Galatians 4

1Ta̤ htě he sò̌yṳ hî̌ dû̌htò̌po̤ numî̌ hî̌tèhî̌dě, hî̌kè̌mò̌, phû̌makhû tapwa̤ dě a tobǎ nî̤bǎ apha û̌cata̤bî̌ pwǎ̤ta bǎ a phijaû̌pe akhanu, a mî̌ asǒsǒ pepwǎ ta jû tapwa̤nu pwǎ. Pò̤̌ta a mî̌ kòyò tapwa̤ dě a tobǎ nî̤bǎbò mè̤mè̤̌ û̌cata̤bî̌ lǒ̤꤮ bò htǒonu pě tapwa̤ hǒ. 2Phû̌makhû htǒotapwa̤ numî̌ a tobǎ ǒpo̤ sadato̤pe dě kò bǔǐ kè̌ǐkhwè̌ǐdû̌ nû̌û ta kò yṳ̂klè̌nè̌klò nû̌û ala̤, dě a tobǎ ǒpo̤ to̤htû̌ khîkhato khîkhabǎ dě apha tîwî̌tòwò ǐlò̤ nû̌û htǒonu pě. 3Pa htǒotoǒ numî̌ asǒsǒta hǐnuhǒ. Bǎ Khrî̌stu hè hǒtò̤ akhanu, pa htû hǎkhû̌ a ta̤mǎlò̤ ta a la̤bò̌la̤klo toǒ ajû. 4Pwǎ̤ta bǎ khîkhato khîkhabǎ hèto̤hǒ akhanu, Cǒmara nohèlò̤ aphû̌khû dě a hè ǒlò̤ kû̌ta mamǔ tapwa̤ a ǒ, dě a hè ǒlò̤ Yṳ̌da a ta̤sû̌ta̤tòwò ala̤. 5Ma̤tè̤hî̌dě, ma̤pûhǐ a hè htè̌ge kòyò ǒhtûpwa̤ dě ta̤sû̌ta̤tòwò ala̤nu toǒ, htohǒtò̤ ma̤pûhǐ pa htûhtò̌ Cǒmara aphû̌ali̤ toǒ ayanu a nohèpwǎ aphû̌khû. ^a 6Sî htû Cǒmara aphû̌ali̤ toǒ akhû̌akhî, dě pa sò̌phlǒkû htǒonu, Cǒmara shû̌nṳ aphû̌khû a sǎcahtǐ dě a yi̤kǒhtò̌ ta, “Abǎ, pha” hǐnu mî̌ a nî̤ htǒonu hǒ. 7Ma̤hǐnudě na mî̌ jû tapwa̤ mè̤petò̤. Na htû ta phû̌khû tapwa̤ hǒ. Na htû Cǒmara aphû̌ tapwa̤ akhû̌akhî, khònò̤htǒo û̌cata̤bî̌ lǒ̤꤮ bò htě na to nî̤bǎ toǒnu, Cǒmara ǐbò nû̌ûta na pě.

Pò̌lu sò̌phlǒ gugè ta Galatǐaphû̌ sîtoǒ aya

8Khîkha htě a tûlû̌hto toǒnu, sî sî̌ya Cǒmara tò̤ akhû̌akhî, sî htû jû dě Cǒmara mè̤tò̤ toǒ ala̤ hǒ. 9Pò̤̌ta khònò̤htǒo sî sî̌ya Cǒmara hǒ. He hî̌ mè̤mè̤̌ sî ta Cǒmara sî̌ya sî hǒ. Ma̤tè̤hî̌dě sî sò̌yṳ tikhlǐ gesǒ pa hǎkhû̌ a ta̤mǎlò̤ toǒ ta ala̤bò̌la̤klo toǒ htě a khû̌ǎyû̌lò̤ abwǐasîrî ǒtò̤ htǒotoǒ ala̤nu ma̤tè? Mî̌ sî sò̌yṳ htûhtò̌ gesǒ asî ajû ya? 10Ma̤tè̤dě sî cû̌ jipwi̤ lṳ̂ma̤mo̤tǒ̤ Cǒmara asò̌phlǒ ta sî bè̌dû̌ khǒtû̌ mṳni̤toǒ, něla toǒ ta khîkha toǒ ma̤tè? 11Dě sî ma̤hǐnu akhû̌akhî, he sò̌phlǒgu sò̌phlǒgè mè̤mè̤̌ sîya. Pěmî̌ ta̤ma̤ lǒ̤꤮ bò htě he ma̤hto bǎ sîyanu toǒ, htûhtò̌ nòdû̌bò tû̌ pě.

12Pṳwè̤ sî꤮, he kwigwèbǎǐ sî ta sî glè kè̌mò̌mṳ gûma̤kû̌ pwǐ he ma̤ htǒonu, ma̤tè̤hî̌dě he htûhtò̌ Yṳ̌daphû̌ mè̤tò̤ htě asǒsǒta sî dě a htûpe ta̤mǎlò̤ ajû tò̤ tapwa̤nu hǒ. Dě awǐanǒ numî̌ sî ma̤sǔnǒ he dǐcǎ꤮ tò̤. 13Bǎ he ǒplǒ ta sî dě he dǒhtû̌ǐ bǎ sî ta ta̤sò̌le̤sò̌lò̤ awi̤akè̌ awǐgutṳ̌ taplǎnumî̌ he shǐshanu sî sî̌yabò tû̌ hǒ. 14He na̤klû a ta̤shǐta̤sha htǒo a htûhtò̌ mè̤mè̤̌ ta̤pò̤ta̤sha ta sîya pò̤̌ta sî sò̌khěkhû̌khwènǒ ta he dǐkhò̌꤮ tò̤. Sî tǐ̤ kaǎshǔwǒ tapǎ̤꤮ pe he lò̤kèta he htû Cǒmara a tanaphû̌ tapwa̤nu hǒ. Htohǒtò̤ sî kaǎshǔ he htǒonu, alò̤ta sî kaǎshǔ Ye̤shǔkhrî̌stu sana̤nu hǒ. 15Sî sò̌le̤hto hǒ, pwǎ̤ta khònò̤htǒo sî cû̌ma̤ sîna̤ hî̌tè? He hî̌mè̤mè̤̌꤮ sî, dě awǐkha numî̌ sî mo̤ǐ he pwî̌꤮ tènu sî dè cîwîhtò̌jò sî mi̤sǎphlǒ hî̌numî̌ cîwîhtò̌ yǎ dě sî glè ǐkè yǎta he kǎlè. 16Pwǎ̤ta khònò̤htǒo dě he pwe̤ǐ bǎ sî ta̤te̤ta̤mǎ akhû̌akhî, mî̌ he cû̌ htûhtò̌tò̤ sî la̤sò̌khěkhû̌khwè he ya?

17Kòyò htě a sò̌yṳ gûma̤kû̌ Yṳ̌daphû̌ a ta̤mǎlò̤ toǒnu asî sò̌yṳ nogûkû̌ mè̤mè̤̌ sî pwǎ̤ta ta̤htǒonumî̌ awǒtò̤. Ma̤pûhǐ sî sò̌phlǒ cû̌nṳ dě asî aklanu, asî sò̌yṳ ma̤ htò̌pò̌htò̌shîkè he ta sî pwǎ. 18Sî dè sò̌phlǒsho sò̌yṳ ma̤ mè̤mè̤̌ ta̤wǒ hî̌numî̌ awǒ hǒ. Jipwi̤ ma̤ lǒkho pṳ̂̌꤮ taplǎ nî̌꤮. Jipwi̤ ma̤pû pwǎpǒ̤ bǎ he ǒplǒ ta sî akhanu ma̤ nî̌꤮. 19Hephû̌ he mo̤ǐ sî꤮, he sò̌phlǒsho mè̤mè̤̌ ta sî glè dû̌pwa̤sî̌yahtò̌ sû̌sò̌ tokho sǒsǒta Khrî̌stunu hǒ. He ta̤sò̌phlǒsho htǒonu, a ǐguǐgè mè̤mè̤̌ he sò̌phlǒ hǒ. He sò̌phlǒ a ta̤guta̤gè htǒonu, a sǒsǒta mo̤ htě a glè phû̌ǒ dě aphusha htǒonu hǒ. 20Khònò̤dě he sò̌yṳ ǒplǒ ta sî dě he sò̌yṳ hî̌bǎbî̌hî̌bǎyṳ hèkhlo heyo̤ ma̤tè̤hî̌dě he gènè̤ǐphlope sî tò̤ hǒ.

Haga ta Shǎra awi̤akè̌

21Sî htě a sò̌yṳ nohtûhtò̌ ta̤sû̌ta̤tòwò htǒonu ta sîsana̤ toǒ sî꤮, ta̤sû̌ta̤tòwò hî̌ hî̌tènumî̌ sî gana̤denǒ kû̌kò tò̤ ya? Pwe̤ǐ bǎkè̌ he. 22Lî̤cahtǐkû hî̌, Abraham phû̌makhû ǒ sò̌gini̤. ^b Tapwa̤ mî̌ jûmo̤ phû̌jaǐ yǎ, dě ahǔwa̤tapwa̤ mî̌ jûmo̤ mè̤tò̤ tapwa̤ phû̌jaǐ yǎ. ^c 23Jûmo̤ htǒotapwa̤nu aphû̌ǒ pwǐ kòyòhǎkhû̌phû̌ ala̤klo ǒnu. Pwǎ̤ta jûmo̤ mè̤tò̤ htǒotapwa̤nu, Cǒmara olò̤nǎhto Abraham akhû̌akhî, aphû̌ǒpwǎ pwǐ Cǒmara olò̤nǎhto yǎnu.

24Mamǔ htǒosò̌gini̤nu a dǔlṳ khěkhǒ bǎ kò la̤sî̌yaphlohè aya pwǎ, ma̤tè̤hî̌dě mamǔ htǒo sò̌gini̤nu a dǔlṳhtò̌ Cǒmara a ta̤olò̤ ginǐ̤cǎ. Ta̤olò̤ ta ta̤mǎlò̤ htǒonumî̌ Cǒmara ǐlò̤ yǎta Mǒ̤jè dě Sǐnǎkholokhû̌. Htǒonumî̌ a dǔlṳ khěkhǒ pwǎ jûmo̤ Haga pwǎ. Ta̤olò̤ htǒonu, aphû̌ǒ kòyò htě a htû ta̤mǎlò̤ ajûnu toǒ hǒ. 25Hǐnuhǒ, Haga htǒonu alò̤ta Sǐnǎkholo dě Arebǐaga bǎ Cǒmara ǐlò̤ kò ta̤mǎlò̤ kholonutama hǒ. Haga ta aphû̌ toǒnu a htû jû lò̤ta Ye̤rǔshèlèphû̌ htě a htû ta̤mǎlò̤ ajûnu toǒ hǒ. 26Pò̤̌ta jûmo̤ mè̤tò̤ Shǎra htǒonumî̌ alò̤ta Ye̤rǔshèlèwî̤ dě mǒkhû̌ akhû̌akhî, aphû̌ toǒnu a htû jû tò̤. A mî̌ pamo̤ hǒ. 27Ma̤tè̤hî̌dě lî̤cahtǐ hî̌ hè̌o,

“Mamǔ shodophû̌꤮ htě a khòbǎnǒ kû̌kò phû̌ǒphusha dǐplǎ꤮ tò̤ tapwa̤, sò̌le̤ dě yi̤kǒ sò̌le̤sò̌lò̤ mò̌. Ma̤tè̤hî̌dě mamǔ shodophû̌ htě awṳ̂ bè̌kè yǎ htǒotapwa̤ phû̌ǒplṳ̂khlo ta mamǔ htě awṳ̂ ǒnu toǒ pě.” ^d

28Pṳwè̤ sî꤮, khònò̤htǒo sî sǒsǒta Isǎkonu hǒ. A htǒonu a ǒphijaû̌lò̤ ta Cǒmara a ta̤olò̤. Cǒmara a ta̤olò̤ akhû̌akhî, a bè̌ sî pwǐ Abraham aphû̌mǔphû̌khû toǒnu hǒ. 29Bǎnukha phû̌makhû htě a ǒphijaû̌lò̤ pwǐ kòyòhǎkhû̌phû̌ ala̤klo ǒ htǒotapwa̤nu, a ma̤jîma̤jû phû̌makhû htě a ǒlò̤ ta Běcǎ sǎcahtǐ a ta̤po̤ta̤phǎ shû̌sho htǒonu tapwa̤. Khònò̤dě, a htûhtò̌ kû̌dǒ ana̤ hǐnu hǒ. ^e 30Pwǎ̤ta lî̤cahtǐkû hî̌, “Wṳ̂hǎhtò̌kè jûmo̤ ta a phû̌khûnu, ma̤tè̤hî̌dě jûmo̤ aphû̌khû glè nî̤bǎ kû̌dǒ phû̌û̌cahtǒo ta jûmo̤ mè̤tò̤ htǒo aphû̌khû numî̌ anî̤ tò̤.” ^f 31Ma̤hǐnudě pṳwè̤ sî꤮, pa mî̌ jûmo̤nu tapwa̤ aphû̌ mè̤tò̤. Pa mî̌ jûmo̤ mè̤tò̤nu tapwa̤ aphû̌ toǒ hǒ.