Act 19 | KxfSCKRC | STEP | Bǎ Apò̌lu ǒbǎ Kòrî̌tiawî̤kû akhanu, Pò̌lu cû̌tûlû̌kè Galatǐaga ta Pǐsidǐaga, dě a cû̌to̤ dě Ephè̌shiawî̤kû. A kè̌shǐ ta pwa̤yṳǎphû̌ toǒ bǎ Ephè̌shiawî̤kûnu.

a Matěo 3:11; Mǎ̤riko 1:4, 7, 8; Lǔka 3:4,16; Jowǎ̤ni̤ 1:26,27

Acts 19

Pò̌lu cû̌ dě Ephè̌shiawî̤

1 Bǎ Apò̌lu ǒbǎ Kòrî̌tiawî̤kû akhanu, Pò̌lu cû̌tûlû̌kè Galatǐaga ta Pǐsidǐaga, dě a cû̌to̤ dě Ephè̌shiawî̤kû. A kè̌shǐ ta pwa̤yṳǎphû̌ toǒ bǎ Ephè̌shiawî̤kûnu. 2 Dě a gwè asî, “Bǎ sî yṳǎna̤ǎta̤ akhanu, sî nî̤bǎhtokû̌ Běcǎ sǎcahtǐ hǒya?”

Dě asî hî̌shǔ nû̌û, “Pa nî̤bǎ kû̌nǒ hǒtò̤. Htodě Běcǎ sǎcahtǐ ǒ hî̌nǔ, pa gana̤denǒ kû̌kò dǐkhò̌꤮ tò̤.”

3 Pò̌lu gwè asî, “Dè ma̤hǐnudě sî plo lǒkho shi hî̌tè tacǎtè?”

Dě asî hî̌shǔ nû̌û, “Pa plobǎ pwǎ Jowǎ̤ni̤ plo panu pwǎ.”

4 Dě Pò̌lu hî̌ asî, “Jowǎ̤ni̤ plopwǎ kòyò htě a yò̤lò̤ge asò̌nu toǒ aya pwǎ. A hî̌ kòyònu toǒ ta yṳǎna̤ǎ pwa̤ htě a glè̌ hè anǒkò htǒonu tapwa̤ nî̌꤮, a mî̌ Ye̤shǔ hǒ.” ^a 5 Asî gana̤de a hî̌ asî pwǐhè̌o dě, asî plo lǒkho ana̤ ta shi dě Běcǎ Ye̤shǔ ami̤akû. 6 Bǎ Pò̌lu bè̌htò̌ acǔde dě asîlo̤ akha, Běcǎ sǎcahtǐ hèlò̤ asîlo̤ dě Běcǎ sǎcahtǐ akhû̌akhî, asî hî̌bǎhǎhtò̌po̤ ta̤hî̌bǎ htě a khǒ toǒ dě a dǒhtû̌ǐ lǒkho bǎ kò ta Cǒmara ale̤ayo̤ toǒ. 7 Lǒ̤꤮ bò numî̌ a ǒ shǐsò̌gini̤ pwǎ.

8 Pò̌lu cû̌nṳ ta̤sabahǐkû dě a dǒhtû̌ǐ khuha ta kòyò saprṳ̂ bǎnu sula akû. Pò̌lu dǒhtû̌ htè̌kè̌khî asî ta, Cǒmara ashiga awi̤akè̌ dě a cǐnṳhtěnṳ asî sò̌phlǒ. 9 Pwǎ̤tadě toǒǒnu a nò̌kulǎdu dě yṳǎ kû̌kò tò̤. Dě a pi̤jishǐcǒ lǒkho Běcǎ aklè̌aklò htě kò dǔlṳ htǒonu dě kòyò tṳ̂prṳ̂taphǎ lo̤mo̤. Hǐnu akhû̌akhî, Pò̌lu hǎhtò̌cû̌ tephekè ta asî. Dě a kaǎnṳ akhophijaû̌ toǒ dě pṳ̂̌ni̤ni̤꤮ a ta akhophijaû̌ toǒ cû̌ dǒhtû̌ǐ plǒnû̌û htě kò kaǎ yǎta sara Turǎnǔ la̤sû̌ǐta̤ gûla̤nu tò̤glò. 10 Dě a cû̌ ma̤plǒ ta̤ bǎnu ginǐ̤ně. Hǐnudě lǒ̤꤮ bò Yṳ̌daphû̌ ta Yṳ̌daphû̌ mè̤tò̤ toǒ htě a ǒ dě Ashǎgakû toǒ gana̤de bǎdǒ Běcǎ ale̤ayo̤.

Sakeba aphû̌makhû toǒ wṳ̂hǎhtò̌kè̌dǒ Khînǎkhîno

11 Cǒmara ǐ Pò̌lu ta̤cǒklî̌kî̌ya htě adû̌ayǒ toǒ. 12 Hǐnu akhû̌akhî, Pò̌lu noǎǐ a khǔphophû̌ toǒ ta a hǔgòpwî̌phû̌ htě a la̤codǐdòbǐ alo̤mo̤ dě a noǎǐhto toǒnu, kò dè phî̌cû̌ yǎdě kòyòshǐkòyòsha toǒ a ǒ, ta khînǎkhîno ma̤sha nû̌û toǒ a ǒ hî̌nu, a ta̤shǐta̤sha hǎmǎkè. Htodě khînǎkhîno toǒ hǎhtò̌khlè̌ tephekèbò.

13 Yṳ̌daphû̌ htě a cû̌shido wṳ̂hǎhtò̌kè khînǎkhînonu a ǒ toǒ. Asî cû̌ wṳ̂hǎhtò̌kè khînǎkhîno ta Ye̤shǔ ami̤. Asî hî̌ khînǎkhîno toǒ ta, “Pò̌lu dǒhtû̌ǐ nû̌ûmi̤ Ye̤shǔ htǒotapwa̤ akûnu, he nohǎhtò̌cû̌kè sî,” a wṳ̂hǎhtò̌ kû̌ hǐnu. 14 Yṳ̌daphû̌ pwa̤tòlûhtò̌ hǐkǒdû̌ htě ami̤ ta Sakeba htǒotapwa̤nu, a phû̌makhû ǒ susǒtapwa̤. Aphû̌ htǒotoǒ numî̌ a wṳ̂hǎhtò̌ lǒkho khînǎkhîno hǐnu toǒhǒ. 15 Pò̤̌ta khînǎkhîno hî̌shǔ asî, “Ye̤shǔ mî̌ he sî̌ya. Pò̌lu mî̌ he sî̌yaya. Pwǎ̤tadě he sî̌ya sî tò̤. Sî mî̌ ûpè?” 16 Kòyò htě khînǎkhîno ma̤sha yǎ htǒotapwa̤nu, a pe̤htò̌ asîlo̤ dě a ma̤pè̤bò asî. Hǐnudě khînǎ ma̤sha plṳ̂ asî dě asî khlè̌hǎhtò̌ kûglebò lǒkho dě hǐdòkhû̌.

17 Lǒ̤꤮ bò Yṳ̌daphû̌ ta Greek khlilèphû̌ ahǔwa̤ htě a ǒ bǎ Ephè̌shiawî̤kûnu toǒ gana̤debò ta̤ma̤htûhtò̌ ana̤ htǒotacǎ. Dě asî ǐshabò dě asî bè̌dubè̌na̤, htû̌sò̌ǐ lǒkho Běcǎ Ye̤shǔ ami̤. 18 Pwa̤yṳǎphû̌ toǒ hèplṳ̂hèphǎ Pò̌lu ǒ dě asî hè olò̤mè̤lò̤ lǒkho kòyò tṳ̂prṳ̂taphǎ a lo̤mo̤, Htodě asî dǔlṳhtò̌ lǒkho a ta̤ma̤phû̌mò̤shî̌hto htě asî ma̤htonu toǒ. 19 Kòyò htǒotoǒ aklanu, toǒǒ mî̌ a htû khînǎkhîno sara dě a phî̌hènṳ lǒkho alî̤, a cû̌sû̌ǐdǒ ta̤ma̤htǒo dě kòyòlo̤ awi̤akè̌nu toǒ dě a hè shû̌gèkè nû̌ûta mî̌ bǎ kòyò tṳ̂prṳ̂taphǎ a lo̤mo̤. Asî dǒbǎbò lî̤ htǒotoǒ apwî̤nu, a lòte̤ wûyî̌ yè̌sò̌ gûla̤. 20 Dě Cǒmara ta̤po̤ta̤phǎ ǒlṳhtò̌ ta aklè̌aklò pwǐhè̌o akhû̌akhî, Cǒmara ale̤ayo̤ lṳpîshî cû̌lè̤htò̌po̤ dě a dû̌htò̌htûhtò̌ hèpo̤ alo̤mo̤.

Ta̤shû̌shǎ ǒhtò̌ dě Ephè̌shiawî̤kû

21 Ta̤ma̤ana̤ pwǐhè̌otoǒ htodě Pò̌lu bè̌lò̤ asò̌phlǒ ta a glè cû̌shido Makedò̌niaga ta Akhayaga dě a cû̌tûlû̌ Ye̤rǔshèlèwî̤ pě. Htodě a hî̌, “He cû̌hto Ye̤rǔshèlèwî̤ dě he bǎ cû̌ hèpo̤ Rò̌mǎwî̤ pě.” 22 Bǎ a cû̌ ǒkǔ Ashǎga teděsǎ akhanu, a nocû̌ Timò̤̌te ta Erǎtǔ htě a ma̤jè nû̌û htǒosò̌gini̤nu dě Makedò̌niaga.

23 Bǎnukha, kò yṳǎ Běcǎ Ye̤shǔ aklè̌aklò akhû̌akhî, ta̤pò̤ta̤sha dû̌꤮ tacǎ ǒhtò̌ dě Ephè̌shiawî̤kû. 24 Pwa̤lòwû htě ami̤ ta Demetarǐ htǒotapwa̤nu, alòwûabǒhtò̌ Běcǎ mo̤ Aratemǐ ^{▼▼Ma̤pûhǐ Greekphû̌ toǒ phû̌ǒplṳ̂ pě ayanu, asî lṳhtò̌ lǒkho Běcǎ mo̤ Aratemǐ.} ta̤lṳhtò̌hophû̌ htě alò̤ta wû toǒ dě pwa̤ma̤ta̤ toǒ nî̤bǎdû̌ kû̌ mè̤mè̤̌ ta ta̤phî̌ta̤ma̤ htǒo akhû̌akhî. 25 Hǐnu akhû̌akhî, a kaǎhtubò apwa̤ma̤ta̤ toǒ ta pwa̤ma̤ta̤ htě ata̤ma̤ sǒsǒ yǎ ahǔwa̤ toǒ dě a hî̌ asî, “Pṳwè̤ toǒ꤮, pa dû̌yò̤htò̌sa pwǎ̤ta pa ta̤phî̌ta̤ma̤ htǒotacǎ akò pwǎ numî̌ sî sî̌yatû̌ hǒ. 26 Pò̌lu htǒo tapwa̤nu a ma̤kwè̌꤮ hî̌tè numî̌ sî kè̌shǐgana̤debò tû̌ ta sîna̤ hǒ. A cû̌ lǒǎplò̤ǎ pî̌bò kòyò ta Cǒmara htě kòyò bǒyǎta acǔde toǒnu, Cǒmara mè̤ dî̌kî̌꤮ tò̤, a hî̌ hǐnu. Dě a lǒǎplò̤ǎnṳ plṳ̂ kòyò ǒbǎ Ephè̌shiawî̤kû htǒo toǒnu tû̌ mè̤tò̤, a phǔ lǒǎplò̤ǎ nṳbò Ashǎga sagala̤ hǒ. 27 Hǐnudě, ǐsha ta pa ta̤phî̌ta̤ma̤ htǒo pî̌kè. Htohǒtò̤ he bǎgu ta pěmî̌ kò bè̌dubè̌na̤ kû̌pe Běcǎ mo̤ Aratemǐ a ta̤lṳhtò̌ho tò̤. Ashǎga sagala̤ ta hǎkhû̌tebě sabahtò̌bò Aratemǐ. He bǎgu ta Běcǎ mo̤ Aratemǐ ami̤ lṳshilṳga htǒonu, pěmî̌ a hǎmǎkè hè̌.”

28 Pwa̤ma̤ta̤ htǒotoǒ gana̤de ta̤hî̌bǎ htǒotoǒ dě asî sò̌phlǒdû̌ jòjî̌꤮ tò̤, dě asî yi̤kǒhtò̌bò ta, “Ephè̌shia Běcǎ mo̤ Aratemǐ htǒotapwa̤ mî̌ a sîrîdû̌sîrîhtû mè̤mè̤̌!” 29 Ta̤pwe̤la̤sò̌go ǒhtûhtò̌ dě a pîshîcû̌bò tî̤wî̤. Kòyò saprṳ̂ pṳ̂mě Makedò̌niaphû̌ Kayǔ ta Arǐtakǔ htě a cû̌ nṳsû̌nṳkho kû̌ta Pò̌lu htǒosò̌gini̤. Dě kò cǐcû̌ asî dě kò la̤dǔlṳ ta̤lò̤we̤lò̤so agûla̤ bǎ wî̤kûnu. 30 Pò̌lu sò̌yṳ cû̌ dǔlṳ ana̤ dě kòyò saprṳ̂ toǒ a lo̤mo̤ dě pwǎ̤tadě pwa̤yṳǎphû̌ toǒ ǐcû̌yǎ tò̤. 31 Pò̌lu a khobǒsû̌ htě a htû Ashǎga hǐkǒdû̌nu toǒ bǎbǎ, a nosûhè ta̤wi̤ta̤kè̌ a ǒ dě a kwigwèbǎǐ nû̌ûta nohè dǔlṳ pûma̤ ana̤ dě kò la̤lò̤we̤lò̤so agûla̤ htǒonu ma̤ a pwe̤ǐlṳ cû̌ nû̌û hǐnunu.

32 Bǎnuakha, kòyò htě a hèǒplǒ lǒkho bǎnu toǒ ma̤shû̌shishû̌shǎ pi̤ti̤pṳ̂tṳ̂ dě tapwa̤ tacǎcǎ a yi̤kǒhtò̌bò lǒkho. Asî hè ǒhtuǒplǒbò lǒkho bǎnu ta ta̤wi̤ta̤kè̌ mî̌titè꤮ nu a sî̌ya lǒkho ana̤tò̤ toǒnu, a glè̌ phǔbò pṳ̂̌pwa̤. 33 Yṳ̌daphû̌ toǒǒnu a nohǎhtò̌ Alexander dě kòyò saprṳ̂ a lo̤mo̤, dě kòyò saprṳ̂ htǒotoǒ hî̌ nû̌û ta hî̌bǎ mò̌ pa. Dě Alexander yṳ̂htò̌ acǔde dě pwǎpwǎ anoǒ asî. Dě a hî̌lṳphlo bǎ kòyò saprṳ̂ htǒotoǒ ta ta̤ma̤htûhtò̌ ana̤ toǒ. 34 Pwǎ̤tadě bǎ asî sî̌ya ta a mî̌ Yṳ̌daphû̌ tapwa̤pwǎ akhanu, asî yi̤kǒhtò̌ plǒbò nû̌û dě a hî̌ lǒkho, “Ephè̌shia Běcǎ mo̤ Aratemǐ numî̌ asîrîdû̌ mè̤mè̤̌! A yi̤kǒhtò̌ htǒonu, a phǔ ǒyî̤ ginǐ̤na̤rî.”

35 Nǒkò dě wî̤ a pwa̤khwè̌lî̤ htǒotapwa̤nu pwǎpwǎ noǒ kòyò saprṳ̂ htǒotoǒ, dě a hî̌ asî, “Ephè̌shiawî̤phû̌ lǒ̤꤮ bò sî꤮, kò pṳ̂̌꤮ tapwa̤ sî̌ya ta pa Ephè̌shiawî̤phû̌ toǒmî̌ pwa̤ htě akè̌ǐkhwè̌ǐ Běcǎ Khwǐmo̤ Aratemǐ ta̤lṳhtò̌ho ta lo̤cahtǐ htě a ǒ dě mǒkhû̌ lò̤te̤nu tama numî̌ kò sî̌ya lǒkho pṳ̂̌꤮ tapwa̤. 36 Kò htè̌bǐma̤bǐ jòpe ta ta̤wi̤ta̤kè̌ htǒotoǒ dǐpwǎ̤꤮ tò̤. Ma̤hǐnudě, pwǎpwǎ sî to ǒ lǒkho dě sî lo̤bǎ ma̤bǐma̤ǒ hǒtò̤. 37 Kòyò htě sî kaǎhè yǎ bǎo toǒ numî̌ kòyò htě a pṳ̂sigwiphî̌saphǎ kòta̤ dě ta̤lṳhtò̌hokûnu toǒ ta a pi̤jishǐcǒ pa Běcǎ mo̤nu toǒ mè̤tò̤. 38 Demetarǐ ta apwa̤ma̤ta̤ htǒotoǒnu, a dè sò̌yṳ bè̌ kò ta̤sǔ tapwa̤pwa̤ hî̌dě anî̤ pwǎ. Ma̤tè̤hî̌dě ta̤cèròho bòmo pwǎ, htodě akhîakha topwǎ ta pwa̤cèròta̤ toǒ hèǒto lǒkho bǎo pwǎ. Bǎtè tṳ̂prṳ̂ bǎbǎ, a dè bè̌htò̌ kòta̤sǔ dě kòyòdû̌ǒ, dě a dè sò̌yṳ hî̌bǎ kò ta kòyòdû̌ hî̌numî̌ anî̤ pwǎ. 39 Pwǎ̤ta ta̤cèrò ahǔwa̤ dè ǒkhǒpo̤ tû̌ hî̌dě, asî tobǎ cèrò bǎ Khwǐ la̤klo kaǎǒhtuhî̌bǎplǒ shiphû̌gaphû̌ akhanu. 40 Ta̤htûhtò̌ ana̤ khò̌ti̤ni̤ akûnu, pa ǐsha ta Rò̌mǎphû̌ toǒ bè̌ pa ta̤sǔ dě a glè hî̌ pa ta sî ma̤dû̌htò̌ ta̤shû̌shishû̌shǎ hǐnu. Ta̤shû̌shishû̌shǎ htûhtò̌dû̌ pwǐhè̌onumî̌, pa hî̌bǎlû̌htò̌jò tû̌ pana̤ dǐcǎ꤮ tò̤. Ta̤shû̌shishû̌shǎ htûhtò̌ ta ta̤wi̤ta̤kè̌ hî̌tènu, pa pwe̤ǐlṳjò bǎ nǒ kò dǐcǎ꤮ tò̤.” 41 A hî̌hto pwǐo dě, a plûgekèbò kòyò saprṳ̂ htǒotoǒ.