkho dě a gènè̤ hî̌bǎphlope dǐcǎ꤮ tò̤. A te̤pe̤bò asî. 8Saulǔ ihtǒ dě a jipwi̤ kè̌kolohtò̌ pwǎ̤ta a kè̌shǐ dǐcǎ꤮ tò̤ akhû̌akhî, asî cǐcû̌ nû̌û dě a sûnṳ nû̌û dě Damatè̌wî̤kû. 9Dě suni̤susa akû a kè̌shǐjòtò̤, htohǒtò̤ aǎao dǐcǎ꤮ tò̤.

10Dě Damatè̌wî̤kûnu pwa̤yṳǎphû̌ htě ami̤ ta Ana̤nǐ ǒ tapwa̤. A kè̌shǐnǎwǐ ta̤htě a ta̤kè̌shǐnǎwǐ akûhtǒonu Běcǎ kaǎ yǎta, “Ana̤nǐ!” Dě a kǔ geshǔ, “Běcǎ heǒ pwǎ.”

11Dě Běcǎ hî̌ yǎ, “Ma̤wǒ mò̌ nana̤ dě cû̌ mò̌ klè̌ htě kò kaǎ ami̤ ta klè̌nò̤ hǐnu tobo dě cû̌ gwè mò̌ Tashǔwî̤phû̌ htě ami̤ ta Saulǔ dě Yṳ̌da ahǐkûnu. Khònò̤dě a kwisaba ta̤. 12Dě a kè̌shǐnǎwǐ ta, ma̤pûhǐ a kè̌shǐ gesǒ ayanu, kòyò htě ami̤ ta Ana̤nǐ hǐnu tapwa̤ hè aǒ dě a hè bè̌htò̌ acǔde dě alo̤.”

13Ana̤nǐ hî̌shǔ, “Běcǎ, kòyò htǒotapwa̤ awi̤akè̌nu, he gana̤de kò saprṳ̂ hî̌htoplṳ̂ bǎ he ta, a ma̤jîma̤jû na kòyòcahtǐ ǒ dě Ye̤rǔshèlèwî̤kûnu toǒ, yahî̌. 14Htohǒtò̤, pwa̤tòlûhtò̌ hǐkǒdû̌ toǒ ǐ a ta̤sîrîshû̌sho ma̤pûhǐ a hèpṳ̂bò kòyò lǒ̤꤮ bò htě a saba na dě Damatè̌wî̤kûnu toǒ.”

15Pwǎ̤tadě Běcǎ hî̌ yǎ, “Cû̌mò̌, ma̤tè̤hî̌dě he wû̌lǎ yǎ dě a glè dǒhtû̌ǐ hewi̤hekè̌ bǎ Yṳ̌daphû̌ mè̤tò̤ toǒ, Khwǐcophǎ toǒ ta Israelphû̌ toǒ alo̤mo̤ pě. 16Ta̤jîta̤jû lǒ̤꤮ bò htě a tobǎ khòshèwè ta hekhû̌hekhî toǒnu, he sana̤ dǔlṳtû̌ yǎta hena̤ pě.”

17Hǐnudě Ana̤nǐ cû̌nṳ dě Saulǔ ǒǐ hǐnu tama akû. Htodě a nṳdò̌htò̌ acǔde Saulǔ akhû̌ dě a hî̌ nû̌û, “Pṳwè̤ Saulǔ, ma̤pûhǐ na kè̌shǐ gesǒ wǒ ta na behtò̌belò̤ ta Běcǎ sǎcahtǐ ayanu, Běcǎ Ye̤shǔ htě a ǒlṳhtò̌hto bǎ na dě klè̌lo̤nu tapwa̤, nohè he dě naǒ hǒ.” 18Bǎnu taplǎpa ta̤htě alò̤ta tò̤phû̌bě ǒ nû̌û mi̤sǎphlǒlo̤nu lòte̤kè dě a kè̌shǐ gesǒ. Htǒotaplǎdě a ihtǒ dě a cû̌ plo gesǒ ana̤ ta shi. 19Aǎao gesǒ dě akhû̌aǎ ǒhtò̌ gesǒ.

Saulǔ dǒhtû̌ǐ bǎ kò Damatè̌wî̤kû

Dě a ǒkû̌ta pwa̤yṳǎphû̌ toǒ bǎ Damatè̌wî̤ akûnu sulǐ̤ni̤. 20Dě taplǎpa Saulǔ hǎhtò̌cû̌ totǐ Yṳ̌da ta̤sabahǐ toǒ akû dě a cû̌dǒhtû̌ǐ bǎ kò ta Ye̤shǔ awi̤akè̌ “A mî̌ Cǒmara aphû̌khû tapwa̤nu.” 21Kòyò lǒ̤꤮ bò htě a gana̤de nû̌û hî̌bǎ toǒnu, a te̤pe̤bò asî dě a hî̌ lǒkho, “A mî̌ kòyò htě a cû̌ lṳ̂ma̤si kòyò htě a saba Ye̤shǔ dě Ye̤rǔshèlèwî̤kûnu toǒ tapwa̤ mè̤tò̤ ya? A hè bǎo dě a glè hèpṳ̂ kòyò pwa̤yṳǎphû̌ toǒ ta a glè sûge kò pwa̤tòlûhtò̌ hǐkǒdû̌ toǒ a ǒ mè̤tò̤ya?” 22Saulǔ a ta̤dǒhtû̌ǐ bǎ kò htǒonu sǔ a ta̤sîrîshû̌sho dû̌hè dě a khòlṳ te̤mǎ bǎ kò ta Ye̤shǔ mî̌ Khrî̌stu mè̤mè̤̌ tapwa̤ akhû̌akhî, to̤ dě Yṳ̌daphû̌ ǒ bǎ Damatè̌wî̤ akûnu toǒ hî̌shǔgejòpe nû̌û dǐcǎ꤮ tò̤.

23Mṳni̤mṳsa yî̤hè tîkî̌ dě Yṳ̌daphû̌ toǒ ǒplǒhî̌bǎhtu nû̌û dě a shokhû̌ye̤yo̤ Saulǔ. ^a 24Pwǎ̤tadě kò pwe̤ǐsî̌yalṳ nû̌û ta kò shokhû̌ye̤yo̤ nû̌û, ma̤pûhǐ kò ma̤sinṳ nû̌û ayanu, kò ǒpo̤ǐ wî̤ takhadû̌htunu lṳmṳkhǐkhǐ lṳmṳshasha. 25Pò̤̌ta bǎ lṳmṳkhǐ akhanu, Saulǔ akhophijaû̌ toǒ shû̌nṳ nû̌û dě sû̌tòphlò̌ tama akû a htò̌jèlòte̤ nû̌û wî̤we̤htò̌yî̤gutṳ̌ takhaphû̌ akû tûkû dě a jèlò̤te̤kè nû̌û wî̤we̤khǒdû̌khlo tokho.

Saulǔ getîkhîsǒ Ye̤rǔshèlèwî̤

26Saulǔ ge Ye̤rǔshèlèwî̤ dě a jipwi̤ bǒsû̌khǎkho ana̤ ta pwa̤yṳǎphû̌ toǒ hǐnudě asî ǐshabò nû̌ûla̤. A htû pwa̤yṳǎna̤ǎphû̌ tapwa̤ hǐnudě asî yṳǎ nû̌û tò̤. 27Htǒotaplǎdě Banabǎ ma̤jè nû̌û dě a kaǎcû̌ nû̌û pwa̤nophû̌ toǒ a ǒ. Dě a pwe̤ǐ sî̌yalṳ bǎ asî ta Saulǔ kè̌shǐ Běcǎ Ye̤shǔ bǎ a cû̌ dě Damatè̌wî̤ akhanu, htodě Běcǎ pwe̤ǐlṳhto bǎ nû̌û ta awi̤akè̌ toǒ. Htohǒtò̤ Banabǎ pwe̤ǐlṳpo̤ bǎ asî ta Saulǔ dǒhtû̌ǐ khukhuhaha bǎ Damatè̌wî̤phû̌ toǒ ta Ye̤shǔ awi̤akè̌. 28Hǐnudě Saulǔ ǒkû̌dǒta asî dě a cû̌shido dǒhtû̌ǐ khuha bǎ kò ta Běcǎ awi̤akè̌ Ye̤rǔshèlèwî̤kû pṳ̂̌꤮ tò̤glò. 29A dǒhtû̌ǐphlo hî̌gehî̌le̤shǔ ta Yṳ̌daphû̌ htě a hî̌bǎ Greek ayo̤ toǒ hǐnudě asî jipwi̤ kè̌lǎ klè̌ dě a glè ma̤si nû̌û. 30Bǎ pwa̤yṳǎphû̌ toǒ gana̤de ta̤wi̤ta̤kè̌ htǒo akhanu, asî kaǎhtò̌ cû̌kè Saulǔ Kèsarǐwî̤ dě sûcû̌kè nû̌û Tashǔwî̤.

31Hǐnudě bǎnuakha pwa̤yṳǎta̤ aprṳ̂ahophû̌ htě a ǒ dě Yṳ̌daga, Galilî̌aga, Shamarî̌taga htǒo akû toǒ ǒgûjûkabǎ nǒkû̌ pwǎ kò. Běcǎ sǎcahtǐ akhû̌akhî, pwa̤yṳǎta̤ aprṳ̂ahophû̌ toǒ akhû̌aǎ shû̌htò̌shohtò̌, asî nî̤khû̌nî̤ǎ, asî ǒwo̤ǒplṳ̂htò̌ ta ǒhtûpwa̤ lǒkho dě ta̤bè̌dubè̌na̤ Běcǎ akû.

Petru cû̌to̤ dě Lǔdawî̤ ta Yǔpewî̤kû

32Petru cû̌shidobò gûla̤ pṳ̂̌꤮ tò̤glò. Taplǎpe dě a cû̌ǒlè kû̌dǒ pwa̤yṳǎna̤ǎphû̌ htě a ǒ dě Lǔdawî̤nu toǒ. 33Dě a cû̌ kè̌shǐ glashǔ ta kòyò sitokho htě ami̤ ta Èněa ǒ bǎnu tapwa̤, a hǎmoǒ ǒpwǎ la̤mi̤kû dě a ihtǒbò̌tò̤nu a ǒ anělǐ̤sǒ hǒ. 34Dě Petru hî̌ yǎ, “Èněa꤮ Ye̤shǔkhrî̌stu ma̤bǎge na hǒ. Ihtǒ dě tûlûwǒ na la̤mi̤nu” dě Èněa ihtǒ tṳplṳtî̤wî̤. 35Kòyò lǒ̤꤮ bò ǒ Lǔdawî̤kû ta Sharo ya̤dakhû̌ toǒnu a kè̌shǐ ta̤ma̤htûhtò̌ pwǐhè̌o akhû̌akhî, a yṳǎna̤ǎ kû̌bò Běcǎ.

36Bǎ Yǔpewî̤kûnu mamǔ htě a yṳǎna̤ǎ Ye̤shǔnu ǒ tapwa̤. Ami̤ mî̌ Tabitǎ (Greek yo̤ mî̌ ami̤ ta Dòka, amûasǎ mî̌ tikhi tado) a ta̤akhîakha lǒ̤꤮ bònu a ma̤bwǐma̤sîrî bǎ kòhǔwa̤ htodě ma̤shû̌ma̤jo bǎ kòyò shuphǔshèwèphû̌ toǒ. 37Bǎnukha asha dě a sikè. Alṳto̤ htǒonu, kò ushò̌mṳ̂plî wǒhto yǎta shi dě kò bè̌ nû̌û hǐdǒkû akhû̌to̤to̤. 38Lǔdawî̤ htǒonu, a ǒphǔ ta Yǔpewî̤ akhû̌akhî, bǎ pwa̤yṳǎphû̌ toǒ gana̤de ta Petru ǒ Lǔdawî̤ akhanu, asî nocû̌ kòyò sò̌gini̤ a ǒ dě a nocû̌ kwigwèbǎǐ nû̌û, “Khòsò̌do ma̤phwèphwè dě hèphwè pa ǒnu!”

39Dě Petru tîwî̌tòwòhtò̌nṳ ana̤ dě a hǎhtò̌cû̌plǒ kû̌ta asî. A cû̌to̤ asîǒ akhanu, asî kaǎhtò̌ nû̌û hǐdǒkû akhû̌to̤to̤. Dě mamǔǒkhwè̌ toǒ ǒbò lǒkho bǎnu dě asî ihtǒ hǎ te̤we̤bò lǒkho Petru dě a dǔlṳ Petru hǐdo ta hǐdokhlo sîtoǒ htě Dòka shò̌ bǎ asî bǎ a ǒhtûpwa̤ kû̌dǒpe ta asî akhanu.

40Petru nohǎhtò̌kèbò kòyò akhlo dě a gene̤lò̤ kwisaba. Htodě a htû̌tiwǐ kè̌cû̌ Dòka lṳto̤ la̤ǒnu dě a hî̌, “Tabitǎ꤮ ihtǒ” a hî̌ dě Tabitǎ kè̌htò̌ dě a kè̌shǐ Petru akha, a ihtǒ hǎnòò̌. 41Petru yṳ̂hè acǔde dě a cǐihtǒ nû̌û. Htodě a kaǎnṳ gesǒ pwa̤yṳǎphû̌ toǒ ta mamǔǒkhwè̌ toǒ dě a dǔlṳ asî ta mamǔ htě a htûpwa̤gesǒ htǒotapwa̤. 42Ta̤wi̤ta̤kè̌ htǒonu, a lṳpîshîcû̌ to̤bò dě Yǔpewî̤ sagala̤ dě kò yṳǎna̤ǎ plṳ̂ Běcǎ. 43Petru ǒni̤ǒsa yî̤kû̌po̤pe ta asî bǎnu dě Shîmǒ̤nè̤ hǐ Yǔpewî̤kûnu. Shîmǒ̤nè̤ mî̌ kòyò htě a ma̤htò̌ ta̤kî̌ta̤kû̌ htǒotoǒnu ta ta̤phû̌ta̤li̤ aphě tapwa̤.