Ephesians 1
1He mî̌ Pò̌lu. Cǒmara sò̌phlǒǒ dě he glè htû Ye̤shǔkhrî̌stu a pwa̤nophû̌ tapwa̤. He khwè̌cû̌ lî̤htǒotabǎ dě Cǒmara akòyò htě a ǒ lǒkho dě Ephè̌shiawî̤kûnu toǒ a ǒ. Sî mî̌ kòyò toǒ htě a htûhtò̌ ta Khrî̌stu tacǎ꤮ pa, sî wîkè sî ta̤yṳǎ Ye̤shǔkhrî̌stu tò̤. a 2Papha Cǒmara ta Běcǎ Ye̤shǔkhrî̌stu ǐtû̌ sî ta̤bwǐta̤sîrî ta ta̤gûjûkabǎ nî̌꤮.A ta̤howi̤ sû̌sò̌ tokho dě Khrî̌stu akû
3Pa htû̌sò̌ǐ plǒnû̌û pa Běcǎ Ye̤shǔkhrî̌stu apha Cǒmara htǒotapwa̤ hò̌꤮. A ǐlò̤ pa ta̤howi̤ pṳ̂̌꤮ tacǎ htě a ǒ mǒkhû̌ hèhtǒo, dě a ma̤jè pa sû̌sò̌ tokho ata̤lo̤bǎnu toǒ pě. Bǎ pa htǒotoǒ ta Khrî̌stu htûhtò̌ nû̌û tacǎ꤮ pa akhanu, a ǐlò̤bò panu toǒ hǒ. 4Ma̤tè̤hî̌dě, Cǒmara a lo̤mo̤ pěnu, ma̤pûhǐ pa cahtǐ dě kò ǐjòpe pû pa ta̤sǔ dǐcǎ꤮ tò̤nu, a wû̌lǎ pa dě Khrî̌stu akû, bǎ a bǒlò̤ hǎkhû̌ hǒtò̤ akhape. 5Cǒmara mo̤ǐ pa akhû̌akhî, bǎ꤮ a bǒlò̤ hǎkhû̌ hǒtò̤akha penu, a bè̌lò̤hto asò̌phlǒ ta a bǔǐ pa pwǐ aphû̌ali̤ ta ana̤nu pě. A ma̤ hǐnudě a noma̤ tṳtṳ nû̌ûta Ye̤shǔkhrî̌stu pě. A ma̤ hǐnumî̌ jǔ꤮ tû̌ asò̌phlǒ sò̌yṳ ma̤tû̌ ta a ta̤yè̤lò̤nǎnu pwǎ. 6A ǐlò̤ko bǎ pa sû ta a phû̌makhû htě a mo̤ǐ htǒotapwa̤ akhû̌akhî, pa htû̌sò̌ǐ plǒ pû nû̌û Cǒmara abwǐdû̌sîrîhtû htǒonu hò̌꤮. 7Khrî̌stu khòsi ana̤ dě asǐ mèlò̤ akhû̌akhî, Cǒmara htè̌ge pa ta a bòlû̌bò pa ta̤sǔ hǒ. Cǒmara abwǐasîrî htǒonu, adû̌ayǒ mè̤mè̤̌ paya. b 8Cǒmara lò̌lò̤ betî̌pî̌ bǎ pa abwǐdû̌sîrîhtû dě, a ǐbò pa a ta̤sî̌ta̤jò toǒ ta a ta̤sî̌khû̌sî̌ya pṳ̂̌꤮ tacǎ. 9Dě a dǔlṳ pa ta a ta̤tîwî̌tòwòhǔsè̌ htǒonuhǒ. A ǐlò̤hto asò̌phlǒ dě a glè ma̤lǒma̤behtò̌ a ta̤tîwî̌tòwòhǔsè̌ htǒonu ta Khrî̌stu hǒ. Htǒomî̌ htě a sò̌yṳ dǔlṳ bǎ pa ta a ta̤tîwî̌tòwòhǔsè̌ htǒonò̤nu. 10Htû̌꤮ khîkha te̤tote̤bǎ pěnu, Cǒmara ma̤lǒma̤behtò̌ a ta̤tîwî̌tòwònǎ htǒotoǒ pě. Ta̤htě a ǒbò dě mǒkhû̌nu toǒ bǎbǎ, a ǒbò dě hǎkhû̌htǒonu toǒ bǎbǎ, a ma̤htuma̤plǒkû̌bò nû̌û dě a hǐkǒdû̌gutṳ̌ Khrî̌stu htǒotapwa̤ ala̤ pě. 11Khrî̌stu khû̌khî, Cǒmara wû̌lǎ pa dě pa htûhtò̌ akòyò hǒ. ▼▼Pa htûhtò̌ Cǒmara a û̌cata̤bî̌.
A bè̌lò̤hto asò̌phlǒ akhû̌akhî, a ma̤ hǐnunu. A ma̤htûhtò̌bò ta̤pṳ̂̌꤮ tacǎ pwǐ a sò̌yṳ ma̤nu hǒ. 12Ma̤pûhǐ pa bè̌dǒ pa ta̤kè̌shuǐ dě Khrî̌stu akûnu, a ma̤bǎ pa hǐnuhǒ. Pa Yṳ̌daphû̌ toǒ mî̌ kòyò htě a kè̌shuǐ wǐtocǒ Khrî̌stu toǒhǒ. Dě pa kè̌shuǐ hǐnu akhû̌akhî, kò htû̌sò̌ǐ tû̌ta Cǒmara a ta̤sîrîdû̌sîrîhtû htǒotoǒ pě. 13Sî dě, bǎ sî gana̤de ta̤te̤ta̤mǎ, ta̤sò̌le̤sò̌lò̤ awi̤akè̌ dě a ma̤lû̌htò̌ge sî awi̤akè̌ akhanu, sî yṳǎ dě sî htûhtò̌ kû̌ta Khrî̌stu tacǎnǔpa hǒ. Sî yṳǎ Khrî̌stu akhû̌akhî, a ǐlò̤ sî Běcǎ sǎcahtǐ htě a olò̤nǎhto htǒonu hǒ. Běcǎ sǎcahtǐ htǒonu alò̤ta ta̤dòǐ tacǎ dě a dǔlṳ ta sî htû Cǒmara akòyò hǒ. 14Běcǎ sǎcahtǐ htǒonu asǒsǒta ta̤olò̤ aměagle tacǎ htě a dǔlṳbò Cǒmara olò̤ dě a ǐ pa pě toǒnu, pa nî̤bǎ yǎpě. Htû̌꤮ Cǒmara a ta̤htè̌ge pa a ta̤phî̌ta̤ma̤ htǒo aphlǔahtobò pě akhanu, a ǐ pa û̌cata̤bî̌ pě. Hǐnudě kò htû̌sò̌ǐ tû̌ta Cǒmara a ta̤sîrîdû̌sîrîhtû htǒotoǒ pě. Pò̌lu kwisaba bǎ Khrî̌stuphû̌ dě Ephè̌shiawî̤kûnu toǒ aya
15Cǒmara howi̤ pa hǐnu akhû̌akhî, sahtò̌ bǎ he gana̤de ta sî yṳǎ Běcǎ Ye̤shǔkhrî̌stu dě sî mo̤ǐ Cǒmara akòyò akhanu, 16He hî̌bwǐhî̌sîrî Cǒmara ta sîyanu, a htò̌tṳpè̤pe dǐkhò̌꤮ tò̤. He kwisaba bò̌khòtè꤮ bǎbǎnu, he gènè̤htò̌bǎ sî. 17He kwisaba sadape pa Běcǎ Ye̤shǔkhrî̌stu a Cǒmara, mî̌pwǎ papha htě asîrîdû̌sîrîhtû apo̤aphǎ htǒotapwa̤ ǒ. Ma̤pûhǐ sî sî̌yahè te̤mǎ wǒkhlopo̤ Cǒmara ayanu, he kwisaba ta Běcǎ sǎcahtǐ glè ǐ sî ta̤sî̌ta̤jò, dě a dǔlṳ bǎ sî ta Cǒmara pě. 18Ma̤pûhǐ sî sî̌yaphlowǒ kû̌kò ta̤ma̤ cǒklî̌kî̌ya htě a olò̤hto bǎ akòyò dě a kaǎ nû̌ûnu toǒ ayanu, he kwisaba ta a glè ǐsî̌yaphlo bǎ sînu. Cǒmara ǐ akòyò htǒotoǒ û̌cata̤bî̌ htě ale̤dû̌pwî̤htû, awî̤awǒ toǒ mî̌ kwè̌꤮ titèhî̌nu, he sò̌yṳ nosî̌ya te̤mǎdǒ sî. 19Htohǒtò̤ a ta̤po̤ta̤phǎ htě a glè ma̤jèbǎ kòyò htě a yṳǎ nû̌û htǒotoǒnu, adû̌ pwî̌꤮ tènu, he sò̌yṳ nosî̌ya sî dě he kwisaba pwǎ sîya. Ta̤po̤ta̤phǎ htǒonumî̌ a ta̤shû̌ta̤sho lò̤kèta, 20Ta̤po̤ta̤phǎ htě Cǒmara ma̤htûpwa̤ge Khrî̌stu dě ta̤siaklanu tacǎ ta ta̤po̤ta̤phǎ htě a nohǎnòò̌ nû̌û mǒkhû̌ bǎ acǔdemû tokho htǒonuhǒ. d 21Lǒ̤꤮ bò pwa̤pǒta̤ dě mǒkhû̌ toǒ, bò꤮ mǒkhû̌ a ta̤sîrîshû̌sho toǒ, bò꤮ mǒkhû̌ a ta̤po̤ta̤phǎ toǒ ta mǒla̤ aběcǎ htǒotoǒ lǒ̤꤮ bò akhû̌nu, Khrî̌stu htûdû̌khlobò asîkhû̌ hǒ. A mi̤dû̌sǎhtû htǒonu, kòmi̤ htě kò bǎ htòhtò̌ a htǒotuhtunu bǎbǎ, děnǒkòtuhtu pěnu bǎbǎ, ahtò̌yî̤khlo ta kòmi̤ htě kò htòhtò̌ yǎ toǒnu. 22Cǒmara noǒbò ta̤pṳ̂̌꤮ tacǎ dě Khrî̌stu a ta̤pǒala̤ hǒ. Cǒmara wû̌lǎ nû̌û dě a glè htûbò ta̤pṳ̂̌꤮ tacǎ ahǐkǒ ta pwa̤yṳǎta̤ aprṳ̂aho aya hǒ. 23Pwa̤yṳǎta̤ aprṳ̂aho mî̌ Khrî̌stu ana̤klû. Pwa̤yṳǎta̤ aprṳ̂aho htǒonumî̌ alǒabehtò̌jò pwǎ ta Khrî̌stu a ta̤ǒhtûpwa̤ pwǎ. Pwa̤ htě a ma̤lǒma̤bejò ta̤pṳ̂̌꤮ tacǎ ta gûla̤ pṳ̂̌꤮ tò̤glò numî̌ pwǎpǒ̤ Khrî̌stu pwǎ. e
Copyright information for
KxfSCKRC