Galatians 5

Ta̤ǒpele dě Ye̤shǔkhrî̌stu akû

1Ma̤pûhǐ pa nî̤bǎ ta̤ǒpele htǒo ayanu, Ye̤shǔkhrî̌stu ma̤lû̌htò̌ge pa dě pa htû ta̤mǎlò̤ ajû htǒo ala̤ hǒ. Hǐnudě ǒměǒgle lǒkho dě htû̌tèplè̌pe pûma̤ jû htǒonu ma̤ nî̌꤮.

2Gana̤delè̌ he mî̌ Pò̌lu htǒo glè hî̌ sî, sî dè gûma̤kû̌ ta̤dǔtṳphě hî̌numî̌, Khrî̌stu khòsi sîyanu, a htûbwǐhtûsîrî bǎ sîya dǐcǎ꤮ tò̤. 3He ǐsè̌rè̌ gesǒ sî ta kòyò tapwa̤pwa̤ dě a dè jû ta̤dǔtṳphě htǒonu a tobǎ lṳ̂kû̌bò ta̤sû̌ta̤tòwò pṳ̂̌꤮ tûmû. 4Dě sîkla toǒǒnu, a gènè̤sǔ lǒkho ta asî dè gûma̤kû̌ ta̤sû̌ta̤tòwò hî̌numî̌ Cǒmara bè̌cǒbè̌tè̤ nû̌û pě, hǐnu. Sî dè gènè̤ lǒkho hǐnu hî̌dě sî bǒsû̌khǎkhope sîna̤ ta Khrî̌stu tò̤ hǒ. Sî htěpa̤ tephekè sîna̤ ta Cǒmara abwǐasîrî htǒonuhǒ. 5Pwǎ̤ta Běcǎ sǎcahtǐ akhû̌akhî, pa yṳǎǐ pana̤ ta Cǒmara glè bè̌cǒbè̌tè̤ pa, ma̤tè̤hî̌dě pa yṳǎ Ye̤shǔkhrî̌stu. Pa ǒpo̤kè̌shuǐ mè̤mè̤̌ ta̤htǒonu hǒ. 6Ma̤tè̤hî̌dě bǎ sî htûhtò̌ kû̌ta Ye̤shǔkhrî̌stu tacǎnǔ꤮ pa akhanu, ta̤dǔtṳphě bǎbǎ, ta̤dǔtṳphě tò̤ bǎbǎ, a htûbwǐhtûsîrî dǐcǎ꤮ tò̤. Ta̤ htě a htûbwǐhtûsîrî khlokò numî̌, ta̤yṳta̤nǎ htě a dǔlṳ ta̤mo̤ǐ Cǒmara ta kòhǔwa̤ htǒonu pwǎ.

7Sî khlè̌ wǒdǎhtohǒ pwǎ̤ta mî̌ûpè tapwa̤ noǒkǔ sî dě sî glè gana̤de ma̤ ta̤te̤ta̤mǎ ma̤ htǒonu pè? 8Cǒmara htě a kaǎ sî htǒotapwa̤ numî̌, a noǒkǔ nǒ sî tò̤. 9“Ta̤bû tîkî̌phû̌ pwǎnu a ma̤ tophǒhtò̌ dû̌jò mû̌ tabǒbò.” ^a 10Pwǎ̤ta pa htûhtò̌ kû̌ta Běcǎ tacǎnǔ꤮ pa akhû̌akhî, he yṳǎ ta sî ta̤kè̌shǐ htǒonumî̌ a nûcû̌khǒ ta he tò̤. Ûpè bǎbǎ a ma̤dǐdò sî tapwa̤pwa̤nu, Cǒmara cèròtû̌ yǎ pě. 11Pṳwè̤ sî꤮, he glè dǒhtû̌ǐ bǎ sî ta Yṳ̌daphû̌ ala̤klo dǔtṳphě numî̌ ta̤ htě a lo̤bǎdû̌ mè̤tò̤. Ye̤shǔ akhû̌akhî, Yṳ̌daphû̌ toǒ ma̤jîma̤jû tû̌pwǎ he. He dè dǒhtû̌ǐ sî ta sî bǎ dǔtṳphě dèhî̌mò̌nu, Yṳ̌daphû̌ toǒ sò̌phlǒmo̤ lòtṳ̌ pwǎ. Pwǎ̤tadě he dǒhtû̌ǐ hǐnutò̤. He dǒhtû̌ǐpwǎ ta Khrî̌stu a nò̌dòhtǔ htě Yṳ̌daphû̌ toǒ sò̌phlǒmo̤ yǎtò̤ htǒo awi̤akè̌ pwǎ. 12Kòyò htě a ma̤jî ma̤shû̌shǎ sî sò̌phlǒ ta ta̤dǔtṳphě awi̤akè̌ toǒnu, he sò̌yṳ noshǔkèbòpo̤ a dǐnu.

13He pṳwè̤ sî꤮, ma̤pûhǐ sî nî̤bǎ ta̤pelesesǎ ayanudě, Cǒmara kaǎ sî hǒ. Pò̤̌ta sî nî̤bǎ ta̤ǒpelehtǒo akhû̌akhî, nopǒǐ pûma̤ sîna̤ ta sî sǐshiphěyî̌ a ta̤sò̌yṳnu toǒ ma̤ nî̌꤮. Mî̌tanu, sî to mo̤ǐ kè̌khînû̌û tapwa̤ ta tapwa̤, sî to ma̤jè kè̌khînû̌û tapwa̤ ta tapwa̤. 14Ma̤tè̤hî̌dě ta̤sû̌ta̤tòwò lǒ̤꤮ bò toǒnu dè bè̌plǒdǒbò yǎta ta̤mǎlò̤ tûmûpa hî̌mò̌nu, a glè hî̌ ta, “Mo̤ǐ kòyò htě a ǒphǔ ta nanu toǒ pwǐ na mo̤ǐlò̤tû̌ nana̤nu nî̌,” a hî̌ pwǎ hǐnu. ^b 15Pwǎ̤tadě sî dè jî sîna̤ pwǐ ta̤mi̤ta̤mò̤ dě sî dè ǎ kè̌khînû̌û tapwa̤ ta tapwa̤ hî̌numî̌ ǒsè̌rè̌ lǒkho sîna̤ nî̌꤮, ma̤tè̤hî̌dě pěmî̌ sî ma̤pî̌ma̤lṳ̂bòsǒ sîna̤ tapwa̤ ta tapwa̤ hè̌.

Ǒhtûpwa̤ ta Běcǎ sǎcahtǐ

16Hǐnudě he hî̌ sî, ǒhtûpwa̤ lǒkho pwǐ Běcǎ sǎcahtǐ yṳ̂klè̌nè̌klò sînu nî̌꤮. Sî dè ma̤hǐnu htodě sî gûma̤kû̌pe sî sǐshiphěyî̌ a ta̤sò̌yṳ tò̤ hǒ. 17Ma̤tè̤hî̌dě sǐshiphěyî̌ a ta̤sò̌yṳ htǒonumî̌, a khlè̌cû̌ khǒkè ta Běcǎ sǎcahtǐ a ta̤sò̌yṳ. Dě Běcǎ sǎcahtǐ a ta̤sò̌yṳ htǒonu a khlè̌cû̌ khǒkèsǒ ta na̤klûphěyî̌ a ta̤sò̌yṳ. Ta̤htǒo ginǐ̤cǎnu a kla nû̌û tò̤ akhû̌akhî, pwǐ sî sò̌yṳ ma̤nu sî ma̤jòpe tò̤ hǒ. ^c 18Běcǎ sǎcahtǐ dè sû sî hî̌dě, sî ǒpe dě ta̤sû̌ta̤tòwò ala̤ tò̤ hǒ.

19Sǐshiphěyî̌ ata̤ma̤nu toǒmî̌ a ǒlṳlîphlo hî̌tè hî̌numî̌ a cû̌sǔnṳ mamǔmakhû, a ǒhtûpwa̤ phû̌mò̤, asò̌phlǒ putupatǎ, 20A saba lǒkho pwa̤yo̤pwa̤gî, a ma̤ lǒkho khînǎkhîno ta̤ma̤ toǒ, a sò̌khěkhû̌khwè nû̌û, a htè̌còwò kè̌khînû̌û, sò̌khě kè̌khînû̌û, sò̌phlǒdû̌ nû̌û, sò̌yṳ mi̤ lṳshilṳga, sò̌phlǒto kè̌khînû̌û tò̤, sò̌khěkhû̌khwè Khrî̌stuphû̌ aprṳ̂aho ahǔwa̤ toǒ. 21Ma̤ǎ kòkhû̌, ta̤ǎmṳopǒ, ma̤pwè dě a lòkhǔlòlo ta ta̤ma̤ ahǔwa̤ htě asǒsǒta htǒotoǒ. Pwǐ he ǐsè̌rè̌hto sî dě awǐkhanu hǒ, he ǐsè̌rè̌po̤sǒ sî khònò̤htǒo. Kòyò htě a ǒhtûpwa̤ hǐnu toǒnu, a nî̤bǎ kû̌kò Cǒmara shila̤gakû a ta̤howi̤homò̤ tò̤.

22Pwatadě Běcǎ sǎcahtǐ numî̌ a bè̌ǒhtò̌ ta̤mo̤ǐ, ta̤sò̌le̤sò̌lò̤, ta̤pè̤ta̤dû, ta̤khòsò̌do, ta̤sò̌yṳgwèbǎǐ, ta̤wî̤ta̤wǒ, ta̤jûle̤phî̌yo̤, 23Ta̤sò̌dohobî̌ ta ta̤khòǐpè̤ sò̌phlǒ sî toǒnu hǒ. Sî dè ma̤hè̌o hî̌numî̌, asǔ ta̤sû̌ta̤tòwò hî̌nǒ hǐnu dǐmû̌꤮ tò̤. 24Kòyò htě a htû Ye̤shǔkhrî̌stu ata toǒ numî̌ a sǐshiphěyî̌ a ta̤sò̌yṳ pǒǐpe nû̌û tò̤ hǒ. A htǎwa̤sikè a sǐshiphěyî̌ a ta̤sò̌yṳ lǒ̤꤮ bò dě nò̌dòhtǔ alo̤ hǒ. 25Pa ǒhtûpwa̤ ta Běcǎ sǎcahtǐ akhû̌akhî, pa bǎ gûma̤ pwǐ Běcǎ sǎcahtǐ yṳ̂klè̌nè̌klò panu. 26Pa bǎ phî̌dû̌ pana̤ tò̤. Ma̤sò̌phlǒdû̌ pûma̤ nû̌û tapwa̤ ta tapwa̤ ma̤. Sò̌khě kè̌khî pûma̤ nû̌û tapwa̤ ta tapwa̤ ma̤ nî̌꤮.