Genesis 12
Cǒmara tûjûpwa̤ kaǎcû̌ Abra dě Khana̤ga
1Cǒmara tûjûpwa̤ hî̌ Abra, “Bè̌kè nashinaga, nakhlinalè ta napha ahǐphû̌phòphû̌toǒ dě hǎhtò̌cû̌ mò̌ shiga htě he dǔlṳ na pěnu taga nî̌꤮. a 2He nohtûhtò̌ na ta khlilèphû̌dû̌ tacǎ꤮ pě dě he howi̤homò̤ na pě, he nolṳshilṳga nami̤ pě dě na htû bǎ kòya ta ta̤howi̤ tacǎ pě. 3He howi̤ kòyò htě a howi̤ nanu toǒ pě. He ǐsho kòyò htě a ǐsho nanu toǒ pě. Htodě kòyò lǒ̤꤮ bò ǒ hǎkhû̌ htǒotoǒnu, he howi̤homò̤ tṳtṳ asî ta na pě.” b 4Dě Abra hǎhtò̌cû̌ mè̤mè̤̌ pwǐ꤮ Cǒmara tûjûpwa̤ hî̌ nû̌ûnu, dě aphû̌dû̌ Lò̌tǎ gûcû̌kû̌ nû̌û. Bǎ Abra ǒ Harawî̤ dě a hǎhtò̌cû̌ akhanu, aněǒ susǒtishi ta yè̤̌ně hǒ. 5Abra kaǎnṳ ama Sharè̌, aphû̌dû̌ Lò̌tǎ, htodě a phî̌nṳbò awûyî̌htaglo ta ata̤phû̌ta̤li̤ ta jû htě a nî̤bǎ bǎ Harawî̤kûnu toǒ, dě asî hǎhtò̌cû̌ lǒkho Khana̤ga, dě a cû̌to̤ lǒkho bǎnu. 6Abra ta akòyò toǒ nṳcû̌tûlû̌kè Khana̤ga dě a cû̌to̤ lǒkho Shekewî̤, sǒmṳdû̌ ǒ dě Mǒrèga nutosǒ aǒ. Bǎnukha Khana̤ khlilèphû̌ toǒ ǒlǒkho bǎ gakûnu. 7Bǎnukha Cǒmara tûjûpwa̤ ǒlṳhtò̌ bǎ Abra dě a hî̌ nû̌û, “Ga htǒotaga, he ǐ yǎta naphû̌nali̤ pě,” htodě Abra tèhtò̌ bǎ Cǒmara tûjûpwa̤ ta a ǒlṳhtò̌ bǎ nû̌ûnu tapwa̤ aya ta̤lṳhtò̌wa̤ ta lo̤ ta̤wa̤. c 8Htodě a cû̌lè̌ cǔmû Betelǎwî̤ mṳhtò̌ kholokla nutokho dě a cû̌ma̤ lǒkho ahǐphû̌ bǎ Betelǎwî̤ ta Aǐwî̤ aplǎkûnu. Betelǎwî̤ mî̌ a ǒ mṳlò̤, Aǐwî̤ mî̌ a ǒ mṳhtò̌ tokho. Dě a tèhtò̌ bǎ Cǒmara tûjûpwa̤ aya ta̤lṳhtò̌wa̤ ta lo̤ bǎnu ta̤wa̤ dě a sabahtò̌ Cǒmara tûjûpwa̤ bǎnu. 9Dě anǒnu a khlè̌cû̌ǒ tò̤glò hto tò̤glò, dě a cû̌ǒ to̤ Khana̤ga cǔmû tokho.Abra cû̌ǒ dě Egyptga
10Bǎnuakha něga dě gawi̤gako ǒhtò̌shû̌ mè̤mè̤̌ Khana̤gakû akhû̌akhî, Abra khlè̌lò̤ cû̌ǒkǔ Egyptga teděsǎphû̌. 11Bǎ asî glè̌ nṳto̤phǔ Egypt gakukû akhanu, a hî̌ ama Sharè̌, “Na mî̌ mamǔ htě a mo̤wî̤ mè̤mè̤̌ tapwa̤. 12Htû̌꤮ Egyptphû̌ toǒ kè̌shǐ na akha pěnu, asî glè hî̌ lǒkho, ‘Hǐnumî̌ ama hǒ.’ Dě asî ma̤sikè he pě, dě a bè̌htûpwa̤kè na pě. 13Khòsò̌do hî̌ nana̤ ta na mî̌ hepṳmamǔnu nî̌꤮, na dè hî̌ hǐnu pěmî̌ asî ma̤mo̤ma̤wǒshǔ he pě, nakhû̌nakhî dě asî bè̌htûpwa̤ he pěpě.” d 14Htodě bǎ asî cû̌nṳ Egyptgakû akhanu, Egyptphû̌ toǒ kè̌shǐ Sharè̌ ta a mo̤wî̤ mè̤mè̤̌. 15Dě Egyptgakhwǐ apwa̤ma̤ta̤ toǒ kè̌shǐ Sharè̌ dě a hè htû̌sò̌ǐ nû̌û awi̤akè̌ ta Khwǐ, Khwǐ sò̌yṳ nû̌û ta ama dě a nocû̌ kaǎhè nû̌û ahokû. 16Dě Sharè̌ akhû̌akhî, Khwǐ dǒshuǐ wǒ꤮ mè̤mè̤̌ Abra, htohǒtò̤ a ǐplṳ̂ mè̤mè̤̌ nû̌û sophû̌ ta pè̤, pṳ̂pa̤na̤, mòû̌lǎpha, mòû̌lǎmo̤, jûmakhû, jûmamǔ ta tîsî̌budû̌ toǒ. 17Dě Khwǐ phî̌ Sharè̌ akhû̌akhî, Cǒmara tûjûpwa̤ nolò̤ ta̤shasila̤ htě aterěsò̌ mè̤mè̤̌ toǒ dě Khwǐ ta ashiphû̌gaphû̌ toǒ alo̤. 18Hǐnuakhû̌akhî, Khwǐ kaǎhè Abra dě a hî̌ nû̌û, “Na cû̌ ma̤tǒ̤ he pwǐhè̌o mî̌ ma̤tè? A mî̌ hema, na hî̌ he hǐnu tò̤ ma̤tè? 19Na cû̌hî̌ tǒ̤ he ta ‘A mî̌ hepṳmamǔ pwǎ,’ dě na cû̌nophî̌ tǒ̤ he ta a ma̤tè? Htǒolè nama, kaǎgekè mò̌ yǎdě hǎhtò̌cû̌kè lǒkho.” 20Htǒotaplǎ dě Khwǐ hî̌lò̤ akhophijaû̌ toǒ dě asî kaǎnṳ Abra ta ama htodě a noto̤nṳbò ata̤dû̌yò̤htò̌sa ata̤kî̌ta̤kû̌ lǒ̤bò toǒ dě a sûhǎhtò̌kè asî.
Copyright information for
KxfSCKRC