Eph 3 | KxfSCKRC | STEP | Hǐnudě, he ma̤ Khrî̌stu a ta̤phî̌ta̤ma̤ dě he dǒhtû̌ǐ bǎ Yṳ̌daphû̌ mè̤tò̤ toǒ ta ta̤sò̌le̤sò̌lò̤ awi̤akè̌ htǒo akhû̌akhî, he mî̌ Pò̌lu htǒo, kò bǎ dǒlò̤te̤ he dě apo̤kû.

Ephesians 3

Cǒmara no Pò̌lu ta a glè dǒhtû̌ǐ bǎ Yṳ̌daphû̌ mè̤tò̤ toǒ

1 Hǐnudě, he ma̤ Khrî̌stu a ta̤phî̌ta̤ma̤ dě he dǒhtû̌ǐ bǎ Yṳ̌daphû̌ mè̤tò̤ toǒ ta ta̤sò̌le̤sò̌lò̤ awi̤akè̌ htǒo akhû̌akhî, he mî̌ Pò̌lu htǒo, kò bǎ dǒlò̤te̤ he dě apo̤kû.

2 Cǒmara abwǐasîrî akhû̌akhî, a ǐlò̤ he ta̤ma̤ dě he glè ma̤jè sî htǒonumî̌, he yṳǎ ta sî gana̤dehtotû̌ hǒ. 3 Cǒmara dǔlṳ bǎ he ta ta̤adû̌ayǒ htě kò sî̌yahtû tò̤ htǒonu, he khwè̌lò̤ sî̌yacû̌hto bǎ sî dě lî̤htǒo akûnu tukutîkî̌phû̌ hǒ. 4 Htû̌꤮ sî dǒ helî̤htǒo pě akhanu, sî sî̌yahè ta he sî̌yaphlobò̌ ta̤adû̌ayǒ dě ta̤adû̌ayǒ htǒonumî̌ Khrî̌stu awi̤akè̌nu hǒ. ^a 5 Ta̤adû̌ayǒ htǒonu, Cǒmara dǔlṳdǒ bǎ kòyò dě꤮ wǐkhanu toǒ tò̤. Pwǎ̤ta khònò̤htǒo Běcǎ sǎcahtǐ akhû̌akhî, a dǔlṳ bǎ a pwa̤nophû̌ htě a cahtǐ htǒotoǒ ta apwa̤po̤ cahtǐ htǒotoǒnu. 6 Cǒmara a ta̤dû̌ta̤yǒ htě kò sî̌yahtû tò̤ htǒonumî̌ Cǒmara ǐlò̤ bǎ Yṳ̌daphû̌ ta̤howi̤ hǒ. Dě ta̤howi̤ htǒotoǒnu, sî Yṳ̌daphû̌ mè̤tò̤ toǒ nî̤bǎplǒ sǒsǒta asî htǒonu. Yṳ̌daphû̌ mè̤tò̤ toǒ ta Yṳ̌daphû̌ htǒotoǒnu, a htû nû̌û na̤ tapwǎ̤panu hǒ. Cǒmara olò̤kèbò akòyò toǒnu, sî Yṳ̌daphû̌ mè̤tò̤ toǒ nî̤bǎplǒ kû̌ta asî hǒ. Sî yṳǎ ta̤sò̌le̤sò̌lò̤ awi̤akè̌ dě sî htûhtò̌ ta Ye̤shǔkhrî̌stu tacǎ꤮ pa akhû̌akhî, sî nî̤bǎkû̌bò ta̤howi̤ toǒnu hǒ.

7 Cǒmara abwǐasîrî a ta̤ǐko htǒo ta a ta̤po̤ta̤phǎ akhû̌akhî, a ǐlò̤ he ta̤ma̤htǒo dě he glè bǎ dǒhtû̌ǐ kò ta ta̤sò̌le̤sò̌lò̤ awi̤akè̌ htǒonu. 8 Dě Cǒmara kòyò htǒotoǒ aklanu, he mî̌ kòyò htě atoabǎ kû̌ kòyò dî̌kî̌꤮ tò̤ tapwa̤. Hǐnuhǒ pwǎ̤ta Cǒmara ǐlò̤ he ta̤bwǐta̤sîrî htǒo ta he glè pwe̤ǐlṳ bǎ Yṳ̌daphû̌ mè̤tò̤ toǒ ta Khrî̌stu a ta̤le̤dû̌pwî̤htû htě kè̌lǎsî̌yapè̤ awi̤akè̌ tò̤ htǒotoǒnu. 9 Cǒmara glè ma̤lǒbehè a ta̤tîwî̌tòwònǎ ta̤adû̌ayǒ htǒotukǔ hî̌tè pěnu, a ǐlò̤ he ta̤ma̤ dě he bǎ cû̌ pwe̤ǐphlo bǎ kò ta̤htǒonu. Ně htě a tûlû̌hto toǒnu, Cǒmara htě a bǒlò̤ ta̤ lǒ̤꤮ bò htǒotapwa̤nu, a dǔlṳ bǎ kò ta̤htǒo hǒtò̤. 10 Khònò̤dě ma̤pûhǐ pwa̤pǒta̤ dě mǒkhû̌ ta mǒkhû̌ a ta̤shû̌ta̤sho toǒ glè kè̌shǐ sî̌ya Cǒmara ǒta a ta̤sî̌ta̤jò pwî̌꤮ tè, dě a dǔlṳ bǎ asî ta a ma̤htû tǒhtudǒ Yṳ̌daphû̌ htě a htû Khrî̌stuphû̌ toǒ ta Yṳ̌daphû̌ mè̤tò̤ htě a htû Khrî̌stuphû̌ toǒnu, a ma̤htû nû̌û tṳ̂prṳ̂pa pwǐ a pwa̤yṳǎta̤ aprṳ̂aho tṳgumṳnǔpa. 11 Cǒmara bè̌lò̤hto asò̌phlǒ dě a glèma̤ hè̌onu mî̌ a bǒlò̤ hǎkhû̌hǒtò̤ akhape. Khònò̤htǒo pa Běcǎ Ye̤shǔkhrî̌stu ma̤phlǔma̤htokèbò bǎ pa akhû̌akhî, Cǒmara ma̤lǒma̤behto a ta̤tîwî̌tòwònǎ htǒonuhǒ. 12 Dě pa yṳǎ Khrî̌stu, htodě pa htûhtò̌kè nû̌û tacǎnǔpa akhû̌akhî, khònò̤htǒo pa glè hènṳ dě Cǒmara ǒ ta ta̤yṳǎ tû̌û na̤ ta ta̤khuta̤ha numî̌ anî̤ hǒ. 13 Ma̤hǐnudě, he kwigwèbǎǐ sî, he khòbǎ ta̤jîta̤jû ta sîya htǒonu, sò̌phlǒpî̌ lǒkho pûma̤ nî̌꤮. He khòbǎ hǐnu numî̌ sî la̤nî̤bwǐ nî̤sîrî ayapwǎ.

Pò̌lu kwisaba gesǒ bǎ Ephè̌shiaphû̌ toǒ aya

14 Dě ta̤wi̤ta̤kè̌ htǒo akhû̌akhî, he gene̤lò̤ kwisaba bǎ sî dě hepha a lo̤mo̤. 15 Mǒkhû̌ a hǐphû̌phòphû̌ lǒ̤꤮ bò toǒnu bǎbǎ, hǎkhû̌ a hǐphû̌phòphû̌ lǒ̤꤮ bò toǒnu bǎbǎ, Cǒmara htǒonumî̌ asî pha mè̤mè̤̌ tapwa̤. 16 Cǒmara a ta̤howi̤hî̌wǒ ǒplṳ̂ǒphǎ hǒ. Hǐnu akhû̌akhî, he kwihtò̌ yǎ dě a no Běcǎ sǎcahtǐ ta a glè ǐlò̤ tṳtṳ bǎ sî ata̤shû̌ta̤sho htǒo dě a bǎ ma̤shû̌ma̤shohtò̌ gesǒ sî sò̌phlǒ pě. 17 Htohǒtò̤ sî ta̤yṳta̤nǎ akhû̌akhî, ma̤pûhǐ Khrî̌stu hè ǒměǒgle pû sî sò̌phlǒkû ayanu, he kwisaba bǎ sîya. He kwisaba ta sǔ꤮ sî bǎ mo̤ǐhè Cǒmara, htodě sǔ꤮ sî bǎ mo̤ǐhè nû̌û tapwa̤ ta tapwa̤nu. Sî dè ma̤mò̌hǐnu hî̌dě pwǐ sǒkhò̌wi̤ yṳ̂lò̤yî̤nu, sî ta̤mo̤ǐ cû̌yî̤ hǐnu pě. Htodě pwǐ kò bǒlò̤ měglewǒ hǐ tama akòkhonu, sî ta̤mo̤ǐ měglewǒ sǒsǒta hǐnu pě. 18 Htodě Khrî̌stu mo̤ǐ sî pwî̌꤮ tènu, he kwisaba dě sî ta Cǒmara akòyò cahtǐ toǒ sî̌yahè te̤mǎbò̌htò̌bò pě. Ata̤mo̤ǐ pa htǒonu adû̌ayǒ mè̤mè̤̌, htohǒtò̤ a gutṳjòpe tò̤. 19 Kò sî̌yahtû Khrî̌stu ata̤mo̤ǐ dǐpwǎ̤꤮ tò̤ pwǎ̤ta ma̤pûhǐ sî sî̌yakû̌ kòyònu, he kwisaba sîya. Bǎ sî sî̌yahè ata̤mo̤ǐ akhanu, sî nî̤bǎ lǒbebò Cǒmara ala̤klonu toǒ pě.

20 Htû̌sò̌ǐ lǒkho Cǒmara. Dě a ta̤po̤ta̤phǎ adû̌ayǒ htǒo ma̤ta̤ dě pakû akhû̌akhî, a ma̤kè̌htò̌khlo bǎ pa ta pa kwihtò̌ yǎnu toǒ pě. Mè̤tò̤mî̌, a ma̤kè̌htò̌khlo bǎ pa ta pa gènè̤nǎnu toǒ pě. 21 Dě Ye̤shǔ akhû̌akhî, kòpṳ̂̌꤮ tapwa̤ htû̌sò̌ǐbò tû̌ta Cǒmara nî̌꤮. Kòyò tuhtu hto tuhtu htě a yṳǎ Ye̤shǔkhrî̌stu toǒnu, a htû̌sò̌ǐ tû̌ta Cǒmara tûjûpwa̤ talakhǎ nî̌. Amè̤.