Ephesians 6

Phû̌ ta mo̤pha toǒ

1Phû̌li̤ toǒ꤮, sî htûhtò̌ kû̌ta Běcǎ tacǎnǔ꤮ pa akhû̌akhî, gana̤de lǒkho sîmo̤sîpha ayo̤ nî̌꤮, ma̤tè̤hî̌dě gana̤de mo̤phayo̤ mî̌ atoabǎ. ^a 2“Bè̌dubè̌na̤ namo̤napha nî̌꤮.” ^b Ta̤mǎlò̤ htǒonumî̌ Cǒmara mǎnǎ wǐgutṳ̌ ayo̤ tûmû dě a ǒkû̌dǒ tû̌ta a ta̤olò̤mèlò̤. 3A ta̤olò̤ htǒonumî̌ kwè̌꤮ titè hî̌dě, sî dè bè̌dubè̌na̤ sîmo̤sîphanu, sî nî̤bǎ ta̤howi̤ pě. Htohǒtò̤ sî ǒhtûpwa̤ něyî̤layî̤ dě hǎkhû̌ pě. ^c

4Pha sî toǒ, ma̤sò̌phlǒdû̌ pûma̤ sîphû̌ ma̤ nî̌꤮. Mî̌tanu, bǔǎbǔo sû̌ǐtòwòǐ dû̌pwa̤sî̌yahtò̌ ǐtû̌ asî ta Běcǎ Cǒmara ale̤ayo̤ nî. Htohǒtò̤ yṳ̂klè̌nè̌klò asî ta Běcǎ Cǒmara sò̌yṳ noma̤ pa toǒ nî̌꤮. ^d

Jû ta aběcǎ

5Jûphû̌ toǒ, gana̤de lǒkho sî hǎkhû̌ běcǎ htǒotoǒ ayo̤ nî̌꤮. Ǐsha pû asîla̤ ta bè̌dubè̌na̤ pû asî nî̌꤮. Pwǐ꤮ sî gana̤de Khrî̌stu ayo̤nu, gana̤de lǒ̤sû̌lǒ̤sò̌ asî yo̤yo̤. ^e 6Ma̤pûhǐ a htû̌sò̌ǐ sî dě sî gana̤depwǎ asîyo̤ bǎ a ǒpo̤kè̌ǐ sî akhanu ma̤. Ma̤tè̤hî̌dě sî mî̌ Khrî̌stu ajû toǒ akhû̌akhî, ma̤ lǒ̤sû̌lǒ̤sò̌ bǎ asî pwǐ Cǒmara sò̌yṳ noma̤ sînu nî̌꤮. 7Ma̤ sapwa̤ bǎ asî sǒsǒta sî ma̤bǎ mǒkhû̌ Běcǎ ata̤ma̤nu nî̌꤮, cû̌ gènè̤ pû ta sî ma̤bǎ hǎkhû̌ běcǎ ata̤ma̤ toǒnu ma̤. 8Ma̤tè̤hî̌dě sî sî̌ya ta, kòyò htûjûhtûpwa̤ toǒ bǎbǎ, kòyò ǒpelesesǎ toǒ bǎbǎ, a dè ma̤ ta̤wǒnu Cǒmara ǐ a ta̤ma̤khû̌kǎ pě.

9Hǐnudě, jû aběcǎ sî꤮, ma̤wǒdǒ lǒkho sîjû toǒ hǐnu nî̌꤮. Hî̌ sò̌gònò̤ ǐsha pûma̤ asî ma̤ nî̌꤮. Sî bǎbǎ, asî bǎbǎ, sî Běcǎ ǒhtupwǎ nû̌û dě mǒkhû̌ tapwǎ̤꤮ panu, sî̌yatûû̌ lǒkho nî̌꤮. ^f Sîběcǎ dě mǒkhû̌ htǒonumî̌, a kè̌dû̌ kè̌pî̌tî̌jò tò̤. ^g

Pò̌lu pwe̤ǐbǎ pwa̤yṳǎphû̌ toǒ dě a glè bǎ shěshǔ khînǎmo̤pha hǐkǒdû̌ hî̌tè

10Gutṳ̌lò̤nu, he sò̌yṳ hî̌ sî hè̌o, ma̤pûhǐ sî shû̌shohtò̌nu, phî̌ lǒkho Běcǎ a ta̤po̤ta̤phǎ shû̌sho htǒotoǒ nî̌꤮. A ta̤po̤ta̤phǎ htǒotoǒ numî̌ ashû̌asho mè̤mè̤̌. 11Sǒsǒta kliphû̌ toǒ kûsǒ a ta̤wè̌ta̤htònu, kûsǒbò lǒkho pû ta̤wè̌ta̤htò htě Cǒmara ǐ sî htǒonu nî̌꤮. Ma̤pûhǐ sî ma̤dǐdò shǔbò̌tû̌ khînǎmo̤pha hǐkǒdû̌ a ta̤htû̌sǒbǎ aphû̌mò̤ lòho toǒnu, kûsǒhtò̌ lǒkho hǐnunu. 12Ma̤tè̤hî̌dě, pa shěshǔ ta kòyò htě aǒ ta aphěayî̌ asǐashi toǒnu mè̤tò̤. Pa shěshǔ ta khînǎkhîno htě a pǒta̤ toǒ, ta khînǎ htě aǒ ta a ta̤shû̌ta̤sho toǒ ta khînǎ shû̌sho htě a pǒǐ hǎkhû̌ a ta̤khǐta̤lo̤nu toǒ, ta khînǎ phû̌mò̤ htě a ǒ dě mǒla̤nu toǒ. 13Hǐnudě, htû̌꤮ ta̤pò̤ta̤sha amṳni̤ hèto̤ pě akhanu, ma̤pûhǐ sî ihtǒ tònòshowǒ kû̌kòyò, htohǒtò̤ htû̌꤮ sî shěhtoshěphlǔ ta̤ pěnu, sî lò̤jû pûtò̤nu dě kûsǒbò lǒkho Cǒmara a ta̤wè̌ta̤htò htǒo toǒnu. 14Hǐnu akhû̌akhî, ihtǒ tònòshowǒ lǒkho sîna̤. Wò̤htò̌mě Cǒmara a ta̤te̤ta̤mǎ htǒo htě asǒsǒta sî wò̤htò̌mě sò̌to̤phě dě sî shè̌kòlo̤ akhonu nî̌꤮. ^h Kûsǒ pû ta̤cǒta̤tè̤ htǒo pwǐ sî kûsǒhtò̌ hǐdote̤htò̌ dě a glè ma̤kwaǐbǐ sîna̤ htǒonu nî̌꤮. ⁱ 15Sǒsǒta kliphû̌ tîwî̌tòwò dò̌htò̌nǎ lǒkho a khò̌phě tûplû̌ dě a glè hǎhtò̌cû̌ ayanu, ma̤wǒnǎ lǒkho sîna̤ ta ta̤sò̌le̤sò̌lò̤ awi̤akè̌ htě a ǐ sî ta̤ǒhǔsè̌ ta̤pè̤ta̤dû htǒonu nî̌꤮. ^j 16Htohǒtò̤, asǒsǒta sî pṳ̂glemě gòtò̤ htě la̤gò dǐdòshǔ htǒonu, tûrû̌ pṳ̂gleměǐwǒ lǒkho sî ta̤yṳta̤nǎ htě a ma̤pi̤shǔkè khînǎ khǎ mî̌pla̤ htě a hèshǔ sî toǒnu nî̌꤮. 17Sî̌ya te̤mǎ lǒkho ta̤ma̤lû̌htò̌ge awi̤akè̌ htě Cǒmara ma̤hto bǎ sî dě asǒsǒta sî glûhtò̌ khû̌glûte̤htò̌ dě a ma̤kwaǐ dǐdò bǎ sî htǒonu, htohǒtò̤ pṳ̂měǐ Běcǎ sǎcahtǐ adòdǔ htě a mî̌ Cǒmara ale̤ayo̤ htǒo nî̌꤮. ^k 18Kwisaba Cǒmara ta kwigwèbǎǐ yǎ dě a glè ma̤jè sî ta̤pṳ̂̌꤮ tacǎ nî̌꤮. Kwisaba lǒkho pwǐ Běcǎ sǎcahtǐ yṳ̂klè̌nè̌klò sî pṳ̂̌꤮ taplǎ nî̌꤮. Bǎ sî kwisaba hǐnu akha, ǒsòklò dě ǒsè̌rè̌ lǒkho sîna̤ nî̌꤮. Kwisabadǒ pû bǎ Cǒmara akòyò lǒ̤꤮ bò toǒ pṳ̂̌꤮ taplǎ nî̌꤮.

19Ma̤pûhǐ Cǒmara nohî̌bǎ he yo̤ htě a to hî̌bǎ toǒ ayanudě, bǎ he glè tèhtò̌ hî̌bǎ kò akha, kwisaba nṳbǎdǒ heya nî̌꤮. Htohǒtò̤ ma̤pûhǐ he dǒhtû̌ǐ khuha bǎ kòyò ta Cǒmara a ta̤sò̌le̤sò̌lò̤ awi̤akè̌ htě a ǒhǔ yî̤꤮ htǒo ayanu, kwisaba nṳbǎ kû̌po̤ heya nî̌꤮. 20Khrî̌stu wû̌lǎ he ta a pwa̤pwe̤ǐ ta̤wi̤ta̤kè̌ tapwa̤ dě he glè dǒhtû̌ǐ kò ta ta̤sò̌le̤sò̌lò̤ awi̤akè̌ htǒo akhû̌akhî, khònò̤htǒo he lò̤te̤ dě apo̤kû hǒ. Ta̤ htě he tobǎ dǒhtû̌ǐ bǎ kò toǒnu, ma̤pûhǐ he dǒhtû̌ǐ khuha bǎ kò ayanudě, kwisaba pû heya nî̌꤮.

Pò̌lu a ta̤hî̌mo̤hî̌wǒ gutṳ̌lò̤

21Tǔkǐkǔ mî̌ pa pṳwè̤ htě pa mo̤ǐ mè̤mè̤̌ yǎ tapwa̤, htohǒtò̤ a mî̌ pṳwè̤ htě acǒatè̤ ta Běcǎ ta̤ma̤. Ma̤pûhǐ sî sî̌ya ta he ǒmo̤ǒwǒ ya, mî̌ tò̤ ya, htohǒtò̤ he ma̤kwè̌꤮ titènu, a hè pwe̤ǐlṳbò bǎ sî pě. ^l 22Ta̤wi̤ta̤kè̌ a kòshî̌kòtṳ htě he sò̌yṳ sûhè yǎ dě sîǒ numî̌ mè̤hǒ, ma̤pûhǐ sî sî̌ya ta pa ǒmo̤ǒwǒ ya, mî̌ tò̤ ya, htohǒtò̤ ma̤pûhǐ a hè ǐshû̌ǐshohtò̌ bǎ sî sò̌phlǒ aya pwǎ.

23Pha Cǒmara ta pa Běcǎ Ye̤shǔkhrî̌stu ǐtû̌ta pṳwè̤ Khrî̌stuphû̌ toǒ a ta̤pè̤ta̤dû, ta̤mo̤ǐ nû̌û tapwa̤ ta tapwa̤, ta ta̤yṳǎ Khrî̌stu htǒotoǒ nî̌꤮. 24Cǒmara dǔlṳ bǎtû̌ abwǐasîrî ta kòyò htě a mo̤ǐ Běcǎ Ye̤shǔkhrî̌stunu toǒ ta ata̤mo̤ǐ htě agutṳjò tò̤nu nî̌꤮.