Galatians 3

Jipwi̤ gûkû̌ Yṳ̌da a ta̤sû̌ta̤tòwò, tò̤hî̌kǎlè̌ ǒhtûpwa̤ ta ta̤yṳ dě Khrî̌stu akû

1Galatǐaphû̌ htě a ǒò̌ toǒ꤮, ma̤pûhǐ sî sò̌yṳ gana̤de gûma̤kû̌ gesǒ Mǒ̤jè a ta̤sû̌ta̤tòwò htǒonu dě ûpè hè lǒǎplò̤ǎ sî pè? He dǒhtû̌ǐphlophǎhto bǎ sî ta Ye̤shǔkhrî̌stu khòsi ana̤ dě nò̌dòhtǔlo̤nu hǒ yahî̌꤮. 2Hî̌ bǎkè̌ he tǒ̤ htǒotacǎcǎ꤮ nupwǎ. Dě sî gûma̤kû̌ ta̤sû̌ta̤tòwò akhû̌akhî, sî nî̤bǎ Běcǎ sǎcahtǐ ya? Dèmè̤tò̤mî̌ sî gana̤de ta̤sò̌le̤sò̌lò̤ awi̤akè̌ dě sî yṳǎna̤ǎ akhû̌akhî, sî nî̤bǎ Běcǎ sǎcahtǐ hǐnu ya? 3Tîkî̌꤮ mî̌ sî gènè̤phlo tò̤ ma̤tè? Bǎ sî sahtò̌ yṳǎkhû̌lû̌ Khrî̌stu akhanu, sî nǎla̤ǐhto Běcǎ sǎcahtǐ hǒ pwǎ̤ta khònò̤htǒodě mî̌ sî jipwi̤ ǒhtûpwa̤ nǎla̤ǐtû̌ sîna̤ hǐnu ya? 4Sî khòjîkhòjûhto ta̤pṳ̂̌tacǎ ta ta̤sò̌le̤sò̌lò̤ awi̤akè̌ aya hǒ, pwǎ̤ta khònò̤htǒo a htû nòdû̌bò hǒya? Hî̌mè̤mè̤̌꤮ mî̌ sî khòjîkhòjû ta̤htǒo numî̌ abwǐasîrî ǒ mè̤mè̤̌ nî. 5Hǐnudě sî gûma̤kû̌ ta̤sû̌ta̤tòwò akhû̌akhî, Cǒmara ǐ sî Běcǎ sǎcahtǐ htě a ma̤ ta̤cǒklî̌kî̌ya dě sîkla hǐnu ya? Hǐnu mè̤tò̤. Sî gana̤de ta̤sò̌le̤sò̌lò̤ awi̤akè̌ dě sî yṳǎ akhû̌akhî, a ǐpwǎ sî. Sî lṳ̂ma̤kû̌ ta̤sû̌ta̤tòwò htǒo akhû̌akhînu mè̤tò̤.

6Gènè̤kè̌ lǒkhomò̌, lî̤cahtǐkû hî̌, Abraham a ta̤ǒhtûpwa̤ htǒonu, “A yṳǎ Cǒmara ta a ta̤yṳta̤nǎ akhû̌akhî, Cǒmara bè̌yǎ pwǐ kòyòcǒkòyòtè̤ tapwa̤nu hǒ.” ^a 7Ma̤hǐnudě sî to sî̌ya ta kòyò htě a yṳǎna̤ǎ Cǒmara toǒ numî̌ Abraham akhlialè mè̤mè̤̌ hǒ. ^b 8Lî̤cahtǐ pwe̤ǐnǎhtotû̌ děwǐkha, Cǒmara bè̌cǒbè̌tè̤ Yṳ̌daphû̌ mè̤tò̤ toǒnu ta asî ata̤yṳta̤nǎ akhû̌akhî pě, a pwe̤ǐnǎ hǐnu. Cǒmara ale̤ayo̤ ǐsî̌yawǐ ta̤sò̌le̤sò̌lò̤ awi̤akè̌ Abraham ǒ dě a hî̌, “Dě nakhû̌nakhî, he howi̤lò̤kû̌ tṳtṳbò khlilèphû̌ toǒ ta na pě,” ^c a hî̌ nû̌û hǐnu. 9Pwǐ Abraham yṳǎ Cǒmara dě a nî̤bǎ ta̤howi̤nu, kòyò lǒ̤꤮ bò htě a yṳǎ ta̤ toǒnu a nî̤bǎ ta̤howi̤ pwǐ anu pě.

10Pò̤̌ta kòyò htě a nǎla̤ǐ ta̤sû̌ta̤tòwò dě a glè nî̤bǎ ta̤cǒta̤tè̤ aya toǒnu, Cǒmara cèrò asî pě. Ma̤tè̤hî̌nu lî̤cahtǐkû hî̌, “Kòyò tapwa̤pwa̤ htě a ǒhtûpwa̤ gûma̤kû̌ ta̤sû̌ta̤tòwò akò pṳ̂̌tûmû tò̤ tapwa̤nu, Cǒmara cèrò a pě,” ^d a hî̌ hǐnu. 11Pa sî̌ya lîphlo ta kòyò htě a jipwi̤ gûma̤kû̌ ta̤sû̌ta̤tòwò akò toǒnu, Cǒmara bè̌cǒbè̌tè̤ asî dǐpwǎ̤꤮ tò̤. Ma̤tè̤hî̌nu lî̤cahtǐkû hî̌, “Kòyòcǒkòyòtè̤ tapwa̤ htě a nî̤bǎ ta̤htûpwa̤ numî̌ a ta̤yṳta̤nǎ akhû̌akhî pwǎ.” ^e 12Pò̤̌ta kòyò htě a nǎla̤ǐ a gûma̤bò̌ ta̤sû̌ta̤tòwò akò toǒnu, a nǎla̤ǐjò ta̤yṳ alo̤ tò̤. A yṳǎbò pwǎ a ma̤bò̌ lǒ̤꤮ bònu toǒ pwǎ. Lî̤cahtǐkû hî̌, “Kòyò tapwa̤pwa̤ dě a gûma̤ lǒ̤꤮ bò ta̤sû̌ta̤tòwò ǒ toǒnu, a htûpwa̤ mè̤mè̤̌ pě,” A hî̌ hǐnu. ^f 13Ta̤sû̌ta̤tòwò lǒ̤꤮ bò toǒnu, kò ma̤kû̌bò̌ akò dǐpwǎ̤꤮ tò̤ akhû̌akhî, Cǒmara bǎ cèròbò kò pě pṳ̂̌꤮ tapwa̤, pwǎ̤tadě Khrî̌stu htè̌ge pa hǒ. Dě a khòbǎ bǎpa ta̤cèrò dě nò̌dòhtǔlo̤ htǒo akhû̌akhî, a hènṳ khòbǎ pa ta̤cèrò dě a hèbǎ pa pě htǒonu agûla̤ hǒ. Ma̤tè̤hî̌dě lî̤cahtǐkû hî̌, “Kòyò tapwa̤pwa̤ htě kò htǎwa̤si yǎ dě nò̌dòhtǔ alo̤nu, ta̤cèrò bǎ yǎ hǒ,” a hî̌ hǐnu. ^g 14Ma̤pûhǐ Yṳ̌daphû̌ mè̤tò̤ toǒ nî̤bǎdǒ ta̤howi̤hî̌wǒnu dě, Ye̤shǔkhrî̌stu hèhtè̌gehtobò bǎ pa hǒ. Ta̤howi̤ htǒonu, alò̤ta Cǒmara olò̤kè Abraham dě꤮ wǐkha hǒ. Htohǒtò̤ Cǒmara olò̤hto ta a ǐlò̤ pa Běcǎ sǎcahtǐ pě. Ma̤pûhǐ kòyò htě a yṳǎ Ye̤shǔ toǒ glè nî̤bǎ Běcǎ sǎcahtǐ pěnu dě, Ye̤shǔ hèhtè̌gepwǎ pa.

Ta̤sû̌ta̤tòwò ta ta̤olò̤mèlò̤

15Pṳwè̤ sî꤮, he pwe̤ǐlṳ bǎ sî ta ta̤ htě kò la̤klo ma̤ǐ a lṳmṳkhǐlṳmṳlî tacǎ. Bǎ kòyò sò̌gini̤ ǎměhto nû̌ûshǎ akhanu, ûpèpè̌ bǎbǎ, a dè hè ma̤pî̌kè mè̤tò̤mî̌ a dè hè ma̤khǒkè hî̌nu, anî̤pe tò̤ hǒ. 16Hǐnuakho Cǒmara ǐlò̤ a ta̤olò̤ ta Abraham ta akhlialè akla tapwa̤ pwǎ. “Dě akhlialè toǒ,” Cǒmara hî̌ hǐnu mè̤tò̤. Amûasǎ mî̌ kòyò ǒplṳ̂ mè̤tò̤. Mî̌tanu, a hî̌, “Dě nakhlinalè aklatapwa̤,” ^h a hî̌ hǐnu khû̌khî, amûasǎ mî̌ a pwe̤ǐlṳ pwǎ tapwǎ̤pa. A sò̌yṳ hî̌ htǒonumî̌ Khrî̌stu htǒonu hǒ. 17Ta̤htě he sò̌yṳ hî̌numî̌ hî̌tè hî̌dě, Cǒmara olò̤hto ta Abraham dě nǒkò aně ǒ lǐ̤ya̤ ta sushinu, a bè̌lò̤nǒ pwǎ ta̤sû̌ta̤tòwò dě Mǒ̤jè a ǒ pwǎ. Ta̤sû̌ta̤tòwò htǒonumî̌, a ma̤phèjòkè Cǒmara a ta̤olò̤ tò̤. ⁱ 18Dě pa gûma̤kû̌ ta̤sû̌ta̤tòwò akhû̌akhî, pa nî̤bǎjò Cǒmara a ta̤howi̤ û̌cata̤bî̌ dèhî̌dě ta̤howi̤ htǒotoǒ numî̌ a hè mè̤mè̤̌ dě Cǒmara a ta̤olò̤ htǒonu a ǒ mè̤tò̤. Pwǎ̤ta Cǒmara olò̤hto ta̤howi̤ û̌cata̤bî̌ htǒonu ta Abraham akhû̌akhî, a ǐhto ta̤howi̤ û̌cata̤bî̌ htǒonu ta a hǒ. ^j

19Cǒmara cû̌ǐlò̤tǒ̤ pa ta̤sû̌ta̤tòwò ma̤tè? Kòyò ma̤ta̤sǔ akhû̌akhî, a ǐlò̤pwǎ pa. Ta̤sû̌ta̤tòwò htǒonu, a ǒměǒgle yî̤ to̤htû̌ Abraham akhlialè hèto̤nu. Abraham akhlialè htě Cǒmara olò̤kènu tapwa̤ mî̌ Ye̤shǔkhrî̌stu htǒonuhǒ. Cǒmara ǐlò̤ ta̤sû̌ta̤tòwò htǒo dě mǒkhû̌tanaphû̌ a cǔdekû. Dě mǒkhû̌tanaphû̌ ǐlò̤ tṳtṳ Mǒ̤jè dě Mǒ̤jè ǐlò̤ tṳtṳ nû̌û kòyò a ǒ. Mǒ̤jè mî̌ pwa̤ma̤ta̤ aplǎkû tapwa̤ pwǎ. 20Pwa̤ma̤ta̤ aplǎkû tapwa̤mî̌ a ǒhtu cî̌htè̌cî̌khobò. Cǒmara ǐlò̤ a ta̤olò̤ dě Abraham a ǒnu, a lo̤bǎ ta pwa̤ma̤ta̤ aplǎkû dǐpwǎ̤꤮ tò̤. Cǒmara olò̤tû̌ tapwǎ̤ pa.

Ta̤sû̌ta̤tòwò a ta̤yè̤lò̤nǎ

21Ma̤hǐnudě ta̤sû̌ta̤tòwò htǒonu a ma̤tukutakǎshǔ Cǒmara a ta̤olò̤ htǒotoǒnu ya? A ma̤tukutakǎshǔ dǐcǎ꤮ tò̤. Ma̤tè̤hî̌dě ta̤sû̌ta̤tòwò htǒo, a dè ǐǒhtò̌jò pa ta̤ǒhtûpwa̤ asa dèhî̌dě Cǒmara bè̌cǒbè̌tè̤ pa ta pa gû jûle̤phî̌yo̤kû̌ ta̤sû̌ta̤tòwò htǒotoǒ akò pwǎ. 22Pò̤̌ta lî̤cahtǐkû hî̌, hǎkhû̌ htǒoteběbònu, a ǒbò dě ta̤sǔta̤plě a ta̤pǒala̤ pwǎ. Hǐnu akhû̌akhî, Cǒmara a ta̤howi̤ htǒonu a olò̤ ta pa dè yṳǎ Ye̤shǔ mî̌ a ǐpwǎ pa pě. Ta̤htûpwa̤ tûjûpwa̤ htǒonu a ǐtû̌pwǎ kòyò htě a yṳǎ Ye̤shǔkhrî̌stunu toǒ pwǎ.

23Bǎ ta̤yṳta̤nǎ htǒo hèto̤ hǒtò̤ akhanu, ta̤sû̌ta̤tòwò dǒǐ sadape pa sǒsǒta kòyò ǒ dě apo̤kûnu toǒ hǒ. Pa ǒ sada bǎ a po̤kûnu to̤htû̌ Cǒmara dǔlṳhtò̌ ta̤yṳta̤nǎ taplǎpanu pě. 24Hǐnu akhû̌akhî, ta̤sû̌ta̤tòwò htǒonu asǒsǒta pwa̤ǒpo̤ǐ pa tapwa̤nu hǒ. Htodě ma̤pûhǐ Cǒmara bè̌cǒbè̌tè̤ pa ta pa ta̤yṳ Khrî̌stu akhû̌akhînu dě, ta̤sû̌ta̤tòwò htǒonu a sûcû̌ pa dě Khrî̌stu a ǒ hǒ. 25Khònò̤dě pa bè̌ pa ta̤yṳta̤nǎ dě Ye̤shǔkhrî̌stu akû akhû̌akhî, ta̤mǎlò̤ htǒonu a ǒpo̤ǐpe pa tò̤, htohǒtò̤ a yṳ̂klè̌nè̌klòpe pa tò̤ hǒ.

26Ta̤yṳta̤nǎ akhû̌akhî, sî lǒ̤꤮ bò htûbò kû̌ta Khrî̌stu tacǎnǔ꤮ pa dě sî htûbò Cǒmara aphû̌ali̤ toǒ hǒ. 27Ma̤tè̤hî̌dě kòyò htě a plo ana̤ ta shi toǒnu, a htûhtò̌ kû̌ta Khrî̌stu tacǎnǔ꤮ pa toǒ numî̌ a kûhtò̌sǒhtò̌ Khrî̌stu sǒsǒta a kûsǒhtò̌ hǐdopo̤to̤ asanu toǒ hǒ. 28Yṳ̌daphû̌ ta khlilèphû̌hǔwa̤ Greekphû̌ toǒ, jûphû̌ ta pwa̤ nî̤bǎ ta̤pelesesǎphû̌ toǒ, makhû ta mamǔ, ta̤ lǒ̤꤮ bò htǒotoǒ numî̌ akhǒ nû̌û tò̤, ma̤tè̤hî̌dě sî lǒ̤꤮ bò htǒotoǒ numî̌ sî htûhtò̌bò kû̌ta Khrî̌stu tacǎnǔ꤮ pa hǒ. 29Sî dè htû Khrî̌stu ata hî̌dě sî htû Abraham akhlialè toǒhǒ. Dě sî nî̤bǎ ta̤howi̤ toǒ htě Cǒmara olò̤kè Abrahamnu toǒ pě. ^k