Gal 6 | KxfSCKRC | STEP | Pṳwè̤ sî꤮, sî dè kè̌shǐ kòyò tapwa̤pwa̤ htě a ma̤sǔ ta̤ tukǔkǔ hî̌nu, sî htě a ǒhtûpwa̤ pwǐ Běcǎ sǎcahtǐ yṳ̂klè̌nè̌klò ǐ sî htǒo toǒnu, sî lo̤bǎ cû̌ sû̌ǐtòwòǐ gesǒ yǎ. Sî bǎ ma̤lè sò̌dohobî̌ yǎ htodě ma̤pûhǐ sî gûcû̌kû̌ pû dě ta̤htû̌sǒbǎ aphû̌mò̤ akû tò̤nu, ǒsè̌rè̌ lǒkho sîna̤ nî̌꤮.

Galatians 6

Bǐò̌ plǒnû̌û tapwa̤ ta tapwa̤ a ta̤bǐta̤ò̌

1 Pṳwè̤ sî꤮, sî dè kè̌shǐ kòyò tapwa̤pwa̤ htě a ma̤sǔ ta̤ tukǔkǔ hî̌nu, sî htě a ǒhtûpwa̤ pwǐ Běcǎ sǎcahtǐ yṳ̂klè̌nè̌klò ǐ sî htǒo toǒnu, sî lo̤bǎ cû̌ sû̌ǐtòwòǐ gesǒ yǎ. Sî bǎ ma̤lè sò̌dohobî̌ yǎ htodě ma̤pûhǐ sî gûcû̌kû̌ pû dě ta̤htû̌sǒbǎ aphû̌mò̤ akû tò̤nu, ǒsè̌rè̌ lǒkho sîna̤ nî̌꤮. 2 Bǐò̌ plǒnû̌û tapwa̤ ta tapwa̤ a ta̤bǐta̤ò̌ toǒ nî̌꤮. Sî dè ma̤hǐnu hî̌numî̌ sî ma̤ pwǐ Ye̤shǔkhrî̌stu ta̤sû̌ta̤tòwònu hǒ. 3 Kòyò tapwa̤pwa̤ dě a hî̌ ana̤ ta, he mî̌ kòyò htě kò lo̤bǎdû̌khlo yǎ tapwa̤ a hî̌ pwǎ̤tadě a dè mè̤ hǐnu tò̤ hî̌mò̌mî̌ a lòholò̤tû̌pwǎ ana̤. 4 Kòyò pṳ̂̌꤮ tapwa̤ to gwèlò̤tû̌ ana̤. Dě a tobǎ ta̤trè ana̤ ta kòyò ahǔwa̤ toǒ tò̤. Ta̤ma̤ htě a ma̤hto toǒnu, a dè wǒ hî̌dě a ta̤ma̤htǒo akhû̌akhî, a dè sò̌le̤sò̌lò̤ mî̌ anî̤ pwǎ. 5 Ma̤tè̤hî̌dě kòyò pṳ̂̌꤮ tapwa̤ bǎbǐbǎò̌tû̌ a ta̤phî̌ta̤ma̤ toǒ.

6 Kòyò htě a sû̌ǐtòwòǐ sî ta Cǒmara ale̤ayo̤ toǒ numî̌, sî tobǎ ǐ asî ta̤wî̤ta̤wǒ pṳ̂̌tacǎ.

7 Lòholò̤ pûma̤ sîna̤ ma̤ nî̌꤮. Gènè̤ pûma̤ ta na glè ma̤tûdû ma̤bǐbò̌jò dě Cǒmara a lo̤mo̤ ma̤ nî̌꤮. Na lǔlò̤ ta̤khli hî̌tènu, na kǎbǎ gesǒtû̌ pě. 8 Ma̤tè̤hî̌dě kòyò htě a lǔlò̤ sǐshiphěyî̌ a ta̤sò̌yṳ toǒnu, a kǎbǎ gesǒtû̌ ta̤pî̌ta̤lṳ̂nu toǒ pě. Pwǎ̤tadě kòyò htě a lǔlò̤ gûma̤kû̌ pwǐ Běcǎ sǎcahtǐ a ta̤yṳ̂klè̌nè̌klò nû̌û toǒnu, a kǎbǎ gesǒtû̌ yolahtûpwa̤ tûjûpwa̤ pě. 9 Ma̤ta̤wǒnu sò̌phlǒpî̌ lǒkho pûma̤ nî̌꤮. Pa dè sò̌phlǒpî̌mò̌ tò̤nu, htû̌꤮ khîkha bǎ pěnu, pa kǎbǎ gesǒtû̌ ta̤sǎta̤pho pě. 10 Hǐnu akhû̌akhî bò̌khòtè꤮ bǎbǎ, bǎ pa nî̤bǎ akhîakha wǒ akhanu, pa bǎ ma̤wǒ bǎ kò pṳ̂̌꤮ tapwa̤. Pwǎ̤ta sî ma̤ta̤wǒnu kè̌dû̌shǐ khǒtû̌ pwa̤yṳǎphû̌nu toǒ nî̌꤮.

Ta̤ǐsè̌rè̌sè̌so ta ta̤hî̌mo̤hî̌wǒ gutṳ̌lò̤

11 Khònò̤htǒo, kè̌ lǒkho mò̌! lî̤phlǒdû̌ htǒotoǒ numî̌ he khwè̌tû̌pwǎ ta hena̤.

12 Kòyò htě a noshû̌ sî ta bǎ dǔtṳphěnu toǒmî̌ a sò̌yṳ nohtû̌sò̌ǐpwǎ kò ta ana̤. Ma̤tè̤hî̌dě kòyònu toǒmî̌ a dè dǒhtû̌ǐ pwǎpǒ̤ Khrî̌stu ata̤si dě nò̌dòhtǔlo̤ pwǎ dèhî̌dě a ǐsha ta kò ma̤jîma̤jû yǎnu. 13 Asî htě a dǔtṳ phěnu toǒ dě a jûle̤phî̌yo̤ kû̌kò ta̤sû̌ta̤tòwò tò̤. Pò̤̌ta ma̤pûhǐ asî bè̌htò̌yî̤ lǒkho asò̌phlǒ ta sî dǔtṳ bǎ yǎ phě htǒo akònu dě, asî sò̌yṳ nodǔtṳ tû̌pwǎ sîphě. 14 He dè hî̌bǎhtò̌yî̤tû̌ pwǐ asînu dèhî̌dě, he hî̌bǎhtò̌yî̤pwǎ ta he dǒhtû̌ǐ pa Běcǎ Ye̤shǔkhrî̌stu a nò̌dòhtǔ awi̤akè̌ htǒonu pwǎ. Ye̤shǔ si dě nò̌dòhtǔlo̤ akhû̌akhî, ta̤pṳ̂̌꤮ tacǎ htě a tǒhtu ta hǎkhû̌ htǒotoǒnu, a sikèbò heya. Hǐnuakho, he dě he sikèbò bǎ ta̤htě a tǒhtu ta hǎkhû̌ htǒotoǒ hǒhǒ. ^{▼▼Amûasǎ mî̌ a sò̌yṳ hî̌ hǐnu: Ye̤shǔ si dě nò̌dòhtǔlo̤ akhû̌akhî, ta̤ htě hǎkhû̌phû̌ sò̌yṳbò toǒnu, he bè̌dû̌pe yǎ dǐcǎ꤮ tò̤ hǒ. Dě hǎkhû̌phû̌ ahǔwa̤ toǒnu, a gènè̤dû̌pe he dǐpwǎ̤꤮ tò̤ hǒ.} 15 Kòyò dǔtṳphě toǒ bǎbǎ, a dǔtṳ kû̌kò tò̤ toǒ bǎbǎ a lo̤bǎdû̌ nǒ dǐcǎ꤮ tò̤. Ta̤htě a lo̤bǎdû̌shǐ numî̌ htûhtò̌ Cǒmara akòyò htǒonu pwǎ. 16 Cǒmara a ta̤pè̤ta̤dû ta a ta̤sò̌yṳgwèbǎǐ ǒkû̌ tû̌ta kòyò htě a jûle̤phî̌yo̤ ta̤mǎlò̤ htǒonu toǒ alo̤ ta Cǒmara akòyò mè̤mè̤̌ tû̌nu toǒ alo̤ nî̌꤮.

17 Khònò̤ tǒ̤hènu, noma̤shû̌shǎpe pûma̤ he sò̌phlǒ ta kò dǐpwǎ̤꤮ ma̤ nî̌꤮, ma̤tè̤hî̌dě ta̤acè htě a ǒ dě hena̤lo̤ htǒotoǒ numî̌, a dǔlṳ mè̤mè̤̌ ta he mî̌ Ye̤shǔkhrî̌stu ajû tapwa̤ hǒ.

18 Pṳwè̤ sî꤮, Běcǎ Ye̤shǔkhrî̌stu shû̌nṳtû̌ abwǐasîrî dě sî lǒ̤꤮ bò a sò̌phlǒkû nî̌꤮. Amè̤.