Acts 1

1Saradû̌ Sòphǐlǔ, tèhtò̌ bǎ Běcǎ Ye̤shǔ ma̤ Cǒmara ata̤ma̤nu ti̤ni̤ to̤htû̌ Cǒmara kaǎge kihtò̌ nû̌ûnu ti̤ni̤ awi̤akè̌ ta a ta̤sû̌ǐtòwòǐ lǒ̤꤮ bò toǒnu he khwè̌mǎǐhtobò yǎ lî̤ awǐgutṳ̌nu tabǎ akû hǒ. ^a 2Bǎ kò kaǎge kihtò̌ yǎ dě mǒkhû̌ hǒtò̤nu, Běcǎ sǎcahtǐ a ta̤po̤ta̤phǎ akhû̌akhî, a mǎnǎ a pwa̤nophû̌ htě a wû̌lǎhto nû̌ûnu toǒ ta asî bǎ ma̤ta̤ toǒ awi̤akè̌. 3A khòsihto ana̤ dě a htûpwa̤gesǒ, htodě nǒkò ani̤ li̤shi akûnu, a dǔlṳplṳ̂ ana̤ ta akhophijaû̌ toǒ, ta a dǒhtû̌ǐ asî Cǒmara ashiaga awi̤akè̌. Akhophijaû̌ toǒ kè̌shǐ a dě asò̌phlǒ sǔǔsewe̤ lǒkhope tò̤. Asî yṳǎ sapwa̤sali̤ ta a htûpwa̤ mè̤mè̤̌. 4Bǎ a ǎohtuta akhophijaû̌ htǒotoǒ akhanu, a mǎnǎ asî, “Hǎhtò̌cû̌kè lǒkho pûma̤ Ye̤rǔshèlèwî̤kûnu hǒma. Ǒpo̤sělě lǒkho bǎnu to̤htû̌ sî nî̤bǎ sû htě he pwe̤ǐnǎhto sî ta hepha olò̤ dě a bǎ ǐ sî pěnu nî̌꤮.” ^b 5Htohǒtò̤ a hî̌po̤ asî, “Jowǎ̤ni̤ plo bǎ kò ta shi, pò̤̌ta yî̤hǒtò̤ pěnu kò plo bǎ sî ta Běcǎ sǎcahtǐ pě.” ^c

Ye̤shǔ kihtò̌ dě mǒkhû̌

6Bǎ pwa̤nophû̌ toǒ hè kè̌shǐ glashǔsǒ nû̌û dě Ye̤shǔ ǒ akhanu, a gwè Ye̤shǔ, “Běcǎ, khònò̤htǒomî̌ khîkha bǎ ta na glè̌ ǐgesǒ Israelphû̌ toǒ ashiganu hǒya?”

7Dě Ye̤shǔ hî̌shǔ asî, “Ta̤akhîakha ta mṳni̤mṳsa toǒ numî̌ a htûhtò̌ bò̌khòtè pěnu, sî lo̤bǎ sî̌ya tò̤. A htûhtò̌tû̌ ta pha a ta̤sîrîshû̌sho pwǎ. 8Pwǎ̤tadě bǎ Běcǎ sǎcahtǐ hèlò̤ dě sîlo̤ pě akhanu, sî lǒbe ta ta̤shû̌ta̤sho pě. Dě sî glè htûhtò̌ bǎ he pwa̤lò̤sasî̌ toǒ dě Ye̤rǔshèlèwî̤kû, ta Yṳ̌da sagala̤, ta Shamarî̌taga htohǒtò̤ a to̤bò hǎkhû̌teběbò pě,” a hî̌hǐnu. ^d

9Ye̤shǔ hî̌bǎ htodě bǎ akhophijaû̌ toǒ ò̌tò̤mò̤kè̌ yǎ akhanu, Cǒmara kaǎ kihtò̌kè nû̌û ta poǒlṳ dě mǒkhû̌, dě asî kè̌shǐpe nû̌û tò̤. ^e

10Bǎ asî ò̌tò̤mò̤htò̌ shope̤pe dě mǒla̤ akhanu, kòyòsò̌gini̤ sǒǐ hǐdopo̤to̤bû dě hèǒihtǒ lṳhtò̌sumṳsòtò̤ asî kòshî̌. 11Dě a hî̌ asî, “Galilî̌aphû̌ toǒ, sî cû̌ ihtǒ ò̌tò̤mò̤htò̌ lǒkho cǎdě mǒla̤ bǎo ma̤tè? Ye̤shǔ htě sî kè̌shǐ Cǒmara kaǎge kihtò̌kè yǎ dě mǒkhû̌ htǒotapwa̤nu a hèlò̤ gesǒ pwǐ sî kè̌shǐ a gekihtò̌ khònò̤htǒonu pě.” 12Htodě akhophijaû̌ toǒ ǒ Olives kholokhû̌ dě a gekhîsǒ lǒkho Ye̤rǔshèlèwî̤. Ye̤rǔshèlèwî̤ htǒonumî̌ a ǒyî̤ ta kholohtǒo mè̤ takama pwǎ. 13Asî geto̤ bǎ Ye̤rǔshèlèwî̤kû dě a cû̌htò̌nṳ hǐ htě asî la̤cû̌ǒkǔ teděsǎphû̌ htǒǒnutama dě akhû̌to̤to̤. Dě asî ǒ bǎnu mî̌ Petru, Jowǎ̤ni̤, Jǎgomo̤, Adrěa, Phǐlǐpo, To̤mǎ̤jo, Batolomě̤o, Matěo, Alphěo, aphû̌khû Jǎgomo̤, Shîmǒ̤nè̤ htě a mo̤ǐ ashiaga htǒotapwa̤ ta Jǎgomo̤ aphû̌khû Yṳ̌da sîtoǒ pwǎ. ^f 14Asî htǒotoǒnu a hè kè̌shǐ glashǔplǒ sala̤la̤ ta mamǔ ahǔwa̤ ta Ye̤shǔ amo̤ Marǐa ta Ye̤shǔ a pṳmakhû toǒ dě asî kwisabahtubò nû̌û bǎnu.

Wû̌lǎ kòyò htě a tohtò̌ Yṳ̌da agûla̤

15Ti̤ni̤khanu, pwa̤yṳǎphû̌ htě a phǔ꤮ ǒ apwa̤ ta̤ya̤gini̤shi htǒonu a hè ǒhtuhî̌bǎplǒ bǒsû̌khǎkho nû̌û. 16Dě Petru ihtǒhî̌, “Pṳwè̤ sî꤮, lî̤cahtǐ hî̌nǎhto Yṳ̌da htě a yṳ̂ bǎ kò klè̌ dě a nopṳ̂ kò ta Ye̤shǔ htǒo awi̤akè̌. Dě Běcǎ sǎcahtǐ nohî̌bǎ Khwǐdǎ̤wi̤ ta awi̤akè̌ htǒotoǒ numî̌ a tobǎ lǒhtò̌behtò̌ nòpwǎ. 17A mî̌ a ǒhtubǎkû̌ pa aprṳ̂ahokla tapwa̤ dě kò wû̌lǎdǒ yǎ dě a glè ma̤plǒhtu ta pa.”

18(Wû htě Yṳ̌da ma̤nṳ dě ta̤phû̌mò̤shî̌hto akû htǒonu a pwî̤ nû̌ûta hǎkhû̌ ta̤la̤ dě a lò̤te̤si phupo̤phò̌ bǎnu dě aphuabwe toǒ hǎhtò̌bò. ^g 19Kòyò ǒ bǎ Ye̤rǔshèlèwî̤ toǒ gana̤de lǒkho ta̤ma̤ana̤ htǒo dě a kaǎ lǒkho tû̌ gûla̤ htǒotò̤glò ami̤ ta ayo̤. Dě asî kaǎ nû̌ûta “Akeladama” amûasǎ mî̌ a hî̌ ta “Ta̤sǐ dokla.”)

20“Kò khwè̌nǎ dě ta̤htû̌sò̌ǐlî̤ akûnu a hî̌,

‘Ahǐ ǒsî̌tukǔkè tû̌ pě nî̌꤮ kò bǎ nṳǒ pû dě hǐhtǒo akûnu dǐpwǎ̤꤮ ma̤ nî̌꤮.’ ^h

Htodě a hî̌po̤,

‘Kò nṳma̤tû̌ agûla̤ tapwa̤ pě nî̌꤮.’ ⁱ

21– 22Hǐnudě kòyò tapwa̤pwa̤ tobǎ nṳǒplǒ ta pa dě a bǎ khòlṳ asò̌ ta Běcǎ Ye̤shǔ sihtûpwa̤gesǒhtǒo awi̤akè̌. Kòyò htě pa glè̌ wû̌lǎ tèplè̌ yǎ htǒotapwa̤ numî̌, bǎ Ye̤shǔ cû̌htukhahtu kû̌pe ta pa bǎ hǎkhû̌bǎo akha, htohǒtò̤ tèhtò̌ bǎ Jowǎ̤ni̤ plo bǎ kò shi tǒ̤hè dě Cǒmara kaǎge kihtò̌kè Běcǎ Ye̤shǔ dě mǒkhû̌nu, bǎnukha a mî̌ a tobǎ htû kòyò htě a ǒhtukhahtu kû̌ta pa pṳ̂̌꤮ plǎ tapwa̤,” Petru hî̌ hǐnu. ^j

23Dě asî pwe̤ǐlṳhtò̌ kòyò sò̌gini̤ htě ami̤ ta Jǒjè, kòyò toǒǒ kaǎ nû̌ûta Basabǎ (tò̤hî̌kǎlè̌ Justus) ta Matǐa. 24Htodě asî kwisaba lǒkho, “Kǒ Běcǎ na sî̌ya tû̌ kòyò sò̌phlǒ ata̤gènè̤ toǒ akhû̌akhî, dě kòyò htǒosò̌gini̤ aklanu na wû̌lǎhto yǎ bǎtè tapwa̤, 25Htohǒtò̤ kòyò htě na wû̌lǎhto yǎ htǒotapwa̤ ma̤pûhǐ a phî̌nṳ pwa̤nophû̌ Yṳ̌da htě a wîkè a ta̤phî̌ta̤ma̤ htǒotapwa̤ agûla̤nu, dǔlṳhtò̌ bǎ pa khònò̤. Yṳ̌da mî̌ a sikèhǒ dě a cû̌tû̌ klè̌ htě a tota anu hǒ.” 26Htodě ma̤pûhǐ asî wû̌lǎ htǒosò̌gini̤ akla tapwa̤nu dě asî bǒ lǒkho ta̤bèbwǐ tacǎnu a lò̤te̤to bǎ Matǐa. Dě kò shû̌nṳ kû̌dǒ yǎ dě pwa̤nophû̌ shǐtapwa̤ aprṳ̂ahohtǒo akû.