Eph 2 | KxfSCKRC | STEP | Dě awǐkha numî̌, sî gana̤de jûle̤phî̌yo̤ kû̌kòyò Cǒmara ayo̤ tò̤, sî ma̤ ta̤sǔ akhû̌akhî, sû̌sò̌ tokhonu, sî sǒsǒta kòyò sihtonu toǒ hǒ.

Ephesians 2

Cǒmara ma̤lû̌htò̌ge pa ta abwǐasîrî

1 Dě awǐkha numî̌, sî gana̤de jûle̤phî̌yo̤ kû̌kòyò Cǒmara ayo̤ tò̤, sî ma̤ ta̤sǔ akhû̌akhî, sû̌sò̌ tokhonu, sî sǒsǒta kòyò sihtonu toǒ hǒ. ^a 2 Bǎnuakha, sî gûma̤kû̌ hǎkhû̌ a ta̤phû̌mò̤shî̌hto toǒ. Sî gana̤de jûle̤phî̌yo̤kû̌ pwǎ khînǎmo̤pha hǐkǒdû̌ htě a pǒǐ khînǎkhîno dě mǒla̤ toǒ ayo̤. Khînǎmo̤pha hǐkǒdû̌ htǒonu, a pǒǐpe kòyò htě a gana̤dekû̌ kòyò Cǒmara ayo̤ tò̤ toǒnu. 3 Dě꤮ awǐkha numî̌, pa ǒhtûpwa̤ sǒsǒta asînu hǒ. Pa ǒhtûpwa̤ pwǐ pa sò̌phlǒ la̤klo sò̌yṳ ma̤ta̤sǔnu toǒ pwǎ. Pa lṳ̂ma̤mo̤ pana̤ ta pana̤klû sǐshi la̤klo sò̌yṳ phû̌mò̤nu toǒ ta ta̤gènè̤ phû̌mò̤ toǒ. Cǒmara to cèròtû̌ pa pwǐ asî akhonu hǒ. 4 Pa sǒsǒnò̌so ta hǐnu, pwǎ̤ta Cǒmara htě a lǒbe ta ta̤gwèbǎǐ htǒotapwa̤nu a mo̤ǐ mè̤mè̤̌ pa. 5 Bǎnukha pa jûle̤phî̌yo̤ ayo̤ tò̤, pa lò̤kèta kòyòsinu, pwǎ̤tadě a ǐkû̌dǒ pa ta̤ǒhtûpwa̤ asa ta Khrî̌stunu hǒ. Cǒmara abwǐdû̌sîrîhtû akhû̌akhî, pa nî̤bǎ ta̤lû̌htò̌ge hǒ. 6 Pa htû kû̌ta Khrî̌stu tacǎnǔ꤮ pa akhû̌akhî, Cǒmara ma̤htûpwa̤gekû̌ pa ta Khrî̌stu hǒ. Pa ta Khrî̌stu htûhtò̌ nû̌û tacǎnǔ꤮ pa akhû̌akhî, a ǐ pǒǐ kû̌dǒ pa ta Khrî̌stu dě mǒkhû̌ ashiaganu. 7 Cǒmara htǒonu awǒ mè̤mè̤̌ dě pa htû akòyò htǒotoǒ akhû̌. Khrî̌stu ma̤hto bǎ paya akhû̌akhî, Cǒmara dǔlṳlò̤ a ta̤ma̤mo̤ma̤wǒ pa htǒotoǒ hǒ. Ma̤pûhǐ Cǒmara dǔlṳ bǎ kòyòhǎkhû̌phû̌ htû̌꤮ anǒkòpě tuhtu toǒ ta abwǐdû̌sîrîhtû htǒotoǒ pěnu dě, a ma̤pwǎ bǎ paya hǐnu. 8 Ma̤tè̤hî̌dě, sî yṳǎ mè̤mè̤̌ Khrî̌stu ta Cǒmara abwǐdû̌sîrîhtû dě sîkhû̌htǒo akhû̌akhî, a ma̤lû̌htò̌ge sî hǒ. Sî sana̤ htǒkhû̌htǒǎ akhû̌akhî, sî nî̤bǎ ta̤lû̌htò̌ge mè̤tò̤. Htǒomî̌ Cǒmara ǐlò̤kopwǎ sî pwǎ. 9 Sî ma̤ ta̤wǒnu toǒ akhû̌akhî, Cǒmara ma̤lû̌htò̌ge sî mè̤tò̤. Hǐnudě, sî la̤htû̌sò̌ phî̌htò̌yî̤ sîna̤nu, agûla̤ ǒ dǐcǎ꤮ tò̤. 10 Khònò̤dě pa htûhtò̌ pwǐhè̌o numî̌, Cǒmara ma̤pwǎ bǎ pa. Dě pa htûhtò̌ ta Ye̤shǔkhrî̌stu tacǎnǔ꤮ pa akhû̌akhî, Cǒmara ǐ pa ta̤ǒhtûpwa̤ asa hǒ. Ma̤pûhǐ pa ma̤ta̤wǒ ayanudě, a ǐ pa hǒ. Pa ma̤ ta̤wǒ htǒotoǒ ayanu, a tîwî̌tòwònǎ yî̤hto paya hǒ.

Khrî̌stu akhû̌akhî, Cǒmara ma̤htuma̤plǒ gesǒ Yṳ̌daphû̌ toǒ ta Yṳ̌daphû̌ mè̤tò̤ toǒ

11 Hǐnudě, gènè̤htò̌nṳ lǒkho sîna̤ ta dě wǐkhanu, sî ǒphijaû̌lò̤ dě Yṳ̌daphû̌ mè̤tò̤ toǒ akla. Dě Yṳ̌daphû̌ htě a kaǎ ana̤ ta kòyò dǔtṳphěphû̌ toǒnumî̌, a dǔ lǒkho pwǎ na̤saklû phěyî̌ pwǎ, dě kòyòhǎkhû̌phû̌ dǔpwǎ bǎ asî. Dě asînu toǒ mî̌ a kaǎ lǒkho sî ta, “Kòyò dǔtṳphěphû̌ mè̤tò̤ toǒ,” hǐnu. ^{▼▼A cû̌kaǎtǒ̤ sî hǐnu ma̤tè̤hî̌dě asî dǔtṳ lǒkho aphě dě a gènè̤ lǒkho ana̤ ta pa mî̌ Cǒmara akòyò.} 12 Gènè̤ gesǒtû̌ lǒkho sîna̤ dě awǐkhanu toǒ, bǎnukha mî̌ sî sî̌ya kû̌kò Khrî̌stu hǒtò̤, sî ǒkû̌dǒ Israelphû̌nu toǒ akla hǒtò̤. Dě Cǒmara ta akòyò toǒ ǎměogle nû̌ûyo̤ dě a olò̤ akòyò toǒ aklanumî̌, sî ǒkû̌dǒ hǒtò̤tò̤. Sî ǒhtûpwa̤ dě hǎkhû̌nu, sî ǒhtûpwa̤ shodo Cǒmara, sî ǒhtûpwa̤ shodo pwǎ lǒkho ta ta̤kè̌shuǐ. 13 Dě awǐkha numî̌, sî ǒtepheyî̤ ta Cǒmara pwǎ̤tadě khònò̤htǒo sî ta Ye̤shǔkhrî̌stu htû nû̌û tacǎnǔ꤮ pa dě Khrî̌stu shǔbòhto sî ta asǐ akhû̌akhî, Cǒmara kaǎgephǔ sî dě akòshî̌ hǒ.

14 Ma̤tè̤hî̌dě, Khrî̌stu sana̤tû̌ htǒonumî̌ pwa̤ htě a ma̤pè̤ma̤dûge ta̤ dě paplǎkû tapwa̤. Dě awǐkhanu, Yṳ̌daphû̌ ta Yṳ̌daphû̌ mè̤tò̤ toǒ numî̌ a sò̌khěkhû̌khwè nû̌û sǒsǒta dědǎ htě a ǒ dǐdò pa htǒonu hǒ. Khònò̤htǒo a ma̤ hǎmǎkè ta̤sò̌khěkhû̌khwè nû̌û htǒo, dě kòyò htǒoginǐ̤mṳnu a ma̤htûhtò̌ge nû̌û tṳgumṳpa. 15 Yṳ̌daphû̌ toǒ a ta̤sû̌ta̤tòwò aklanumî̌, a ta̤sû̌ta̤tòwò aphû̌phò toǒ ǒplṳ̂ pò̤̌ta Khrî̌stu si akhû̌akhî, a ma̤gutṳphlǔhtobò asî ta̤ma̤nu toǒ hǒ. A ta̤yè̤lò̤nǎ mî̌ mè̤hǒ, ma̤pûhǐ kòyò htǒoginǐ̤gumṳ htûhtò̌tû̌ kòyò asa tṳgumṳpa dě Khrî̌stu akûnu, a ma̤ tèplè̌ tû̌nû̌û ta ana̤ hǒ. Hǐnudě a ma̤pè̤ma̤dû gesǒ asî hǒ. ^c 16 A khòsi asò̌ dě nò̌dòhtǔlo̤ akhû̌akhî, kòyò htǒoginǐ̤gumṳnu a ma̤tǒhtu gesǒnû̌û tṳgumṳpa, dě a ma̤klaǐkè̌khî gesǒ asî ta Cǒmara hǒ. Hǐnudě asî tapwa̤ ta tapwa̤ sò̌khěkhû̌khwèpe nû̌û tò̤. ^d 17 Hǐnudě Yṳ̌daphû̌ mè̤tò̤ htě a ǒ te̤pheyî̤ ta Cǒmara toǒ bǎbǎ, Yṳ̌daphû̌ htě a ǒphǔ ta Cǒmara toǒ bǎbǎ, Khrî̌stu hèlò̤ dǒhtû̌ǐ bǎ asî ta ta̤pè̤ta̤dû a ta̤sò̌le̤sò̌lò̤ awi̤akè̌ hǒ. ^e 18 Dě Khrî̌stu ma̤hto bǎ paya, dě Běcǎ sǎcahtǐ tapwǎ̤꤮ pa ma̤jè tṳtṳ pa akhû̌akhî, pa Yṳ̌daphû̌ lǒ̤꤮ bò toǒ bǎbǎ, Yṳ̌daphû̌ mè̤tò̤ toǒ bǎbǎ, pa hènṳjò dě Cǒmara alo̤mo̤nu hǒ.

19 Dè ma̤hǐnudě, sî Yṳ̌daphû̌ mè̤tò̤ htǒotoǒnu, sî htûpe shiphû̌gaphû̌ toǒ mè̤petò̤ hǒ, mè̤tò̤mî̌ sî htû shǐtè̤mè̤ toǒ mè̤petò̤ hǒ. Khònò̤htǒo sî htû sǒsǒ Cǒmara a shiphû̌gaphû̌ sǒsǒta akòyò htǒotoǒ. Htohǒtò̤ sî mî̌ Cǒmara a hǐphû̌phòphû̌ toǒ hǒhǒ. 20 Sî mî̌ asǒsǒta hǐ htě kò bǒ yǎ kòkhǒ ta lo̤ htǒonutama hǒ. Pwa̤nophû̌ ta pwa̤po̤ toǒ numî̌ asǒsǒta kò bǒ hǐtṳ a kòkhǒ htǒotoǒnu hǒ. Dě Běcǎ Ye̤shǔkhrî̌stu sana̤tû̌ htǒonumî̌ asǒsǒta hǐhtǒo tama ǒměǒgle ayanu, a mî̌ a htû pwa̤tûhtû̌mě bǎ kò ta̤ htě a lo̤bǎdû̌khlo kò tapwa̤nu. 21 Běcǎ mî̌ pwa̤ htě a pṳ̂měcǐmě plǒdǒbò hǐta̤kî̌ta̤kû̌ htǒonutama a ma̤dû̌htò̌ ta ma̤htûhtò̌ hǐ htǒonutama dě gutṳ̌lò̤nu, a htûhtò̌ ta̤lṳhtò̌hocahtǐ htě Běcǎ la̤ǒǐ aya tama hǒ. 22 Dě sî ta Khrî̌stu htûhtò̌ nû̌û tacǎnǔpa akhû̌akhî, Khrî̌stu bè̌plǒkû̌dǒ sî ta Yṳ̌da Khrî̌stuphû̌ toǒ hǒ. Htodě Běcǎ sǎcahtǐ a ta̤po̤ta̤phǎ akhû̌akhî, sî htě a htûkû̌ Yṳ̌daphû̌ mè̤tò̤ htǒotoǒnu, kò ma̤htò̌ kû̌dǒ sî ta Yṳ̌daphû̌ dě Cǒmara ahǐkû htǒonuhǒ.