Ephesians 4

Ta̤htûhtò̌ nû̌û ta Khrî̌stu akû tacǎ꤮ pa

1Hǐnu akhû̌akhî, he kwigwèbǎǐ sî sǒsǒta kò dǒlò̤te̤ kòyò dě apo̤kû ta Běcǎ aya tapwa̤nu. Cǒmara kaǎ sî dě sî htûhtò̌ pwa̤yṳǎphû̌ toǒ akhû̌akhî, he kwigwèbǎǐ sî ta sî glè ǒhtûpwa̤ bè̌wǒkû̌ sî sò̌phlǒ pwǐ pwa̤yṳǎphû̌ toǒ to ǒhtûpwa̤nu. 2Dě sî ma̤ta̤ lǒ̤꤮ bò aklanu, sî tohtû lǒkho pû kòyò htě a shò̌lò̤ asò̌phlǒ dě a sò̌dohobî̌ toǒ. Htodě sò̌phlǒhtû lǒkhopû nû̌û tapwa̤ ta tapwa̤ dě ta̤mo̤ǐ nû̌û akûnu nî̌꤮. ^a 3Běcǎ sǎcahtǐ ma̤htuma̤plǒ sî hǒ. Ma̤pûhǐ sî ǒhtuǒplǒ sělěkû̌pû yǎnu, jipwi̤ ǒhtûpwa̤ lǒkho dě ta̤pè̤ta̤dû akû nî̌꤮. 4Pa htǒotoǒ mî̌ pana̤saklû ǒhtunû̌û tapwǎ̤꤮ pa pwǎ. Pa nî̤bǎ htunû̌û Běcǎ sǎcahtǐ ta̤pwǎ̤꤮ pa pwǎ. Hǐnudě, bǎ Cǒmara kaǎ pa akhanu, a olò̤ta a ǐnǒ pa ta̤awǒ htǒo anǒkò pě. Hǐnudě pa lǒ̤꤮ bò kè̌shuǐ plǒbò nû̌û ta̤htǒo tacǎ꤮ pa pwǎ. 5Pa Běcǎ plǒhtunû̌û tapwǎ̤꤮ pa pwǎ, pa ta̤yṳta̤nǎ mî̌ aǒ nû̌û tacǎ꤮ pa pwǎ, htohǒtò̤ pa plo wo̤wǒ̤nû̌û shi tukǔ꤮ pa pwǎ. 6Pa Cǒmara plǒhtunû̌û tapwǎ̤꤮ pa pwǎ. A mî̌ pa lǒ̤꤮ bò apha pwǎ. A pǒǐ sǒsǒbò pa, dě a ma̤ tṳtṳ ta̤ dě pa lǒ̤꤮ bò akla. A ǒkû̌ pa lǒ̤꤮ bò akû.

7Pwǎ̤ta Khrî̌stu ǐlò̤khǒ pa ta̤jòta̤lîmò tapwa̤ ta tapwa̤ dě pa ma̤khǒma̤yòyǎ a ta̤phî̌ta̤ma̤ toǒ. Khrî̌stu mèpa̤ bǎ pa ta̤jòta̤lîmò htǒonu, a sò̌le̤ǐ nû̌û tò̤. 8Lî̤cahtǐ khwè̌nǎ numî̌ a hî̌ hǐnu hǒ. Dě a hî̌,

“Bǎ a ge kihtò̌ dě gûla̤htò̌yî̤ akhanu, a pṳ̂cû̌nṳ pwa̤khû̌khwè a dě a lò̤jûkè nû̌ûla̤nu toǒ. Dě a ǐ akòyò toǒ asû hǒ.” ^b

9“A ge kihtò̌,” amûasǎ mî̌ hî̌tè? “A ge kihtò̌,” amûasǎ mî̌ a sò̌le̤ hî̌ ta Khrî̌stu lò̤hto hǎkhû̌ htě a yo̤gutṳ̌ htǒonu tapwa̤ hǒ. 10Kòyò htě a lò̤hto hǎkhû̌ htǒotapwa̤nu, a ge kihtò̌ dě gûla̤htò̌yî̤khlo ta mǒkhû̌ toǒ tapwa̤nu hǒ. Dě mǒkhû̌ bǎbǎ, dě mǒla̤ bǎbǎ, dě hǎkhû̌ gûla̤ bǎtè꤮ tò̤glò bǎbǎ, ma̤pûhǐ a ǒbò gûla̤ pṳ̂̌꤮ tò̤glònu, a ge kihtò̌pwǎ dě mǒkhû̌. 11Ma̤pûhǐ kò htû pwa̤nophû̌ toǒ, kò htû pwa̤po̤ toǒ, kò htû pwa̤dǒhtû̌ǐ ta̤sò̌le̤sò̌lò̤ awi̤akè̌ toǒ, kò htû pwa̤yṳǎta̤ aprṳ̂aho sara toǒ, kò htû pwa̤sû̌ǐ lî̤cahtǐ asara toǒnu, pwa̤ htě a ǐlò̤ kò ta̤jòta̤lîmò htě a kî̌ya nû̌û toǒ htǒotapwa̤nu a mî̌pwǎ Khrî̌stu. 12Ma̤pûhǐ Cǒmara akòyò toǒ ǒ tîwî̌tòwò ana̤ ta a ma̤ bǎ nû̌û ta̤ma̤ aya, htohǒtò̤ ma̤pûhǐ a ǐshû̌ǐshohtò̌ pwa̤yṳǎta̤ aprṳ̂ahophû̌ htě a mî̌ Khrî̌stu ana̤saklûhtǒonu dě, a ǐlò̤ hǐnuhǒ. 13Dě Khrî̌stu ana̤saklûhtǒo a shû̌htò̌shohtò̌ to̤htû̌ pa lǒ̤꤮ bò ǒnû̌û ta ta̤yṳ tacǎ꤮ pa ta ta̤sî̌yahè Cǒmara aphû̌khû tacǎ꤮ pa pě. Htohǒtò̤ pa htûhtò̌ pwa̤yṳǎphû̌ htě a dû̌pwa̤sî̌ya te̤mǎ toǒ pě. Ta̤dû̌pwa̤sî̌ya te̤mǎ htǒonumî̌ pa htûhtò̌ kòyò htě alǒabe sǒsǒta Khrî̌stu htě alǒabe htǒotapwa̤nu hǒ.

14Hǐnudě pa mî̌ asǒsǒta phijaû̌phû̌ htě a onû̌penu toǒ mè̤petò̤ hǒ. Kòyòkě htě a sû̌ǐlòhǎlòho ta̤ toǒnu, a lǒǎplò̤ǎjòpe pa tò̤, dě pa yṳǎsǔjò kû̌pe asî ata̤sû̌ǐtòwòǐ tò̤ hǒ. Pa sǒsǒpe ta sǒkhli htě gili̤sǎ pla̤ gleglòshû̌ yǎ tabǎnu mè̤petò̤ hǒ. 15Mî̌tanu, pa to hî̌bǎkhlo ta̤cǒta̤tè̤ ta ta̤mo̤ǐ htǒotoǒ. Htodě pa ma̤ ta̤pṳ̂̌꤮ tacǎ akûnu, pa bǎ htûhtò̌ sǒsǒkû̌ ta pa Běcǎ Khrî̌stu htě a htû pa hǐkǒdû̌ htǒonu tapwa̤. 16Khrî̌stu pṳ̂mě plǒhtudǒbò akòyò sîtoǒ htě alò̤ta kòyò wi̤htû̌ ta akhwǐakhû̌ dě atucu tǒhtuměbò na̤klû aphwǐaphrû̌ dě a kî̌yanû̌ûnu toǒ hǒ. Na̤klû aphwǐaphrû̌ tacǎ ta tacǎ dè ma̤tû̌ ata̤ma̤ htě a to ma̤ toǒ hî̌numî̌, na̤klû sapwa̤bò dû̌htò̌ dě sǔ ashohtò̌ pě. Pwa̤yṳǎta̤ aprṳ̂aho numî̌ a sǒsǒpwǎ hǐnò̤nu. Pwa̤yṳǎta̤ aprṳ̂ahophû̌ htě ata̤ma̤ kî̌yanû̌û htǒotoǒnu, a dè mo̤ǐ kè̌khînû̌û tapwa̤ ta tapwa̤ dě a dè ma̤tû̌ tapwa̤ ta tapwa̤ ata̤ma̤ hî̌numî̌, pwa̤yṳǎta̤ aprṳ̂aho htǒo dû̌htò̌ lǒbe tṳtṳ tû̌ta Khrî̌stu a ta̤po̤ta̤phǎ akò pě. ^c

Ta̤ǒhtûpwa̤ asa dě Khrî̌stu akû

17Hǐnudě, Khrî̌stu ami̤akû he bǎ hî̌shû̌shû̌ nò sî ta ǒhtûpwa̤ lǒkho pûma̤ pwǐ kòyò htě a sî̌ya Cǒmara tò̤nu toǒ ǒhtûpwa̤nu ma̤. Asî ata̤gènè̤ toǒ numî̌ abwǐasîrî ǒ dǐcǎ꤮ tò̤. 18Asînu toǒ mî̌ a sî̌yaphlobò̌ kû̌kò ta̤te̤ta̤mǎ tò̤. Asî hǐkǒshò̌ akhû̌akhî, a sî̌yakû̌ lǒkho kò Cǒmara aklè̌aklo tò̤, dě asî sî̌ya tò̤ akhû̌akhî, asî nî̤bǎ kû̌kò ta̤htûpwa̤ asa htě Cǒmara ǐ htǒonò̤nu tò̤. 19Bǎ asî ma̤sǔta̤ akhanu, a gènè̤ sòwò̤ǐpe ana̤ tò̤. Asî ma̤ pwǐ ana̤saklû phěyî̌ a ta̤sò̌yṳ kwi asînu, asî ǐlò̤kè ana̤saklû ta sǐshiphěyî̌ a ta̤sò̌yṳ phû̌mò̤shî̌hto putupatǎ dě a glè ma̤ lǒ̤꤮ bòkè asî sò̌phlǒ a ta̤gènè̤ phû̌mò̤shî̌htonu toǒ. Dě a sò̌yṳ ma̤ sělěpo̤ lǒkhope.

20Sî dě, bǎ sî sî̌yahè Khrî̌stu akhanu, kò sû̌ǐnǒ sî ta sî glè ǒhtûpwa̤ ma̤hǐnu dǐpwǎ̤꤮ tò̤. 21Sî htě a htûhtò̌ ta Khrî̌stu tacǎnǔ꤮ pa toǒnu, he yṳǎ ta sî gana̤de te̤mǎhto Khrî̌stu awi̤akè̌ hǒ. Htodě kò sû̌ǐhto bǎ sî ta̤sû̌ǐ acǒatè̤ htě Ye̤shǔ sû̌ǐhto toǒnu hǒ. 22Kò sû̌ǐ sî ta sî tobǎ plû̌lòte̤kè sî ta̤ǒhtûpwa̤ ali̤alṳ̂ toǒ. Bǎ sî ǒhtûpwa̤ dě ta̤ǒhtûpwa̤ ali̤alṳ̂kû htǒo akhanu, sî sò̌phlǒ a ta̤sò̌yṳ phû̌mò̤ toǒnu alǒaplò̤pî̌kè sî dě a ma̤ phû̌mò̤shî̌htobò sî sò̌phlǒ. ^d 23Kò sû̌ǐhto sî ta noma̤sahtò̌ tèplè̌ sî sò̌phlǒ ata̤gènè̤ toǒ ta Běcǎ sǎcahtǐ. 24Dě kûsǒhtò̌ lǒkho pû ta̤ǒhtûpwa̤ asa pwǐ Cǒmara bǒlò̤ sǒsǒhto sî ta ana̤saklû ^e dě ta̤cǒta̤tè̤ mè̤mè̤̌ ta ta̤cahtǐ mè̤mè̤̌ akûnu toǒ nî̌꤮. ^f

25Hǐnudě lòhope pûma̤ kò dǐpwǎ̤꤮ ma̤ nî̌꤮. Hî̌bǎcǒhî̌bǎtè̤ lǒkho kò pṳ̂̌꤮ tapwa̤ nî̌꤮, ma̤tè̤hî̌dě pa mî̌ asǒsǒta na̤saklû tapwǎ̤꤮ pa, pwǎ̤tadě aphwǐaphrû̌ kî̌yapwǎnû̌û hǐnu. ^g 26Sî dè sò̌phlǒdû̌ dě ma̤sǔ pûma̤ nî̌꤮. Lṳmṳlò̤te̤ hǒtò̤nu, sî bǎ sû̌dû̌sò̌gèpe tò̤ nî̌꤮. ^h 27Ma̤pûhǐ khînǎmo̤pha hǐkǒdû̌ cǐnṳ pû sî dě ta̤sǔ akû tò̤nu, bòmo pûma̤ aklè̌ ma̤ nî̌꤮. Hǐnudě sò̌phlǒdû̌ sělě lǒkho pûma̤. 28Kòyò htě a htû pwa̤ǎhǔ tapwa̤nu, ǎhǔ sělěpe pûma̤ nî̌꤮. Ma̤pûhǐ a yṳ̂ǎyṳ̂obò̌ pû kòyò shuphǔshèwèphû̌ toǒnu, a bǎ goǎgowè̤tû̌ ta̤awǒ htě a cǒtè̤ toǒnu.

29Yo̤sǎ htě a htûbwǐhtûsîrî ta kòya tò̤nu, nohî̌bǎhtò̌ pûma̤ yǎ dě sî hò̌kû dǐmû̌꤮ ma̤ nî̌꤮. Ma̤pûhǐ a nî̤khû̌nî̤ǎ bǎ kòyò htě a gana̤de ta̤ toǒ ayanu, hî̌bǎ lǒkho pwǎ yo̤sǎ htě a htûbwǐhtûsîrî dě a glè ma̤jè kò ta̤dû̌htò̌htûhtò̌ toǒ pwǎ nî̌꤮. Hî̌bǎ lǒkhopwǎ yo̤sǎ htě a nî̤bwǐnî̤sîrî kòya toǒ pwǎ nî̌꤮. 30Ma̤sǎpla̤ pûma̤ Cǒmara a sǎcahtǐ ma̤. Cǒmara ǐ sî Běcǎ sǎcahtǐ htǒonumî̌, alò̤ta ta̤dòǐ tacǎ dě sî mî̌ Cǒmara ata hǒ. Běcǎ sǎcahtǐ htǒonu, a ǒkû̌ta sî to̤htû̌ Cǒmara hè ma̤lû̌htò̌ge sînu pě ti̤ni̤. 31Wîkè ta̤sò̌phlǒsha, ta̤sò̌phlǒdû̌, ta̤to̤klî̌ kaǎgu nû̌û, ta̤dǒmi̤shǐyo̤, ta̤sò̌khě phû̌mò̤shî̌hto kòyò pṳ̂̌tacǎ htǒotoǒ nî̌꤮. 32Ma̤mo̤ma̤wǒ nû̌û dě gwèbǎǐ pû nû̌û tapwa̤ ta tapwa̤ nî̌꤮. Khrî̌stu akhû̌akhî, Cǒmara bòlû̌ sî ta̤sǔ dě bòlû̌ kè̌khî pû nû̌û ta̤sǔ tapwa̤ ta tapwa̤ nî̌꤮. ⁱ